3 Nifae 8–10

O Le Siufofoga o le Faaola i le Pouliuli

aiga ma se teineitiiti tauaso o loo lagonaina le la mo le taimi muamua talu mai aso e tolu o le pogisa ina ua mavae le faasatauroga o Iesu Keriso

I le atu Amerika, o le tele o le faatafunaga ma le pogisa na faailogaina ai le faasatauroga o le Faaola. I se taimi i aso e tolu o le mafiafia o le pogisa, sa fetalai atu ai Iesu Keriso i tagata. O taimi ua mavae ma taimi nei, o mala faalenatura, mafatiaga, ma tofotofoga e mafai ona avea ma avanoa e aoao ai ma liliu atu ia Iesu Keriso. O lenei lesona o le a faailoa ai uiga o Iesu Keriso e mafai ona fesoasoani ia te oe e lagona ai le alofa sili atu mo Ia ma faalagolago ai ia te Ia.

O se afā tele

asiosio o loo agai atu i le fanua

afā o uila

o timuga afā ma matagi ua taia ai se taulaga

Mafaufau i taimi na e oo ai i matagi matautia po o mala faalenatura e pei o mafuie, afā, po o asiosio. E faape’ī nei aafiaga?

Ina ua faasatauroina Iesu Keriso i Ierusalema, o se afā ma se mafuie matautia i le atu Amerika na mafua ai le faatafunaga tele. O nei mea na tutupu na faataunuuina ai valoaga a Samuelu le sa Lamanā e uiga i faailoga o le maliu o le Faaola (tagai Helamana 14:20–27).

Ina ia aoao e uiga i auiliiliga o nei mea faataumaoi na tutupu, faitau le 3 Nifae 8:5–22. E mafai foi ona e matamata i le vitiō, “Jesus Christ Appears in the Ancient Americas,” mai le faailo taimi 0:00–3:19. O loo maua lenei vitiō i le ChurchofJesusChrist.org.

• Faamata o a ni ou mafaufauga po o ni lagona pe ana e oo i nei mea?

I tausaga e tau atu i lenei faatafunaga, o le toatele o sa Nifaē na liliuese mai le Alii ma tutuliese perofeta na auina atu e le Atua e talai atu ia i latou (tagai 3 Nifae 7:7–8, 14, 21).

Faitau le 3 Nifae 8:23–25, ma vaavaai pe na faapefea ona tali atu tagata na faasaoina ina ua uma ona oo i nei mea faataumaoi na tutupu.

• O le a faapefea ona e faamatalaina o latou lagona?

Upumoni e uiga ia Iesu Keriso

A o faanoanoa tagata i le pogisa, sa latou faalogoina le siufofoga o Iesu Keriso o fetalai atu ia i latou. Sa ia ta’ua igoa o le tele o aai ma faamalamalama atu o nā aai ma tagata na faaumatia ona o lo latou amioleaga. Ona Ia aoaoina lea o tagata i le tele o upumoni taua e uiga ia te Ia lava.

Ina ia fesoasoani e faatulaga nei upumoni, fatu se ulutala i lau api faamaumau mo suesuega e faaautuina: Aoao e uiga ia Iesu Keriso i le 3 Nifae. Atonu e te manao e faaleoleo ni itulau se tele i lau api faamaumau mo suesuega ina ia mafai ona e faaopoopoa i ai upumoni i lenei lisi i le taimi o lau suesuega o galuega a le Faaola i sa Nifaē i nai vaiaso o lumanai.

Faitau le 3 Nifae 9:13–22 ma le 10:4–12, ma vaavaai mo mea na aoao atu e Iesu Keriso i nei tagata e uiga ia te Ia lava. Tusi upumoni nei i lalo o le ulutala i lau api faamaumau mo suesuega.

1. Lisi ni upumoni na e aoaoina e uiga ia Iesu Keriso i lau suesuega o le 3 Nifae 9–10. Ona tali lea ia lē itiiti ifo ma le lua o fesili nei:

• O le a se mea na aoao mai e le Faaola e uiga ia te Ia lava lea sa sili ona taua ia te oe? Aisea?

