Mōsaia 27:1–24

“Kuó Ne Lotu ʻi he Tui Lahi Koeʻuhí ko Koe”

ko ha ʻāngelo ʻokú ne taʻofi ʻa ʻAlamā ko e Siʻí

ʻOkú ke ʻiloʻi nai e ongo ʻoku maʻu ʻi haʻate mamata ki hono fakasītuʻaʻi ʻe he niʻihi ʻokú te ʻofa aí ʻa e moʻoní? Naʻe ʻiloʻi ʻe ʻAlamā mo e Tuʻi ko Mōsaiá ʻa e loto-mamahi ʻi he mamata ki he angatuʻu ʻa e kau mēmipa ʻo e fāmilí ki he Fakamoʻuí mo Hono Siasí. Tuʻunga ʻi he ʻaloʻofa ʻa Kalaisí, naʻe faifai pea tāpuekina kinaua ke na ongoʻi ʻa e fiefia ʻi heʻena mamata ki he fakatomala ʻa e niʻihi ko ʻeni ʻokú na ʻofa aí. ʻE lava ke tokoniʻi koe ʻe he lēsoni ko ʻení ke ke ʻiloʻi ha ngaahi founga ke tokoniʻi ai ʻa kinautolu ʻoku fakasītuʻaʻi e ngaahi akonaki ʻa Sīsū Kalaisi ke foki kiate Iá.

ʻOku ʻi ai ha ʻamanaki lelei ʻia Kalaisi

ʻOku ʻi ai nai ha taha ʻokú ke hohaʻa ki ai koeʻuhí ʻoku nau faingataʻaʻia fakalaumālie pe angatuʻu ki he ʻOtuá? Kapau ʻoku pehē, manatuʻi maʻu pē ʻa e tokotahá ni ʻi hoʻo ako he ʻaho ní. Ko e meʻa tatau pē, kapau ʻokú ke faingataʻaʻia fakalaumālie, te ke lava ʻo manatuʻi ho tūkungá ʻi he kotoa ʻo e lēsoní.

Fakalaulauloto ki he founga ʻoku fakamatalaʻi totonu ai koe ʻe he ngaahi fakamatala ko ʻení:

1. ʻOku ou tui ʻoku ʻikai tōmui kiate kinautolu ʻoku faingataʻaʻia fakalaumālie pe angatuʻú ke fakamoʻui kinautolu ʻe Sīsū Kalaisí.

2. Kuó u mātā ha ngaahi sīpinga ʻi he folofolá mo e kakai ʻoku mau feohí ʻoku nau ʻomi ha ʻamanaki lelei kiate au maʻá e kakai ʻoku faingataʻaʻia fakalaumālie pe angatuʻú.

3. ʻOku ou ʻiloʻi ʻa e meʻa te u lava ʻo fai ke tokoniʻi ai e kakai ʻoku faingataʻaʻia fakalaumālie pe angatuʻú.

ʻI hoʻo ako ʻa e Mōsaia 27 he ʻaho ní, kumi ha ngaahi ʻuhinga ke maʻu ai ha ʻamanaki lelei pea mo e meʻa te ke lava ʻo fai ke tokoniʻi ʻa kinautolu ʻoku faingataʻaʻia fakalaumālie pe angatuʻú.

Ko hono tokoniʻi ʻo kinautolu ʻoku hē fakalaumālié

Lau ʻa e Mōsaia 27:1, 8–10 ke ʻilo pe ko hai naʻe hohaʻa ki ai ʻa e palōfita ko ʻAlamaá mo e Tuʻi ko Mōsaiá.

• ʻOkú ke pehē naʻe liliu fēfē ʻe he ngaahi fili ʻa e kau talavou ko ʻení ʻenau mātuʻá, ngaahi tokouá mo e tuofāfiné, mo e kaungāmeʻá?

Lau ʻa e Mōsaia 27:11–16, 19 ke ʻiloʻi ʻa e meʻa naʻe fai ʻe he ʻEikí ke tokoniʻi ʻa ʻAlamā ko e Siʻi ke liliu ʻene moʻuí pea mo hono ʻuhingá. Mahalo te ke fie mamata foki he foʻi foʻi vitiō “ʻOku Ului ʻa ʻAlamā ko e Siʻí ki he ʻEikí” mei he taimi 3:06 ki he 6:59.

