Iien Karōk Men Otemjej
(Jerbal 3:21)
Men eo aorōk tata im aiboojoj kōn “naan eo em̧m̧an” ej ennaan eo bwe Irooj Jisōs Kraist ekar kōjepļaaktok gospel in im Kabun̄ eo An ilo raan kein āliktata.
Kabun̄ eo an Jisōs Kraist im Armej ro Rekwojarjar ilo Raan Ko Aliktata ekar ejaak 195 iiō ko remootļo̧k rainin, ilo Eprōļ 6, 1830.
Juon jarlepju edik in rittōmak ro im ro m̧ōttāer raar kobatok ilo iien in eļap im elem̧ōņōņō. Ro raar pād ilo iien in rekar jeraam̧m̧an jān Jetōb eo ke kain̄i eo an kwojkwoj ekar kōm̧m̧an, menin letok eo an Jetōb Kwojarjar ekar leļo̧k, kain̄i ko an priesthood rekar kōm̧m̧an, im m̧ool ko an gospel eo an Jisōs Kraist rekar kwaļo̧k.
N̄an ejaake kabun̄ eo An, Irooj ekar kōjenolo̧k revelesōn in n̄an Josep Smith eo 24 iiō-dettan ritōl eo an jinoin tata: “juon rilolo, juon riukok, juon rikanaan, juon rijjilōk an Jisōs Kraist, juon elder an kabun̄ eo kōn ankilaan Anij Jemān, im jouj an am Irooj Jisōs Kraist.”
Ij lukkuun jar kōn jipan̄ eo an Jetōb Kwojarjar ilo ad ļōmņak kōn aorōkin im wōnm̧aanļo̧k ilo iien in ejej uwaan ilo bwebwenatoin laļ in.
Visōn Eo M̧oktata
Ejaak eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata ekar men eo eļap an juon ellaajrak in en̄jake ko rekabwilōn̄lōn̄. En̄jake eo jinointata ekar waļo̧k 10 iiō ko m̧oktaļo̧k ilo upstate New York.
Ilo spring in 1820 eo, juon ļaddik kar etan Josep Smith ekar ilo̧k n̄an wōjke ko repaake m̧weo im̧ōn im jar. Ekar wōr an kajjitōk kōn lo̧mo̧o̧r n jetōb eo an, im ekar lukkuun kōņaan jeļā “[kabun̄] rōt iaan aolep ko ijin ekar jim̧we, bwe [e] maron̄ jeļā eo n̄an kobaļo̧k ippān.” Josep ekar lōke bwe Anij enaaj kar uwaake jar eo an im tōlļo̧k e.
Jouj im lukkuun jeļā bwe Josep ekar jab jar wōt n̄an jeļā ta eo ekar jim̧we. Ijello̧kin, ekar jar n̄an jeļā ta eo ekar jim̧we bwe en maron̄ kōm̧m̧ane ta eo ekar jim̧we. Josep ekar kajjitōk ilo tōmak im kar kōmlet n̄an jerbale ekkar n̄an uwaak ko ekar būki.
“N̄an [uwaake] jar eo an, Anij Jemed im Nejin, Jisōs Kraist, raar waļo̧k n̄an Josep im kar jinoe iien ko ‘iien karōk men otemjej’ (Jerbal 3:21) āinwōt kar kanaan kake ilo Baibōļ. Ilo visōn in, ekar ekkatak bwe ālkin kar mej eo an Rijilōk ro jinointata, Kabun̄ eo an Jisōs Kraist ilo Kallim̧ur M̧okta ekar jako jān laļ in.” Josep Smith enaaj erom kein jerbal n̄an bar kōjepļaaktok katak eo, mālim eo, im bujen ko im kain̄i ko an Kabun̄ eo etto an Rilo̧mo̧o̧r.
Josep ekar bar kam̧oole: “Iaar lo ruo Armej ro, ro meram im aiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iaer eaar kōnono n̄an eō, im kūr eō kōn eta im ba, im jitōn̄ļo̧k eo juon—En̄in Nejū Jitōnbōro. Kwōn Ron̄jake E!”
