1 Nephi 19–22

“Sila Mahimo nga Makalimot, apan Ako Dili Makalimot Kaninyo”

Ang maayong magbalantay

Unsa ang imong bation kon ikaw mahinumdoman sa usa ka tawo nga importante kanimo? Samtang nagtudlo mahitungod sa pagkatibulaag ug pagpundok sa Israel, si Nephi migamit sa mga panagna ni Isaias sa pagpakita nga ang Ginoo dili makalimot sa nagkatibulaag nga balay ni Israel. Kini nga leksiyon gituyo aron sa pagtabang kanimo nga mobati sa gugma sa Ginoo alang kanimo ug sa tanang mga tawo ug sa Iyang tinguha sa pagpundok kaninyo ngadto Kaniya.

Ang gugma sa Manluluwas alang kanato

Adunay mga higayon nga ang matag usa kanato mahimong makaila ug makabati sa gugma sa Dios sa atong mga kinabuhi, apan sa ubang mga higayon tingali dili nato kini mailhan. Hunahunaa nga nakigsulti ka sa usa ka higala nga nisulti kanimo nga dili siya segurado nga gihigugma siya sa Dios.

• Unsa kaha ang imong mapaambit gikan sa mga kasulatan nga makatabang sa imong higala?

• Unsa nga mga kasinatian ang mahimo nimong ipaambit sa imong higala kon giunsa nimo pagkahibalo ug pagkabati ang gugma sa Langitnong Amahan ug ni Jesukristo?

Pamalandongi ang imong kaugalingon nga mga pagbati mahitungod sa gugma sa Dios alang kanimo, lakip ang bisan unsang mga pangutana o mga kabalaka nga tingale aduna ka. Samtang magtuon ka, pangitaa ang mga kamatuoran nga makatabang nimo nga mas makasabot ug makabati sa gugma sa Langitnong Amahan ug ni Jesukristo kanimo.

Si Nephi nagtudlo mahitungod sa gugma sa Manluluwas alang kanato

Sa 1 Nephi 19, si Nephi nanagna sa umaabot nga kinabuhi ug misyon ni Jesukristo. Basaha ang 1 Nephi 19:7–10, nga mangita sa unsay gitudlo ni Nephi kon unsaon pagtratar si Jesukristo sa Iyang panahon dinhi sa yuta ug nganong andam Siya nga trataron niini nga paagi.

• Unsa nga mga pulong o hugpong sa mga pulong ang mipatigbabaw kanimo gikan niini nga mga bersikulo? Ngano man?

• Sa unsang paagi nga ang pagsabot sa mga pagtulun-an niini nga mga bersikulo makaapekto sa imong mga pagbati alang sa Langitnong Amahan ug ni Jesukristo?

Human sa pagrekord sa iyang kaugalingong mga panagna mahitungod ni Jesukristo, si Nephi mipaambit sa mga panagna gikan sa propeta sa Daang Tugon nga si Isaias mahitungod sa pagkatibulaag ug pagpundok sa Israel. Kini nga mga panagna importante kang Nephi ug sa iyang pamilya, kinsa natibulaag gikan sa ilang yutang natawhan sa Jerusalem tungod sa pagkadautan sa mga tawo nga nagpuyo sa maong dapit. Ang mga panagna ni Isaias nagpakita nga daghan sa mga Israelita ang mobati nga nakalimtan sa Ginoo sa ilang pagkatibulaag nga kahimtang.

Basaha ang 1 Nephi 21:14–16 ug pangitaa ang mga pulong sa Ginoo niadtong mobati nga nakalimtan.

Ang gugma sa Manluluwas gipakita pinaagi sa Iyang kaandam sa pagpundok sa mga tawo ngadto Kaniya

Ang katawhan sa karaang Israel nagkatibulaag sa matag higayon nga sila mohunong sa pagsimba kang Jehova ug molapas sa ilang mga pakigsaad ug sa mga sugo sa Dios (tan-awa sa 2 Nephi 6:10–11; 10:3–6). Ang katawhan sa Israel mapundok sa higayon nga sila moduol kang Kristo, modawat sa Iyang ebanghelyo pinaagi sa bunyag, ug motuman sa Iyang mga sugo. Ang Manluluwas misaad sa nagkatibulaag nga Israel nga Siya dili makalimot kanila ug nga Siya mopundok kanila ngadto Kaniya sa kataposang mga adlaw (tan-awa sa 1 Nephi 15:13–14; 2 Nephi 6:11; 9:1–2; 10:7–8).

Tun-i ang mga ulohan sa kapitulo sa 1 Nephi 21 ug 22 aron mas masabtan kon unsa ang gipanagna ni Isaias ug gitudlo niini nga mga kapitulo.

