“Sukda ang Imong Nakat-onan 1: 1 Nephi 1–15” Manwal sa Magtutudlo sa Basahon ni Mormon (2024)
“Sukda ang Imong Nakat-onan 1: 1 Nephi 1–15” Manwal sa Magtutudlo sa Basahon ni Mormon
Sukda ang Imong Nakat-onan 1
Kini nga leksiyon gituyo aron sa pagtabang kanimo sa pagtimbang-timbang sa mga tumong nga imong gitakda ug sa paglambo nga imong nasinati hangtod karon atol sa imong pagtuon sa Basahon ni Mormon.
Tun-i ang Basahon ni Mormon Adlaw-adlaw
-
Unsa ang pipila ka mga butang nga imong gibuhat kada adlaw o kada gabii?
-
Unsa ang mahimong mahitabo kon imong lat-angan kini nga mga kalihokan sulod sa usa ka adlaw o mas dugay pa?
-
Ngano nga ang matag adlaw nga pagtuon sa kasulatan usa ka butang nga kinahanglan natong paningkamotan nga buhaton?
Pagpili og usa sa mosunod aron sa paghulagway kon kumusta ang imong inadlaw nga pagtuon sa Basahon ni Mormon:
-
Ang akong pagtuon makahuloganon ug makanunayon.
-
Ang akong pagtuon maayo kon kini mahitabo apan dili kaayo kanunay mahitabo.
-
Ako makanunayon sa akong pagtuon apan dili kaayo makakuha niini.
-
Naglisod ko sa pagsabot sa akong gibasa ug panagsa ra nga magtuon sa akong kaugalingon.
-
Wala koy bisan unsang gibuhat aron makab-ot ang tumong sa pagtuon sa kasulatan.
-
Uban pa: ipasabot ang imong tubag.
Natural lang nga adunay mga babag nga moabot sa usa ka inadlaw nga tumong nga sama niini. Ang importante mao ang padayon nga pagpaningkamot.
-
Unsay maayong nahitabo sa imong pagtuon sa Basahon ni Mormon? Unsa ang gusto nimong palamboon o usbon sa lahi nga paagi?
Personal nga mga hunahuna ug mga pagbati mahitungod sa Basahon ni Mormon
Damgo ni Lehi
Paggahin og usa ka minuto sa pagtan-aw niining mga ilustrasyon sa kahoy sa kinabuhi ug pamalandong sa imong nakat-onan.
-
Tubaga ang mosunod nga mga pangutana:
-
Unsa nga nagkalainlaing bahin o simbolo sa damgo ang imong nahinumdoman?
-
Hain sa mga simbolo ang labing mahinungdanon kanimo? Ngano man?
-
Sa unsang paagi nga ang damgo ni Lehi susama sa atong kalibotan karon?
-
Ikonsiderar kon sa unsang paagi nga ang lain-laing mga bahin sa damgo ni Lehi mahimong makatabang sa mga indibidwal sa mosunod nga mga senaryo:
-
Ang usa ka batan-ong lalaki migahin og panahon uban sa grupo sa mga tawo kinsa mipili sa paglapas sa Pulong sa Kaalam ug mipugos kaniya sa pagbuhat sa susama.
-
Ang usa ka batan-ong babaye naghunahuna nga mas seryosohon niya ang iyang pagtuon sa kasulatan kon mokalma na ang iyang tensiyonado nga kinabuhi.
-
Ang usa ka batan-ong lalaki misugod sa pagbati og kaulaw sa iyang pagkamiyembro sa Ang Simbahan ni Jesukristo sa mga Santos sa Ulahing mga Adlaw sa dihang iyang nadungog ang uban nga nagbugalbugal sa mga tawo nga relihiyoso.
-
Tubaga ang mosunod nga mga pangutana:
-
Unsaon nimo paggamit ang damgo ni Lehi sa pagtubag sa matag senaryo?
-
Unsa nga pagtulon-an o kamatuoran gikan sa damgo ni Lehi ang imong gibati nga makatabang nimo nga mas mapaduol sa gugma sa Dios sa imong kinabuhi?
-
Mahimo nimong tumanon ang mga kasugoan
Atol sa leksiyon sa 1 Nephi 3, tingali nakahimo ka og tumong nga mahimong mas matinumanon sa usa ka sugo nga lisod tumanon. Pagpamalandong sa imong pag-uswag paingon niini nga tumong, ug irekord ang imong mga hunahuna diha sa imong journal sa pagtuon o personal nga journal. Ikonsiderar ang mosunod nga mga pangutana samtang imong pamalandongan ug isulat:
-
Kumusta ang imong pagpaningkamot sa pagsunod niini nga sugo?
-
Unsa nga mga kalamposan o mga babag ang imong nasinati?
-
Unsaon nimo pagpahiuyon sa imong plano?
-
Giunsa ka pagpanalanginan sa imong mga paningkamot?
-
Giunsa sa Ginoo pag-andam og paagi aron ikaw magmasulondon?
Kon wala ka naghunahuna og usa ka sugo nga tingali lisod alang kanimo sa pagtuman, paghunahuna na og usa karon. Pagdesisyon kon unsa nga mga aksiyon ang imong mahimo aron sa pagtuman niini sa mas hingpit.
Si Presidente Henry B. Eyring sa Unang Kapangulohan mitudlo nga ang pagsalig ni Nephi sa Ginoo makahatag kanato og pagdasig kon kita maglisod sa pagsunod sa mga sugo sa Ginoo:
Ang batan-on nga si Nephi sa Basahon ni Mormon nagdasig kanato og usa ka tinguha sa pagpalambo sa pagsalig diha sa Ginoo sa pagsunod sa Iyang mga sugo, bisan unsa pa man kini kalisud tan-awon. Si Nephi miatubang og kakuyaw ug posibleng kamatayon sa dihang siya misulti niining mga pulong sa pagsalig nga kita makabati ug kinahanglang mobati og kalig-on sa atong kasingkasing: “Ako moadto ug mobuhat sa mga butang nga ang Ginoo nagsugo, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” [1 Nephi 3:7]. (Henry B. Eyring, “Salig sa Dios, Dayon Lakaw ug Buhata,” Liahona, Nob. 2010, 71)