Jān visōn in im wāween ko rekwojarjar ālkin, Josep Smith ekar meļeļe bwe Anij im Jisōs Kraist raar jeļā kajjien āinwōt juon armej, kar kea kōn lo̧mo̧o̧r indeeo eo an, im ekar wōr juon mijen bwe en kōm̧m̧ane. Ekar barāinwōt katak katak ko raorōk kōn piktokin, m̧wil, im aiboojoj eo kōn Doulul in Anij—im bwe Jemān im Nejin rej Armej ro rejenolo̧k jen doon. Jisōs Kraist ej lukkuun Nejin Anij ilo jetōb im ilo kanniōk.
Josep Smith ekar kwaļo̧k bwe Jemedwōj Ilan̄ im Jisōs Kraist rej armej ro eier wōt juon ānbwinnier. E ekar ba, “Jemān ewōr ānbwinnin kanniōk im di ko āinwōt maron̄ un̄ūr wōt ānbwinnin armej; Nejin barāinwōt; a Jetōb Kwōjarjar ejjeļo̧k ānbwinnin kanniōk im di, a ej juon ānbwinnin Jetōb.”
Ij kam̧ool kōn lo̧lo̧k eo an Jemān im Nejin n̄an Josep Smith ekar jinoin iien eo ilo wōj eo an “jepļaaktok eo an aolep men ko kar kōnono kaki jān lo̧n̄iin aolep rikanaan ro rekwōjarjar jān jinoin laļ.”
Bok in Mormon
Eo kein karuo ilo laajrak in wāween ko rekabwilōn̄lōn̄ me ekar tōlļo̧k n̄an ejaak eo an Kabun̄ eo kar kōjpeļaaktok an Rilo̧mo̧o̧r eo ekar ukook eo an im waļo̧ktok eo an Bok in Mormon.
“Jej kam̧ool eļapļo̧k bwe Josep Smith ekar letok menin letok im kajoor an Anij n̄an ukot rekoot ko etto—Bok in Mormon—Bar Juon Kallim̧ur kōn Jisōs Kraist. … Peij ko ilo jeje in ekwojarjar ekoba iien kwaļo̧k eo an Jisōs Kraist ilubwiljin armej ro ilo Western Hemisphere ejjab to ālkin Jekakpeje eo An. [Bok in Mormon ej katakin kōj kōn jibadbad eo an mour in im ej kōmeļeļeik kōn katak eo an Kraist, eo ej dilepen jibadbad eo. Āinwōt m̧ōttan Baibōļ eo, Bok in Mormon ej kam̧ool bwe aolep armej rej ļaddik im leddik ro nejin Jemedwōj Ilan̄ eo ej iakwe kōj ilo Lan̄, bwe E ewōr juon An karōk ekwojarjar n̄an mour ko ad, im bwe Eo Nejin, Jisōs Kraist, ej kōnono rainin āinwōt an kar kōnono etto.”
Āinwōt membōr ro an Kabun̄ eo kōjepļaaktok an Rilo̧mo̧o̧r, “Kōmij tōmak bwe Baibōļ eo ej naan in Anij toun wōt an jim̧we ukook eo an; kōmij barāinwōt tōmak bwe Bok in Mormon ej naan in Anij. Bok in Mormon ej bar juon kallim̧ur kōn Jisōs Kraist, ej kapen m̧ool eo an Baibōļ, im ej kōjepļaaktok m̧ool ko ralikkar im raorōk me raar jako jān Baibōļ eo.
Jepļaaktok eo an Priesthood
Kabun̄ eo an Jisōs Kraist im Armej ro Rekwojarjar ilo Raan Ko Āliktata ej kwaļo̧k bwe Kabun̄ eo m̧oktata kar ejaake jān Rilo̧mo̧o̧r eo, kōn mālim eo an ekwojarjar, katak eo, im bujen ko im kain̄i ko, raar jako jān laļ in. Ejja m̧ōttan jepļaaktok eo kar kanaan kake bwe aolep men ko ilo raan ko āliktata, rikanaan ro etto im rijilōk ro kar leļo̧k mālim eo an priesthood eo ioon Josep Smith im kar leļo̧k ki ko an priesthood eo n̄an e. Menin ekar laajrak in wāween ko rekabwilōn̄lōn̄ kein kajilu me ekar tōlļo̧k n̄an ejaake eo an Kabun̄ eo kar kōjepļaaktok an Rilo̧mo̧o̧r.
Mālim eo an priesthood ej kōtļo̧k an ro rikarejeran Anij n̄an “bōk jikin [E] im jerbal ilo Etan.” “Ki ko an priesthood rej mālim eo n̄an kōjbwebweik kōjerbal priesthood eo ilo etan ajri ro nejin Anij.”
