Mukenji wa ku Ngondu wa Liahona, Ngondu Muitanu 2025
“Semena Pabuipi Nanyi”
Yezu Kilisto mmunanga yonsu wa kutudi. Mmutupesha mushindu wa kusemena pabuipi Nenda.
Bana betu baluma ne bakaji, tshidi disanka kundi bua kuikala nenu mu mpungilu munena ewu wa Ekelezia wa Yezu Kilisto wa Bansantu ba Matuku a Ndekelu. Ewu udi Ekelezia Wenda. Tudi basangila mu nzubu ne mu bitanda pa buloba bujima mu dina dienda.
Tudi tuangata dina dienda pamitu yetu patudi tubuela mu bukalenga buenda ku bipungidi. Udi Muana wa Nzambi mubika ku lufu ne mutumbishibua. Tudi ba tshifuaka, benji ba bubi ne bena lufu. Kadi, mu dinanga dienda bua yonsu wa kutudi, Mupandishi udi utubikila bua tulua kudiyi.
Edi didi dibikila dienda: Wakamba ne tuetu basemena pabuipi nenda, Yeya neasemena pabuipi netu; tuetu bamukeba ne tshisumi netumumona; tuetu balomba, netupete, tuetu bakokola nebatunzuluile.
Kudi misangu itudi tudiumvua pabuipi ne Mupandishi Yezu Kilisto. Ne kadi, pamuapa mu ntatu yetu ya pa buloba, tudi tudiumvua ntanta Nenda, ne tujinga mua kutuishibua ne mumanya tshidi mu mioyo yetu ne mutunanga ku muntu ku muntu.
Dibikila dia Mupandishi didi diangata mushindu wa kumvua dituishibua adi. Semena pabuipi nenda ku dimuvuluka diba dionsu. Mukeba ne tshisumi kupitshila ku dilonga mifundu. Ku disambila ne moyo mujima, lomba Tatu wa mu Dîulu bua udiumvua pabuipi ne Muanenda Munanga.
Kudi mushindu mupepela wa kuela meji pa tshiotshi. Ke tshiwudi mua kuenza bu wewa muikala mushiyangana ntanta ku balunda beba. Uvua mua kupeta mushindu wa kuyukilangana nabu, uvua mua kunanga mikenji yonsu ivua mua kufuma kudibu, ne uvua mua kuenza mueba monsu muwuvua mua kuenza bua kubambuluisha.
Monsu muvuatshi mua kufika, ntanta uvua mua kunenga, ne dinanga dieba divua dikolakana, ne uvua udiumvua mudisemeja pabuipi menamena. Koku kupita ntanta mula kakuyi muyuki mushema ne mushindu wa kuambuluishangana, malanda adi ateketa.
Yezu Kilisto mmunanga yonsu wa kutudi. Udi ufila mushindu ewu bua kusemena pabuipi Nenda. Bu mudibi bua mulunda wetu munanga, newutshienza momumua, ku diyukila kupitshila ku disambila kudi Tatu wa mu Dîulu mu dina dia Yezu Kilisto, mu diteleja bua diludika dimpa dia Nyuma wa Tshijila, ne pashisha disadila dia bakuabu ne musangelu bua Mupandishi. Pankabi newumvua dibenesha adi dia kusemena pabuipi nenda.
Mu bunsonga buanyi, nankamanya disanka dia kusemena kudi Mupandishi—ne ku mumona usemena kundi—kupitshila ku bienzedi bipepela bia ditumikila ku mikenji. Pamvua nsonga, biakudia bia tshijila bivua bifidibua mu tshisangila tshia dilolu. Ndi mvuluka kabidi dilolu kampanda, kukadi bidimu bisambuka pa 75, kukavu kabuitshibuitshi ne mashika pambelu. Ndi mvuluka ngumvuilu wa bukenka ne wa luya unankapeta pamvua munemeka mukenji wa kusangila ne Bansantu bua kuangata biakudia bia Tshijila, mu dienza tshipungidi ne Tatu wa mu Dîulu bua kuvuluka Muanenda diba dionsu ne kulama mikenji yenda.
Ku ndekelu kua tshisangilu dilolu adi, tuakimba musambu “Demeure aupres de moi, Seigneur!” ne miaku ya tshivulukilu “Seigneur, reste avec moi, ce soir.”
