2 Nifae 9:50–52

“O Mai i le Paia e Toatasi o Isaraelu”

aiga o loo faitauina faatasi ia tusitusiga paia

Pe na i ai se taimi na e faamoemoeina ai le fiafia tele mai se mea na ona le fiafia ai mulimuli ane? Na faaiuina e Iakopo lana lauga e ala i le fautuaina o sa Nifae e aloese mai le faaaluina o le taimi po o tupe i mea o le a le maua ai le faamalieina tumau. Sa ia valaaulia lona nuu e o mai ia Iesu Keriso ma taumamafa fiafia i faamanuiaga o le talalelei. O lenei lesona ua faamoemoe e fesoasoani ia te oe ia lagonaina se naunautaiga sili atu e saili faamanuiaga ma le faamalieina lea e na o Iesu Keriso lava e mafai ona maua ai.

Gaoioiga e Ono Mafai Ona Aoao Ai

Faamalieina o lo tatou matelaina ma le fia inu

Mafaufau i se taimi o lou olaga na e fia ai tele ai pe fia inu.

• O a meaai po o meainu e sili ona faamalieina ma aoga i tulaga faapenei? O a meaai po o meainu e le aoga? Aisea?

Atonu ua e matauina o o tatou agaga, e pei o o tatou tino, e manaomia le fafagaina ma le faamalieina.

• O a nisi o auala e mafai ona tatou tuuina atu ai meaai tumau po o le faamalieina i o tatou agaga?

• O a mea e liliu atu i ai tagata mo le faamalieina e mafai ona tuua ai i latou ma le lagonaina o le gaogao faaleagaga?

• Aisea e te manatu e liliu atu ai tagata i nisi o taimi i mea e le aumaia ai le faamalieina tumau?

Mafaufau pe fesootai faapefea nei fesili i lou olaga.

• E iai ni mea e te liliu atu i ai mo le fiafia ma le faamalieina e lē faamalieina moni ai ou manao? O le a se mea na fesoasoani ia te oe e lagona ai le filemu tumau ma le fiafia i lou olaga?

• A o e suesue i le aso, vaavaai mo upumoni e mafai ona fesoasoani ia te oe e maua ai faamanuiaga ma le faamalieina lea e na o Iesu Keriso e mafai ona ofoina mai.

“Taumamafa fiafia i mea e le fano”

Manatua mai lau suesuega o le 2 Nifae 9:27–49 faapea na lapataia e Iakopo lona nuu mai faiga e tumu i le agasala sa latou faia. Ona faaiu lea e Iakopo lana saunoaga i se valaaulia taua.

Faitau le 2 Nifae 9:50–52, ma vaavaai mo le valaaulia a Iakopo i lona nuu.

• O a nisi o upu po o fasifuaitau mai nei fuaiupu e te ilo e taua? Aisea?

• O a ni mea ua fesoasoani nei fuaiupu e te malamalama ai e uiga i finagalo o le Iesu Keriso mo i tatou? O le a se mea ua latou aoao mai ia te oe e uiga i mea ua Ia ofoina mai ia i tatou?

O le upumoni e tasi e mafai ona tatou aoao mai nei fuaiupu o le taimi tatou te o mai ai ia Iesu Keriso, e mafai ona faamalieina o tatou agaga.

Faaaogaina o mau fefaasinoa’i e faaloloto ai lou malamalama

O le mauaina o fuaitau o mau e fesootai i mea o loo e suesueina e mafai ona avea o se auala aoga e faaloloto ai lou malamalama ma le talisapaia o mea o loo i tusitusiga paia.

Faataitai lenei tomai e ala i le mauaina o mau fesootai e fesootai i aoaoga o loo i le 2 Nifae 9:50–52.

Mafaufau e fatu se ata e talitutusa ma le mea lenei i lau api talaaga mo suesuega ma tusi ai le “2 Nifae 9:50–52” i le li’o ogatotonu. A o e mauaina mau fesootai e te manao e manatua, e mafai ona e tusia mau faasino i isi li’o.

kalafa o le li’o

O lau laasaga muamua mo le sueina o mau fefaasinoai o le vaavaai lea mo mau faasino ma autu o loo lisiina i vaefaamatalaga. O le isi, mafaufau e faailoa upu autu mai le 2 Nifae 9:50–52 ma sailiili i na upu po o faaupuga e faatatau i ai i le Taiala i Tusitusiga Paia, le Taiala mo Autu, po o le faatinoga o le sailiga o le Potutusi o le Talalelei.

O nisi nei o upu po o fasifuaitau atonu e te mafaufau e sailia: sau; vai ola; faamalieina; faalogo mai ia; taumafataga; tatalo; faafetai; olioli.

aikona, faamaumau

1. Faamaea mea nei:

   • O a ni mau-fefaasinoai se lua na e mauaina?

