Atamai i Aoaoga Faavae: Alema 39:9

“Aua e Te Toe Alu e Tusa ma Tuinanau o Ou Mata.”

O Isapela o loo savali atu i tafatafa o Korianetona

I au suesuega o le Alema 39, sa e aoao ai e uiga i le taua o le ola ai i le tulafono o le legavia ma le auala e tetee atu ai i faaosoosoga e ala i le faalagolago ia Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Alema 39:9, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Faamatala ma tauloto

O le fasifuaitau autu o le mau o le atamai i aoaoga faavae mo le Alema 39:9 o le “Aua e te toe alu e tusa ma tuinanau o ou mata.” Faaaoga le metotia lenei, po o se isi e te filifilia, e fesoasoani ai ia te oe e tauloto le mau faasino ma le fasifuaitau autu o le mau.

mata e lua i totonu o se lio kolosi

I lau api talaaga mo suesuega po o luga o se fasipepa, tusi ai ni mata se lua i totonu o se lio kolosi i le ogatotonu o le itulau. I luga ae o lau ata tusi, tusi le Alema 39:9 ma le fasifuaitau autu o le mau, “Aua e te toe alu e tusa ma tuinanau o ou mata.” Toe tusi le mau faasino ma le fasifuaitau autu i lalo ifo o lau atatusi. Toe tusi faalua i latou, faatasi i le agavale ma le faatasi i le itu taumatau o lau atatusi. Moeiini nei ou mata ma tauloto leotele mai le mau faasino ma le fasifuaitau autu mai lou mafaufau. Afai e te manaomia nisi faataitaiga, toe fai le gaoioiga seia oo ina e taulotoina le mau faasino ma le fasifuaitau autu.

icon, record

1.  Faamaea mea nei:

   Manatu faapea o oe o se faifeautalai o loo aoaoina se tasi e uiga i le tulafono o le ola mamā mo le uluai taimi. Faamatala faapuupuu po o le a le tulafono o le ola mamā, ma faaaoga le Alema 39:9 e faamatala ai pe faapefea ona tausia.

Faataitai le faaaogaina

Toe iloilo otooto mataupu faavae o le mauaina o le malamalama faaleagaga i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Taumafai e filifili se upu taua se tasi mai mataupu faavae taitasi e tolu lea e faamanatu atu ai ia te oe le mataupu faavae ma mafai ai ona fesoasoani ia te oe e manatua vave ai. Mo se faataitaiga, e mafai ona e filifilia le upu muamua o mataupu faavae taitasi e fai ma faamanatu (faatino, suesue, saili). Pe e mafai foi ona e filifilia upu e pei o le faatuatua, faavavau, ma le punavai.

Faaaoga le tulaga faataitai lenei e fesoasoani ai ia te oe e faaaoga mataupu faavae o le mauaina o le malamalama faaleagaga.

E fiafia Ivan e faaalu se taimi i luga o ala o faasalalauga faaagafesootai. E maeleelega o ia ma e faaaogaina tulaga eseese o ala o faasalalauga faaagafesootai e faasoa atu ai ni savali lelei. Peitai, na te vaaia foi le tele o anotusi e le talafeagai ma e i ai taimi e oo lava i mea faaponokalafi. I le taimi muamua, sa faalavelave ia te ia, ae i le aluga o taimi ua faateleina pea lona toafimalie i ai. Talu ai nei lava, na ia saili atili ai i lenei ituaiga o anotusi. E le o popole o ia i le taimi nei e uiga i filifiliga o loo ia faia.

Mafaufau pe mafai faapefea e le malamalama ma le faaaogaina o mataupu faavae o le mauaina o le malamalama faaleagaga ona fesoasoani ia Ivan e iloa ai popolega i ana faatinoga o i ai nei. Atonu o le a fesoasoani fesili ma punaoa nei.

Iloilo manatu faavae ma fesili faatasi ai ma se vaaiga e faavavau

• E mafai faapefea e Ivan ona iloilo lona tulaga faatasi ai ma se vaaiga faavavau?

• E mafai faapefea e ana taumafaiga e tausia le mama o ona mafaufauga ona faia se eseesega i lona olaga atoa i le lalolagi ma i le olaga a sau?

• E mafai faapefea e ana taumafaiga ona aafia ai lana sootaga ma le Tama Faalelagi?

Saili le malamalama atili e ala i punaoa mamana ua filifilia

• O a nisi o faataitaiga o punaoa mamana ua filifilia e mafai ona fesoasoani ia Ivan? E mafai faapefea ona fesoasoani le Alema 39:9?

Mafaufau e faaaoga ni nai minute e suesue ai nisi o punaoa mamana ua filifilia, ma vaavaai mo fasifuaitau po o aoaoga e mafai ona fesoasoani ia Ivan. O nisi nei o manatu:

• Mo Le Malosi o le Autalavou: O Se Taiala i le Faia o Filifiliga (tamaitusi, 2022), “O le mea e fai i lena taimi”

• Mosaea 4:30; 3 Nifae 12:28–30; Mataupu Faavae ma Feagaiga 42:23; 121:45

• O saunoaga o le konafesi aoao e uiga i le mama mai feusuaiga, ponokalafi, po o ala o faasalalauga faaagafesootai e te maua i luga o le polokalama o le Gospel Library po o ChurchofJesusChrist.org

Faatino i le faatuatua 

• O le a se mea e mafai ona fai e Ivan e faatino ai le faatuatua ma “aua le toe alu e tusa ma tuinanau o ona mata”? (Alema 39:9).

• E ono mafai faapefea e le taumafai e liliu atu ia Keriso ona fesoasoani i ana taumafaiga?

aikona, faamaumau

2. Tali fesili nei:

   • O le a le aoaoga faavae mai le fuafuaga a le Tama Faalelagi e mafai ona fesoasoani ia Ivan ma aisea?

   • O le a sou manatu e mafai faapefea e mataupu faavae o le mauaina o le malamalama faaleagaga ona fesoasoani ia Ivan ia iloa le matautia o ana faatinoga o i ai nei?

   • O le a se mea e mafai ona ia faia e faatino ai ni suiga tumau?