Pasiunang mga Pahina sa Basahon ni Mormon

Pasiuna sa Basahon ni Mormon

Ang Sukaranan sa Atong Relihiyon

Batang lalaki nga nagbasa sa mga kasulatan

Si Joseph Smith mitawag sa Basahon ni Mormon nga tukuranang bato sa atong relihiyon. Sa sulod sa basahon adunay pagdapit sa pagpangutana sa Dios kon kini tinuod. Minilyon ka mga tawo ang misunod niini nga pagdapit ug nakadawat og saksi gikan sa Espiritu Santo sa katinuod sa Basahon ni Mormon. Kini nga leksiyon gituyo aron pagtabang kanimo nga madugangan ang imong tinguha sa pagtuon sa Basahon ni Mormon kada adlaw aron mapalig-on ang imong pagpamatuod sa katinuod niini.

Mga Panalangin gikan sa Basahon ni Mormon

• Hain sa mosunod nga mga panalangin ang imong gibati nga mahinungdanong makaimpluwensiya sa imong inadlaw-adlaw nga kinabuhi? Unsa ang andam nimong buhaton aron makadawat niini?

  • mas dako-dako nga abilidad sa pagpaminaw sa tingog sa Espiritu

  • tubag sa mga pangutana ug direksiyon sa imong kinabuhi

  • mas dako-dako nga abilidad sa pagbatok sa tentasyon ug kadautan

Kini ang pipila sa mga panalangin nga mahimong moabot gikan sa pagtuon sa Basahon ni Mormon.

Basaha ug ikonsiderar ang pagmarka sa pamahayag ni Joseph Smith diha sa paragrapo 6 sa pasiuna sa Basahon ni Mormon.

• Unsa ang mipatigbabaw kanimo gikan sa pamahayag ni Joseph Smith?

Ang sukaranan sa atong relihiyon

Arko

• Ngano nga ang bato sa ibabaw sa sentro sa arko (ang sukaranan) importante kaayo? Unsay mahitabo sa arko kon tangtangon kini?

Si Presidente Ezra Taft Benson (1899–1994) mitudlo:

Presidente Ezra Taft Benson

Ang Basahon ni Mormon mao ang sukaranang bato sa atong pagsaksi kang Jesukristo, kinsa Siya Mismo mao ang bato sa pamag-ang sa tanan nato nga buhaton. Kini nagsaksi sa Iyang pagkatinuod uban sa gahom ug katin-aw. …

… Ang Basahon ni Mormon mao ang sukaranang bato sa atong pagpamatuod. Sama nga ang arko malumpag kon tangtangon ang sukaranang bato, mao usab ang tanan diha sa Simbahan mobarug o mapukan uban sa kamatuoran sa Basahon ni Mormon. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona, Okt. 2011, 54-55)

Ang sukaranan nga bato sa atong saksi ni Jesukristo

• Unsa sa imong hunahuna ang buot ipasabot nga ang Basahon ni Mormon mao ang sukaranan nga bato sa atong saksi ni Jesukristo?

Ang mga manunulat sa Basahon ni Mormon kanunay nga nagpamatuod ni Jesukristo.

icon, rekord

1. Kompletoha ang mosunod ug tubaga ang mga pangutana sa ubos.

Pagpili og bisan unsa nga pahina gikan sa Basahon ni Mormon, ug pangitaa ang matag kasayoran sa Manluluwas niana nga pahina.

• Unsay imong nakit-an mahitungod sa Manluluwas?

• Unsa ang natabang sa mga tudling nga imong nakit-an sa pagsabot o pagbati mahitungod sa Manluluwas?

Hunahunaa kon sa unsang paagi ka mapanalanginan pinaagi sa pagbaton og mas lig-on nga pagpamatuod ni Jesukristo. Samtang magtuon ka sa Basahon ni Mormon, pangitaa ang mga kasayoran ni Jesukristo ug sa unsay imong nakat-onan mahitungod Kaniya. Samtang imong buhaton, ang imong kahibalo ug pagpamatuod sa Manluluwas motubo.

Ang sukaranan nga bato sa atong pagpamatuod

• Hain sa mosunod nga mga pamahayag ang labing naghulagway sa imong mga pagbati mahitungod sa Basahon ni Mormon?

