“Fakataukei Fakatokāteliné: 2 Nīfai 28:30—ʻʻOtu Lea ki he ʻOtu Lea, ʻa e Akonaki ki he Akonaki,’” Tohi ʻa Molomoná - Tohi Lēsoni ʻa e Tokotaha Akó (2024)
“Fakataukei Fakatokāteliné: 2 Nīfai 28:30,” Tohi ʻa Molomoná - Tohi Lēsoni ʻa e Tokotaha Akó
Fakataukei Fakatokāteline: 2 Nīfai 28:30
“ʻOtu Lea ki he ʻOtu Lea, ʻa e Akonaki ki he Akonaki”
ʻI ha lēsoni kimuʻa, “2 Nīfai 28:27–32,” naʻá ke ako ai ʻa e 2 Nīfai 28:30 peá ke ʻilo ʻoku fakahā ʻe he ʻOtuá ʻa e moʻoní ʻi he ʻotu lea ki he ʻotu lea kiate kinautolu ʻoku loto-fiemālie ke maʻu iá. ʻE lava ke tokoniʻi koe ʻe he lēsoni ko ʻení ke ako maʻuloto e potufolofola mo e kupuʻi lea folofola mahuʻinga ki he 2 Nīfai 28:30, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.
Ako maʻuloto pea fakamatalaʻi
Ke tokoniʻi koe ke ako maʻuloto ʻa e kupuʻi folofola mahuʻinga ʻo e 2 Nīfai 28:30, tā ha ʻotu laine fakaholisonitale ʻe 4 ʻi hoʻo tohinoa akó ke hangē ha sitepú.
Hiki he taimí ni ʻa e kupuʻi lea folofola mahuʻingá mo e potufolofolá ʻi he ngaahi laine ko iá ʻi he founga ko ʻení:
Fakakaukau ki he founga ʻe lava ke fakamanatu atu ai ʻe he ngaahi sitepú ʻa e founga ʻoku akoʻi ai kitautolu ʻe he ʻOtuá ʻi he “ʻotu lea ki he ʻotu leá.”
Toutou lau e potufolofola mo e kupuʻi lea folofola mahuʻinga ko ʻení kae ʻoua kuó ke lava ʻo lau maʻuloto ia.
ʻI ha lēsoni kimuʻa, “2 Nīfai 28:27–32,” naʻá ke ako ai ʻoku fakahā mai ʻe he ʻOtuá ʻa e moʻoní ʻi he ʻotu lea ki he ʻotu lea kiate kinautolu te nau maʻu iá. Ke tokoni atu ke ke teuteu ke fakamatalaʻi e foʻi moʻoni ko ʻení, fakalaulauloto ki he ongo fehuʻí ni pea fakakakato ʻa e ʻekitivitī tohi ko ʻení:
-
ʻOkú ke pehē ʻoku ʻuhinga ki he hā ʻa e “ʻotu lea ki he ʻotu lea”?
-
ʻOkú ke pehē ʻoku teuteuʻi fēfē kitautolu ʻe hono maʻu e moʻoni kuo ʻosi foaki mai ʻe he ʻOtuá ke tau maʻu mo ha ngaahi moʻoni lahi angé?
-
Fakakakato e ʻekitivitī ko ʻení:
Fili ha taha ʻo e ngaahi tūkunga ko ʻení ʻa ia ʻe ala fiemaʻu ai ʻe ha taha ha tokoni mei he ʻOtuá:
-
Fiemaʻu faleʻi fekauʻaki mo ha faingataʻa ʻoku nau fehangahangai mo ia.
-
Ko e holi ke fakatupulaki ha vā fetuʻutaki mālohi ange mo e Fakamoʻuí.
-
Fiemaʻu ke nau maʻu ha mahino ki honau tāpuaki fakapēteliaké.
Hiki ha fakamatala nounou fekauʻaki mo e meʻa ʻokú ke ako mei he 2 Nīfai 28:30 ʻe lava ʻo tokoni ʻi he tūkunga naʻá ke filí.
-
Akoako hono fakaʻaongaʻí
Fakakaukau ki ha foʻi lea pe kupuʻi lea ʻe ua ki he tolu ʻokú ke ongoʻi ʻokú ne fakamatalaʻi lelei taha ʻa e meʻa ʻoku tau ako mei he ngaahi tefitoʻi moʻoni takitaha ʻo hono maʻu ʻo e ʻilo fakalaumālié. Ko e hā naʻa ke fili ai e ngaahi lea ko iá?
