Mosiah 3:1–17

Kaluwasan pinaagi ni Jesukristo

Jesukristo

Sa tibuok kasaysayan, ang mga anghel mibisita sa yuta aron sa pagpamatuod ni Jesukristo ug sa pagpadayag sa “malipayon nga mga balita sa dako nga kalipay” (Mosiah 3:3; Alma 13:22; Helaman 16:14). Si Hari Benjamin nakadawat sa ingon nga pagbisita. Iyang gipaambit sa iyang katawhan ang pagpamatuod sa anghel kang Jesukristo, ang mga butang nga masinati sa Manluluwas, ug ang kamatuoran nga ang kaluwasan moabot lamang pinaagi sa ngalan ni Kristo. Kini nga leksiyon makatabang kanimo nga makasabot sa kamahinungdanon sa unsay gibuhat ni Jesukristo aron ikaw maluwas.

Malipayon nga mga balita sa dako nga kalipay

• Makahunahuna ka ba sa mga panahon sa dihang ang mga anghel mianhi sa yuta aron sa pagpamatuod ni Jesukristo?

Usa ka ehemplo anaa sa Lucas 2:10–12. ChurchofJesusChrist.org

Ang usa ka anghel mipakita usab kang Hari Benjamin. Basaha ang Mosiah 3:3–4, mangita sa pagkaparehas tali sa gisulti sa anghel ngadto sa mga magbalantay ug sa gisulti sa anghel ngadto kang Hari Benjamin.

• Unsa ang imong nahibaloan mahitungod ni Jesukristo nga makonsiderar nga “malipayon nga mga balita sa dako nga kalipay”?

Sa iyang pakigpulong ngadto sa iyang mga katawhan nga gilakip sa Mosiah 3:1–17, si Hari Benjamin mipaambit sa pipila ka mensahe sa anghel. Kini nga mensahe naghisgot sa kinabuhi ug misyon ni Jesukristo, sa unsang paagi sila makadawat og kalipay, ug unsay gitanyag ni Jesus nga dili mahimo sa uban.

Ang bugtong ngalan diin moabot ang kaluwasan

Basaha ang Mosiah 3:17, mangita sa unsay gitanyag ni Jesukristo.

• Unsa nga kamatuoran ang imong matino gikan sa bersikulo 17?

Basaha ang mosunod nga pamahayag gikan ni Elder Neil L. Andersen sa Korum sa Napulog Duha ka Apostoles nga mangita kon unsay giluwas ni Jesukristo kanato gikan sa:

Elder Neil L. Andersen

Ang atong Ginoo ug Manluluwas, si Jesukristo, pinaagi sa dili masukod nga gasa sa Pag-ula, wala lamang moluwas kanato gikan sa kamatayon ug mitanyag kanato, pinaagi sa paghinulsol, kapasayloan sa atong mga sala, apan Siya mibarog usab nga andam sa pagluwas kanato gikan sa mga kasubo ug mga kasakit sa nasamdan natong mga kalag. (Neil L. Andersen, “Nasamdan,” Liahona, Nob. 2018, 84)

Hunahunaa kon sa asa ka gikinahanglan nga maluwas. Aduna bay mga sala nga imong gipaningkamotan nga mabuntog? Aduna ka bay mga kasubo o mga kasakit nga imong nasinati? Samtang magtuon ka sa Mosiah 3, tinguhaa ang inspirasyon pinaagi sa Espiritu Santo aron matabangan ka nga makahibalo kon unsaon nimo nga makadawat sa kaluwasan nga gitanyag ni Jesukristo.

Basaha ang Mosiah 3:5–10, mangita sa unsay gibuhat ni Jesukristo aron ikaw maluwas. Paggahin og panahon sa hinay-hinay nga pagbasa ug sa pagpamalandong. Ang pagpamalandong maoy usa ka paagi sa pagdapit sa Espiritu Santo sa pagtudlo kanimo. Mahimo nimong isulat ang mga ideya ug mga hunahuna diha sa imong mga kasulatan o sa journal sa pagtuon.

icon, rekord

1. Tubaga ang duha sa mosunod nga mga pangutana:

• Unsa nga mga impresyon ang imong nabatonan samtang imong gitun-an kini nga mga bersikulo?

• Unsa ang pipila ka hugpong sa mga pulong niini nga mga bersikulo ang mipatigbabaw diha kanimo?

• Unsay imong napalgan nga nakapalipay nimo?

ChurchofJesusChrist.org

Basaha ang Mosiah 3:11–13, mangita sa unsay kinahanglan nimong buhaton aron makadawat og kalipay ug kaluwasan pinaagi ni Jesukristo. Basaha sa hinay-hinay ug pamalandongi kini nga mga bersikulo. Ang mosunod nga mga pangutana makatabang kanimo sa pagpamalandong.

2. Tubaga ang mosunod nga mga pangutana:

• Unsa ang imong nakat-onan o gibati mahitungod ni Jesukristo nga nagdasig kanimo sa paghinulsol?

• Ngano sa imong hunahuna nga ang kapasayloan sa mga sala nagdala og kalipay?

