“ʻAlamā 31:1–11: ‘[Ko e] Ivi ʻo e Folofola ʻa e ʻOtuá,’” Tohi ʻa Molomoná - Tohi Lēsoni ʻa e Tokotaha Akó (2024)
“ʻAlamā 31:1–11,” Tohi ʻa Molomoná - Tohi Lēsoni ʻa e Tokotaha Akó
ʻAlamā 31:1–11
“[Ko e] Ivi ʻo e Folofola ʻa e ʻOtuá”
Ko e hā ha faʻahinga meʻa te ne ala fakatupu ke ke ongoʻi mamaʻo mei he Fakamoʻuí? Ko e hā ha meʻa ʻokú ne tokoniʻi koe ke ke ongo‘i ofi ange kiate Iá? Hili e fanongo ʻa ʻAlamā kuo “tō [ʻa e kau Sōlamí] ki [ha] ngaahi hala lahi” (ʻAlamā 31:9), naʻá ne faʻu ha ngaahi palani ke fakaʻaongaʻi e mālohi ʻo e folofola ʻa e ʻOtuá ke fakaafeʻi kinautolu ke nau toe foki kia Sīsū Kalaisi. ʻE lava ke tokoniʻi koe ʻe he lēsoni ko ʻení ke ke falala ki he mālohi ʻo e folofola ʻa e ʻOtuá ke ke kei tui faivelenga ai pē kia Sīsū Kalaisi.
Ko e Hē mei he Halá
Naʻe vahevahe ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi ola ʻo ha fakatotolo fekauʻaki mo e faingataʻa ʻo e fononga hangatonú ʻi he taimi ʻoku ʻikai ke tau maʻu ai ha ngaahi fakaʻilonga paú. Neongo naʻe pehē ʻe ha niʻihi tokolahi ʻi he sivi fakatotoló ne ola lelei ʻenau fekumí, ka naʻe hā mei he ngaahi olá “ka ʻikai ha ʻū fakaʻilonga pau, ʻoku tau hē leva mei he halá” (Dieter F. Uchtdorf, “Fakafoki Fakaʻahó,” Liahona, Nōvema 2021, 77). Mahalo te ke fie mamata ʻi he foʻi vitiō “Fakafoki Fakaʻahó” mei he taimi 1:40 ki he 3:25, ʻoku maʻu ʻi he ChurchofJesusChrist.org, ʻo fakakaukau ki he founga ʻe ala fekauʻaki fakalaumālie ai ʻeni mo ʻetau moʻuí.
-
ʻE fekauʻaki fakalaumālie fēfē nai ʻeni mo kitautolú?
Te ke ako ʻi he ʻAlamā 31–35 fekauʻaki mo e kau Sōlami naʻa nau tui kimuʻa kia Sīsū Kalaisí ka kuo nau hē mei heʻenau tuí. Kimuʻa pea kamata hoʻo ako ʻi he ʻAlamā 31, fakakaukau ki he founga kuo tupulaki ai hoʻo tui kia Sīsū Kalaisí.
-
Kapau te ke nofo maʻu ʻi ho halanga lolotongá, te ke fakataumuʻa nai kia Kalaisi pe mamaʻo meiate Ia?
Ko e taumuʻa ʻa ʻAlamaá
ʻOku tau ako ʻi he ʻAlamā 31:1–11 fekauʻaki mo e kau Sōlamí pea mo e ngaahi feinga ʻa ʻAlamā ke fakaafeʻi kinautolu ke foki ki he ʻEikí. ʻE lava ke tokoni e fakatātā ko ʻení ke mahino kiate koe ʻa e founga naʻe feinga ai ʻa ʻAlamā ke fakafoki mai ʻa e kau Sōlamí.
Hiki ʻeni ki hoʻo tohinoa akó.