   • Na faapefea e nei mau-fefaasinoai ona faalautele ai lou malamalama po o le talisapaia o aoaoga o loo i le 2 Nifae 9:50–52?

Faaaogaina o mea ua e aoaoina

Mafaufau i mea ua e aoaoina e uiga ia Iesu Keriso i le aso ma pe mafai faapefea e nei aoaoga ona faamanuiaina oe i ou tulaga o i ai nei.

aikona, faamaumau

2. Ina ia fesoasoani ia te oe e faagasolo mea ua e aoaoina, tali ia le itiiti ifo ma le lua fesili nei:

   • O le a se mea ua e aoaoina pe lagonaina e uiga ia Iesu Keriso e te manao e manatua?

   • E mafai faapefea e le filifili e mulimuli ia Iesu Keriso ona maua ai e lou agaga le faamalieina tumau?

   • O a nisi o filifiliga patino e mafai ona e faia o le a aumaia ai le faamalieina tumau e ala mai ia Iesu Keriso i lou olaga?

Tuu i le faitalia: O e Manao e Aoao Atili?

2 Nifae 9:50–51. O le a le uiga o le tala a Iakopo ina ua ia fai mai e sau e faatau “e aunoa ma se tupe ma aunoa ma se tau”?

E mafai e tagata uma ona maua faamanuiaga ua ofoina mai e Iesu Keriso, e tusa lava po o a tulaga tautupe po o nisi lava agavaa faalelalolani. E ui o nei faamanuiaga e le manaomia ai ni tupe faaletino, ae e i ai se mea e tatau ona tatou faia e maua ai. O fea se isi mea e mafai ona ou alu iai e aoao atili ai e uiga i le faapotopotoina o Isaraelu?

Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Pe a fesiligia i tatou i mea faigata, e oo lava i mea e feteenai ma faananauga o o tatou loto, ia manatua o le faamaoni tatou te folafola atu i le faamoemoe o Keriso o le tuuto silisili lea o o tatou olaga. E ui ina faamautinoa mai e Isaia ia i tatou o loo avanoa “e aunoa ma se tupe ma aunoa ma se tau” [Isaia 55:1]—ae ua—mtatau ona tatou saunia, e faaaogaina ai le fuaitau a T. S. Eliot, “ia tatou tuuina atu mea uma ua ia i tatou” [“Little Gidding,” i le T. S. Eliot: Collected Poems, 1909–1962 (1963), 209]. (Jeffrey R. Holland, “O Le Oa Silisili,” Liahona, Nov. 2021, 9.)

Na aoao mai Peresitene Marion G. Romney (1897–1988) o le Au Peresitene Sili:

Peresitene Marion G. Romney

A uma le olaga i le lalolagi ma oo mai mea i la latou vaaiga moni, o le a manino atili la tatou vaai ma iloa mea ua ta’u soo mai e le Alii ma ana perofeta ia i tatou, o fua o le talalelei ua na o le pau ia o faamoemoega e agavaa ai mo taumafaiga atoatoa o le olaga. E maua e a latou oa moni—tamaoaiga i le silafaga a le Alii i tulaga faatauaina. (Marion G. Romney, i le Conference Report, Oct. 1949, 39)

E faapefea ona ese mea ua ofoina mai e Iesu Keriso ia i tatou mai mea e fiafia i ai le lalolagi?

Na aoao mai Elder Ulisses Soares o le Korama a Aposetolo e Toasefululua:

Elder Ulisses Soares

O loo taufai saili tagata i soo se mea mo se mea. I la latou lava ala, o le mea o loo latou sailia moni o le fiafia. Peitai, o le mea moni lava ia, e toatele e le o maua le fiafia “ona ua latou le iloa le mea e maua ai” (Mataupu Faavae ma Feagaiga 123:12).

Talu ai latou te le iloa le mea e maua ai le fiafia moni ma le tumau, ua latou sailia ai i mea e aumaia moni ai na o le fiafia e le tumau—o le faatauina o mea, sailia o le mamalu ma viiga mai le lalolagi e ala i amioga e le talafeagaai, pe taulai atu foi i le aulelei ma le lalelei faaletino.

O le tuinanau e tele ina fenumiai ma le fiafia. E foliga mai o le tele lava ina sailia e tagata o le tuinanau e le tumau, o le faaitiitia foi lea o lo latou fiafia. E masani lava, o le tuinanau e mo na o sina taimi puupuu lava. (Ulisses Soares, “Paths to True Happiness,” Ensign, Ape. 2018, 14)