Miaku eyi yakantuadila ngumvuilu wa dikema wa Nyuma, nansha mumvua nsongaluma. Nankumvua dinanga ne nsemenenu bia Mupandishi dilolu adi kupitshila ku dikankamika dia Nyuma wa Tshijila.
Bidimu bipita nankajinga bua kupetulula ngumvuilu wa momumua bua dinanga ne nsemenenu bia Mupandishi binankumvua kudi Mukalenga mu tshisangilu tshia biakudia bia tshijila mu bunsonga buanyi. Nanku nankalama mukenji mukuabu mupepela: Nankakebulula mifundu.
Mu mukanda wa Luka, nankabala pa bualu bua dituku disatu panyima pa mutshiamakajibua ne dijikibua bienda, pa kalua basadidi ba lulamatu, bua dinanga dia Mupandishi, bua kuela mubidi wenda manyi. Pakafikabu, bakasangana dibua diumbusha ku lukita ne bakamona ne mubidi kawuvua momu to.
Banjelo babidi bimana ne bakakonka ne buatshinyi bavua batshina:
“Nudi nukebela udi ne moyo munkatshi mua bafue buatshinyi?
“Yeye kena kunueku, wakubika; nuvuluke bu muakanuambileye pakadiye mu Ngalela ne,
“Budi Muana wa muntu nabu mbua kumufilabo mu bianza bia bantu babi ne bua kumushihabo ku mutshi mutshiamakane ne bua kubikaye kabidi hahita matuku asatu.”
Dilolu adi kukavu kufikuluka, bayidi babidi bafuma ku Yelushalema mu njila wa ku Emau, ne Mukalenga mubika ku lufu wakabamuenekela ne kuenda nabu.
Mukanda wa Luka udi utuanyishila bua kubashindikija dilolu adi:
“Hakadibo bayikila bakonkangana, Yesu mene wakalua nabo habuipi, wakenda nabo.
“Kadi mesu abo akadi bitayitayi, kabakamumanya.
“Yeye wakabakonka ne, Nudi nuenda nuyikila tshinyi? Bobo bakimana babungame.
“Mukuabu dina diandi Keleopa, wakamukonka kabidi ne, ahu wewe udi muenyi udi usomba ha nkayebe mu Yelushalema kuyi mumanye malu akulua matuku â?”
Bavua bamuambila bua kanyinganyinga kabu pa lufu lua Yezu pavuabu batuishibua ne yeye udi mua kuikala Mupikudi wa Isalele.
Kuvua ne bua kuikala dinanga mu diyi dia Yezu mubika ku lufu padiyi wambila bayidi babidi aba banyongama ne madilu.
Pandi ntunguluka ne kubala, kudi kulua miaku eyi idi misankisha moyo wanyi, amu bu mumvua mumvua pamvua nsongaluma muana:
“Hakafikabo ha buihi ne musoko wakadibo baya, yeye wakamba kuhita.
“Bakamusengelela bikole ne, ulala netu kunoko; bualu bua diba dikadi dibuela, munya ukadi ushika. Yeye wakaya kulala nabo.”
Mupandishi wakitaba butuku abu dibikila dia kubuela mu nzubu wa bayidi benda. Hakashikamaye nabo ku mesa. Wakamema mutanda wa bidia, wakawubenesha, hakawutshiubulaye bitupa, wakabahabi. Mesu abu akabululuka, ne bakamumanya. Yeye wakabajimina ku mesu kuabo.
Luka udi utulondela ngumvuilu wa bayidi babenesha aba: “Bakambilangana ne, mitshima yetu kayakadi itema munda muetu, anyi hakadiye utuambila malu mu nshila, hakadiye utujinguluila mukanda wa Nzambi?”
Bayidi babidi aba bakalukila lubilu ku Yelushalema bua kulondela Bapostolo dikumi ne umua tshivua tshifika. Pavuabu baleja dimanya diabu, Mupandishi wakadimuesha kabidi.
Wakimana munkatshi muabo ne “wakabambila ne, nuikale talala.” Pashisha wakavuluija dîyi dia buprofete dia mudimu wenda bua kupikula bubi bua bana bonsu ba Tatuenda ne kukosa mionji ya lufu.