• E mafai faapefea e upumoni ua e aoaoina e uiga ia Iesu Keriso ona aafia ai lou alofa ma le faalagolago ia te Ia?

• O a ni tulaga na e i ai, pe atonu o e i ai, lea o le a taua ai le manatuaina o se tasi pe sili atu o nei upumoni?

Tuu i le faitalia: O e Manao e Aoao Atili?

Faamata o le a faamagalo moni a’u e Iesu Keriso pe a ou faia ni mea sesē tetelē?

Sa faamamafa mai e Peresitene Boyd K.Packer (1924–2015) o le Korama a Aposetolo e Toasefululua:

Peresitene Boyd K. Packer

E oo mai ni tusi ia i latou na faia ni measese matuia. Latou te fesili mai: “Pe mafai ea ona faamagaloina a’u?”

O le tali o le ioe!

Ua aoaoina i tatou e le talalelei e mafai ona maua le mapusaga mai mafatiaga ma ta’usalaga e ala i le salamo. E leai se amio, leai se tuinanau, leai se fouvalega, leai se solitulafono, leai se agasala e le aofia ai i le folafolaga o le faamagaloga atoatoa, vagana ai ni nai tagata toaitiiti o e ua filifili le malaia ina ua uma ona maua se malamalama atoatoa. (Boyd K. Packer, “O Le Taeao Pupula o le Faamagaloga,” Ensign, Nov. 1995, 19)

Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

E lē popole tele lava le Atua po o fea sa e i ai ae popole o Ia po o fea o loo e i ai ma, faatasi ai ma Lana fesoasoani, o fea le mea o e naunau e te alu i ai. (Jeffrey R. Holland, “The Best Is Yet to Be,” [Brigham Young University devotional, Jan. 13, 2009], 27, speeches.byu.edu)

3 Nifae 9:20. O le a le uiga o le i ai o se loto momomo ma se agaga salamo?

Na aoao mai e Ezra Taft Benson (1899–1994) le mea lenei e faatatau i se loto momomo ma se agaga salamo:

Peresitene Ezra Taft Benson

O le salamo moni e aofia ai le liua o le loto a e lē na o le suia o amioga (tagai Alema 5:13). O se vaega o lenei suiga tele o le loto o le lagonaina lea o le tiga faaleatua mo a tatou agasala. O le uiga lenei o se loto momomo ma se agaga salamo. Ua lava meaalofa a le Atua e fesoasoani ai ia i tatou e faatoilalo agasala ma vaivaiga uma pe afai tatou te liliu atu ia te Ia mo se fesoasoani. O le tele o le salamo e lē aofia ai ni suiga maoae pe iloga, ae o lea laasaga ma lea laasaga, o se gaoioiga tumau ma faifai pea agai atu i le amioatua. (Aoaoga a Ezra Taft Benson [1988], 71.)

Na faamalamalama mai e Elder Bruce D. Porter (1952–2016) o le Fitugafulu:

Elder Bruce D. Porter

O le gauai atoatoa atu o le Faaola i le Tama Faavavau, o le uiga tonu lea o se loto momomo ma se agaga salamo. O faataitaiga a Keriso ua aoao mai ai ia i tatou o le loto momomo o se uiga e faavavau o le tulaga faaleatua. A momomo o tatou loto tatou te nofouta lelei i le Agaga o le Atua ma iloa lo tatou faalagolago ia te Ia, i mea uma ua tatou maua ma o tatou tagata uma. O le taulaga e oo mai i lenei tulaga, o se taulaga o le faamaualuga i ona tulaga uma. E pei o le omea e mamanu gofie i lima o se faiipu atamai, e mafai ona galueaiina ma faaleleia se tagata loto momomo i aao o le Matai. …

… O i latou ua i ai se loto momomo ma se agaga salamo e naunau e fai soo se mea ma mea uma e fetalai mai ai le Atua ia i latou, e aunoa ma le tetee pe lē fiafia. E tuu lo tatou faia o mea i a tatou lava ala ae aoao e faia i le ala a le Atua. (Bruce D. Porter, “O Se Loto Momomo ma se Agaga Salamo,” Ensign po o le Liahona, Nov. 2007, 32)