Pasiunang mga Pahina sa Basahon ni Mormon

Ang Pagpamatuod ni Joseph Smith sa Basahon ni Mormon

“[Gi]hubad … pinaagi sa Gasa ug Gahom sa Dios”

Joseph Smith

© 1998 David Lindsley

Giunsa pagtungha sa Basahon ni Mormon? Giunsa kini paghubad ni Joseph Smith gikan sa wala mailhi nga pinulongan ngadto sa Ingles? Kini nga leksiyon makatabang kanimo nga mas makasabot ug makapasabot giunsa pagtungha sa Basahon ni Mormon “pinaagi sa gasa ug gahom sa Dios” (Doktrina ug mga Pakigsaad 135:3).

Ang pagtungha sa Basahon ni Mormon

icon, rekord

1. Rebyoha ang mosunod nga mga hulagway nga nagpakita sa mga panghitabo atol sa pagtungha sa Basahon ni Mormon. Ihan-ay kini sa hustong kronohikal nga pagkasunod-sunod kon kanus-a ang mga panghitabo nahitabo. Samtang nagtan-aw ka niini nga mga hulagway, hunahunaa kon unsa kaha ang gibati ni Joseph Smith sa matag usa niini nga mga okasyon.

   Ang eksaktong mga tubag anaa sa kataposan niini nga leksiyon.

   • A.

     Pag-imprinta sa unang Basahon ni Mormon

   • B.

     Paghubad sa Basahon ni Mormon

   • C.

     Bungtod sa Cumorah

   • D.

     Si Moroni nagpakita ngadto sa batan-ong si Joseph Smith

   • E.

     Ang Unang Edisyon sa Basahon ni Mormon

“Pinaagi sa gasa ug gahom sa Dios”

Paghunahuna og usa ka tawo nga imong nailhan nga mahimong makabenepisyo gikan sa pagkat-on og dugang mahitungod sa pagtungha sa Basahon ni Mormon. Mahimong usa kini ka tawo nga dili miyembro sa Simbahan, o tingali miyembro sa Simbahan nga nanlimbasog sa iyang pagtuo. Ihulagway sa daklit ang iyang mga kahimtang diha sa imong journal sa pagtuon ug ilha nganong ang pagkat-on og dugang mahitungod sa pagtungha sa Basahon ni Mormon makaayo kanila.

Samtang magtuon ka, pangitaa ang ebidensiya sa kamatuoran nga si Joseph Smith mipatunga sa Basahon ni Mormon pinaagi sa gasa ug gahom sa Dios (tan-awa ang ulohan nga pahina sa Basahon ni Mormon ug Doktrina ug mga Pakigsaad 135:3).

Si Joseph Smith misulat sa iyahang kasinatian atol sa pagtungha sa Basahon ni Mormon.

Basaha ang “Ang Pagpamatuod ni Propeta Joseph Smith” gikan sa pasiuna nga mga pahina sa Basahon ni Mormon. Markahi ang mga panabot o mga detalye nga mahimo nimong ipaambit sa tawo nga imong gihunahuna bag-ohay lang. Kon aduna kay access sa digital nga mga kasulatan, mahimo nimong paminawon ang teksto ug magsunod diha sa imong mga kasulatan.

• Unsa nga mga pamahayag ang imong nakit-an nga nagpakita nga ang Basahon ni Mormon mitunga pinaagi sa gasa ug gahom sa Dios?

• Nganong sa imong hunahuna si Joseph Smith ang napili sa paghubad sa Basahon ni Mormon, kay sa usa ka inila nga eskolar niini nga yugto sa panahon?

• Unsa ang imong nakat-onan mahitungod sa pagtungha sa Basahon ni Mormon nga imong ipaambit ngadto sa tawo nga imong gihunahuna?

Makasaysayanon nga mga detalye

Human nadawat ni Joseph Smith ang mga palid, iyang gihubad ang Basahon ni Mormon pinaagi sa gasa ug gahom sa Dios. “Usahay mohubad si Joseph pinaagi sa pagtan-aw gamit ang mga ighuhubad [ang Urim ug Thummim] ug sa pagbasa sa Iningles sa mga sinulat diha sa mga palid. Kasagaran mas sayon kaniya nga usa lang ka bato sa manalagna ang gamiton. Iyang ibutang ang bato sa manalagna sa iyang kalo, iyang ibutang ang iyang nawong ngadto sa kalo aron masalipdan ang kahayag, ug motan-aw sa bato. Ang kahayag gikan sa bato modan-ag sa kangitngit, mopakita sa mga pulong nga idiktar ni Joseph” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 68).

Basaha ang mosunod nga pamahayag ni Presidente Dallin H. Oaks sa Unang Kapangulohan. Mahimo usab nimong tan-awon ang video nga “Oposisyon sa Tanang mga Butang” diha sa ChurchofJesusChrist.org gikan sa time code 8:18 hangtod 9:24.