Lau ʻa e ʻAlamā 31:1–4, 8–11, ʻo kumi e founga mo e ʻuhinga naʻe kamata ke hē ai ʻa e kakai Sōlamí. Lekooti ʻa e meʻa ʻokú ke maʻú ʻi he konga ki he “Palopalemá.”
-
Tali e ngaahi fehuʻi ko ‘ení:
-
Ko e hā ha ngaahi founga naʻe hē ai e kau Sōlamí? Ko e hā ha ngaahi palopalema naʻe fakatupu ʻe he meʻá ni?
-
Ko e hā ha ngaahi tōʻonga tatau te ne lava ʻo fakatupu ha hē ʻa e kakaí he ʻahó ni?
Lau ʻa e ʻAlamā 31:34, ʻo kumi e taumuʻa mo e ʻamanaki ʻa ʻAlamā ki he kakai Sōlamí. Fakakaukau ke hiki ʻeni ʻi he konga ki he “Taumuʻá.”
-
ʻOkú ke pehē ko e hā ʻa e meʻa naʻá ne fakaʻaiʻai ʻa ʻAlamaá ʻi hoʻo fakakaukau ki he taumuʻa ʻa ʻAlamaá mo ʻene ngaahi ongo naʻá ke lau ʻi he ʻAlamā 31:1–2? Ko e hā ka mahuʻinga ai ʻení?
-
Lau ʻa e ʻAlamā 31:5–7, 11, ʻo fakaʻilongaʻi e ngaahi foʻi lea pe kupuʻi lea ʻoku nau fakamatalaʻi e palani ʻa ʻAlamā ke aʻusia ʻene taumuʻá. Mahalo te ke fie fakaʻilongaʻi ʻi he veesi 5 ko e foʻi lea iví ko e haʻu ia mei he foʻi lea faka-Latina ko e virtus, ʻa ia ko hono ʻuhingá ko e ivi pe mālohi (vakai, Gospel Topics, “Virtue”), pea ʻoku ʻuhinga ʻa e foʻi lea ʻahiʻahiʻi ʻi he puipuituʻa ko ʻení ke siviʻi.
-
Tali ha fehuʻi ‘e tolu pe lahi ange mei he ngaahi fehuʻi ʻe nima ko ʻení:
-
ʻOkú ke pehē ʻoku ʻuhinga ki he hā ʻa e “ʻahiʻahiʻi ʻa e ivi ʻo e folofola ʻa e ʻOtuá”? Te ke maʻu nai ʻi fē ʻa e folofola ʻa e ʻOtuá? (Fakakaukau ke lau mo fakafekauʻaki ʻa e Tokāteline mo e Ngaahi Fuakava 18:2–4, 34–36; 68:4.)
-
Ko e hā ha foʻi moʻoni te tau lava ʻo ako mei he taumuʻa mo e palani ʻa ʻAlamā ke fakahoko iá?
Ko e moʻoni ʻe taha mahalo kuó ke ʻiloʻí ʻoku maʻu ʻe he folofola ʻa e ʻOtuá ha mālohi ke tataki e kakaí kia Sīsū Kalaisi.
-
Ko e hā ʻokú ke ʻilo fekauʻaki mo e ʻOtuá ʻokú ne ʻai ʻEne folofolá ke fakaivia pe mālohi kiate koé? ʻOkú ke pehē ko e hā ʻoku mālohi ange ai ia “ʻi he heletaá, pe ko ha toe meʻa kehe”? (ʻAlamā 31:5).
-
Ko e hā ha founga ʻe lava ke tokoniʻi ai kitautolu ʻe he folofola ʻa e ʻOtuá ke vahevahe ʻa e ongoongoleleí, fakatonutonu e ngaahi fakakaukau halá, pe tataki e niʻihi kehé kia Sīsū Kalaisí?
-
Kuo tokoniʻi fēfē nai ʻe he folofola ʻa e ʻOtuá hoʻo moʻuí?