Hinumdomi kon sa asa ikaw gikinahanglan nga maluwas. Hunahunaa ang imong gitun-an sa Mosiah 3 ug ang mga impresyon nga imong nadawat gikan sa Espiritu. Paningkamot sa pagpakita og hugot nga pagtuo, sa paghinulsol, ug sa pagtuo kang Kristo aron ikaw makadawat sa tabang sa Manluluwas ug sa kalipay nga moabot gumikan kay napasaylo.

Opsiyonal: Gustong Makakat-on Pa og Dugang?

Mosiah 3:7. Unsa ka dako ang pag-antos ni Jesukristo aron ako maluwas?

Si Elder James E. Talmage (1862–1933) sa Korum sa Napulog Duha ka Apostoles mitudlo:

Elder James E. Talmage

Nanglimbasog Siya ug miagulo tungod sa gibug-aton nga walay laing binuhat nga mipuyo sa yuta ang makahimo sa pagtuo nga kini posible. Dili kadto usa ka pisikal nga kasakit, ni mental nga paghigwaos lamang, nga nakapahimo Kaniya sa pag-antos sa ingon nga kasakit nga nakahimo sa pag-agas sa dugo gikan sa matag lungag sa panit; apan usa ka espirituhanong paghingutas sa kalag nga ang Dios lamang ang makahimo sa pagsinati. … Nianang mga orasa sa kasakit, si Kristo miatubang ug mibuntog sa tanang mga kabangis nga gipahamtang ni Satanas, “ang prinsipe niining kalibotana” [Juan 14:30]. …

Sa pipila ka paagi, aktwal ug tinuod nga makalilisang bisan og ngadto sa tawo dili masabtan, gidala sa Manluluwas diha sa Iyang Kaugalingon ang gibug-aton sa mga sala sa katawhan gikan ni Adan ngadto sa kataposan sa kalibotan. (James E. Talmage, Jesus the Christ, 3rd ed. [1916], 613)

Mosiah 3:8. Ngano nga si Jesus natawo sa usa ka imortal nga amahan ug usa ka mortal nga inahan?

Si Elder Robert D. Hales (1932–2017) sa Korum sa Napulog Duha ka Apostoles mipaambit:

Elder Robert D. Hales

Ngano nga si Jesukristo, ug Siya lamang, ang maka-ula alang sa mga sala sa kalibotan?. …

Bugtong si Jesukristo lang ang makahimo sa maulaon nga sakripisyo—isip natawo sa usa ka mortal nga inahan, si Maria, ug nakadawat sa gahom sa kinabuhi gikan sa Iyang Amahan (tan-awa sa Juan 5:26 ). Tungod niining gahom sa kinabuhi, Iyang gibuntog ang kamatayon, ang lubnganan wala nay gahom, ug Siya nahimong atong Manluluwas ug Tigpataliwala ug ang Agalon sa Pagkabanhaw—ang paagi diin ang kaluwasan ug pagka-imortal gihatag kanatong tanan. Kitang tanan mabanhaw ug mahimong imortal tungod sa maulaong sakripisyo ni Jesukristo. (Robert D. Hales, “Ang Pag-ula sa Manluluwas: Ang Pundasyon sa Tinuod nga Kristiyanismo,” Liahona, Abril 2017, 9, 11)

Unsa ang tahas sa Manluluwas sa paghinulsol, ug unsa ang akong tahas?

Si Elder Dieter F. Uchtdorf sa Korum sa Napulog Duha ka Apostoles mitudlo:

Elder Dieter F. Uchtdorf

Dili ingon nga ang paghinulsol lang gayod ang makaluwas sa tawo. Ang dugo ni Jesukristo mao ang makaluwas kanato. Dili pinaagi sa atong tinguha ug matinuoron nga kausaban sa kinaiya lamang nga kita maluwas, apan “pinaagi sa grasya kita maluwas, human sa tanan nga atong mabuhat” (2 Nephi 25:23). Ang tinud-anay nga paghinulsol, hinuon, mao ang kahimtang nga gikinahanglan aron nga ang pagpasaylo sa Dios mahimong moabot sa atong mga kinabuhi. (Dieter F. Uchtdorf, “Punto sa Luwas nga Pagbalik,” Liahona, Mayo 2007, 100)

Unsaon nako pagsinati og kalipay pinaagi sa paghinulsol?

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Modapit ko kaninyo nga mobati og mas dakong kalipay sa inyong kinabuhi: kalipay sa kahibalo nga ang Pag-ula ni Jesukristo tinuod, kalipay sa abilidad, kaandam, ug tinguha sa Manluluwas nga mopasaylo; ug kalipay sa pagpili nga maghinulsol. Atong sundon ang sugo nga “uban ang kalipay … managtimba og tubig gikan sa mga atabay sa kaluwasan” [Isaias 12:3]. Unta mopili kita nga maghinulsol, mobiya sa atong mga sala, ug mopabalik sa atong mga kasingkasing ug mga kabubut-on ngadto sa pagsunod sa atong Manluluwas. (Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 124)