• Ko e hā ha ngaahi kupuʻi lea mei he pōpoaki ʻa e ʻāngeló ʻokú ke pehē naʻe mei ʻaonga taha ki he kau talavou ko ʻení?

• ʻOku fakahaaʻi fēfē ʻe he aʻusia ko ʻení ʻa e ʻofa mo e holi ʻa e ʻOtuá ke fakahaofi ʻa e kau talavou ko ʻení (kae pehē ki he niʻihi kehe ʻoku hē fakalaumālié)?

• Fakatatau mo e Mōsaia 27:14, ko e hā naʻe pehē ai ʻe he ʻāngeló kuó ne haʻú kia ʻAlamā ko e Siʻi mo e ngaahi foha ʻo Mōsaiá? (Fakakaukau ke fakaʻilongaʻi e tali ki he fehuʻi ko ‘ení ‘i hoʻo folofolá.)

Fakaʻaongaʻi ha kiʻi taimi ke fakalaulauloto ai ki he ngaahi tefitoʻi moʻoni te ke lava ʻo ako mei he ngaahi veesi ko ʻení.

Ko ha tefitoʻi moʻoni ʻe taha te tau lava ʻo akó ko e lotu ʻi he tui lahi maʻanautolu ʻoku faingataʻaʻia fakalaumālie pe angatuʻú ʻokú ne fakaafeʻi ʻa e ʻEikí ke tokoniʻi kinautolu ke nau maʻu ha ʻilo ki he moʻoní.

Manatuʻi he ʻikai fakataʻeʻaongaʻi ʻe he ʻEikí ʻa e tauʻatāina ke fili ʻo kinautolu ʻoku tau lotuá. Neongo naʻe ʻaʻahi mai ha ʻāngelo kia ʻAlamā mo e ngaahi foha ʻo Mōsaiá ka naʻa nau kei fakaʻaongaʻi pē ʻenau tauʻatāina ke filí ke ʻoua naʻa nau fakatomala. Neongo he ʻikai ʻomi ʻe he Tamai Hēvaní ha ʻāngelo ki hotau ngaahi ʻofaʻangá, ka te Ne tali ʻetau ngaahi lotú ʻi Heʻene founga mo e taimi pē ʻAʻaná. Te tau lava ʻo falala kiate Ia ke tokoni. Te ke ako lahi ange fekauʻaki mo e fatongia ʻo e ʻEikí ʻi he liliu ʻa ʻAlamā ʻi he lēsoni hokó.

• ʻOkú ke pehē naʻe fēfē nai e lotu ʻa ʻAlamā ko e Lahí? ʻOkú ke pehē ʻoku ʻuhinga ki he hā ʻa e lotu “ʻi he tui lahí” (Mōsaia 27:14)?

• ʻOkú ke pehē ko e hā ʻoku finangalo ai e ʻEikí ke tau lotua ʻa kinautolu ʻoku faingataʻaʻia fakalaumālie pe angatuʻú?

• Ko e fē ha taimi ne ke ongoʻi ai hano tokoniʻi ʻe hoʻo ngaahi lotú siʻa moʻui ʻa ha taha kehe? ʻOkú ke pehē ko e fē ha taimi ne tokoniʻi ai koe ʻe ha lotu ʻa ha taha kehe?

Fakalaulauloto ki ha ngaahi meʻa pau te ke ala lotua ʻi haʻo kole ki he Tamai Hēvaní ke tokoniʻi ha taha ʻoku faingataʻaʻia fakalaumālie. Te ke lava foki ke kiʻi taʻofi hoʻo akó ka ke lotua kinautolu he taimí ni.

Ko e hā mo ha toe meʻa te u lava ʻo fai?

Lau e ngaahi potufolofola ko ʻení, ʻo kumi e meʻa naʻe fai ʻe ʻAlamā mo e niʻihi kehé, makehe mei he lotú, ke tokoniʻi hono fohá ke foki ki he ʻEikí.