  • Misalig ko sa uban kinsa nakadawat sa ilang kaugalingong personal nga pagpamatuod ug mipasalig nako nga ang Basahon ni Mormon tinuod.

  • Dili ko sigurado kon nasayod ba ko nga ang Basahon ni Mormon tinuod.

  • Nakadawat ko og saksi gikan sa Espiritu Santo nga ang Basahon ni Mormon tinuod.

• Ngano kaha nga gusto sa Langitnong Amahan nga imong mahibaloan nga ang Basahon ni Mormon tinuod?

Basaha ang ikaduha-hangtod-kataposan nga parapo sa pasiuna, ingon man ang Moroni 10:3–5, nga mangita kon unsay imong buhaton aron makahibalo kon ang Basahon ni Mormon tinuod.

• Sumala sa imong nabasa, unsa ang kinahanglang buhaton sa usa ka tawo aron makahibalo kon ang Basahon ni Mormon tinuod?

Si Elder Ulisses Soares sa Korum sa Napulog Duha ka Apostoles mipaambit kon sa unsang paagi nga ang iyang pagpamatuod sa Basahon ni Mormon milambo samtang mitambong siya sa seminary. Mahimo nimong tan-awon ang “Ang Pagtungha sa Basahon ni Mormon,” anaa sa ChurchofJesusChrist.org, gikan sa time code 12:03 hangtod 14:12.

Basaha ang kataposang parapo sa pasiuna sa Basahon ni Mormon, nga mangita kon unsa pa ang ubang kahibalo ang moabot uban sa pagpamatuod sa Basahon ni Mormon.

• Sa unsang paagi nga ang pagbaton og pagpamatuod sa Basahon ni Mormon makaapekto sa imong kinabuhi?

Tun-i ang Basahon ni Mormon kada adlaw

Si Presidente Russell M. Nelson mipaabot kanatong tanan og mga saad kon kita magtuon sa Basahon ni Mormon kada adlaw. Basaha ang mosunod nga pamahayag, o tan-awa ang video “Ang Basahon ni Mormon: Unsa Kaha ang Imong Kinabuhi Kon Wala Kini?” sa ChurchofJesusChrist.org gikan sa time code 11:52 hangtod 13:05.

Presidente Russell M. Nelson

Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabeng pagtakboy sa pornograpiya ug sa ubang matang sa adiksyon.

Sa higayon nga makadungog ko sa uban, lakip sa akong kaugalingon, nga moingon, “Nakahibalo ko nga ang Basahon ni Mormon tinuod,” gusto kong mosinggit, “Nindot na, apan dili pa igo!” Kinahanglan kitang mobati, sa “labing kinahiladman” sa atong kasingkasing [Alma 13:27], nga ang Basahon ni Mormon mao gayod ang pulong sa Dios. Kinahanglan ato gayud kining mabati og maayo nga dili ta gusto nga mabuhi bisan usa ka adlaw nga wala kini. (Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Liahona, Nob. 2017, 62–63)

icon, rekord

2. Tubaga ang mosunod nga mga pangutana:

   • Unsay nakadani nimo niini nga pamahayag?

   • Unsa ang imong gibati mahitungod sa pagdapit sa pagbasa sa Basahon ni Mormon kada adlaw?

Kon wala pa kini nimo mahimo, paghimo og plano sa pagpalig-on sa imong pagpamatuod ni Jesukristo pinaagi sa inadlaw nga pagtuon sa Basahon ni Mormon. Sama pananglit, mahimo kang motakda kon pila ka minuto matag adlaw ka nga magtuon. Mahimo kang magplano unsaon nimo pagpunting kon unsa ang gitudlo sa Basahon ni Mormon bahin sa Manluluwas. Paghunahuna bahin sa bisan unsa nga mga babag nga mahimo nimong atubangon sa imong inadlaw-adlaw nga pagtuon ug kon unsa ang imong mabuhat aron mabuntog kini.

Opsiyonal: Gustong Makakat-on pa og dugang?

Unsa ang usa ka sukaranan?

Aron makat-on og dugang mahitungod sa pulos sa sukaranan, tan-awa ang video “Tan-awa ang Basahon, Tan-awa ang Ginoo” gikan sa time code 5:16 hangtod 6:41.

Kapila gihisgotan sa Basahon ni Mormon si Jesukristo?

