Siviʻi Hono 7 Hoʻo Akó

ʻAlamā 53–3 Nīfai 7

talavou ʻoku fakalaulauloto lolotonga ʻene ako e folofolá

ʻE lava ke tokoni hoʻo fakakaukau mo vakaiʻi hoʻo ako fakalaumālié ke ke ofi ange ai ki he Fakamoʻuí. ʻE lava ke tokoniʻi koe ʻe he lēsoni ko ʻení ke ke manatu mo vakaiʻi ʻa e founga kuo tokoniʻi ai koe ʻe hoʻo ngaahi aʻusia ʻi he ʻAlamā 53–3 Nīfai 7 ke ke tupulaki fakalaumālié.

Ko e mahuʻinga ʻo e manatú

Naʻe akoʻi ʻe Palesiteni Sipenisā W. Kimipolo ko e foʻi lea mahuʻinga taha ʻi he tikisinalé ko e manatú. (Vakai, “Circles of Exaltation” [address to Church Educational System religious educators, June 28, 1968], 5.)

• ʻOkú ke pehē ko e hā naʻe lea ʻaki ai ʻe Palesiteni Kimipolo ʻa e meʻa naʻá ne lea ʻaki fekauʻaki mo e foʻi lea manatú?

• Ko e hā ha ngaahi lēsoni naʻá ke ako mei he ʻAlamā 53–3 Nīfai 7 ʻe mahuʻinga kiate koe ke ke manatu ki ai? Ko e hā hono ʻuhingá?

Mahalo te ke manatu naʻe poupouʻi ʻe Hilamani hono ongo foha ko Nīfai mo Līhaí ke na manatu ki ha ngaahi lēsoni mo ha kakai mahuʻinga (vakai, Hilamani 5:4–14). ʻI he founga tatau, ʻoku fakataumuʻa ʻa e lēsoni ko ʻení ke tokoniʻi koe ke ke manatu ki he ngaahi moʻoni kuó ke akó mo e ngaahi tukupā kuó ke fai ʻi he ngaahi uike kimui ní.

Fakamatalaʻi ʻa e fatongia ʻo e kau palōfitá

Fakakaukauloto ʻokú ke ongoʻi ʻoku ueʻi koe ke fakaafeʻi hao kaungāmeʻa ke mo mamata ʻi he konifelenisi lahí. ʻI hoʻo teuteu ʻi he faʻa lotu ke ngāueʻi ʻa e ueʻi ko ʻení, ʻokú ke fili ke fakamatalaʻi ki ho kaungāmeʻá ʻa e palōfitá pea mo e ʻuhinga ʻokú ke fiefia ai ke fanongo kiate iá. ʻOkú ke manatu kuó ke ako kau ki ha kau palōfita maʻongoʻonga ʻi he Tohi ʻa Molomoná ʻe lava ʻo tokoni atu ke ke fakamatalaʻi ʻa e fatongia ʻo ha palōfita ki ho kaungāmeʻá.

lotu ʻa Nīfai ʻi he taua ʻi heʻene ngoué

Samuela ko e Tangata Leimana ʻi he Funga ʻAá

Fili ʻa e fakamatala ʻo Nīfaí (Hilamani 7–11) pe ko Samuela ko e tangata Leimaná (Hilamani 13–15). Toe vakaiʻi hona talanoá ʻi he ngaahi vahe ʻoku lave ki aí ʻaki hono vakaiʻi vave e ngaahi vēsí mo e ngaahi ʻuluʻi fakamatala ʻo e ngaahi vahé pe ha ngaahi meʻa naʻá ke hiki ʻi hoʻo tohinoa akó.

fakaʻilonga, lekooti

1. Tali e ongo fehuʻi ko ʻení:

• Te ke fakaʻaongaʻi fēfē ʻa e talanoa ko ʻení ke fakamatalaʻi ʻaki ʻa e fatongia ʻo e kau palōfitá ki ho kaungāmeʻá?

• Ko e hā ha ngaahi veesi mei he folofolá te ke ala fakakau ko ha konga hoʻo fakamatalá?

• Ko e hā ha ngaahi moʻoni kehe pe ngaahi aʻusia fakafoʻituitui te ke lava ʻo vahevahe ke tokoni ke mahino ki ho kaungāmeʻá ʻa e mahuʻinga ʻo e kau palōfitá?

Vakaiʻi hoʻo tōʻonga fakakaukaú mo e ngaahi holí

fakatātā ʻo e siakale ʻo e loto-hīkisiá

ʻI hoʻo sio ki he fakatātā ko ʻení, mahalo te ke manatu ai ki ha fakamoʻoni ki he siakale ʻo e hīkisiá ʻi he kotoa ʻo e Hilamani 1–16 mo e 3 Nīfai 1–7. Te ke lava foki ʻo fakatokangaʻi ha ngaahi sīpinga kuó ke mamata ai ʻi hoʻo moʻuí pe ʻi he māmani ʻokú ke ʻi aí.

