Toe Vakaiʻi Hono 11 ʻo e Fakataukei Fakatokāteliné

Ako Maʻuloto pea Mahino

tokotaha ako ʻoku hiki hono nimá ke fai ha fehuʻi

ʻE lava ke fakaafeʻi ʻe hono ako maʻuloto ʻo e ngaahi potufolofola fakataukei fakatokāteliné mo hono maʻu ha mahino ki he tokāteline ʻoku akoʻi aí, ʻa e Laumālie Māʻoniʻoní ki hoʻo moʻuí pea tokoniʻi koe ke ke hoko ʻo tatau ange mo Sīsū Kalaisí. ʻOku fakataumuʻa ʻa e lēsoni ko ʻení ke tokoni atu ke ke ako maʻuloto e ngaahi kupuʻi lea folofola mahuʻinga mei he fuofua potufolofola fakataukei fakatokāteline ʻe 12 ʻo e Tohi ʻa Molomoná pea fekumi ki ha mahino lahi ange ʻaki hano ʻeke mo tali ha ngaahi fehuʻi ʻoku ueʻi fakalaumālié.

Ako maʻuloto e ngaahi fakamoʻoni fakafolofolá mo e ngaahi kupuʻi lea mahuʻinga he folofolá

Fakaʻaongaʻi e saati ko ʻení ke toe fakamanatu ʻa e ʻuluaki potufolofola fakataukei fakatokāteline ʻe 12 ʻi he Tohi ʻa Molomoná. Fili ha kupuʻi lea fakafolofola mahuʻinga ʻe ua ki he tolu ʻoku teʻeki ke ke ako maʻuloto. Hiki ʻi ha laʻipepa pe ʻi hoʻo tohinoa akó, ʻa e potufolofolá mo e kupuʻi lea fakafolofola mahuʻingá lolotonga hoʻo puʻaki leʻolahi ʻa e ngaahi foʻi leá. Toutou fai ʻeni kae ʻoua kuó ke lava ʻo lau maʻuloto ʻa e kupuʻi leá kotoa. Hoko atu leva ki hoʻo potufolofola hokó.

ʻUluaki Potufolofola Fakataukei Fakatokāteline ʻe 12 mo e Ngaahi Kupuʻi Lea Mahuʻingá

Tohi ʻa Molomoná – Tohi Lēsoni ʻa e Faiakó (2024)

Potufolofolá	Kupuʻi Lea Fakafolofola Mahuʻingá
Potufolofolá 1 Nīfai 3:7	Kupuʻi Lea Fakafolofola Mahuʻingá “Te u ʻalu ʻo fai ʻa e ngaahi meʻa kuo fekau ʻe he ʻEikí.”
Potufolofolá 2 Nīfai 2:25	Kupuʻi Lea Fakafolofola Mahuʻingá “Naʻe hinga ʻa ʻĀtamá koeʻuhi ke ʻi ai ʻa e faʻahinga ʻo e tangatá; pea ʻoku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.”
Potufolofolá 2 Nīfai 2:27	Kupuʻi Lea Fakafolofola Mahuʻingá “ʻOku nau tauʻatāina ke fili ʻa e tauʻatāiná mo e moʻui taʻengatá … pe … pōpulá mo e maté.”
Potufolofolá 2 Nīfai 26:33	Kupuʻi Lea Fakafolofola Mahuʻingá “ʻOku tatau ʻa e kakai fulipē ʻi he ʻao ʻo e ʻOtuá.”
Potufolofolá 2 Nīfai 28:30	Kupuʻi Lea Fakafolofola Mahuʻingá ʻE foaki ʻe he ʻOtuá “ki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.”
Potufolofolá 2 Nīfai 32:3	Kupuʻi Lea Fakafolofola Mahuʻingá “Keinanga ʻi he ngaahi folofola ʻa Kalaisí; he vakai, ʻe fakahā kiate kimoutolu ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke mou faí.”
Potufolofolá 2 Nīfai 32:8–9	Kupuʻi Lea Fakafolofola Mahuʻingá “Kuo pau ke mou lotu maʻu ai pē.”
Potufolofolá Mōsaia 2:17	Kupuʻi Lea Fakafolofola Mahuʻingá “ʻO ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
Potufolofolá Mōsaia 2:41	Kupuʻi Lea Fakafolofola Mahuʻingá “[Ko] kinautolu ʻoku tauhi ʻa e ngaahi fekau ʻa e ʻOtuá … ʻoku nau monūʻia ʻi he meʻa kotoa pē.”
Potufolofolá Mōsaia 3:19	Kupuʻi Lea Fakafolofola Mahuʻingá “Liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí.”
Potufolofolá Mōsaia 4:9	Kupuʻi Lea Fakafolofola Mahuʻingá “Tui pē ki he ʻOtuá; … tui ʻokú Ne maʻu ʻa e poto kotoa.”
Potufolofolá Mōsaia 18:8–10	Kupuʻi Lea Fakafolofola Mahuʻingá Ke “papitaiso ʻa kimoutolu ʻi he huafa ʻo e ʻEikí, ko e fakamoʻoni … kuo mou fai ha fuakava mo ia.”

