“Hilamani 8: ʻOku fakamoʻoni ‘a e kau palōfitá kia Sīsū Kalaisi,” Tohi ʻa Molomoná - Tohi Lēsoni ʻa e Tokotaha Akó (2024)
“Hilamani 8,” Tohi ʻa Molomoná - Tohi Lēsoni ʻa e Tokotaha Akó
Hilamani 8
ʻOku fakamoʻoni ʻa e kau palōfitá kia Sīsū Kalaisi
ʻI ha māmani ʻoku lahi ai ha ngaahi leʻo ʻoku nau fusi kitautolu ki ha ngaahi tafaʻaki kehekehe, kuo tuku mai ai ʻe he ʻOtuá ha kau palōfita ke nau fakamaʻu kitautolu kiate Ia. ʻI he taimi naʻe fakafehuʻi ai ʻa Nīfai ʻe he kau Nīfai faiangahalá fekauʻaki mo e ʻuhinga kuó ne lea fefeka ai kau kiate kinautolú, naʻá ne fakamoʻoni mālohi ki he Fakamoʻuí. ʻE lava ke tokoni ʻa e lēsoni ko ʻení ke mahino kiate koe ʻoku fakamoʻoni ʻa e kau palōfitá kia Sīsū Kalaisi, pea ʻe lava ke tokoni ia ke ke ongoʻi ʻa e moʻoni ʻo ʻenau ngaahi fakamoʻoní.
Ko e fakamoʻoni ʻa ha tokotaha fakamoʻoni
Fakakaukau ki ha taimi naʻá ke fanongo ai ki ha meʻa naʻe faingataʻa ke ke tui ki ai. Hangē ko ʻení, mahalo naʻá ke fanongo ʻi ha taha ʻokú ne aʻusia ha meʻa naʻe ngali taʻemalava pe fakamoʻui ʻi he mana ʻi he mālohi ʻo e lakanga fakataulaʻeikí. Ko e hā naʻe fāifai peá ke tui aí? ʻE liliu fēfē hoʻo tuí ʻi haʻo fanongo ki he meʻá ni mei ha fakamoʻoni?
Ko e tokolahi taha ʻo e kakaí ʻoku teʻeki ke nau mamata kia Sīsū Kalaisi, ka ʻoku kei tui pē ha tokolahi kiate Ia.
-
Ko e hā ha ngaahi ʻuhinga ʻoku tui ai ʻa e kakaí kia Sīsū Kalaisí?
-
Ko e hā ʻa e fatongia ʻo e kau palōfitá ʻi hono tokoniʻi koe ke ke tui ki he Fakamoʻuí?
Ko e fakamoʻoni ʻa e kau palōfita ʻo e kuonga muʻá
Mahalo te ke manatuʻi naʻe kikite ʻa e palōfita ko Nīfaí ki he kau Nīfai faiangahalá ʻe fakaʻauha kinautolu kapau he ʻikai ke nau fakatomala (vakai, Hilamani 7:22–29). Naʻe kamata ke ʻita ʻa e tokolahi ʻo e kau Nīfaí kia Nīfai ʻi heʻene lea ʻo fakafepakiʻi ʻenau faiangahalá (vakai, Hilamani 8:1–7). Naʻe valokiʻi ʻe Nīfai ʻa e kakaí ni mo talaange kiate kinautolu naʻe ʻikai ngata pē ʻi heʻenau fakaʻikaiʻi ʻene ngaahi leá ka ko e ngaahi lea ʻa e kau palōfita ʻo e kuohilí, kau ai ʻa Mōsese, ʻa ia naʻá ne fakamoʻoni kia Sīsū Kalaisí (vakai, Hilamani 8:10–13).
Lau ʻa e Hilamani 8:13–23, ʻo kumi ʻa e meʻa naʻe vahevahe ʻe Nīfai fekauʻaki mo Mōsese mo e kau palōfita kehe ʻo e kuohilí. Mahalo te ke fie fakaʻilongaʻi ʻa e ngaahi hingoa ʻo e kau palōfita naʻe lave ki ai ʻa Nīfaí.
-
Ko e hā naʻe faitatau ai ʻa e kau palōfita kotoa ko ʻení?
Ko e moʻoni ʻe taha te tau lava ʻo ako mei he ngaahi veesi ko ʻení, ʻoku fakamoʻoni ʻa e kau palōfitá kia Sīsū Kalaisi.