Mōsaia 27:20–24

ʻAlamā 36:17–19 (Ko hono fakamatalaʻi ʻe ʻAlamā ko e Siʻí kimui ange ʻa e meʻa naʻe akoʻi ʻe heʻene tamaí mo e founga naʻe tokoniʻi ai iá)

• Ko e hā naʻe fai ʻe ʻAlamā, makehe mei he lotú, ke tokoni ki hono fohá?

Ako ha taha ʻo e ngaahi meʻa ko ʻeni naʻe fai ʻe ʻAlamaá pea lekooti hoʻo ngaahi fakakaukaú. ʻI hoʻo akó, mahalo te ke manatuʻi ha taha ʻokú ke ʻofa ai ʻoku faingataʻaʻia fakalaumālie pe angatuʻu:

1. ʻAukai—Ako lahi ange fekauʻaki mo e ʻaukaí ʻaki haʻo fekumi ʻi he ChurchofJesusChrist.org, ko e Gospel Library app, ko e Fakahinohino ki he Ngaahi Folofolá, pe ngaahi potufolofola kehe hangē ko e Maʻake 9:17–18, 25–29. ʻE tokoniʻi fēfē koe pe ko ho ʻofaʻangá ʻe he ʻaukaí? ʻOku ʻi ai nai ha niʻihi kehe te ke lava ʻo fakaafeʻi ke kau fakataha mo koe ʻi he ʻaukaí?

2. Fakamoʻoni—Fakafehoanaki e aʻusia ʻa ʻAlamā ʻoku fakamatalaʻi ʻi he ʻAlamā 36:17–19 ki he aʻusia ʻa ʻĪnosi ʻi he ʻĪnosi 1:1–5. Fakalaulauloto ki he tuʻunga malava ʻa e Laumālie Māʻoniʻoní ke fakamanatu ki he kakaí ʻa e meʻa kuo nau fanongo aí ʻi heʻenau fiemaʻu iá (vakai ki he Sione 14:26). ʻE lava ke tau maʻu heni ha loto-toʻa ke vahevahe ʻetau fakamoʻoni kia Kalaisí mo kinautolu ʻoku ngalingali he ʻikai ke nau talí. ʻE lava foki ke tokoni ke tau manatuʻi ʻa e meʻa ʻoku tau ʻilo mo tui ki ai fekauʻaki mo e Fakamoʻuí ʻi he taimi te tau fiemaʻu lahi taha ai iá. Te ke lava fēfē nai ʻo vahevahe hoʻo fakamoʻoni ki he Fakamoʻuí?

fakaʻilonga, lekooti

1. Tali ha fehuʻi ‘e tolu pe lahi ange mei he ngaahi fehuʻi ko ʻení:

   • Ko e hā naʻá ke ako mei he fakamatala ko ʻení fekauʻaki mo e founga ke tokoniʻi ai ʻa kinautolu ʻoku faingataʻaʻia fakalaumālié?

   • Ko e hā ha faleʻi te ke vahevahe mo ha taha ʻoku ʻikai liliu vave hono ʻofaʻangá?

   • Ko e hā e fatongia ʻo e Fakamoʻuí ʻi hono tokoniʻi ʻa kinautolu ʻoku tau ʻofa aí? Ko e hā e ʻuhina ʻe lava ai ke ke falala kiate Ia ke tokoniʻi kinautolú?

   • Ko e hā ha ngaahi meʻa pau ʻokú ke ongoʻi ʻoku ueʻi koe ke ke fai pe lea ʻaki ke tokoniʻi ha taha ke foki ki he Fakamoʻuí?

Fili Pē: Fie Ako Lahi Ange?

