“Ko Hono Ako ʻo e Folofolá: Piki Maʻu ki he Folofola ʻa e ʻOtuá,” Tohi ʻa Molomoná - Tohi Lēsoni ʻa e Tokotaha Akó (2024)
“Ko Hono Ako ʻo e Folofolá,” Tohi ʻa Molomoná - Tohi Lēsoni ʻa e Tokotaha Akó
Ngaahi Naunau Fakafeʻiloakí
Ko Hono Ako ʻo e Folofolá
Piki Maʻu ki he Folofola ʻa e ʻOtuá
ʻOku makehe ʻa e folofolá ʻi heʻenau malava ke fakaloloto ʻa e tui mo e ʻofa ki he Tamai Hēvaní mo Sīsū Kalaisí. Ko e toutou ako maʻu pē mo hono ako lolotó ‘okú ne fakaafeʻi ʻa e tuí mo fakamālohia ʻetau moʻui fakaʻahó. Ko e taumuʻa ʻo e lēsoni ko ʻení ke fakatupulaki hoʻo holi mo e malava ke ako fakaʻaho e folofolá pea maʻu e ngaahi tāpuaki kuo talaʻofa mai ʻoku hoko ʻi he ako folofolá.
Ako folofola fakaʻahó
Kapau naʻe fiemaʻu ʻe ha taha ke mālohi ange ʻi hono fai ha fakamālohisino pamu he falikí, ko e hā kuopau ke ne faí? Ko e hā hano fuoloa pea toki hāsino mai ha tupulaki ʻi he mālohí? Ko e hā ha ngaahi faingataʻa ʻe ala ke ikunaʻi ʻe ha tokotaha?
-
ʻE fekauʻaki fēfē nai ʻeni mo hono ako ʻo e folofolá?
Lau ʻa e lea ko ʻeni ʻa Palesiteni Tōmasi S. Monisoni (1927–2018) mo Suli B. Peki, ko e Tokoni ʻUluaki ʻi he Kau Palesitenisī Lahi ʻo e Kau Finemuí he taimi ko iá, pea toe fakamanatu ʻa e meʻa naʻá na akoʻi fekauʻaki mo e ako folofolá:
Ko hano fakamoleki ha taimi he ʻaho takitaha ʻi he ako folofolá, ‘oku ‘ikai toe veiveiua, ‘ene fakamālohia hotau fakavaʻe ʻo e tuí mo ʻetau ngaahi fakamoʻoni ki he moʻoní. (Thomas S. Monson, “How Firm a Foundation,” Ensign pe Liahona, Nov. 2006, 68)
Neongo ʻoku ʻikai ke u pehē ko ha tokotaha mataotao au, … ka ʻoku ou houngaʻia ʻi heʻeku kamataʻi ʻa e tōʻonga moʻui ʻo hono lau [ʻo e folofolá]. ʻE ala faingataʻa ke ako e ngaahi lēsoni ʻoku ʻi he folofolá ʻaki hono lau tuʻo taha pē kinautolu pe ako e ngaahi veesi kuo filí ʻi ha kalasi. (Julie B. Beck, “My Soul Delighteth in the Scriptures,” Ensign pe Liahona, May 2004, 107)
-
Ko e hā naʻá ke maʻú?
Fakakaukau ki hoʻo ongo fekauʻaki mo hoʻo ako e folofolá.
-
Fakakakato ʻi hoʻo tohinoa akó ʻa e ngaahi meʻá ni:
Laʻipepa tufa: “Vakaiʻi ʻo e Ako Folofolá”
Tohi ʻa Molomoná – Tohi Lēsoni ʻa e Faiakó (2024)—“Ko Hono Ako ʻo e Folofolá”
© 2023 ʻe he Intellectual Reserve, Inc. All rights reserved.
Ngaahi tapuaki ʻi hono ako e folofolá
ʻE tatau ai pē pe naʻe fēfē hoʻo fakafuofua kimuʻá, ka ʻe lava ke tupulaki hoʻo loto-holi mo e malava ke maʻu e ngaahi tāpuaki ʻo e folofolá. ʻE lava ke tokoni e mahino ʻa e ngaahi tāpuaki ʻoku fakafekauʻaki mo e folofola ʻuhingamālié ke fakaʻaiʻai ʻa e tupulaki ko iá.
Lau ʻa e ngaahi veesi ko ʻení, ʻo kumi e ngaahi tāpuaki ʻoku maʻu mei hono ako ʻo e folofolá.
-
Ko e hā ha ngaahi moʻoni ʻoku fekauʻaki mo e ako folofolá te ke lava ʻo ʻiloʻi mei he ngaahi veesi ko ʻení?
-
Ko e fē ʻi he ngaahi moʻoni pe ngaahi tāpuaki ko ʻení kuó ke aʻusiá?
Ki ha ngaahi tāpuaki lahi ange ʻoku maʻu mei he ako folofolá, vakai ki he “Fili: Fie Ako Lahi Ange?
