Mukenji wa ku Ngondu wa Liahona, Ngondu Muitanu 2025

Ditabija Kumpala kua Nzambi

Kudi Mulombodi Mukulu Russell M. Nelson

Mulombodi Mukulu wa Ekelezia wa Yezu Kilisto wa Bansantu ba Matuku a Ndekelu

Patudi tukeba ne tshisumi bua kuikala ne bunangi ne buimpa biwuja nsombelu yetu, ditabija dietu bua kusemeja Nzambi nedivula.

Bana betu bananga baluma ne bakaji, ndi ne disanka bua kuakula kunudi lelu mu mpungilu munena wa mushinga. Mesu anyi adi enda akulakaja. Tuasakidilayi bua lumvu luenu pandi nnupesha mukenji wanyi.

Tudi mu matuku adi Elekezia wa Yezu Kilisto wa Bansantu ba Matuku a Ndekelu utanta mu lubilu lukola. Ndi muwujibua ne disanka pandi mmona ditanta mu nteji ya bungi.

Ndi mupeshibua meji kudi bansonga betu. Mbabikilangana ba bungi bua kusadila. Badi bakeba bankambua babu ne bakumbaja milulu mu ntempelo. Bansonga betu baluma ne bakaji badi batuma malomba bua kuya mu bukenji bungi kabuyi kuelakaja. Lukongu luabanda ludi luimanakana bu mulongu wa balondi ba Yezu Kilisto.

Musangu mushala nankatutakena ne kankanunuina ka bakaji kapiakapia. Pandi mona ntatu ikalaye mua kumanya mu nsombelu wenda, ndi ngumvua dijinga dinena dia kumuambuluisha bua kukolesha ditabuja dienda mu Yezu Kilisto. Diteka lumu luimpa luenda mu tshienzedi didi ne mushinga bua diakalenga dienda dialua.

Yeya, bu mudi yonsu wa kutudi, neatutakena ne ntatu. Tuetu bonsu netupeta masama, dishima, ditetshibua, ne dijimija. Ntatu eyi idi mua kutekesha ditabija dietu nkayetu. Nansha nanku, bayidi ba Yezu Kilisto badi ne tshibuelelu ku mushindu kampanda wa ditabija.

Patudi tuenza ne tulama bipungidi ne Nzambi, tudi mua kuikala ne ditabija didi diledibua mu Nyuma. Mukalenga wakambila Muprofete Joseph Smith ne ditabija dietu didi didiunda kumpala kua Nzambi. Ela meji ku busambi bua kuikala ne ditabija kumpala kua Nzambi!

Pandi ngakula bua kuikala ne ditabija kumpala kua Nzambi, ndi ntuma meji ku dikala ne ditabija bua kusemena kudi Nzambi anu mpindiewu! Ndi ntuma meji ku disambila ne ditabija ne Tatu wa mu Dîulu udi ututeleja, ne umvua bimpa majinga etu mutupita. Ndi ntuma meji ku dikala ne ditabija ne mmutunanga bikola bipita mutudi mua kubiumvua, ne udi utuma banjelo bua kusomba netu ne batudi bananga. Ndi ntuma meji ku dikala ne ditabija ne udi ukeba bua kuambuluisha yonsu wa kutudi bua kupeta tshidiyi wipatshila.

Mpindiewu, ntshinyi tshitudi tuenza bua kupeta ditabija bu nunku? Mukalenga udi wandamuna lukonku elu ne miaku eyi: lekela bia munda bieba biuwula tenta ne bunangi kudi bantu bonsu ne buimpa bulengeja misangu yonsu lungenyi lueba; pashisha ditabija dieba nedikola kumpala kua Nzambi.

Ke nsapi! Mu miaku ya Mukalenga nkayenda, bunangi ne buimpa bidi bikangula njila wa kuikala ne ditabija kumpala kua Nzambi! Bana betu baluma ne bakaji, tudi mua kutshienza! Ditabija dietu didi mua kudiunda bulelela Kumpala kua Nzambi, anu mpindiewu!

Tuangata bionsu bibidi bunangi ne buimpa.