Ko hono ʻeke ha ngaahi fehuʻi kuo ueʻi fakalaumālié

ʻOku hoko ʻa e ngaahi fehuʻi kuo ueʻi fakalaumālié ko ha konga mahuʻinga ʻo e founga akó. Lolotonga e ngāue fakafaifekau ʻa e Fakamoʻuí ʻi he māmaní, naʻá Ne faʻa ʻeke ha ngaahi fehuʻi naʻá ne fakaafeʻi ʻa e kau akó ke nau fakakaukau, ongoʻi, mo ngāueʻi e ngaahi moʻoni naʻá Ne akoʻí (vakai ki he Mātiu 16:13–16; Sione 6:66–69). Mahalo kuó ke fakatokangaʻi hano ʻekei atu ʻe ha mātuʻa, faiako, pe taki ʻo e Siasí ha ngaahi fehuʻi naʻá ne tokoniʻi koe ke ke maʻu ha mahino lelei ange ki he ongoongoleleí pe fakafelāveʻi ʻa e meʻa ʻokú ke akó ki hoʻo moʻuí. ʻE lava ʻe hono ʻeke mo tali ʻa e ngaahi fehuʻi ueʻi fakalaumālié ʻo ʻai e akó ke hoko ko ha aʻusia fakamānako mo ʻuhingamālie ange kiate koe.

ʻOku lahi ha ngaahi faʻahinga kehekehe ʻo e fehuʻí. ʻI he ʻaho ní, te ke maʻu ai ha faingamālie ke akoako fakahoko hono ʻeke mo tali ha ngaahi fehuʻi fakalaumālie ke tokoni ke mahino kiate koe ʻa e ngaahi potufolofola fakataukei fakatokāteliné.

Ko e ngaahi sīpinga ʻeni ʻo e faʻahinga fehuʻi kehekehe ʻe lava ke fakaʻaongaʻi ʻi hono ako ʻo e folofolá. ʻOku fekauʻaki ʻa e sīpinga fehuʻí mo e ngaahi moʻoni ʻoku akoʻi ʻi he 2 Nīfai 32:8–9.

Ngaahi fehuʻi ke tokoni ke mahino kiate koe ʻa e puipuituʻa ʻo e ngaahi folofolá

• Ko hai ʻoku lea ʻi he 2 Nīfai 32:8–9?

• Ko ʻene leá kia hai? Ko e hā hono ʻuhingá?

Ngaahi fehuʻi ke tokoni ke mahino kiate koe ʻa e kakano pe ʻuhinga ʻo e folofolá

ʻE lava ke tokoni ʻa e ngaahi fehuʻi ko ʻení ke tau ʻiloʻi ʻa e tokāteliné mo e ngaahi tefitoʻi moʻoní.

• Ko e hā e meʻa naʻe loto ʻa e tokotaha tohí ke tau akó?

• ʻOkú ke pehē ko e ʻuhinga ki he hā ke “lotu maʻu ai pē, pea ʻoua naʻa fiú”? (2 Nīfai 32:9).

Ngaahi fehuʻi ke tokoni ke mahino kiate koe ʻa e tokāteline mo e ngaahi tefitoʻi moʻoni ʻi he folofolá

• ʻOkú ke pehē ʻe lava fēfē ʻe he lotu maʻu peé ʻo tākiekina hotau vā fetuʻutaki mo e Tamai Hēvaní?

• Ko e hā ha meʻa ʻe ala tokoni ke tau manatuʻi ke lotu maʻu ai pē, ʻo aʻu ki he taimi ʻoku ʻikai ke tau ongoʻi ʻoku tau fie lotu aí?

fakaʻilonga, lekooti

1. Fakakakato eni:

   Fili ha taha ʻo e ngaahi potufolofola fakataukei fakatokāteline ʻi he vahaʻa ʻo e 1 Nīfai 3:7 mo e Mōsaia 18:8–10. Hiki ha fehuʻi ʻe tolu—ko ha fehuʻi ʻe taha ki he faʻahinga takitaha ʻi ʻolungá—ʻa ia te ke lava ʻo fehuʻi fekauʻaki mo e potufolofola fakataukei fakatokāteliné. Vakai ki he ngaahi sīpinga kimuʻá kapau ʻokú ke fiemaʻu tokoni. Tali ʻa e ngaahi fehuʻi takitaha ʻokú ke tohí.

   Fakakaukau ke ako ʻa e potufolofola fakataukei fakatokāteline naʻá ke filí mo ha mātuʻa, tokoua pe tuongaʻane, pe kaungāmeʻa pea kole ange ke nau tali hoʻo ngaahi fehuʻí.