“Yeye wakabambila ne, bakafunda ne, Mbimpe bua Kilisto kukengaye ne kubikaye ku lufu hahita matuku asatu:
“Mbimpe kabidi bia kuambilabo bisamba bionso bualu bua kukudimuna kua mitshima ne bua kujimijibua kua mibi yabo mu dina diandi, babangile ku Yelushalema.
“Ne nuikala bajadiki ba bintu ebi.”
Bu mudi bayidi benda bananga, muana yonsu wa Tatu wa mu Dîulu udi musungula bua kubuela ku tshibuelelu tshia ditambula mmuenza tshipungidi bua kuikala mujadiki wa Mupandishi ne kukuba aba bonsu badi mu dijinga mu nsombelu wetu ewu wa tshifuaka. Dipangadika edi divua ditumvuija patoka kudi muprofete munena Alama wa mu Mukanda wa Molomo kukadi bidimu nkama bipita pavuaye ku Mâyi a Molomo.
“ bu munudi nujinga kubuela mu tshisumbu tshia mikoko tshia Nzambi, ne bua kubikidibua bantu benda, ne bitaba bua kuambuilangana majitu enu, bua ô ikala mapepela;
“Eyowa, ne nudi bitaba bua kudila ne badi badila; eyowa, ne kusamba badi ne dijinga dia disamba, ne kuikala bajadiki ba Nzambi diba dionsu, mu bintu bionsu, ne mu miaba yonsu … , mena tô ne ku lufu, bua nuenu kusungidibua kudi Nzambi, … bua nuenu kupeta moyo wa tshiendelela.”
Nenu bikala ne lulamatu ku milayi yenda, nenumona ne Mukalenga udi ulama milayi yenda bua kuikala bamua nenu mu disadila dienu, mu dipepeja dia majitu enu. Nenufika ku dimanya Mupandishi, ne bula bua ntanta nenufika ku difuanangana nenda ne “ikalayi bajalama mudiye.” Ku diambuluisha bakuabu bua Mupandishi, nenumona ne nudi nuenda nusemena pabuipi nenda.
Ba bungi ba kunudi badi ne bananga babu badi bumbuka mu njila wa moyo wa tshiendelela. Nudi nulubakana bua tshiakuenza tshiansongu bua kubalujamu. Nudi mua kuikala ne ditabija mu Mukalenga bua asemena kudibu bu munudi numusadila ne ditabuja.
Vulukayi mulayi wa Mukalenga kudi Joseph Smith ne Sidney Rigdon pavuabu mu mudimu wenda ntanta ne mêku abu, Mukalenga wakabambila Sidney ne Joseph ne, mêku abu avua bimpa, avua mu bianza Bienda, ne nênza nawu tshidi tshimunsankisha; bualu mu Yeya mudi bukola bonsu.
Panudi nujingila mputa ya badi mu dijinga, bukola bua Mukalenga nebunukolesha. Maboko enda neyikala manuoluela ne enu bua kusabula ne kubenesha bana ba Tatu wa mu Dîulu.
Musadidi yonsu udi wenza tshipungidi ne Yezu Kilisto neapeta dilongesha dienda ku Nyuma bu mudiyi usadila ne ubenesha bakuabu Buenda. Pashisha nebumvua dinanga dia Mupandishi ne nebapeta disanka mu disemena pabuipi nenda.
Ndi mujadiki wa Dibika ku Lufu dia Mukalenga bushuwa bu mema muikalapu ne bayidi babidi mu nzubu, ne mu njila wa ku Emau. Ndi mumanya ne Udi ne moyo.
Ewu udi Ekelezia mulelela—Ekelezia wa Yezu Kilisto. Dituku dia Tshilumbuluidi, netuimana kumpala kua Mupandishi, batangilangana. Netshikala diba dia disanka dinena bua aba bavua bikala basemena kudiyi mu moyo ewu, mu mudimu wenda ne badi mua kutekemena ne disanka bua kumvua miaku yenda: “Bimpe, muana wanyi muimpe ne mutumikidi.”
Ndi njadika bu mujadiki wa Mupandishi mubika ku lufu ne Musungidi wetu, mu dina dia Yezu Kilisto, amena.
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2025. Tshiluba. 19602