ʻI hoʻo ako ʻa e Hilamani 11–12, mahalo naʻá ke vakaiʻi ai hoʻo ngaahi feinga ke loto-fakatōkilaló. Mahalo naʻá ke hiki foki ha tukupā ʻi hoʻo tohinoa akó ke fakatupulaki ʻi he loto-fakatōkilaló pea ikunaʻi ʻa e loto-hīkisiá. Toe vakaiʻi ʻa e meʻa naʻá ke tohí pea fakakaukau ki he founga kuó ke fakahoko ʻaki e tukupā ko iá. Fakalaulauloto ki he ngaahi fehuʻi ko ʻení pea lekooti hoʻo ngaahi talí ʻi hoʻo tohinoa akó.

• Ko e hā kuó ke fai ʻi he ngaahi uike kimui ní ke manatuʻi ʻa e ʻEikí mo e meʻa kotoa kuó Ne fai maʻaú? ʻOkú ke ongoʻi fēfē kuo tokoniʻi koe ʻe hoʻo manatuʻi ʻa e ʻEikí ke ke kei loto-fakatōkilaló?

• ʻOku ʻi ai nai ha ngaahi liliu ʻokú ke fie fakahoko ke tokoniʻi koe ke ke manatu ki he ʻEikí ʻi he ʻaho kotoa pē mo tupulaki ʻi he loto-fakatōkilalo?

Fakakaukau ki he ngaahi palani ke langa ho fakavaʻé ʻia Sīsū Kalaisí

ʻI he ngaahi lēsoni kimuí ni maí, naʻá ke ako ai ha ngaahi fakamatala lahi ʻo ha niʻihi fakafoʻituitui naʻa nau ikunaʻi ʻa e ngaahi faingataʻa ʻi heʻenau moʻuí, tui fakalotú, mo e ngaahi fakamoʻoni kia Sīsū Kalaisí. Lolotonga hoʻo akó, mahalo kuó ke fai ha ngaahi tukupā ke tokoni ke ke langa ha fakavaʻe mālohi ange ʻia Sīsū Kalaisi ke matuʻuaki e ngaahi ʻohofi ʻa Sētané.

Fakaʻaongaʻi ha ngaahi miniti siʻi ke toe vakaiʻi ha taha ʻo e ngaahi fakamatala ko ʻení pe ha ngaahi fakamatala lahi ange:

Lehonitai mo ʻAmalekaia

Lehonitai mo ʻAmalekaia (ʻAlamā 47:10–18)

kolo kuo ʻaaʻi ʻaki ha kolotau

Langa kolotau ʻa e ʻeikitau ko Molonaí (ʻAlamā 50:1–6)

fale ʻi ha fakavaʻe

Faleʻi ʻa Hilamani ki hono ongo fohá (Hilamani 5:12)

• Ko e hā ha ngaahi lēsoni te tau lava ʻo ako mei he ngaahi fakamatala ko ʻení ʻe lava ʻo tokoni ke tau matuʻuaki ʻa e ʻahiʻahí?

Fakakaukau ki he ngaahi taumuʻa naʻá ke toki fokotuʻu ke langa ho fakavaʻé ʻia Sīsū Kalaisí.

2. Tali ʻa e ngaahi fehuʻi ko ‘ení:

• Ko e hā ha ngaahi tāpuaki kuó ke aʻusia ʻi hoʻo feinga ke langa hoʻo fakavaʻé ʻia Sīsū Kalaisí?

• Ko e hā ha ngaahi faingataʻa kuó ke mamata ai ʻi hono langa ha fakavaʻe mālohí? Kuó ke feinga fēfē ke ikunaʻi kinautolú?

• Kuo tāpuekina fēfē koe ʻi hoʻo feinga ke langa ho fakavaʻé ʻia Sīsū Kalaisí? Ko e hā ha liliu kuó ne fai maʻau?

Toe lau ʻa e Hilamani 5:12, pea fakakaukau ʻi he faʻa lotu pe ʻoku ʻi ai ha meʻa ʻoku totonu ke ke kamata, taʻofi, pe hokohoko atu hono fakahokó ke langa ha fakavaʻe mālohi ange ʻia Sīsū Kalaisí. Kapau ʻokú ke ongoʻi ʻoku fiemaʻu ke ke liliu ha faʻahinga taumuʻa pē kuó ke fokotuʻu, te ke lava ʻo hiki ia ʻi hoʻo tohinoa akó pe ʻi ha feituʻu kehe te ke lava maʻu pē ʻo fakakaukau ki ai.