ʻI hono fakaʻaongaʻi ʻo e meʻa kuó ke ako meia ʻAlamaá mo hoʻo ngaahi fakakaukau mei he ngaahi fehuʻi kimuʻá, fakafonu ʻa e konga “Founga ke ikunaʻi ai ʻa e taumuʻá.”
-
Ko e folofola ʻa e ʻOtuá ʻi heʻeku moʻuí
Fakakaukau ki he founga ʻoku fekauʻaki ai e meʻa ʻokú ke ako meia ʻAlamā mo e kau Sōlamí mo hoʻo moʻuí.
-
Ko e hā ha ngaahi meʻa ʻokú ne fakatupunga e toʻu tupú ke nau hē meia Sīsū Kalaisí?
-
ʻE taʻofi fēfē ʻe he falala ki he folofola ʻa e ʻOtuá ʻetau hē meia Sīsū Kalaisí pe tokoni ke tau toe foki kiate Iá?
Fakakaukau ki hoʻo vā fetuʻutaki mo Sīsū Kalaisí. ʻOku ʻi ai nai ha meʻa ʻokú ne fakatupu hoʻo hē meiate Iá? ʻOkú ke fiemaʻu nai ha vā fetuʻutaki ʻoku mālohi angé mo Ia? Fokotuʻu ʻi he faʻa lotu ha taumuʻa fakataautaha ke tokoniʻi koe ke fakamālohia hoʻo vā fetuʻutaki mo Iá. ʻE lava ke felāveʻi pe tānaki atu ʻa e taumuʻa ko ʻení ki hoʻo ngaahi taumuʻa ki he Fānaú mo e Toʻu Tupú.
Faʻu ha tatau ʻe taha ʻo e fakatātā ʻo e taumuʻá ʻi hoʻo tohinoá.
Hiki hoʻo taumuʻa pē ʻaʻaú ʻi he konga ki he “Taumuʻá.”
Te ke lava foki ʻo hiki ha ngaahi fakafeʻātungia ki hoʻo taumuʻá ʻi he konga ki he “Palopalemá.”
Tohiʻi ʻi he konga “Founga ke ikunaʻi ai ʻa e taumuʻá” ʻa e founga te ke lava ai ʻo falala ki he ivi ʻo e folofola ʻa e ʻOtuá. Fakakau ai ʻa e founga ʻe tokoniʻi ai koe ʻe he meʻá ni ke ke aʻusia hoʻo taumuʻá.
ʻE lava ke tokoni ʻa e ngaahi fehuʻi ko ʻení.
-
Ko e hā ʻoku hoko ai e taumuʻa ko ʻení ko ha meʻa ʻokú ke ongoʻi ʻokú ke fiemaʻu ʻi hoʻo moʻuí? ʻE tākiekina fēfē hoʻo vā fetuʻutaki mo Sīsū Kalaisí ʻi hono aʻusia iá?
-
Ko e hā ha ngaahi ngāue pau te ke lava ʻo fai ke tokoniʻi koe ke ke falala ki he mālohi ʻi he folofola ʻa e ʻOtuá? ʻE lava fēfē ke tokoniʻi koe ʻe he meʻá ni ke ke aʻusia hoʻo taumuʻá.
-
Ko e hā ha ngaahi potufolofola pe fakamatala mei he kau taki ʻo e Siasí te ne lava ʻo fakaʻaiʻai koe ke ke ngāueʻi ʻa e taumuʻa ko ʻení?
-
ʻI hoʻo ʻosí, tohiʻi ʻa e “Naʻá ku fokotuʻu ha taumuʻa fakataautaha” ʻi hoʻo tohinoa akó. Fakakaukau ke lekooti ha faʻahinga fakakaukau pe fakaikiiki fekauʻaki mo e meʻa naʻá ke aʻusia ʻi hoʻo ako ʻa e ʻAlamā 31:1–11 ʻa ia ʻoku ʻikai fuʻu fakataautaha.