Ko e hā e ongo ʻoku maʻu ʻe he Tamai Hēvaní kiate kinautolu ʻoku hē pe angatuʻú?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Jeffrey R. Holland

Ko e ongo fakaeloto ʻo e vivili ʻa e [foha maumau koloá], mo e lele ʻa e tamai faivelengá ke fakafetaulaki mo ʻuma kiate iá ʻa e taha ʻo e ngaahi meʻa fakaloloma mo manavaʻofa taha ʻoku hā ʻi he folofolá. ʻOkú ne fakahā ki he fānau kotoa pē ʻa e ʻOtuá, ʻa e lahi hono fiemaʻu kitautolu ʻe he ʻOtuá ki he malu ʻi Hono toʻukupú, neongo pe ʻoku tau talangataʻa pe talangofua. (Jeffrey R. Holland, “The Other Prodigal,” Ensign, May 2002, 62)

Ko e hā ʻoku fuʻu fuoloa ai ke liliu ʻa e niʻihi ʻoku ou ʻofa aí (pe ko au) ʻi he fakafehoanaki ki he aʻusia ʻa ʻAlamā ko e Siʻí?

Naʻe fakamatala ʻa Palesiteni ʻEselā Tafu Penisoni (1899–1994) ʻo pehē:

Palesiteni Ezra Taft Benson

ʻOku lekooti ʻe he folofolá ha ngaahi talanoa fakaofo ʻo ha kau tangata ne liliu fakaʻaufuli ʻenau moʻuí, ʻi ha lau momeniti pē, ʻo hangē ko: ʻAlamā ko e Siʻí, Paula he hala ki Tāmasikusí, ʻĪnosi naʻe lotu fuoloa ʻo aʻu ki he poʻulí, Tuʻi ko Lamōnaí. Mei he ngaahi sīpinga fakaofo ko ia ʻo e mālohi ke fai ha liliú ʻo aʻu ai pē kiate kinautolu ne fuʻu tōtuʻa e angahalá, ʻokú ne ʻomi ai e falala ki he malava ke aʻu atu e Fakaleleí kiate kinautolu ʻoku taulōfuʻu ai e mamahí.

Ka kuo pau ke tau mātuʻaki tokanga ʻi hono aleaʻi e ngaahi sīpinga fakaofó ni. Neongo ʻenau hoko moʻoni mo fuʻu mālohí, ka ko ha ngaahi meʻa ia ʻoku makehe ʻo laka ange ia he laó. Ki he Paula kotoa pē, kau ʻĪnosi kotoa pē, pea mo e Tuʻi Lamōnai kotoa pē, ʻoku ʻi ai ha kakai ʻe laungeau mo lauafe ʻoku nau ʻiloʻi ʻoku kiʻi faingataʻa ange e hala ki he fakatomalá, pea ʻikai faʻa fakatokangaʻi. ʻI he ʻaho kotoa pē ʻoku nau ʻunu ke ofi ange ki he ʻEikí, pea ʻikai faʻa fakatokangaʻi ʻoku nau langa hake ha moʻui faka-ʻOtua. ʻOku nau moʻui fiemālie pē mo angalelei, ngāue tokoni, mo moʻui tukupā. (Ezra Taft Benson, “A Mighty Change of Heart,” Ensign, Oct. 1989, 5)

Ko e hā ʻa e ngaahi tāpuaki ʻoku fakafou mai ʻi he ʻaukai?

Naʻe akonaki ʻa ʻEletā Seni M. Poueni ʻo e Kau Fitungofulú ʻo pehē:

ʻEletā Shayne M. Bowen

Fēfē kapau naʻe ʻi ai ha founga ke ikunaʻi ai ʻetau ngaahi tōʻonga moʻuí, maʻunimaá mo e ngaahi kavengá? Fēfē kapau naʻe ʻi ai ha founga ke maʻu ai ha loto-falala feʻunga ki he ʻEikí te ke lava ʻo kolea e ngaahi mālohi ʻo e langí? Fēfē kapau naʻe ʻi ai ha ngaahi tefitoʻi moʻoni te ke lava ʻo akoʻi ki he niʻihi ʻokú ke ʻofa aí, kapau te nau fakaʻaongaʻi, te nau lava ʻo ikunaʻi honau ngaahi vaivai fakatāutahá mo ʻunu ke ofi ange ki he ʻOtuá?

ʻI he mahino lelei kiate kitautolu mo tau moʻui ʻaki e fono ʻo e ʻaukaí, ʻe lava ke tau maʻu ʻa e ngaahi tāpuaki ko ʻeni ʻoku tau fakaʻamuá. (Shayne M. Bowen, “Fasting with Power,” Ensign, Apr. 2009, 64)