29

Nabuhay na Mag-uli si Jesucristo (Paskua)

Pambungad para sa Guro

Para espirituwal na maihanda ang inyong sarili sa pagtuturo ng araling ito, basahin at pag-isipan ang sumusunod:

Dahil sa Pagkahulog nina Adan at Eva, lahat ay magdaranas ng pisikal na kamatayan. Pagkamatay natin, humihiwalay ang ating espiritu sa ating katawan. Nang mabuhay na mag-uli si Jesucristo, muling nagsama ang Kanyang katawan at espiritu, at hindi na kailanman maghihiwalay. Dahil sa Pagbabayad-sala ni Jesucristo, lahat ay mabubuhay na mag-uli (tingnan sa I Mga Taga Corinto 15:22; Alma 11:42–45). Ang pag-unawa at patotoo tungkol sa Pagbabayad-sala ay nagbibigay sa atin ng galak at pag-asa (tingnan sa Isaias 25:8; Alma 22:14).

Mga Aktibidad sa Pag-Aaral

Magsimula sa isang aktibidad sa pagtitipon. Para sa mga ideya, tingnan sa pahina 3.

Panalangin

Pag-alayin ng pambungad na panalangin ang isang bata.

Kuwento

Ipakita ang larawan sa pahina 122. Ituro ang mga detalye sa larawan habang ikinukuwento ninyo sa napakasimpleng paraan ang Pagkabuhay na Mag-uli ni Jesucristo (tingnan sa Juan 19:41–42; 20:1, 11–16). Ang sumusunod ay isang halimbawa:

Pagkamatay ni Jesus, nalungkot nang husto ang Kanyang mga kaibigan (sabihin sa mga bata na palungkutin ang kanilang mukha). Inilagak nila ang katawan ni Jesus sa isang libingan, na parang isang kuweba (ituro ang libingan sa larawan). Isang malaking bato ang iginulong sa harapan ng pasukan nito (pagkunwariin ang mga bata na nagpapagulong ng malaki at mabigat na bato). Pagkaraan ng tatlong araw (ipataas sa mga bata ang tatlong daliri), inalis ng dalawang anghel ang bato. Muling nabuhay si Jesus! (Ituro si Jesus sa larawan.) Siya ay nabuhay na mag-uli (tulungan ang mga bata sa pagsambit ng “nabuhay na mag-uli”). Tuwang-tuwa ang mga kaibigan ni Jesus! Siya ay buhay, at hindi na Siya muling mamamatay! Si Maria ay isa sa mga kaibigan ni Jesus (ituro si Maria sa larawan). Nalungkot siya nang mamatay si Jesus. Nang mabuhay na mag-uli si Jesus, si Maria ang unang taong nakakita sa Kanya. Tuwang-tuwa siya dahil buhay si Jesus (sabihin sa mga bata na pasayahin ang kanilang mukha).

Sabihin sa mga bata na dahil kay Jesus, lahat ay mabubuhay na maguli at mabubuhay magpakailanman. Sabihin sa mga bata na pasayahing muli ang kanilang mukha.

Jesus and Mary by the tomb

Awit

Kantahin o bigkasin ang unang taludtod ng “Si Jesus Ba ay Nagbangon?” (Aklat ng mga Awit Pambata, 45) at gawin ang mga aksyon sa ibaba. Pasabayin sa inyo ang mga bata.

Si Jesus ba ay nagbangon?

Sa ikatlong araw, (itaas ang tatlong daliri)

Nabuhay muli’t

Nilisan Kanyang libingan. (humalukipkip)

Katapusan

Ipasambit sa mga bata ang, “Si Jesucristo ay nabuhay na mag-uli,” nang paisa-isa o padala-dalawang salita. Magbigay ng maikling patotoo sa mga bata na nabuhay na mag-uli si Jesucristo.

Panalangin

Pag-alayin ng pangwakas na panalangin ang isang bata.

Mga Tip sa Pagtuturo

Jesucristo: Maraming kulturang may mga tradisyon sa Paskua na kinatutuwaan ng mga bata pero wala namang kinalaman sa Pagkabuhay na Mag-uli ni Jesucristo. Ituon sa Tagapagligtas ang araling ito sa Paskua, at tulungang lumago ang pagmamahal ng mga bata sa Kanya. Turuan silang magalak sa dakilang mga kaloob na ibinigay Niya sa atin, tulad ng Pagkabuhay na Mag-uli at ng Kanyang mga turo at sakdal na halimbawa.

