Mukenji wa ku Ngondu wa Liahona, Ngondu Muitanu 2025
Mambuluishi a Bunzambi bua Moyo wa Tshifuaka
Bulongolodi bua Tatu wetu wa mu Dîulu budi bufila mambuluishi bua kutulombola mu ngendu ya tshifuaka yetu.
I.
Kupitshila ku Muprofete Joseph Smith, Mukalenga wakabuilula bintu bikesa bia moyo wa kumpala kua diledibua. Koku tuvuaku bu bana ba nyuma ba Nzambi. Bualu Nzambi uvua musua kuambuluisha bana benda bua baya kumpala, wakapangadika bua kuenza buloba pa bobu ke patuapeta mubidi, kulonga kupitshila ku dimanya, kukolesha ngikadilu ya bunzambi, ne kutekibua ku mateta bua kumona ne tudi mua kulama mikenji yenda. Aba badi bakumbana badi mua kupeta butumbi bua bungi pa mitu yabu bua kashidi ne kashidi (Abalahama 3:26).
Bua kushindika ngikadilu ya bulongolodi bua bunzambi, Nzambi wakasungula Muanenda Mulela Umua bua kuikala Mupandishi wetu. Lusifele, ewu uvua welesha meji mu tshibadi tshikuabu tshia mua kunyanga budienzedi bua muntu, wakalua Satana ne uvua muipatshibua. Mubengela pa buloba ne mukandika manema a moyo wa tshifuaka, Satana wakapeta dianyisha dia kudinga ne kufofomija bantu, ne kubalombola ku bupika ku disua dienda, bonsu badi kabayi basua kuteleja dîyi dia Nzambi (Mose 4:4).
Mu bulongolodi bua Nzambi bunena bua ntungulukilu wa bana benda mu moyo wa tshifuaka buvua bua kumanya “dîmanyinangana mu malu onsu” (2 Nefi 2:11). Bu mudi misunyi yetu kayiyi mua kukolakana anyi kulama bukola buayi kakuyi diyibidija, ke mudi dikola dia moyo wa tshifuaka ulomba bua tudibidija bikola bua kukandamena meteta a Satana ne dimanyinangana kampanda mu moyo wa tshifuaka. Tshia mushinga muvula bua dikolakana dia nyuma tshidi dijinga dia kusungula pankatshi pa buimpa ne bubi. Aba badi basungula buimpa badi mua kutungunuka batangila ku muaba wabu wa tshiendelela. Aba badi basungula bubi—bu mudi bonsu mua kuenza mu mateta a mu tshifuaka—nebikala ne dijinga dia diambuluisha dia lupandu, diodi edi didi Nzambi wa dinanga mua kufila.
II.
Kakuyi mpata, diambuluisha dinena dia Nzambi mu moyo wa tshifuaka divua dia kutupesha Mupandishi, Yezu Kilisto, uvua ne bua kukenga bua kufuta mushinga ne kufua lusa ku badi bakudimuna moyo bua mibi. Bupikudi bua lusa ne butumbi budi bumvuija buatshinyi ditabuja mu Mukalenga Yezu Kilisto didi nshindamenu wa kumpala wa lumu luimpa. Bupikudi buenda “budi butuala dibika dia bafua” (Alama 42:23), ne “apikula mibi ya ba pa buloba” (Alama 34:8), ukupula mibi yonsu itudi bakudimuna mutshima ne upesha Mupandishi bukola bua kutusabula mu bilema bietu bia mu moyo wa tshifuaka.
Pa kutenteka pa butumbi ebu bua dikupula dia mibi mienza ne kuikala bafuidibua lusa, bulongolodi bua Tatu wa mu Dîulu wa dinanga mbufila mapa makuabu a bungi bua kutukuba, biangata ditukuba ku bubi mu muaba wa kumpala. Moyo wetu wa tshifuaka udi ubanga misangu yonsu ne tatu ne mamu. Mu meji, bonsu badiku, ne mapa mashilangana bua kutulombola mu dikola dietu. Biobi kabiyi nanku, dikenaku diabu didi tshitupa tshia dîmanyinangana ditudi mua kukungamangana nadi.
III.
Dilongolola dia Tatu wetu wa mu Diulu didi difila mambuluishi makuabu bua kutulombola mu ngendu ya tshifuaka yetu. Nengakula bua anayi a ku wowu. Suayi kanundaminyi ku nomba yanyi ya inayi, bualu mambulushi â adi apuyakana. Mu dikumbaja, kudi bikubi bikuabu bia lusa mu dikumbaja ku biobi ebi.
