Mosiah 11–17

“Maghinulsol ug Mobalik ngadto sa Ginoo”

Abinadi nagsangyaw

Kasagaran mosulay kita sa pagpasidaan sa mga tawo nga atong gihigugma bahin sa mga desisyon nga makahatag og kasakit ug pag-antos. Ang Ginoo mipadala ni Abinadi nga adunay mensahe alang ni Hari Noah ug sa iyang katawhan sa paghinulsol ug paglikay sa pag-antos nga mahimong moabot tungod sa ilang makasasala nga mga kinaiya. Kini nga leksiyon makatabang nga madugangan ang imong tinguha sa pagdawat sa mga propeta sa Ginoo ug sa pagbuhat sa mga pagdapit nga ilang gihatag gikan sa Ginoo.

Ang Ginoo nagpasidaan sa peligro

Kunohay nga ikaw bag-o lang nakadawat og impormasyon bahin sa usa ka butang diin ang imong mga higala ug mga minahal anaa sa peligro.

• Unsa ang pipila ka nagkalain-laing mga paagi nga mahimo nimong ipahibalo ang mensahe sa pasidaan ngadto kanila?

Ang Ginoo adunay daghang mga paagi sa pagpasidaan kanato. Ikonsiderar ang mosunod nga mga paagi:

• Tambag gikan sa mga ginikanan

• Mga pagpanudlo gikan sa mga propeta ug ubang mga lider sa Simbahan

• Mga pagtulun-an diha sa mga kasulatan, sa simbahan, o sa seminary

• Mga hunahuna o mga pagbati gikan sa Espiritu Santo

• Uban pa:

Hunahunaa kon unsa ka kamaayo sa imong pagbuhat sa paglikay sa sala ug kapeligro tungod sa paagi sa imong pagpili sa pagsanong sa mga pasidaan sa Ginoo.

• Hain nga mga paagi ang mura og labing lisod nga dawaton? Ngano man?

• Unsa ang gisulti niini mahitungod sa Ginoo nga Siya mitabang kanato sa nagkalain-laing mga paagi?

Karon, ang imong pagtuon magtutok sa mosunod nga kamatuoran: Ang Ginoo namulong kanato pinaagi sa Iyang mga propeta aron sa pagdapit kanato sa paghinulsol ug pagbalik ngadto Kaniya.

Ang Ginoo mitawag kang Noah ug sa iyang mga katawhan aron sa paghinulsol

Hinumdomi nga si Zeniff nangulo sa usa ka grupo sa mga tawo gikan sa Zarahemla ngadto sa yuta sa Nephi. Sa wala pa mamatay si Zeniff, iyang gitugyan ang gingharian ngadto sa iyang anak nga si Noah (tan-awa sa Mosiah 9–10). Si Noah ug ang mga pari nga iyang gipili nagpakabuhi nga daotan. Ilang gikombinsir ang mga tawo pinaagi sa pagpamakak ug maulog-ulugon nga mga pulong aron sa pagpakasala (tan-awa sa Mosiah 11:7, 11).

Basaha ang Mosiah 11:2, 14–15, 19 mangita sa mga sala nga nahimo ni Noah ug sa iyang mga katawhan. (Angbersikulo 19 naghulagway sa ilang reaksiyon human mapanalipdan ang ilang mga kaugalingon gikan sa pag-atake sa mga Lamanite.) Mahimo usab nimong tan-awon ang bidyo nga “Gisaysay ni Alma ang Kadautan ni Hari Noah | Mosiah 11–12, 17” (2:26), anaa sa https://www.churchofjesuschrist.org/study/video/mosiah-11-18/2020-03-0220-alma-recounts-the-wickedness-of-king-noah-mosiah-11-12-17-1080p?lang=ceb ChurchofJesusChrist.org.

• Sa unsa nga mga paagi nga ang mga pagpili nga gihimo ni Noah ug sa iyang katawhan matandi sa mga pagpili sa mga tawo karon?

• Unsa ang pipila ka posibleng mga sangpotanan sa pagpuyo sama sa ilang gibuhat?