Tshia kumpala, bunangi. Bidimu bibidi bipita, nankanuela lubila, nuenu bu bayidi badi benza tshipungidi ne Nzambi, bua kuikala bafidi ba ditalala. Nanku ndi ngambulula tshingakamba: “Tshiji katshitu tshituisha. Diluishangana kadiena dibaka muntu nansha umua to. Dikokangana kadiena dilombola ku bipeta bia nyuma nansha.”

Dinanga dilelela kudi bantu bonsu didi dileja kuikala bafidi ba ditalala! Tudi benzejibua bua tuikala ne bunangi mu tshiakuidi tshietu, mu bantu anyi pa nkayetu. Ndi nsakidila aba ba kunudi badi bateka mubelu wanyi awu mu moyo. Kadi tudi mua kuenza kabidi biakana.

Diluishangana dia mpindiewu mu muyuki wa mu bantu ne media bidi bia kukema. Meyi a lukinu ke bingoma bia lufu. Dikokangana didi dikandika Nyuma wa Tshijila bua kuikalaye mulunda wetu wa tshishiki.

Bu balondi ba Yezu Kilisto, tudi ne bua kuleja tshilejilu tshia bafidi ba ditalala. Padi bunangi bulua tshitupa tshia ngikadilu wetu, netujimija ngenzelu ya dipuekesha bakuabu. Netulekela kulumbuluisha bakuabu. Netuikala ne bunangi bua bantu mu mishindu yabu yonsu ya nsombelu. Kuikala ne bunangi bua bantu bonsu tshidi ne mushinga bua ditanta dietu. Dinanga didi tshishimikidi tshia muntu wa Nzambi.

Tusengelela Tatu wetu wa mu Dîulu bua uwuja mioyo yetu ne bunangi bua bungi—nangananga bua aba batudi nabu ne lutatu bua kubananga—bualu bunangi budi dipa dia kudi Tatu wa mu Dîulu dipesha balondi balelela ba Yezu Kilisto. Mupandishi udi Mukalenga wa Ditalala. Tudi ne tshia kuikala biamu bienda bia ditalala.

Mpindiewu, tuakula bua buimpa. Mukalenga udi utulomba bua tulengeja lungenyi luetu misangu yonsu ne buimpa. Ela meji bua bukola buwapeta ku ngenyi yonsu milenga pawudi uyilengeja ne buimpa. Buimpa budi bulengeja bionsu ne bufila disanka! Mu ngakuilu mukuabu, ela meji tshidi mua kufika pawudi mua kukumbaja ku buimpa lungenyi lukoya, lungenyi lua tshikisu, anyi lua kapeji. Ngikadilu muimpa neyipata ngenyi ayi. Ngikadilu muimpa neakupikula ku ngenyi ya disumpakana ne ya tshikutukutu.

Bana betu baluma ne bakaji, padi buloba buenda bunyanguka, tudi ne dijinga dia kukolesha dipeluka menamena. Ngenyi, miaku, ne bienzedi bietu bidi bijinga bua kuikala amu bimpa ne biuwujibua ne dinanga dipeluka dia Yezu Kilisto kudi bantu bonsu. Mushindu munena udi kumpala kuetu udi bua tulua bantu ba Nzambi badiyi musua bua tuikala.

Kutendelela misangu yonsu mu nzubu wa Mukalenga kudi kudiundisha ngenzelu wetu bua kuikala ne buimpa ne bunangi. Nanku, diba dia mu ntempelo didi didiundisha ditabija dietu kumpala kua Mukalenga. Divudija dia diba dia mu ntempelo nedituambuluisha bua kudilongolola bua Dilua Dibidi dia Mupandishi wetu, Yezu Kilisto. Katuena bamanya dituku nansha diba dia kulua kuenda to. Kadi ndi mumanya ne Mukalenga udi unsaka bua nnubela bua nuikala pabuipi bua “dituku adi dinena ne didi dikuatshisha bowa.”

Patudi tukeba ne tshisumi bua kuikala ne bunangi ne buimpa biwuja nsombelu yetu, ditabija dietu bua kusemeja Nzambi nedivula. Ndi nnubikila bua nuangata bipidi bimueneka bua kukola mu ditabija dienu kumpala kua Mukalenga. Pashisha, mu diya kudi Tatu wetu wa mu Dîulu ne ditabija divula, netuwujibua ne disanka dia bungi, ne ditabuja dietu mu Yezu Kilisto nedivula. Netubanga kumanya bukola bua nyuma budi bupita matekemenyi etu manena.

