Seminare
2 Nifae 16: “Ua Paia, Ua Paia, Ua Paia Lava, le Alii”

“2 Nifae 16: ‘Ua Paia, Ua Paia, Ua Paia Lava, le Alii,’” Tusi Lesona a Tagata o le Vasega o le Tusi a Mamona (2024)

“2 Nifae 16,” Tusi Lesona a Tagata o le Vasega o le Tusi a Mamona

2 Nifae 16

“Ua Paia, Ua Paia, Ua Paia Lava, le Alii”

Ata
O Keriso ma le Foafoaga, saunia e JD Sullivan

Na i ai sau aafiaga na faigata ona faamatala i upu? Atonu e moni lena mea mo Isaia ina ua ia tusi e uiga i le vaai i le Alii i Lona mamalu atoa. Ina ia fesoasoani e talanoaina lenei aafiaga, sa faaaoga ai e Isaia le gagana faafaatusa e faamatala ai le mana o le Alii ma le paia ma lagona patino o Isaia o le le atoatoa. Sa faamamaina o ia e le Alii mai ana agasala ma valaauina o ia e avea ma perofeta. O lenei lesona e mafai ona fesoasoani ia te oe e iloa ai le gafatia e le Alii ona faamagalo ma faamama oe.

Gaoioiga e Ono Mafai Ona Aoao Ai

O le pule ma le mamalu o Iesu Keriso

O nisi perofeta ma isi na maua le avanoa e vaai ai ia Iesu Keriso i Lona mamalu matagofie uma.

  • O a nisi o mafuaaga na asiasi mai ai le Alii i tagata eseese i le talafaasolopito atoa o le lalolagi?

Faaalu sina taimi e vaai ai i ata nei ma mafaufau po o le fea aafiaga e sili ona e fiafia i ai.

Ata
O Le Liuaina, saunia e Carl Bloch

O Le Liuaina, saunia e Carl Bloch

Ata
O Keriso i le Laueleele o Nuumau, saunia e Simon Dewey

O Keriso i le Laueleele o Nuumau, saunia e Simon Dewey

Ata
O Le Uluai Faaaliga, saunia e Walter Rane

O Le Uluai Faaaliga, saunia e Walter Rane

Ata
O Iesu Ua Faaali atu i le Perofeta o Iosefa Samita ma Oliva Kaotui, saunia e Walter Rane

O Iesu Keriso ua Faaali atu i le Perofeta o Iosefa Samita ma Oliva Kaotui, saunia e Walter Rane

  • O a ni manatu po o ni lagona e te ono oo i ai i le afioaga o le Alii?

Sa vaai Isaia i le Alii i Lona mamalu atoa ina ua valaauina o ia o se perofeta. Sa ia faamaumauina lenei aafiaga ma sa faaaofia ai e Nifae i ana tusitusiga. (Tagai Isaia 6 ma le 2 Nifae 16.)

Faitau le 2 Nifae 16:1–4, ma vaavaai pe na faapefea ona faamatala e Isaia mea sa ia vaaia. Ona sa faaaoga e Isaia le gagana faafaatusa e faamatala ai lona aafiaga, o faamalamalamaga nei atonu e aoga:

  • Lau: O le vaega pito i lalo o le ofu talaloa o le Alii, lea e mafai ona faatusa i Lana amiotonu, mana, ma le mama a’ia’i. E taua le vaaia e Isaia ua “faatumulia ai le malumalu” (2 Nifae 16:1).

  • Serafi: O tagata agelu e auauna atu i faamasinoga a le Atua (tagai Bible Dictionary, “Seraphim”). O apaau o le serafi o se faatusa o lo latou mana e gaoioi ai pe galulue ai (tagai i le Mataupu Faavae ma Feagaiga 77:4).

  • Asu po o le Ao: E masani lava o se faatusa o le afio ai o le Atua (tagai Esoto 19:18; Faaaliga 15:8).

  • O a upu po o fasifuaitau mai nei fuaiupu e fesoasoani e te malamalama ai i le mamalu o le Alii?

  • O le a sou manatu i ni ou lagona pe ana e vaai i lenei mea?

Faitau le 2 Nifae 16:5 e iloa ai le tali a Isaia i le vaai atu i le Alii.

  • O a upu po o fasifuaitau e fesoasoani e te malamalama ai sa iloa e Isaia ana agasala ma vaivaiga?

  • O a nisi o mafuaaga atonu e lagona ai e tagata i ona po nei le le mama po o le le agavaa i luma o le Atua?

  • O a ni auala e mafai ona lelei mo i tatou le iloaina o o tatou sese a o tatou latalata atili atu i le Alii?

E aveese ma le loto i ai e le Alii a tatou agasala

Faitau le 2 Nifae 16:6–7, ma vaavaai mo le isi mea na tupu ia Isaia. Atonu e fesoasoani le manatua o fatafaitaulaga sa faaaoga i aso anamua i tapuaiga i le malumalu.

  • E faapefea ona e aoteleina mea na tutupu?

  • O le a sou manatu i le mea e ono faatusa i ai lenei mea?