Ang Ginoo mitawag og propeta nga ginganlan og Abinadi aron paghatag sa mensahe ngadto kang Noah ug sa iyang katawhan aron sa pagtabang kanila nga makakita sa mga sangpotanan sa ilang mga binuhatan.

Basaha ang mensahe ni Abinadi sa Mosiah 11:20–25, mangita sa mga sangpotanan nga gipasidaan sa Ginoo. Ang pulong nga “alaot” sa bersikulo 20 nagpasabot og kasubo o kasakit.

• Unsa ang pipila ka mga sangpotanan nga imong nakaplagan nga ang Ginoo mipasida-an ngadto sa mga tawo?

Bantayi ang gibalikbalik nga mga hugpong sa mga pulong nga “gawas kon sila maghinulsol” ug “gawas kon kini nga mga katawhan maghinulsol.” Mahimo nimong markahan kini nga mga pulong ug hunahunaa kon unsa ang imong makat-onan mahitungod sa Ginoo gikan niini nga mga hugpong sa mga pulong.

Basaha ang Mosiah 11:26–29, mangita kon unsay reaksiyon ni hari Noah ug sa uban ngadto kang Abinadi.

Pagtan-aw sa paghinulsol isip gasa sa gugma gikan sa Ginoo

Paghunahuna sa lain-laing mga pagdapit nga gihatag sa Ginoo sa atong panahon aron kita maghinulsol ug mag-usab. Mahimo nimong rebyohon ang bag-ohay lang nga pakigpulong gikan sa propeta sa Ginoo ug mangita sa mga pasidaan nga iyang gihatag.

• Unsa ang pipila ka mga pagkaparehas o kalainan tali sa reaksiyon sa mga tawo sa panahon ni Abinadi ug sa reaksiyon sa katawhan sa atong panahon ngadto sa mga propeta? Ngano kaha nga ingon niini ang ilang reaksiyon?

Pamalandongi ang imong personal nga pasalig sa pagpaminaw sa Dios, ilabi na kon Siya mopasidaan kanimo pinaagi sa Iyang mga propeta sa sala ug sa mga sangpotanan niini.

Si Elder D. Todd Christofferson sa Korum sa Napulog Duha ka Apostoles mipasabot kon unsaon nato paglantaw ang pagdapit sa paghinulsol gikan sa mga propeta.

Elder D. Todd Christofferson

Ako dugay nang naaghat, ug usab mibati, sa mapanganduyon nga gugma sa mga propeta sa Dios sa ilang mga pagpasidaan batok sa sala. Sila wala gidasig pinaagi sa tinguha sa pagpanghimaraot. Ang ilang tinuod nga tinguha sama ra sa gugma sa Dios; gani, kini mao ang gugma sa Dios. Sila mohigugma niadtong kinsa sila gipadala, kon si kinsa man sila ug unsa pa man sila sama. Sama lang sa Ginoo, ang Iyang mga sulugoon dili gusto ni bisan kinsa nga mag-antos sa kasakit sa sala ug sa dili maayo nga mga pagpili. (D. Todd Christofferson, “Ang Gugma sa Dios,” Liahona, Nob. 2021, 17)

• Sa unsang paagi nga ang pagsabot niini mahitungod sa mga propeta makaimpluwensiya sa imong tinguha sa pagbuhat sa ilang mga pagdapit?

Sa kalooy, ang Ginoo mihatag sa mga tawo og panahon sa pagbalik ngadto Kaniya ug paghinulsol sa ilang mga sala. Apan, sa dihang si Abinadi mibalik paglabay sa duha ka tuig, sila nasuko pag-usab ug nangita aron sa pag-akusar kaniya(tan-awa sa Mosiah 12:1, 9, 19).

Si Abinadi sa walay kahadlok mipamatuod nga ang mga pari wala magtudlo sa mga tawo sa pagsunod sa mga sugo sa Dios (tan-awa sa Mosiah 12:33–37; 13:12–25). Siya mipamatuod usab nga si Jesukristo moabot aron sa pagtubos sa tanang mga tawo ug nga ang kaluwasan posible lamang pinaagi sa Manunubos.(tan-awa sa Mosiah 15:1, 19). Sa dihang si Abinadi nakahuman sa pagpamatuod ni Jesukristo, ang iyang kinabuhi nameligro na usab. Apan niining higayona, mao usab ang kinabuhi sa usa sa mga pari, si Alma.