Si Elder Gary E. Stevenson sa Korum sa Napulog Duha ka Apostoles mitudlo:

Elder Gary E. Stevenson

Basaha ninyo ang mga tudling niining bililhon nga basahon ug inyong masugatan ang inyong minahal nga Manluluwas, ang Ginoong Jesukristo diha sa hapit matag pahina. Gibana-bana nga gigamit ang lain-laing porma sa Iyang ngalan sa kasagad nga kausa matag 1.7 nga mga bersikulo. (Gary E. Stevenson, “Tan-awa ang Basahon, Tan-awa ang Ginoo,” Liahona, Nob. 2016, 47)

Unsaon nako nga mapanalanginan pinaagi sa pagtuon sa Basahon ni Mormon?

Si Presidente Ezra Taft Benson (1899–1994) mipamatuod:

Presidente Ezra Taft Benson

Ang Basahon ni Mormon wala lamang magtudlo kanato sa kamatuoran, bisan tuod naghimo kini niana. Ang Basahon ni Mormon wala lamang magpamatuod kang Kristo, bisan tuod naghimo kini niana, usab. Apan adunay mga butang nga mas labaw pa. Adunay gahom sa basahon nga magsugod sa pagdagayday diha sa inyong mga kinabuhi sa higayon nga sugdan ninyo ang tinuoray nga pagtuon sa basahon. Makaplagan ninyo ang mas dako nga gahom sa pagpakigbatok sa pagsulay. Makaplagan ninyo ang gahom sa paglikay sa panglingla. Makaplagan ninyo ang gahom nga magpabilin sa higpit ug pig-ot nga dalan. Ang mga kasulatan gitawag og “ang mga pulong sa kinabuhi” [Doktrina ug mga Pakigsaad 84:85], ug walay laing mas tinuod pa kay sa Basahon ni Mormon. Kon kamo magsugod sa pagkagutom ug pag-uhaw niadto nga mga pulong, kamo makakaplag sa kinabuhi nga mas mabungahon. (Ezra Taft Benson, “Ang Basahon ni Mormon—Sukaranang Bato sa Atong Tinuohan,” Liahona,Okt. 2011, 56-57)

Si Presidente Thomas S. Monson (1927–2018) mipamatuod:

Presidente Thomas S. Monson

Mohangyo ko natong tanan nga mainampoong magtuon ug mamalandong sa Basahon ni Mormon kada adlaw. Kon buhaton nato, anaa kita sa posisyon nga makadungog sa tingog sa Espiritu, sa pakigbatok sa tentasyon, sa pagbuntog sa pagduhaduha ug kahadlok, ug sa pagdawat sa tabang sa langit sa atong mga kinabuhi. Niini ako mopamatuod sa tibuok nakong kasingkasing. (Thomas S. Monson, “Ang Gahom sa Basahon ni Mormon,” Liahona, Mayo 2017, 87)

Unsaon nako paggahin og panahon sa pagtuon sa Basahon ni Mormon?

Si Elder Gary E. Stevenson sa Korum sa Napulog Duha ka Apostoles mitudlo:

Elder Gary E. Stevenson

Aron sa pagtabang sa Basahon ni Mormon nga mahimong sukaranan sa imong pagpamatuod, mohatag ako kaninyo og usa ka hagit. Bag-o lang nakong nasayran nga daghang kabatan-onan kasagaran mogahin og pito ka oras kada adlaw nga magtan-aw sa mga screen sa TV, computer, ug smartphone. Sa paghunahuna niini, mohimo ba kamo og gamay nga kausaban? Ilisan ba ninyo ang pipila nianang inadlaw nga panahon sa pagtan-aw sa screen—ilabi na kanang gigahin sa social media, sa internet, pagdula, o telebisyon—ngadto sa pagbasa sa Basahon ni Mormon? Kon sakto ang mga pagtuon nga akong gihisgutan, dali ra kamong makakita og oras alang sa inadlaw nga pagtuon sa Basahon ni Mormon bisan kon sulod lang sa 10 ka minutos matag adlaw. Ug makatuon kamo sa paagi nga kamo malingaw niini ug makasabot niini—sa inyo ba nga device o sa basahon mismo. (Gary E. Stevenson, “Tan-awa ang Basahon, Tan-awa ang Ginoo,” Liahona, Nob. 2016, 46)