Presidente Dallin H. Oaks

Human nakompleto ni Joseph Smith ang paghubad sa Basahon ni Mormon, kinahanglan pa niyang mangita og tigmantala. Dili kadto sayon. Ang kakomplikado niining taas kaayong manuskrito ug ang gasto sa pagprinta ug paghimo sa liboan ka mga kopya sa basahon makalisang. Unang giduol ni Joseph si E. B. Grandin, tag-iya sa Palmyra printer, kinsa mibalibad. Giadto usab niya ang laing printer sa Palmyra, ug gibalibaran usab siya. Mibiyahe siya sa Rochester, 25 milya (40 km) ang gilay-on, ug giadto ang ilado kaayo nga tigmantala sa western New York, kinsa mibalibad usab kaniya. Laing tigmantala sa Rochester ang misugot, apan ang mga kahimtang naghimo niini nga alternatibo nga dili madawat.

Mga semanang milabay, si Joseph tingali naglibog na tungod sa oposisyon sa pagtuman sa balaan nga gisangon kaniya. Wala kadto buhata sa Ginoo nga sayon, apan gihimo niya nga kadto posible. Ikalimang paningkamot ni Joseph, ang ikaduha niyang pagduol sa tigmantala nga taga-Palmyra nga si Grandin, nagmalamposon. (Dallin H. Oaks, “Oposisyon sa Tanang mga Butang,” Liahona, Mayo 2016, 116)

icon, rekord

2. Tubaga ang mosunod nga mga pangutana:

   • Sa unsang paagi nga kining mga detalye sa kasaysayan makaimpluwensiya sa imong personal nga mga pagbati mahitungod sa Basahon ni Mormon?

   • Unsa ang gitudlo kanimo sa pagtungha sa Basahon ni Mormon mahitungod sa Langitnong Amahan ug ni Jesukristo?

Pagpasabot sa pagtungha sa Basahon ni Mormon

icon, rekord

3. Kompletoha ang mosunod:

   Hunahunaa ang tawo nga imong gihunahuna bag-o lang nga makabenepisyo gikan sa pagkahibalo og dugang kon sa unsang paagi mitungha ang Basahon ni Mormon. Pagsuwat og mubo nga kasumahan alang kaniya. Ilakip ang mga detalye nga makatabang sa pagtubag sa mga pangutana nga tingali aduna siya. Ipaambit kon unsay gitudlo niini nga mga panghitabo mahitungod sa Langitnong Amahan ug ni Jesukristo. Ikonsiderar ang paglakip sa imong kaugalingong personal nga pagpamatuod sa Basahon ni Mormon ug giunsa kini paghubad pinaagi sa gasa ug gahom sa Dios.

Ang husto nga pagkasunod-sunod sa mga hulagway sa sinugdanan mao ang D, C, B, A, E.

Opsiyonal: Gustong Makakat-on pa og dugang?

Giunsa ni Joseph Smith paghubad ang Basahon ni Mormon?

Si Elder Ulisses Soares sa Korum sa Napulog Duha ka Apostoles mitudlo:

Elder Ulisses Soares

Ang proseso sa paghubad sa Basahon ni Mormon usa usab ka milagro. Kining sagrado nga karaang rekord wala “gihubad” diha sa tradisyonal nga pamaagi nga ang mga eskolar mohubad sa karaan nga mga teksto pinaagi sa pagkat-on sa karaan nga pinulongan. Kita angay nga molantaw pa sa proseso nga sama og “pagpadayag” uban sa tabang sa pisikal nga kahimanan nga gihatag sa Ginoo, sukwahi ngadto sa “paghubad” pinaagi sa tawo nga adunay kahibalo sa mga pinulongan. Si Joseph Smith namahayag nga pinaagi sa gahom sa Dios siya “[mihubad sa] Basahon ni Mormon gikan sa sinulat sa karaang Ehipto [hieroglyphs], diin ang kahibalo nawala sa kalibotan, diin ang talagsaong hitabo nagbarog [siyang] nag-inusara, usa ka batan-on nga walay kinaadman, sa pagpakig-away sa kaalam sa kalibotan ug gidugangan sa pagkaignorante sa ikanapulog walo nga siglo, uban sa bag-ong pagpadayag.”” Ang tabang sa Ginoo diha sa paghubad sa mga palid—o sa pagpadayag, sa ingon nga pagkasulti—makita usab kon maghunahuna sa milagro sa kamubo sa panahon nga nagamit ni Joseph Smith sa paghubad niini. (Ulisses Soares, “Ang Pagtungha sa Basahon ni Mormon,” Liahona, Mayo 2020, 33)

Portrait of Emma Smith with brown eyes and dark brown hair smoothed back from center part into three ringlets on either side. Small gold colored bead choker, buff shawl with lace collar. Painted from an earlier version in 1843

Giunsa paghubad ang Basahon ni Mormon sa nagkadaiyang pinulongan?