Te u lava fēfē ʻo maʻu ha meʻa lahi ange mei heʻeku ako folofolá?
-
Ko e hā ʻe lava ʻo tokoni ki ha taha ke ne maʻu ha meʻa lahi ange mei heʻene ako folofolá?
Lau ʻa e fakamatala ko ʻeni ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá pea kumi ha ngaahi taukei kehe ʻe lava ke tokoni ke toe ʻaonga ange ai ʻa e ako folofolá.
Ko ha meʻa lelei he taimi ʻe niʻihi ke lau ha tohi folofola ʻi ha vahaʻa taimi tukupau ke ʻiloʻi fakalūkufua ʻene pōpoakí, ka ko e uluí, ʻoku totonu ke ke tokanga ki he lahi ʻo e taimi ʻokú ke fakaʻaongaʻi ʻi he folofolá ʻo laka ange ʻi he lahi ʻo e meʻa ʻokú ke lau ʻi he taimi ko iá. ʻOku ou ʻilo ʻokú ke faʻa lau ha ngaahi veesi he taimi ʻe niʻihi, pea kiʻi mālōlō ʻo fakalaulauloto ki ai, pea toe lau fakalelei ange ʻa e ngaahi vēsí, pea ʻi hoʻo fakakaukau ko ia ki hono ʻuhingá, mo lotua ke mahinó, pea mo fehuʻi ʻi ho ʻatamaí, mo tatali ki ha ueʻi fakalaumālié, pea mo hiki ʻa e ngaahi ongo mo e ngaahi ʻilo ʻoku hokó, koeʻuhi ke ke lava ʻo manatuʻi mo ako lahi ange ai. ʻI hoʻo ako ʻi he founga ko ʻení, mahalo he ʻikai te ke lau ha ngaahi vahe pe veesi lahi ʻi ha haafe houa, ka te ke fakaʻataʻatā ai ha potu ʻi ho lotó maʻá e folofola ʻa e ʻOtuá, pea te Ne folofola atu kiate koe. (D. Todd Christofferson, “When Thou Art Converted,” Ensign pe Liahona, May 2004, 11)
-
Ko e hā ‘a e meʻa ʻokú ke vakai ki ai ʻi he ngaahi fakakaukau ko ʻení te ne lava ʻo tāpuekina hoʻo aʻusia ʻi hono ako e folofolá?
Fakaʻaongaʻi e miniti ʻe 5 pe 10 ka hokó ke ke feinga ke fakaʻaongaʻi e ngaahi fokotuʻu ne ʻomi ʻe ʻEletā Kulisitofasoní. Tuku ha taimi ke fakalaulauloto, toe lau, lotu, fai ha ngaahi fehuʻi, mo hiki ai hoʻo ngaahi ongó. Ko ha ngaahi potufolofola ʻeni ʻe niʻihi te ke ala fakaʻaongaʻi (tauʻatāina pē ke fili ha ngaahi potufolofola kehekehe ʻi he Tohi ʻa Molomoná).
Mōsaia 3; ʻAlamā 32; 3 Nīfai 11
-
Ko e hā hoʻo aʻusia ki hono ako ‘o e folofolá ʻi he founga ko ʻení?
-
ʻE tākiekina fēfē ʻe hoʻo ako ʻi he founga ko ʻení hoʻo ako folofola fakatāutahá?
Fokotuʻu ha taumuʻa ki he ako folofolá
Ko e taha ʻo e ngaahi taumuʻa ʻo e seminelí ke tokoniʻi koe ke ke ofi ange kia Sīsū Kalaisi ʻi hono ako fakaʻaho ʻo e folofolá. Ke tokoniʻi koé, ʻoku ʻi ai ha fiemaʻu ki he kalasi seminelí ke lau ʻa e tohi folofola ʻo e taʻu lolotongá ʻo ʻoua naʻa toe siʻi hifo he peseti ʻe 75 ʻo e tohi māhina ‘o e semesitaá.
Fekumi ki ha ueʻi fakalaumālie ʻi he Laumālie Māʻoniʻoní ke fokotuʻu ha taumuʻa ako fakataautaha. Ke tokoni atu, kamata ʻaki hano foaki ha lotu ke fekumi ki ha fakahinohino fakalaumālie mei he Tamai Hēvaní. Fakakaukau ki he ngaahi fehuʻi ko ʻení ʻi hoʻo fokotuʻu ha taumuʻá:
-
Ko e fē ʻa e taimi mo e feituʻu te u lava ʻo ako fakaʻaho ai ʻeku folofolá?
-
Ko e hā e lahi ʻo e taimi ʻi he ʻaho takitaha te u ako aí?
-
Ko e hā te u lava ʻo fai ke fakaafeʻi kakato ange ʻa e Laumālie Māʻoniʻoní ki heʻeku aʻusia ʻi hono ako e folofolá?
-
Lekooti hoʻo taumuʻa ki he ako folofolá pea palani ki hono fakahokó.