“Almà 26: ‘Hirehareha ao amin’ny Tompo isika,’” Boky torolalana ho an’ny mpampianatra ny Bokin’i Môrmôna (2024)
“Almà 26,” Boky torolalana ho an’ny mpampianatra ny Bokin’i Môrmôna
Almà 26
“Hirehareha ao amin’ny Tompo isika”
Efa nisy zavatra niainanao ve ka tsy andrinao izay hilazana azy tamin’ny olona iray? Inona no tianao ho fantatry ny olona? Mitovitovy amin’izany, nifaly tamin’ny iraka 14 taona nataon’izy ireo tany amin’ny Lamanita i Amôna sy ny rahalahiny, ary izy ireo dia te hizara ny zavatra niainan’izy ireo. Nijoro ho vavolombelon’ny hery sy fitiavan’ Andriamanitra izy ireo satria Lamanita an’arivony no nampahafantarina ny fahamarinana. Ity lesona ity dia afaka manampy anao hahatsapa fankasitrahana lalina sy fitiavana ny Tompo sy ireo fitahiana omeny eo amin’ny fiainanao.
Inona no zavatra tianao be ny manao azy?
Saintsaino ao anatina fotoana fohy ny zavatra iray mampafana fo anao na tianao be—zavatra izay raha vao manomboka miresaka momba azy ianao, dia sarotra be ny manajanona anao!
-
Nahoana no matanjaka be ny fihetseham-ponao momba azy io?
-
Inona no antenainao ho tsapan’ny hafa rehefa miresaka momba azy io ianao? Nahoana?
Rehefa niverina avy amin’ny iraka 14 taona nataon’izy ireo tamin’ny Lamanita ireo zanak’i Môzià, dia niresaka tamin’ireo rahalahiny momba ny zavatra niainan’izy ireo i Amôna. Vakio ny Almà 26:8, 16, hitadiavana ny zavatra nampafana fo an’i Amôna sy tena tiany.
Ao amin’ny Almà 26:16, i Amôna dia nampiasa ny teny hoe hirehareha, hifaly, ary hankalaza teo am-piresahana momba ny Tompo. Ny hoe manome voninahitra dia midika hoe mifaly amin’ny na manome “fiderana feno fiankohofana, haja, ary fisaorana” (Merriam-Webster.com, “Glory”; jereo ihany koa ny Torolalana ho an’ny Soratra Masina, “Voninahitra,” scriptures.ChurchofJesusChrist.org). Azonao atao ny manisy marika ireo teny ireo ao amin’ny andininy 16 sy ao amin’ny andininy hafa nohalalininao androany.
Makà fotoana fohy hisaintsainana ireto manaraka ireto:
-
Ahoana no fahatsapanao momba ny fifandraisanao amin’ny Ray any An-danitra? Nahoana?
-
Miresaka momba Azy amin’ny hafa amim-pientanentanana sy fifaliana ve ianao? Nahoana, na nahoana no tsia?
Rehefa mandalina ny Almà 26 ianao anio, dia saintsaino ny fomba ahafahan’ny ohatra nasehon’i Amôna tamin’ny fizarana ny fahatsapany momba an’ Andriamanitra manampy amin’ny fampitomboana ny fitiavanao sy fankasitrahanao ny Ray any An-danitra sy i Jesoa Kristy.
“Fitahiana lehibe toy izao”
Vakio ny Almà 26:1–4, 8–16, hitadiavana ny fomba niresahan’i Amôna momba an’ Andriamanitra sy momba ny zavatra nataony ho an’ny rahalahiny sy ny Lamanita.
-
Inona no nanan-danja indrindra taminao momba ny fomba niresahan’i Amôna momba an’ Andriamanitra?
-
Inona avy no fahamarinana hitanao ka afaka manainga ny olona iray hirehareha ao amin’ny Tompo?
Mety hilaina ny mieritreritra ny sasany amin’ny zavatra niainana izay nananan’i Amôna tamin’ny maha-misiônera azy ka nitarika azy hidera an’ Andriamanitra. Ireto sary manaraka ireto dia mety hanampy anao hahatsiaro ny zavatra nitranga.
