Rebyo 2 sa Doktrinal nga Kahanas sa Basahon ni Mormon

Isag-ulo ang mga Pakisayran ug mga Mahinungdanon nga Hugpong sa mga Pulong sa Kasulatan

Ang paghinumdom sa mga tudling sa kasulatan ug unsay gitudlo niini makatabang nimo sa daghang paagi. Kini nga leksiyon gituyo aron sa pagtabang kanimo sa pagsag-ulo sa mga pakisayran sa kasulatan ug sa mahinungdanon nga hugpong sa mga pulong sa kasulatan alang sa pipila ka mga tudling sa doktrinal nga kahanas sa Basahon ni Mormon.

Paggamit sa mga kasulatan sa pagpakigbahin sa ebanghelyo

Hunahunaa nga usa sa imong mga higala adunay mga pangutana mahitungod sa pipila sa imong mga gituohan isip miyembro sa Ang Simbahan ni Jesukristo sa mga Santos sa Ulahing mga Adlaw, lakip ang imong mga pagtuo mahitungod ni Jesukristo, sa atong katuyoan dinhi sa yuta, ug sa mga sugo sa Dios. Dihang naghunahuna ka kon unsaon nimo sa pagtubag, nakahukom ka nga gusto nimong ipakita kaniya ang mga kasulatan gikan sa Basahon ni Mormon aron makatabang sa pagtubag sa iyang mga pangutana.

• Makahunahuna ka ba og makatabang nga mga tudling gikan sa Basahon ni Mormon nga mahimo nimong ipakita sa imong higala?

• Sa unsang paagi nga ang pagkahibalo sa mga tudling sa doktrinal nga kahanas ug sa ilang mahinungdanon nga hugpong sa mga pulong sa kasulatan makatabang kanimo sa mga sitwasyon nga sama niini?

Kini nga leksiyon makatabang nimo sa pagsag-ulo sa mga pakisayran sa kasulatan ug sa mahinungdanon nga hugpong sa mga pulong sa kasulatan alang sa mga tudling sa doktrinal nga kahanas nga imong tun-an karong tuiga. Ang pagsag-ulo niini nga mga pakisayran sa kasulatan ug hugpong sa mga pulong makatabang kanimo sa imong kinabuhi ug sa imong mga paningkamot sa pagpaambit sa imong mga gituohan ngadto sa uban. Sa ubos mao ang lista sa unang 12 ka mga tudling sa doktrinal nga kahanas sa Basahon ni Mormon uban sa ilang mahinungdanon nga hugpong sa mga pulong sa kasulatan.

Unang 12 ka mga Tudling sa Doktrinal nga Kahanas ug Mahinungdanon nga Hugpong sa mga Pulong

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadtong] naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang iyang kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

Mga kard sa paghinumdom [memory card]

Paggahin og panahon sa paghimo og set sa kard sa paghinumdom [memory card] nga imong magamit sa tibuok tuig. Ibutang ang pakisayran sa kasulatan sa doktrinal nga kahanas sa usa ka bahin sa matag kard ug ang mahinungdanon nga hugpong sa mga pulong sa kasulatan sa pikas nga bahin. Paghimo og mga kard sa paghinumdom [memory card] para sa tanang 12 ka mga tudling sa doktrinal nga kahanas nga nalista sa tsart.

Kon gikinahanglan, gamita ang mosunod nga mga instruksiyon aron matabangan ka sa paghimo sa imong mga kard sa paghinumdom [memory card]:

Lakang 1: Paghimo og 12 ka mga kard

Gamit ang tibuok bahin sa usa ka pirasong papel, pagdrowing og linya paubos diha sa tunga-tunga sa papel aron makahimo og duha ka kolum. Dayon pagdrowing og duha ka pinahigda nga linya babag sa papel aron makamugna og tulo ka kahon nga managsama ang gidak-on sa matag kolum, maghatag kanimo og kinatibuk-ang unom ka kahon. Tan-awa ang mosunod nga hulagway para sa usa ka pananglitan kon unsa dapat ang hitsura sa imong panid:

Walay sulod nga talaan

Baliha ang papel ug buhata ang susama niana nga bahin. Balika kini nga proseso sa lain nga piraso sa papel aron mahimo ang 12 ka mga kahon nga imong gikinahanglan.

Lakang 2: Isulat ang pakisayran sa kasulatan sa doktrinal nga kahanas sa usa ka bahin

Sa usa ka bahin sa imong duha ka papel, pagsulat og pakisayran sa kasulatan gikan sa tsart sa matag kahon. Agi og dugang sa pakisayran sa kasulatan, mahimo ka usab nga magdrowing og usa ka yano nga hulagway nga makatabang kanimo sa paghinumdom sa mahinungdanon nga hugpong sa mga pulong sa kasulatan.

Lakang 3: Isulat ang mahinungdanon nga hugpong sa mga pulong sa kasulatan sa pikas nga bahin

Baliha ang imong mga papel, ug isulat sa matag kahon ang mahinungdanon nga hugpong sa mga pulong sa kasulatan nga motakdo sa pakisayran sa kasulatan sa pikas nga bahin.

Lakang 4: Guntinga ang imong mga kard

Guntinga ang matag usa sa mga kahon nga imong gihimo nga mga kard.

Kon mahuman ka na sa paghimo sa imong mga kard, paggahin og pipila ka adlaw sa pagsag-ulo sa pipila o sa tanan niining mga pakisayran sa kasulatan ug importanteng hugpong sa mga pulong. Ikonsiderar ang pagpangayo og tabang gikan sa mga miyembro sa pamilya ug sa mga higala. Mahimo nimong ikonsiderar ang pagmemorya sa pipila ka mga tudling sa kinatibuk-an niini imbis kay ang importanteng hugpong sa mga pulong sa kasulatan lamang.

• Hain nga mga tudling ug mahinungdanon nga hugpong sa mga pulong sa kasulatan ang imong gibati nga labing makatabang kanimo nga masag-ulo? Ngano man?

• Unsa ang pipila ka mga kamatuoran nga gitudlo niini nga mga tudling mahitungod sa Manluluwas ug sa Iyang ebanghelyo?

• Unsa ang pipila sa mga paagi nga ang pagsag-ulo sa mga pakisayran ug sa mga kamatuoran gikan sa mga kasulatan makatabang kanimo?