30

Si Jesucristo ang Anak ng Ama sa Langit (Pasko)

Pambungad para sa Guro

Para espirituwal na maihanda ang inyong sarili sa pagtuturo ng araling ito, basahin at pag-isipan ang sumusunod:

Si Jesucristo ay isinilang sa isang mortal na ina, si Maria, at isang imortal na ama, ang Ama sa Langit. Siya ay literal na Anak ng Diyos. Dahil sa dakilang pagmamahal Niya sa atin, isinugo ng Ama sa Langit si Jesucristo para maging Tagapagligtas at Halimbawa natin. “Gayon na lamang ang pagsinta ng Dios sa sanglibutan, na ibinigay niya ang kaniyang bugtong na Anak, upang ang sinomang sa kaniya’y sumampalataya ay huwag mapahamak, kundi magkaroon ng buhay na walang hanggan” (Juan 3:16).

Paghahanda

Markahan ang pahina 106 sa manwal na ito para madali ninyo itong mabuklat.

Mga Aktibidad sa Pag-Aaral

Magsimula sa isang aktibidad sa pagtitipon. Para sa mga ideya, tingnan sa pahina 3.

Panalangin

Pag-alayin ng pambungad na panalangin ang isang bata.

Larawan

Ipakita ang larawan sa pahina 126. Ipahanap sa mga bata ang sanggol sa larawan. Sabihin sa kanila na ang pangalan Niya ay Jesus, at ipasambit sa kanila ang “Jesus.” Pagkunwariin ang mga bata na may kargang sanggol.)

Mary and baby Jesus

Ituro si Maria sa larawan at sabihin sa mga bata, “Ito ang ina ni Jesus. Ang pangalan niya ay Maria.”

Sabihin sa mga bata na si Jesus ang Anak ng Ama sa Langit. Ipasambit na muli sa mga bata ang “Si Jesus ang Anak ng Ama sa Langit,” nang dahan-dahan. Sabihin sa kanila na isinugo ng Ama sa Langit ang Kanyang Anak, si Jesucristo, sa lupa dahil mahal Niya tayo.

Awit

Iturong muli ang sanggol na si Jesus sa larawan. Sabihin sa mga bata na kakanta kayo. Ipasambit sa kanila ang, “Isinugo Niya ang Kanyang Anak” kapag itinuro ninyo ang sanggol na si Jesus. Pagpraktisin sila nang ilang beses, pagkatapos ay kantahin o bigkasin ang sumusunod na mga titik sa Isinugo Kanyang Anak (Aklat ng mga Awit Pambata, 20–21):

Paano mailalahad ng Diyos ang pag-ibig?

Sinugo ang kanyang Anak, (ituro ang sanggol na si Jesus sa larawan) banal at payapa.

Ipakita ang larawan ni Jesucristo sa pahina 106. Sabihin sa mga bata na ang sanggol na si Jesus ay lumaki para maging ating Tagapagligtas na si Jesucristo. Ipasambit sa kanila ang, “Isinugo Niya ang Kanyang Anak” kapag itinuro ninyo ang larawan ng Tagapagligtas. Kantahin o bigkasin ang sumusunod na mga titik sa Isinugo Kanyang Anak:

Paano maihahayag ang tamang landas sa ‘tin?

Anak niya’y ‘pinagkaloob (ituro ang larawan ng Tagapagligtas) bilang gabay natin.

Jesus Christ

Katapusan

Pasalamatan ninyo ang pagsusugo ng Ama sa Langit kay Jesucristo. Magpatotoo na si Jesucristo ay Anak ng Ama sa Langit.

Panalangin

Pag-alayin ng pangwakas na panalangin ang isang bata.

Mga Tip sa Pagtuturo

Jesucristo: “Dapat na ang lahat ng ating itinuturo ay makapagpapalapit sa mga miyembro ng mag-anak at miyembro ng klase kay Cristo.… Alalahanin ito habang inihahanda at inilalahad ninyo ang mga aralin” (Pagtuturo, Walang Higit na Dakilang Tungkulin, 100).

Mga batang musmos: Bantayan ang mga palatandaang magsasabi sa inyo kung nakikinig ang mga bata. Para tulungan silang magtuon ng pansin sa inyo, subukang ibaibahin ang inyong boses, habang nakatitig sa kanilang mga mata, at iba-ibahin ang mga paraan ninyo sa pagtuturo. (Tingnan sa Pagtuturo, Walang Higit na Dakilang Tungkulin, 87–89.)

Opsyonal na Mga Aktibidad

Paghahanda

• Para sa mga stick puppet: Kopyahin at gupitin ang mga larawang guhit sa pahina 127 para sa bawat bata. Iteyp o idikit ang isang patpat sa likuran ng bawat larawang guhit para makagawa ng mga stick puppet para sa mga bata.

  coloring page, Nativity pictures

  Si Jesucristo ang Anak ng Ama sa Langit

• Para sa aktibidad sa banal na kasulatan: Magdala ng isang kopya ng Aklat ni Mormon. Markahan ang 3 Nephi 9:15 para madali ninyo itong mabuklat.

Mga Stick Puppet

Ibigay sa mga bata ang mga stick puppet na ginawa ninyo para sa kanila. Muling ikuwento nang maikli ang pagsilang ni Jesucristo sa sarili ninyong mga salita (tingnan sa Lucas 2:4–16). Ipataas sa mga bata ang kanilang mga stick puppet sa mga angkop na oras ng kuwento. Mas angkop sa nakatatandang mga bata ang aktibidad na ito.

puppet diagram

Awit

Kantahin o bigkasin ang sumusunod na mga titik sa “Doon sa May Sabsaban” (Aklat ng mga Awit Pambata, 26–27) at gawin ang mga aksyong iminungkahi sa mga titik. Pasabayin sa inyo ang mga bata.

Doon sa sabsaban, wala s’yang kuna,

Ang Panginoong munti’y nakahiga;

Tanglaw sa Kanya ang bitwing kayningning,

Ang Panginoong munti ay kayhimbing.

Activity Verse

Bigkasin ang sumusunod na activity verse, at pasabayin sa inyo ang mga bata:

Sa sabsaban naroon ang isang sanggol, (maghele na parang may kargang sanggol)

Katabi ang inang mapagmahal,

Nagniningning isang bituin sa kalangitan, (ituro ang langit)

Narito ang Anak ng Diyos! (humalukipkip)

Banal na Kasulatan

Sabihin sa mga bata na sinabi sa atin ni Jesus sa mga banal na kasulatan na Siya ang Anak ng Diyos, na ating Ama sa Langit. Buklatin ang Aklat ni Mormon sa 3 Nephi 9:15 at basahin ang, “Masdan, ako si Jesucristo, ang Anak ng Diyos.” Pasabayin sa inyo ang mga bata sa pagsambit ng “ang Anak ng Diyos.”

Mga Tip sa Pagtuturo

Mga sanggunian: Mga sangguniang gawa lamang ng Simbahan ang gamitin sa klase ng nursery. Kung kailangan ninyo ng iba pang ipagagawa sa mga bata, pumili ng mga kuwento, laro, puppet, o aktibidad sa pagkukulay mula sa manwal na ito na nagamit na ninyo noon. Magagamit din ninyo ang mga laro at kuwento mula sa mga magasin ng Simbahan.

Pag-uulit: Ituro nang ilang beses ang lahat o bahagi ng araling ito sa Kapaskuhan. Natutuwang makinig ang mga bata sa paulit-ulit na kuwentong Pamasko.