Na dia tsy mitovy amin’ny an’i Amôna aza ny zavatra niainantsika, dia mety manana antony mitovitovy hiderana an’ Andriamanitra isika.
-
Valio ny roa amin’ireto fanontaniana manaraka ireto:
-
Eritrereto ny nanaovana anao na nahafahanao ho “[fitaovana] teo an-tànan’ Andriamanitra” (Almà 26:3) mba hitahiana ny hafa. Ahoana no mety hahafahan’ireny zavatra niainana ireny mitarika anao hidera an’ Andriamanitra?
-
Inona avy no antony hafa sasantsasany anananao hiderana an’ Andriamanitra?
-
Inona avy no fiovana mety ho tonga eo amin’ny fiainan’ny olona iray amin’ny fireharehana amin’ny zavatra nataon’ Andriamanitra ho azy?
-
“Antony lehibe loatra hifaliana”
Rehefa nahatsiaro ny fotoanany tamin’ny naha-misiônera azy sy ny fifaneraserany tamin’ Andriamanitra i Amôna, dia nirehareha sy nifaly tamin’ny maha-izy an’ Andriamanitra sy ny zavatra nataon’ Andriamanitra ho azo tanterahina teo amin’ny fiainany izy.
Aforeto telo ny taratasy iray na manaova tsanganana telo amina pejy iray ao amin’ny diary fandalinanao. Asio soratra amin’ny anankiray amin’ireto vondron’olona manaraka ireto ny tampon’ny tsanganana tsirairay:
-
I Amôna sy ireo rahalahiny (Almà 26:17–22)
-
Ny Lamanita (Almà 26:23–24, 31–34)
-
Ny zanak’ Andriamanitra rehetra (Almà 26:35–37)
Vakio ny andalan-tsoratra masina ho an’ny vondrona tsirairay ary soraty ao amin’ilay tsanganana ny zavatra nataon’ Andriamanitra ho azy ireo.
-
Inona no nanan-danja taminao momba ny zavatra nataon’ Andriamanitra ho an’ireo vondron’olona ireo? Nahoana no nahatonga ny vahoaka hirehareha ao Aminy izany?
Avadiho ilay ravin-taratasy, na manaova tsanganana vaovao telo ao amin’ny diary fandalinanao. Omeo ny iray amin’ireto lohateny manaraka ireto ny tsanganana tsirairay:
-
Ny fomba nitahian’ Andriamanitra ahy
-
Ny fomba nitahian’ Andriamanitra ireo olona tiako
-
Ny zavatra fantatro sy tsapako momba an’ Andriamanitra
Azonao atao ny mivavaka amin’ny Ray any An-danitra, ka mangataka Azy hitondra eritreritra sy fahatsiarovana ao an-tsainao. Rehefa mahatsiaro ny fomba nitahian’ Andriamanitra anao sy ny hafa ianao ary misaintsaina ny fahatsapanao Aminy, ny Fanahy Masina dia afaka manampy anao hahatsapa ny fitiavan’ Andriamanitra anao.
Raketo an-tsoratra ao amin’ny tsanganana tsirairay ny valinteninao, ary hazavao ny antony anosehan’izany anao hirehareha ao amin’ Andriamanitra.
-
Valio ireto fanontaniana manaraka ireto:
-
Ahoana no nanampian’io sahanasa io anao hahatsapa fifaliana lehibe kokoa ao amin’ Andriamanitra na fitiavana sy fankasitrahana nitombo kokoa Azy?
-
Ahoana araka ny eritreritrao no hiovan’ny fifandraisanao amin’ny Tompo raha maka fotoana hahatsiarovana sy hireharehana ao Aminy matetika kokoa ianao?
-
Rehefa misaintsaina ny zavatra nianaranao sy tsapanao androany ianao, dia azonao atao ny manao tanjona haka fotoana hahatsiarovana sy hireharehana ao amin’ Andriamanitra. Mety hahatsapa ho voatosika hizara ny eritreritrao amin’ny olona iray tahaka ny nataon’i Amôna ianao. Mitadiava lala-misokatra hizarana, ary hevero ny fomba ahafahanao manampy ilay olona hafa hahatsapa ny zavatra tsapanao tamin’ny Ray any An-danitra sy i Jesoa Kristy.