Tshia kumpala, Ndi ngakula bua Bukenka anyi Nyuma wa Kilisto. Mu dilongesha dienda dinena dia mu mukanda wa Moloni, Moloni udi utela tatuenda ne “Nyuma wa Kilisto udi mupeshibua kudi muntu yonsu, bua ajingulula buimpa kudi bubi” (Moloni 7:16). Tudi tubala dilongesha dia momumua edi mu mabuluila a lelu:
Ne Nyuma udi ufila bukenka kudi muntu yonsu udi ulua pa buloba; ne Nyuma udi ukenkesha muntu yonsu pa buloba, udi uteleja dîyi dia Nyuma (Dilongesha ne Bipungidi 84:46).
Kabidi: Mukalenga udi wamba ne Nyuma wenda mmutumibua kudi ba pa buloba bua kukenkesha mupuekela ne munyingalala, ne dipisha dia badi kabayi bitaba (Dilongesha ne Bipungidi 136:33).
Mulombodi Mukulu Joseph Fielding Smith wakumvuija mifundu eyi ne: “Mukalenga kimulekela bantu to (padibu baledibua pa buloba) bapanga diambuluisha, benzejibua bua kuteta bua kujandula bukenka ne bulelela, kadi muntu yonsu … udi uledibua ne bunema bua kupeta buludiki, dilongesha, mubelu wa Nyuma wa Kilisto, anyi Bukenka bua Bulelela.”
Tshibidi tshia mambuluisha manena tshifila kudi Mukalenga bua kutuambuluisha tshidi nsangilu wa maludiki a bunzambi mu mifundu adi mikala tshitupa tshia bulongolodi bua lupandu (bulongolodi bua disanka). Maludiki â adi mikenji, milulu, ne bipungidi.
Mikenji idi ileja njila udi Tatu wa mu Dîulu mutuenzela bua tuetu kukolela bua kuya ku moyo wa tshiendelela. Bantu badi bela meji ne mikenji idi mushindu wa Nzambi kupangadika nganyi wakunyoka kabena bumvua kipatshila ka bulongolodi bua disanka dia Nzambi wa dinanga. Mu njila ewu, tudi mua kuenza ndambundambu malanda adi akengedibua ne Mupandishi ne tukumbana bua kupeta didiundisha dia bukola buenda buatuambuluisha mu njila wa kuetu kudiyi ujinga bua yonsu wa kutudi. Tatu wetu wa mu Dîulu mmusua bua bana benda bonsu balukila ku bukalenga buenda bua selestiya, koku ke kudi Nzambi ne Mupandishi basomba, ne kuikala ne mushindu wa moyo wa badi basomba mu butumbi bua selestiya.
Milulu ne bipungidi bidi tshitupa tshia mukenji udi uleja njila wa ku moyo wa tshiendelela. Milulu, ne bipungidi bia tshijila bitudi tuenza ne Nzambi kupitshila ku biobi, bidi bitupa bidi bilombibua ne bilaminu bia mushinga mu njila awu. Ndi musua kuela meji bua mudimu wa bipungidi bumudiwu muleja mu bulongolodi bua Nzambi, mabenesha enda manena adi afidibua kudi aba badi balaya kumpala bua kulama mikenji kampanda ne balama milayi ayi.
Makuabu mambuluishi adi Nzambi ufila bua kuenza masungula mimpa adi mikala madimuenesha a Nyuma wa Tshijila. Nyuma wa Tshijila udi tshidimba tshisatu tshia Bunzambi. Mudimu wenda udi muleja mu mifundu, udi wa dijadika dia Tatu ne Muana, kutulongesha, kutuvuluija bintu bionsu, ne kutuludika mu bulelela bonsu. Mifundu idi yangata ndejilu ya bungi bua madimuenesha a Nyuma wa Tshijila, bu mudi bujadiki bua nyuma mu diandamuna ku lukonku pa bulelela bua Mukanda wa Molomo. Didimuenesha kadiena kufuanyikija ne dipa dia Nyuma wa Tshijila, udi muikala ufidibua mulondangana ne ditambula.
Dimua dia ku mambuluisha a mushinga a Nzambi adiyi ufila bua bana benda bena lulamatu didi dipa dia Nyuma wa Tshijila. Mushinga wa dipa udi mushuwua bua ne udi ufidibua bimanyika panyima pa dikudimuna dia mutshima ne ditambula dia mu mâyi, “ne pashisha [mifundu idi yumvuija] ki dilekela dia mibi yenu idi ilua ku kapia ne ku Nyuma wa Tshijila” (2 Nefi 31:17). Bantu badi bapeta dilekela edi dia mibi—ne benzulula misangu yonsu dipeluka diabu dia dikudimuna mutshima dituku dionsu ne basomba bilondeshila bipungidi bienza kupitshila ku mululu wa biakudia bia tshijila—badi bakumbana bua mulayi wa ne Nyuma wa Tshijila, Nyuma wa Mukalenga, udi mua kuikala misangu yonsu nabu (Dilongesha ne Bipungidi 20:77).