Basaha ang Mosiah 17:1–4 aron sa pagpangita sa mga tubag ni Noah ug Alma sa pagpamatuod ni Abinadi kang Kristo.

icon, rekord

1. Tubaga ang mosunod nga pangutana:

   • Giunsa kaha niining hilabihan ka lahi nga mga tubag pagtabang kanato nga makasabot?

Human sa tulo ka adlaw nga pagkabilanggo, si Abinadi gidala pag-usab sa atubangan ni Hari Noah. Si Noah miingon nga iyang patyon si Abinadi gawas kon siya andam sa paglimod sa mga kamatuoran nga iyang gitudlo (tan-awa sa Mosiah 17:5–8).

Basaha ang Mosiah 17:9–10, 13, mangita sa tubag ni Abinadi sa hangyo sa hari sa paglimod sa iyang pagpamatuod. O mahimo nimong tan-awon ang bidyo nga “Si Abinadi Nag-antos sa Kamatayon tungod sa Iyang Pagtuo | Mosiah 16–17” (4:28), anaa sa https://www.churchofjesuschrist.org/study/video/mosiah-11-18/2020-03-0260-abinadi-suffers-death-for-his-faith-mosiah-16-17-1080p?lang=ceb ChurchofJesusChrist.org.

2. Tubaga ang mosunod nga mga pangutana:

   • Unsa ang imong nakat-onan gikan sa ehemplo ni Abinadi?

   • Sa unsang paagi kaha kana makaimpluwensiya sa paagi sa imong pagsanong sa Ginoo ug sa Iyang mga propeta?

Opsiyonal: Gustong Makakat-on Pa og Dugang?

Mosiah 11:20, 25. Unsa ang atong makat-onan mahitungod sa Ginoo gikan sa mga pagbati nga gihisgotan sa mensahe ni Abinadi?

Alaot, o kaguol: Ang Ginoo nagpasidaan sa kasubo o kasakit nga resulta sa makasasala nga kinabuhi. Gusto sa Dios nga magmalipayon kita (tan-awa sa 2 Nephi 2:25). Kon kita makasala, Siya gusto nga kita mapainubsanong maghinulsol ug magbasol sa atong mga binuhatan (tan-awa sa 3 Nephi 20:9).

ChurchofJesusChrist.org

Kasuko: Nasayod kita nga ang Dios “dili dali nga masuko, dili maghunahuna sa dautan” (1 Mga Taga Corinto 13:5; Moroni 7:45), ug “mahinay sa pagkasuko, ug dako ang kalooy” ( Mga Salmo 145:8). Ang mga tawo nga tinuyo nga misupak batok sa Dios ug mipili sa pagkadautan, mga salawayon, ug mga malaw-ay nga buhat makapasuko sa Ginoo. Ang kasuko sa Dios dili makapawala Kaniya sa pagpugong. Hinoon Siya nagpasidaan sa mga sangpotanan sa ilang mga binuhatan ug nagpadayon sa pagdapit sa tanan sa paghinulsol.

Pangabubho: Ang pulong nga nangabubho mahimong hubaron nga adunay “tandugon ug lawom nga mga pagbati” (Giya ngadto sa mga Kasulatan, “Nangabubho, Pangabubho”). Sa laing pagkasulti, ang Dios nagpakabana pag-ayo kanato ug nagdapit kanato sa hingpit usab nga pagtugyan ngadto Kaniya.

Unsa ang tahas sa usa ka propeta?

Ang propeta mao ang “usa ka tawo kinsa gitawag pinaagi ug namulong alang sa Dios” (Giya ngadto sa mga Kasulatan, “Propeta”). Tan-awa kon unsa pa ang gisulti niini diha sa Giya ngadto sa mga Kasulatan mahitungod sa mga propeta.