Mafaufau i le aafiaga o Isaia i le fatafaitaulaga ma pe mafai faapefea ona aoao atu e uiga i le faamagaloga o agasala ma le mama e ala i le Togiola a Iesu Keriso.

  • O le a sou manatu na faapefea ona aafia Isaia i le aveeseina e le Alii o ana agasala?

  • O a ni upumoni o fesoasoani nei fuaiupu ia oe e malamalama ai e uiga i le Alii?

O se upumoni e tasi e mafai ona tatou aoaoina o le, e i ai i le Alii le mana e faamamaina ai i tatou.

E i ai taimi, atonu tatou te le manatua ai ma lagonaina le taua o lenei upumoni. Sa faasoa mai e Brother Bradley R. Wilcox o le Au Peresitene Aoao o Alii Talavou ia upu a se alii talavou na ia ta’ua o Damon. Sa faasoa mai e lenei alii talavou manatu ma lagona sa ia te ia e uiga i ana agasala.

Ata
Brother Bradley R. Wilcox

Sa tusia e Damon: … “Sa ou lagonaia pea lava le maasiasi faapea ou te lē mafai ona faasa’oina ni mea. … Ua tonu ia te a’u ua onomea lava ia te a’u le lagonaina o le lofituina i taimi uma. Ua ou manatu atonu ua inoino le Atua ia te a’u ona sa ou le loto e galue malosi ma solipalaina lenei faaosoosoga ma tumau ai. Ou te tuua i se vaiaso ma o nisi taimi o se masina, ona ou toe fo’i a lea ma mafaufau, “O le a le lava so’u lelei, o le a la le aoga o le taumafai?” (Bradley R. Wilcox, “O Le Agavaa E Le o le Atoatoa,” Liahona, Nov. 2021, 62)

  • Aisea e ono maua ai e se alii talavou e pei o Damon nei manatu?

Ata
aikona, faamaumau

  1. Faamaea le gaoioiga tusitusi lenei:

Vaai faalemafaufau e faapea, sa e maua le avanoa e fesoasoani ai i se tasi e pei o Damon. Mafaufau i le aafiaga o Isaia. Ma le isi, mafaufau i mea ua e iloa patino e uiga i le Faaola e mafai ona e faasoa atu. Tusi i lalo mea e mafai ona fesoasoani. E mafai foi ona e sueina soo se mau po o faamatalaga mai taitai o le Ekalesia e mafai ona e faaaogaina i lau faamalamalamaga. E mafai ona fesoasoani faataitaiga nei:

Na aoao mai Elder Dieter F. Uchtdorf o le Korama a Aposetolo e Toasefululua:

Ata
Elder Dieter F. Uchtdorf

E le manaomia e le Atua ni tagata e le pona. Na te sailia i latou o e o le a ofoina atu o latou “loto ma se mafaufau malie” [Mataupu Faavae ma Feagaiga 64:34], ma o le a Ia faia i latou ia “atoatoa ia Keriso” [Moronae 10:32–33]. (Dieter F. Uchtdorf, “Five Messages That All of God’s Children Need to Hear” [Faigalotu a le Iunivesite o Polika Iaga, Aok. 17, 2021], 3, speeches.byu.edu)

O se vaaiga fou

Faitau le 2 Nifae 16:8 e vaai ai i le mea na faia e Isaia ina ua uma ona faamamaina e le Alii.

  • O le a sou manatu na faapefea e le aafiaga o Isaia i le faamamaina ona aafia ai lana tali i le fuaiupu 8?

Ina ua mavae lenei faaaliga vaaia, sa auauna atu ma le loto i ai Isaia i le Alii. I le aluga o nai tausaga na sosoo ai, sa ia fesoasoani ai e taiala tagata o Iuta. O aoaoga ma tusitusiga a Isaia ua musuia ai tagata e le mafaitaulia, ma sa sili atu ona sii mai o ia e le Faaola nai lo se isi lava perofeta.

Na suia foi Damon. Faatasi ai ma se fesoasoani a se taitai o le Ekalesia, sa iloa ai e Damon e lei silasila ifo le Alii ia te ia i se faamasinoga ita ae i le alofa mutimutivale, ma le manao e fesoasoani ia te ia ia faaleleia atili. Faitau upu a Damon ina ua ia maua se vaaiga fou e uiga i le Atua:

Ata
Brother Bradley R. Wilcox

Fai mai Damon: … O le taimi nei ua matuai itiiti atu le taimi ou te faaaluina e inoino ai ia te a’u lava ona o mea sa ou faia, ma ua tele na’uā le taimi ou te alofa ai ia Iesu ona o mea sa Ia faia mo au.” (Bradley R. Wilcox, “O Le Agavaa E Le o le Atoatoa,” Liahona, Nov. 2021, 62)

  • Na faapefea e aafiaga o le Togiola, alofa, ma le faamagaloga a le Faaola ona uunaia ai lou olaga?

Mafaufau loloto i le fesili lenei a o e faaiuina lau suesuega o lenei mataupu:

  • O le a sou manatu o le a se mea e mafai ona e faia ia loloto atili ai lou lagonaina o le alofa ma le faamagaloga a le Faaola i lou olaga?