Toe vakaiʻi ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2022) ʻo ka fiemaʻu.
Lau e ongo tūkunga ko ʻení fekauʻaki mo ha toʻu tupu mei ha uooti tatau ʻoku nau kau atu ki ha houalotu ʻaukai mo e fakamoʻoni. ʻOku nau takitaha maʻu ha ngaahi fakakaukau kehekehe lolotonga e houalotú.
-
ʻOku kamata ke fifili ʻa Tōmasi pe ko e hā e meʻa ʻoku hoko kiate iá. ʻOkú ne tui ki he ʻOtuá pea ʻoku moʻoni ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ʻokú ne ongoʻi hangē ʻoku vaivai ʻene fakamoʻoní ʻi hono fakafehoanaki ki he kau mēmipa kehe ʻo e uōtí. ʻOkú ne fifili pe ʻoku malava nai ke ne ʻiloʻi ʻiate ia pē ʻa e ngaahi meʻa kotoa ʻoku fakamoʻoni ki ai ʻa e niʻihi kehé.
-
ʻI he lolotonga e lele ʻa e houalotú, kuo ʻikai toe tokanga ʻa Lisi ki he ngaahi fakamoʻoní. ʻOkú ne fakakaukauloto pē, “Kuó u ʻosi fanongo au he meʻa kotoa pē ʻoku nau lea ʻakí, pea kuó u ʻosi ʻiloʻi ʻoku moʻoni kotoa ia.” Kuó ne ongoʻi foki ʻoku hōloa ʻene ongoʻi ko ia ke lau e folofolá mo ʻalu ki he seminelí koeʻuhí ʻokú ne ongoʻi ʻoku ʻosi mālohi feʻunga pē ʻene fakamoʻoní.
-
Fakakakato ʻa e ʻekitivitī ko ʻení, ʻo fili ha taha ʻo e ngaahi fokotuʻutuʻu kimuʻá ke ke tokanga taha ki ai:
Fakamatalaʻi ʻa e founga te ke fakaʻaongaʻi ai e ngaahi tefitoʻi moʻoni takitaha ʻo hono maʻu ʻo e ʻilo fakalaumālié ke tokoni kia Tōmasi pe Lisi ʻi hona tūkungá. Kapau ʻe fiemaʻu, ʻe lava ke tokoniʻi koe ʻe he ngaahi fehuʻi ko ʻení.
Ngāue ʻi he tuí
-
Ko e hā te ke lava ʻo vahevahe mei he palakalafi ko ʻení ke tokoni kia Tōmasi pe Lisi ke na ngāue ʻi he tuí?
-
ʻE tokoni fēfē ʻa e ngaahi moʻoni mei he 2 Nīfai 28:30 kia Tōmasi pe Lisi ke na ngāue ʻi he tuí?
Vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
-
ʻI hoʻo fakaʻaongaʻi ʻa e meʻa kuó ke ako mei he 2 Nīfai 28:30, ko e hā ha meʻa te ke lava ʻo vahevahe ke tokoniʻi ʻa Tōmasi pe Lisi ke na vakai ki hona tūkungá ʻo hangē ko ia ko e ʻafio mai ki ai ʻa e ʻEikí?
-
Ko e hā ha ngaahi moʻoni kehe te ke lava ʻo vahevahe ke tokoniʻi kinaua ke na vakai ki he ngaahi meʻa ʻoku na hohaʻa ki aí ʻaki ha fakakaukau ʻoku taʻengatá?
-
Ko e hā ʻokú ke ʻilo fekauʻaki mo e ʻOtuá ʻe lava ʻo tokoni ke na vakai kiate kinaua ʻo hangē ko ʻEna vakai maí?
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Ko e hā ka ʻaonga ai kia Tōmasi pe Lisi ke talanoa mo ʻena mātuʻá pe kau taki ʻo e siasí fekauʻaki mo ʻena ngaahi fakakaukaú?
-
Ko e hā ha ngaahi potufolofola pe talanoa ʻokú ke lava ʻo fakakaukau ki ai ʻe ala tokoni kiate kinaua?