1 Nifae 16–18

O Le Liahona: O Se Taiala i le Vao

O Liae ma le Liahona

E i ai ea se taimi e te lagona ai le leiloa ma le le mautonu e uiga i mea e tatau ona e faia pe taulai atu i ai i le olaga? Mata e faapefea ona ese lou olaga pe ana faapea e sili atu ona mafai ona e iloa le taitaiga sa taumafai le Alii e tuuina atu ia te oe? E lei leva ona tuua e le aiga o Liae Ierusalema, ae tuuina atu e le Alii ia i latou se taitaiga faateleina e ala i le Liahona. O lenei lesona e mafai ona fesoasoani ia te oe ia iloa ma mulimuli ai i le taitaiga a le Alii i lou olaga.

O se taiala i le vao

Iloilo ni nai ata faaalia o le meafaigaluega faavavega na tuuina atu ia Liae ae lei leva ona ia taitaia lona aiga mai Ierusalema.

Liahona

Liahona

Liahona

• O le a se mea ua e iloa e uiga i le aitema o loo faaalia i nei ata? (tagai 1 Nifae 16:10).

• O le a lona faamoemoega?

Ina ua uma ona faatonuina e le Alii e malaga mamao atu i le vao, sa ala ae Liae ma maua se meafaigaluega faavavega, po o se meafaitino, na saunia e le Alii. O le Liahona o se “polo apamemea e lua ona vae na tuuina atu ai faatonuga—o se tapasa—ma faatonuga faaleagaga foi ia Liae ma e na mulimuli ia te ia pe a latou amiotonu” (Taiala i Tusitusiga Paia, “Liahona,” scriptures.ChurchofJesusChrist.org).

Vaai faalemafaufau pe faape’i le ala ae i se tasi taeao ma maua i talaane o lou faitotoa se meafaigaluega e pei o le Liahona e mafai ona e faaaogaina e taiala ai oe i le faagasologa o lou aso.

• O le a se mea e ono ese i lou olaga pe afai e i ai se mea e pei o le Liahona e taialaina ai oe?

• O a nisi o tulaga o loo e feagai ai i le taimi nei lea e te manaomia ai se taiala ma se taitaiga faaopoopo?

Sa faamatala e Elder David A. Bednar o le Korama a Aposetolo e Toasefululua se tasi o mafuaaga e tatau ai ona tatou saili ia malamalama atili i le ala e galue ai le Liahona. Matau o le fasifuaitau “faatusa ma se ata faaalia” e faasino i mea faitino, mea e tutupu, tala, po o tagata e fai ma sui o nisi o mea.

Elder David A. Bednar

O le faamatalaina o le Liahona e le Tusi a Mamona, o le faatonu po o le tapasa sa faaaogaina e Liae ma lona aiga i la latou malaga i le vao, ma sa patino lava lona aofia ai i tusitusiga, o se faatusa ma se ata faaalia mo o tatou aso, ma o se lesona taua o mea e tatau ona tatou faia ina ia olioli ai i faamanuiaga o le Agaga Paia. (David A. Bednar, “Ina ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 30)

O mea e tulaga tutusa ai le Liahona ma le Agaga Paia

I lau api faamaumau mo suesuega, fatu se siata e pei o lea o loo i lalo. Mafaufau e lisi nisi o mea e tulaga tutusa ai le Liahona ma le Agaga Paia ua uma ona e iloa. A o e suesue, mafaufau i mea ua e aoaoina e fesoasoani e te malamalama atili ai i le Agaga Paia ma pe faapefea ona e faaaogaina lelei lenei meaalofa i lou olaga.

Foliga o le Liahona	O tulaga e tutusa ai ma le Agaga Paia
Foliga o le Liahona	O tulaga e tutusa ai ma le Agaga Paia

Faitau mau faasino nei, ma faamaumau auiliiliga e uiga i le Liahona i le koluma agavale o lau siata. E mafai ona aofia ai le ala na galue ai le Liahona, le pogai na saunia ai, ma le mea na mafua ai ona na taofia ai lona galueaina. Ona mafaufau lea ma le agaga tatalo pe faapefea e nei auiliiliga e uiga i le Liahona ona fesootai pe faatusa i galuega a le Agaga Paia. Faamaumau tulaga e tutusa ai i le koluma taumatau o le siata. Mo se faataitaiga, i le 1 Nifae 16:10, ua tatou aoao ai faapea na faasino mai e le Liahona le ala e tatau ona o ai Liae ma lona aiga i le vao. E faapena foi, e mafai e le Agaga Paia ona faasino le ala e tatau ona tatou o i ai i le olaga.

• 1 Nifae 16:10

• 1 Nifae 16:15–16

• 1 Nifae 16:18–20, 25–27

• 1 Nifae 16:28

• 1 Nifae 16:29

• 1 Nifae 18:8–13, 21–22

• Alema 37:38–42

aikona, faamaumau

1. Tali fesili nei i totonu o lau api talaaga mo suesuega:

   • O a upumoni e lua pe tolu e sili ona taua na e aoaoina e uiga i le Agaga Paia e ala i le faatusatusaina i le Liahona?

   • O anafea na e iloa ai pe na iloa ai e isi se tasi pe sili atu o nei upumoni e uiga i le Agaga Paia?

   • E faapefea e le saili ia iloa ma mulimuli i le taitaiga mai le Agaga Paia ona aafia ai lou sootaga ma le Tama Faalelagi ma Iesu Keriso?

Faaaoga sina taimi e toe manatunatu ai i lou gafatia e maua ai le taitaiga mai le Agaga Paia ma lona aafiaga i filifiliga e te faia. Mafaufau e faamaumau soo se manatu po o ni uunaiga atonu o ia te oe.

Tuu i le faitalia: O e Manao e Aoao Atili?

E faapefea ona pei le Liahona o le Agaga Paia?

Na aoao mai Elder David A. Bednar o le Korama o Aposetolo e Toasefululua:

Elder David A. Bednar

E faapei foi ona faamanuiaina Liae i ona po anamua, e faapena foi ona tofu i tatou i nei ona po ma se tapasa faaleagaga lena e mafai ai ona taitaiina ma faatonutonu i tatou i la tatou malaga i le olaga nei. …

“A o taitasi i tatou ma fetaomi atu i luma i le ala o le ola, tatou te maua le taitaiga mai le Agaga Paia e faapei foi ona taitaiina Liae e ala i le Liahona. …

E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai. (David A. Bednar, “Ina ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 30–31)

E faapefea ona ou iloa atili le Agaga Paia i lo’u olaga?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

Peresitene Boyd K. Packer

E le talia e le Agaga lo tatou gauai atu e ala i le leotetele po o le luluina o i tatou i se faamalosi. Ae e musumusu mai. E pa’i mai ma le malū lea afai tatou te pisi tele, o le a lē mafai lava ona tatou lagonaina. …

E mai lea taimi i lea taimi o le a ia uunai mai ma le mausali ia tatou gauai atu ai. Ae o le tele lava o taimi, afai tatou te le lagonaina le lagona malu, o le a aluese le Agaga ma faatali sei tatou o atu e saili ma faalogologo ma faapea atu i la tatou ala ma uiga faaalia, e pei o Samuelu o anamua, “Fetalai mai [le Alii e], aua o loo faalogologo atu lau auauna.” (1 Samu. 3:10.) (Boyd K. Packer, “The Candle of the Lord,” EnsignIan. 1983, 53)