Tun-i ang mosunod nga mga tudling sa kasulatan mahitungod sa pagpundok sa Israel sa ulahing mga adlaw. Hatagi og pagtagad ang mga pulong o hugpong sa mga pulong nga nagpakita sa gugma sa Ginoo alang sa Iyang mga katawhan.

• 1 Nephi 22:9–12

• 1 Nephi 22:24–25

• 3 Nephi 22:7–8

Sa imong pagtapos sa leksiyon karon, hunahunaa unsay imong nakat-onan ug gibati mahitungod sa gugma sa Dios. Hunahunaa kon sa unsang paagi ang Dios nakahinumdom ug mitabang kanimo nga adunay kalooy ug pagkamabination. Unsa ang imong mahimo sa pagpakita og pasalamat alang sa unsay Iyang nabuhat alang kanimo? Ikonsiderar ang pagrekord sa imong mga hunahuna ug espirituhanong mga impresyon diha sa imong journal sa pagtuon.

Opsiyonal: Gustong Makakat-on Pa og Dugang?

Sa diha nga ako makasala, ako ba dili takos sa gugma sa Dios?

Si Brother Bradley R. Wilcox sa Kinatibuk-ang Kapangulohan sa Young Men mitudlo:

Brother Bradley R. Wilcox

Hinumdomi nga ang kausaban posible, ang paghinulsol usa ka proseso, ug ang pagkatakos dili ang pagkawalay tatsa. Labing importante, hinumdomi nga ang Dios ug si Kristo andam nga motabang kanato dinhi mismo ug karon. …

Daghan kaayo ang nasakitan tungod sa nabungkag ug naabusahan nga mga relasyon mao nga lisod alang nila nga motuo sa kalooy ug pagkamainantoson sa Dios. Sila nanlimbasog sa pagkakita sa Dios kon unsa Siya—usa ka mahigugmaon nga Amahan kinsa motabang kanato sa atong mga panginahanglan ug nakahibalo unsaon sa “paghatag sa mga maayo nga butang ngadto kanila nga mangayo kaniya” [3 Nephi 14:11]. Ang Iyang grasya dili lang usa ka premyo alang sa mga takos. Kini mao ang “balaang panabang” nga Iyang gihatag nga motabang kanato nga mahimong takos. Dili lang kini usa ka ganti alang sa mga matarong. Kini mao ang “gasa sa kalig-on” nga Iyang gihatag nga motabang kanato nga mahimong matarong. [Dieter F. Uchtdorf, “Ang Gasa sa Grasya,” Liahona, Mayo 2015, 107]. Dili lamang kita naglakaw padulong sa Dios ug ni Kristo. Kita naglakaw uban Kanila. (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62, 67)

Ngano nga gikompara ni Kristo ang Iyang kaugalingon sa usa ka inahan?

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Nangutana si Jehova, “Mahimo ba sa usa ka inahan sa pagkalimot sa iyang masuso nga anak, nga siya walay kaluoy diha sa iyang anak nga lalaki sa iyang sabakan?” Sama nga dili mahitabo nga ang mahigugmaong inahan mahikalimot sa iyang masuso nga anak, si Jehova mipahayag nga ang Iyang debosyon mas nagmakanunayon. Siya mipamatuod: “Oo, sila mahimo nga makalimot, apan Ako dili makalimot kaninyo. … Tan-awa, Ako mikulit kaninyo diha sa mga palad sa akong mga kamot; ang inyong mga paril anaa kanunay sa akong atubangan” [1 Nephi 21:15–16]. Tungod kay si Jesukristo milahutay sa walay kataposan matubsanon nga sakripisyo, Siya hingpit nga makasabot kanato [tan-awa sa Alma 7:11–13]. Siya sa kanunay nasayod bahin kanato ug sa atong mga kahimtang. (Dale G. Renlund, “Makapungot nga Pagkadili Makiangayon,” Liahona, Mayo 2021, 42-43)

Sa unsang paagi nato maila ang gugma sa Dios alang kanato?

Si Sister Susan H. Porter sa Kinatibuk-ang Kapangulohan sa Primary mitudlo:

Sister Susan H. Porter

Ang gugma sa Dios dili makita sa mga sirkumstansiya sa atong kinabuhi kon dili sa Iyang presensiya sa atong kinabuhi. Makahibalo kita sa Iyang gugma kon kita makadawat sa kalig-on nga lapas sa atong kalig-on ug kon ang Iyang Espiritu magdala og kalinaw, kahupayan, ug direksiyon. Usahay mahimong malisod nga mobati sa Iyang gugma. Makaampo kita aron mabuka ang atong mga mata nga makakita sa Iyang kamot sa atong kinabuhi ug makakita sa Iyang gugma diha sa katahom sa Iyang mga gilalang. (Susan H. Porter, “Ang Gugma sa Dios: Ang Labing Hingpit nga Kalipay sa Kalag,” Liahona, Nob. 2021, 35)