Mga awit: Maaaring hindi kayo sabayan ng ilang bata sa pagkanta. Kahit mga aksyon lang ang gawin nila o manood lang at makinig sa inyo, masisiyahan pa rin sila sa mga awit at matututo rito.

Patotoo: Magpatotoo sa simple at maikling paraan; halimbawa: “Alam ko na nabuhay na maguli si Jesucristo.”

opsyonal na Mga Aktibidad

Paghahanda

• Para sa kuwento: Kopyahin ang mga larawang guhit sa pahina 123. Kulayan ang mga ito at idikit sa makapal na papel, kung gusto ninyo. Gupitin ang bawat hugis at gupitin ang pasukan sa libingan sa tulduk-tuldok na linya.

  coloring page, Resurrection illustration

• Para sa aktibidad sa pagkukulay: Gawan ng kopya ang pahina 123 para sa bawat bata. Gupitin ang bawat hugis at gupitin ang pasukan sa libingan.

Awit

Patayuin ang mga bata nang pabilog at paghawakin ng mga kamay. Kantahin o bigkasin ang sumusunod na mga titik sa “Si Jesus ay Nagbangon” (Aklat ng mga Awit Pambata, 44) at gawin ang mga aksyon sa ibaba:

Si Jesucristo ay nagbangon, (lumakad nang pabilog)

Muling nabuhay.

O kaysaya; (huminto at ilagay ang mga kamay sa dibdib)

Siya ay nagbangon.

Ulitin hanggang gusto ng mga bata.

Kuwento

Muling ikuwento ang Pagkabuhay na Mag-uli ni Jesucristo, sa pagkakataong ito gamitin ang mga larawang ginupit ninyo. Nasa ibaba ang isang halimbawa:

(Magsimula sa hugis ni Jesus na nakatayo at ang bato ay inalis mula sa pasukan ng libingan.) Pagkamatay ni Jesus, inilagak ang kanyang katawan sa isang libingan (ihiga ang hugis ni Jesus sa [likuran] ng libingan). Isang malaking bato ang pinagulong sa harapan ng pasukan (pagulungin ang bato sa pasukan ng libingan). Sa ikatlong araw dalawang anghel ang dumating at inalis ang bato (pagulungin ang bato palayo sa pasukan). Si Jesus ay nabuhay na mag-uli (ipatayo ang hugis ni Jesus). Ang Kanyang espiritu at katawan ay muling nagkasama! [Tingnan sa Susan Payson, “Easter Story,” Friend, Abr. 1995, 32–33.]

illustration diagram

Pagkukulay

Ibigay sa mga bata ang mga larawang guhit na ginupit ninyo para sa kanila. Ipakita sa kanila kung paano magagamit ang mga larawang guhit para marepaso ang kuwento ng Pagkabuhay na Mag-uli ni Jesus. Mas angkop sa nakatatandang mga bata ang aktibidad na ito.

Mga Tip sa Pagtuturo

Ang opsyonal na mga aktibidad ay ibinigay sa inyo para idagdag sa aralin kung gusto ninyo. Kung wala kayong mapagkunan ng mga kailangan, gumamit ng mga kahalintulad nito.

Mga kuwento: “Natutuwa ang mga batang musmos sa paulit-ulit na mga kuwento. Kung inuulit ninyo ang kuwento, simulan ito at itanong, ‘Ano ang sumunod na nangyari?’ (Pagtuturo, Walang Higit na Dakilang Tungkulin, 238). Ipagamit sa isa sa nakatatandang mga bata ang mga ginupit o ang larawan sa pahina 122 para ikuwento ang Pagkabuhay na Mag-uli sa mga batang musmos sa klase ng nursery. Tumulong kung kailangan.

Activity box: Gumawa ng activity box na maitatago sa nursery. Mapaglalagyan ito ng mga aktibidad sa pagkukulay at iba pang bagay na ginagawa o ginagamit ninyo para sa mga aktibidad. Kaya mauulit ninyo ang mga aktibidad na iyon sa susunod na mga klase sa nursery para marepaso ang nakaraang mga aralin. Ang pagrerepasong ito ay maisasagawa anumang oras sa klase sa nursery.