Nanku, Mulombodi Mukulu Joseph F. Smith wakalongesha ne Nyuma wa Tshijila “neakenkesha meji a bantu pa bintu bia Nzambi, bua kubatuishisha ku diba dia ditonda diabu benza disua dia Tatu, ne kuikala mu bobu bujadiki bua diba dionsu ne mubashindikiji mu nsombelu, mu dienza bu muludiki mushuwa pa bulelela bonsu ne dibumvua ku dituku ne dituku ne disanka ne kalolu, ne diakana bua kuikala muimpa kudi bantu bonsu, bakuenzela bubi pa mutu pa kubuenza, kuikala amu muimpa ne lusa, kuikala ne moyo munena. Aba badi ne dipa edi dialabala, dibua edi dia mushinga mukola, badi ne nyota ya bululama. Kakuyi diambuluisha dia Nyuma wa Tshijila,” ke muvua Mulombodi Mukulu Smith ujikija, “muntu wa tshifuaka nansha umua kena mua kuenda mu kajila kakesa ne ka meba to.”
IV.
Ne mambuluishi onsu a makanda bua kutuludika mu ngendu yetu ya tshifuaka, bidi bia bundu bua ne bantu ba bungi kabena balongolola bua dituilangana ne Mupandishi ne Musungidi wetu, Yezu Kilisto. Lusumuinu luenda lua mishika nkunda dikumi, ludi luakudibua bikola mu mpungilu emu, ludi luleja ne aba bonsu batu babikidibua bua kusambakena nenda, amu nkatshi nkatshi uvua mudilongolola.
Tudi bamanya bonsu bilejilu bia bantu badi kabayi badilongolola: bena bukenji badi bafuma mu bukenji badi bimanyika ntungunukilu wabu wa mu nyuma kabayi baya mu disambila, bansonga badi banyanga ntungunukilu wa mu nyuma wabu mu dishala ntanta ne malongesha ne bibilu bia Ekelezia, Baluma badi batentemuna dijidibua diabu ku Buakuidi bua Melekisedeke, baluma ne bakaji—pamuapa ndelanganyi wa ba mpanda njila anyi ya baledi bakana—badi bumbuka mu njila wa bipungidi kabayi benza ne balama bipungidi mu ntempelo wa tshijila.
Dijimina dia bungi didi difika padi bidimba kabiyi bilonda bulongolodi bua muyuki wa nkaya wa nyuma udi muikala disambila dia nkaya, dibala dia mifundu dia ku dituku, ne dikudimuna mutshima misangu yonsu. Ku luseka lukuabu, bakuabu badi badiombola kuenzulula kua bipungidi bia ku lumingu bua kubenga kuangata biakudia bia tshijila. Bakuabu badi bamba ne Ekelezia kena wandamuna ku majinga abu to; badi baluja tshidibu bamona bu majinga abu alua pa tshivua Mukalenga mufila mu malongesha enda a bungi ne mishindu ya kuambuluisha bakuabu.
Didipuekesha ne dieyemena Mukalenga bidi buanga ku majimina â. Bu mudi Mukanda wa Molomo ulongesha, Mukalenga “udi ubenesha ne ulubuluja badi bateka tshieyemenu tshiabu kudiyi” (Helamana 12:1). Dieyemena kudi Mukalenga didi dijinga dia mushinga bua aba badi bapima bibi mikenji ya Nzambi ne malongesha a baprofete ku bidibu bajandula ne ku lungenyi lua muntu.
Ndi muakula bua mambuluisha a tshifuaka a bungi adi Tatu wa mu Dîulu mufila bua kuambuluisha bana benda bua kupingana kudiye. Mudimu wetu mu bulongolodi bua bunzambi udi wa kueyemena Nzambi ne kukeba ne kuenzela mambaluishi a bunzambi â, nangananga Bupikudi bua Muanenda Munanga, Mupandishi ne Musungidi wetu, Yezu Kilisto. Ndi nsambila bua tulongesha ne tuteka mu nsombelu wetu nshindamenu eyi, mu dina dia Yezu Kilisto, amena.”
© 2025 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, May 2025. Tshiluba. 19602