Tudi ne disanka kudi Mukalenga udi usaka lukasa dibaka dia ntempelo mu bidimu biashadi ebi. Ku buludiki buenda, lelu tudi tunumanyisha dilongolola dia dibaka ntempelo mu miaba 15 idi ilonda eyi:

• Reynosa, Mexique

• Chorrillos, Peru

• Rivera, Uruguay

• Campo Grande, Bresil

• Porto, Portugal

• Uyo, Nigeria

• San Jose del Monte, Philippines

• Nouméa, Nouvelle-Caledonie

• Liverpool, Australie

• Caldwell, Idaho

• Flagstaff, Arizona

• Rapid City, Dakota du Sud

• Greenville, Caroline du Sud

• Norfolk, Virginie

• Spanish Fork, Utah

Ndi njadika ne Yezu Kilisto udi Musungidi wa Isalele, Ekelezia wenda, udi umulombola. Udi udilongolola bua kulua kabidi. Tudi mua kudilongolola bietu bua kumuakidila. Ndi nsambila buatshi, mu dina dia Yezu Kilisto, amena.

© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2025. Tshiluba. 19602

Biakumanya

1. Dibua dikesa divua muprofete Danyele mumona mu tshilota tshienda tshia matuku a ndekelu divua dibunguluka bua kuwuja buloba (tangila Danyele 2:31–45; Dilongesha ne Bipungidi 65:2).

2. Dilongesha ne Bipungidi 121:45.

3. Mukalenga wakamba ne neaya kumpala kuetu. Neikala ku dia baluma ne ku dia bakaji dietu, ne Nyuma wenda neikala mu mioyo yetu, ne banjelo benda nebatunyunguluka, bua kutuambula (Dilongesha ne Bipungidi 84:88).

4. Dilongesha ne Bipungidi 121:45, mfundilu mukumbaja; tangila kabidi kanungu 46.

5. Russell M. Nelson, “Bafidi ba Ditalala Badi Bajingibua,” Liahona, Ngondu Muitanu 2023, 98.

6. Disungula bua dikokangana ne bakuabu didi disungula bua kubenga kuikala ne buludiki bua Nyuma wa Tshijila.

7. Tudi ne bua kuikala ne bunangi kudi bantu bonsu, ne kudi bana betu mu ditabuja (Dilongesha ne Bipungidi 121:45).

8. Tshidi tshiumvuija sambilayi “ne makanda onsu a mutshima wenu” (Moloni 7:48).

9. Tangila Moloni 7:48.

10. Tangila Yeshaya 9:6.

11. Bu muakalongesha Joseph Smith, “Patudi [tuetu] tujinga bua kuya muaba udi Nzambi muikala, [tuetu] tudi ne tshia kuikala bu Nzambi, anyi kuikala ne nshindamenu idi nayi Nzambi” (Teachings of Presidents of the Church: Joseph Smith [2007], 72). Bu mudi, Mupostolo Polo mufila didimuisha ne “tusemena ne dikima hehi ne nkuasa wa butumbi wa ngâsa, bua tuetu tupete luse ne bua tusangane ngâsa bua kutukuatshisha mu tshikondo tshia dikengela dietu (Ebelu 4:16).

12. Tangila Matayo 24:36–37.

13. Malaki 4:5; tangila kabidi Sefanya 1:14–18.

14. Mukalenga wakatuambila ne Vulukayi ditabuija, buimpa, dimanya, budikandi, ditukija, kalolu ka buena wetu, dinemeka dia Nzambi, bunangi, didipuekesha, dinanukila (Dilongesha ne Bipungidi 4:6). Patudi tutshienza, ditabija dietu didi didiunda, ne pashisha, mu miaku yenda nkayenda, patudi tulomba, netupeta. Ne patudi tukokola, nebatunzuluila. (Tangila Dilongesha ne Bipungidi 4:7.)

15. Tudi mua kumanya tshivua bantu ba Mfumu Benyamina benza: “bakuwujibua ne disanka, bakapeta dilekedibua dia mibi yabu, ne bavua ne ditalala mu meji, bua ditabuja ditamba bunena divuabu nadi kudi Yezu Kilisto” (Mosiya 4:3).