Naʻe pehē ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá:
Ko e fatongia mahuʻinga taha ʻo e palōfita ʻa e ʻEikí ke akoʻi kiate kitautolu ʻa e Fakamoʻuí pea tataki kitautolu kiate Ia. …
ʻOku ʻikai vaetuʻua ʻe ha palōfita ho vā mo e Fakamoʻuí. Ka, ʻokú ne tuʻu ʻi hotau tafaʻakí ʻo fakahonohino mai ʻa e hala ki he Fakamoʻuí. Ko e fatongia maʻongoʻonga taha mo e meʻaʻofa mahuʻinga taha ʻa ha palōfita kiate kitautolú, ʻa ʻene fakamoʻoni ʻiloʻilopau ko Sīsū ʻa e Kalaisí. (Neil L. Andersen, “Ko e Palōfita ʻa e ʻOtuá,” Ensign pe Liahona, Mē 2018, 25, 27)
-
ʻOkú ke pehē ko e hā ʻoku hoko ai ʻa e fakamoʻoni ʻa ha palōfita kia Sīsū Kalaisí ko ʻene meʻaʻofa maʻongoʻonga taha ia kiate kitautolú?
Ngaahi sīpinga ʻo e fakamoʻoni ʻa e kau palōfitá kia Sīsū Kalaisí
Tuku ha taimi ke ako ai ha niʻihi ʻo e ngaahi fakamoʻoni ʻa e kau palōfitá kia Sīsū Kalaisí. ʻI hoʻo ako ʻenau ngaahi fakamoʻoní, ʻe lava ke fakamoʻoni ʻa e Laumālie Māʻoniʻoní ki hono moʻoni ʻo ʻenau ngaahi leá ki ho lotó mo e ʻatamaí.
-
Fakakakato ha taha ʻo e ngaahi ʻekitivitī ko ʻení:
Fili A: Naʻe fakamoʻoni ʻa e kau palōfita ʻo e kuonga muʻá kia Sīsū Kalaisi
Lau ha ngaahi fakamoʻoni ʻe tolu pe lahi ange mei he kau palōfita ko ʻeni naʻe lea ki ai ʻa Nīfaí. Hiki ha lisi ʻo e ngaahi meʻa ʻoku akoʻi atu ʻe he ngaahi fakamoʻoni ko ʻení fekauʻaki mo Sīsū Kalaisí.
-
Mōsese: ʻEkesōtosi 15:2; Teutalōnome 18:15 (vakai foki ki he 3 Nīfai 20:23–24)
-
ʻĒpalahame: ʻĒpalahame 3:22–24; Liliu ʻe Siosefa Sāmita, Sēnesi 15:12 (ʻi he Ngaahi Tokoni ki he Akó)
-
ʻĪsaia: ʻĪsaia 7:14; 9:6; 53:3–5
-
Selemaia: Selemaia 33:14–16; 50:34
-
Līhai: 1 Nīfai 1:14–15; 2 Nīfai 2:6–8
-
Nīfai, foha ʻo Līhaí: 1 Nīfai 19:9–11; 2 Nīfai 25:19, 23–26
Toe vakaiʻi ʻa e lisi naʻá ke tohí. Fakakaukau ke lekooti ha faʻahinga fakakaukau, ongo, pe ngaahi ueʻi naʻá ke maʻu fekauʻaki mo e Fakamoʻuí ʻi hoʻo akó. Hiki ha ngaahi sētesi ʻo fakamatalaʻi ʻa e founga naʻe mei kehe ai hoʻo moʻuí kapau naʻe ʻikai akoʻi mai ʻe he kau palōfitá ʻa e ngaahi meʻá ni fekauʻaki mo Sīsū Kalaisi.
Kapau naʻá ke fili ʻeni, fakahū ʻa e meʻa naʻá ke hikí.
Fili E: ʻOku fakamoʻoni ʻa e kau palōfita ʻo e ngaahi ʻaho kimui ní kia Sīsū Kalaisi
Kumi ha sīpinga ʻe ua pe lahi ange ʻo e fakamoʻoni ʻa e kau palōfita pe kau ʻaposetolo ʻo e ngaahi ʻaho kimui ní kia Sīsū Kalaisí. ʻE lava ke maʻu ia mei ha konifelenisi lahi kimuí ni mai pe mei he hisitōlia ʻo e Siasí. Fakakaukau ke ke fakaʻaongaʻi ʻa e ChurchofJesusChrist.org pe ko e Gospel Library app ʻi hoʻo fekumí. Te ke lava foki ʻo lau pe fanongo ki he “Ko e Kalaisi Moʻuí: Ko e Fakamoʻoni ʻa e Kau ʻAposetoló” ʻi he ChurchofJesusChrist.org.
Kapau naʻá ke fili ʻeni, lekooti hoʻo ngaahi sīpinga ʻo hono fakamoʻoniʻi ʻe he kau palōfitá ʻa Kalaisí. Hiki ʻa e meʻa naʻá ke ako fekauʻaki mo Sīsū Kalaisí, pea fakakau ai ʻa e ongo naʻá ke maʻu ʻi hoʻo lau pe fanongo ki he ngaahi fakamoʻoni ko ʻení.