Ium̧win tōl eo an Jeman im Nejin, Jon Ripeptaij eo emoj an jerkakpeje ekar kojeplaaktok maron eo nan peptaij kon tulok ilo dan nan jeorlok jerawiwi ko ilo 1829. Ilo ejja iio eo wot, juon iaan rijilok ro jinointata—Piter, Jemes im Jon—rekar kojeplaaktok tol an Jonoulruo ro im maron ko jet an priesthood im kii ko.
Jiljino iiō ālkin an ejaak Kabun̄ in, ilo Kirkland Tampeļ, Moses, Elias, im Ilaija rekar leļo̧k n̄an Josep mālim ko jet remenin aikuj n̄an kadedeļo̧k jerbal eo an Anij ilo raan ko āliktata.
Moses ekar leļo̧k ki ko an aiintok Israel.
Elias ekar leļo̧k tōrean bōk eddo in gospel eo an Ebream, ekoba kōjepļaaktok eo an bujen eo an Ebream.
Ilaija ekar leļo̧k ki ko an kajoor in liāp, leļo̧k māim eo ej kōtļo̧k an kain̄i ko kōm̧m̧an ioon laļ in n̄an lukwōj ilo indeeo, eo āinwōt kobaik baam̧le ko ippān doon ilo kadkad ko indeeo me rōļļāļo̧k jān mej.
Kabun̄ eo an Jisōs Kraist Ej Ejaak
Ke Josep Smith ekar ukōt Bok in Mormon, ekar bōk revelesōn ko kwaļo̧ki bwe Kabun̄ eo an Jisōs Kraist enaaj bar jutak. Bōtaab Irooj ekar kōmeļeļeik Josep n̄an jab m̧ōkaj in ejaake Kabun̄ eo An. Ijello̧kin, “jān jitōbōn kanaan im revelesōn” Irooj ekar kwaļo̧k n̄an Josep “lukkuun raan eo … [ej] aikuj wōnm̧aanļo̧k im karōke kobban Kabun̄ eo An [bar juon alen], ioon laļ in.”
Kabun̄ eo ekar ejaak ilo laajrak eo wōt ekkar ālkin jepļaaktok eo an priesthood eo im waļo̧ktok eo an Bok in Mormon. Kape ko im̧aan tata an Bok in Mormon raar pojak ilo M̧aaj 26, 1830, im Kabun̄ in ekar ejaak ilo Eprōļ 6.
“Kabun̄ eo an Jisōs Kraist im Armej ro Rekwojarjar ilo Raan Ko Āliktata ej Kabun̄ eo an Kraist ilo Kallim̧ur Ekāāl kar kōjepļaaktok. Kabun̄ in ej āmjak ilo mour in ewānōk an lukkuun dōm̧an em̧, Jisōs Kraist, im ilo Pinmuur eo ejjeļo̧k jem̧ļo̧kin im Jerkakpeje eo em̧ool. Jisōs Kraist ekar bar kūr juon alen Rijilōk ro im kar leļo̧k n̄an er mālim eo an priesthood. E ej karuwaineneik kōj aolep n̄an itok n̄an E im Kabun̄ eo An, n̄an bōk Jetōb Kwojarjar, kain̄i ko an lo̧mo̧o̧r, im bōk lan̄lōn̄ eo ejjeļo̧k jem̧ļo̧kin.”
Tōrean In Bōk Eddo an Tarlep in Iien ko
Waļokļo̧k eo an Jemān im Nejin n̄an Josep Smith, ukook eo im waļoktok eo an Bok in Mormon, im jepļaaktok eo an malim im ki ko an priesthood eo raar menin aikuj ko m̧okta wōt jān an ejaak Kabun̄ eo kar kōjepļaaktok an Irooj 195 iiō ko remootļo̧k rainin.
Ilo Kallim̧ur M̧okta, rikanaan Daniel ekar ukōt juon ettōņak kōn juon dekā me naaj m̧wijiti jān juon toļ kōn ejjeļo̧k pā im kobrak aolepān laļ. Juon iiō ālkin ejaak eo an Kabun̄ in, Irooj ekar kōmeļeļeik Josep Smith bwe ki ko an aelōn̄ in kiin̄ eo an Anij em̧ōj bar juon alen “liļo̧k n̄an armej ioon laļ” im “gospel eo [an Jisōs Kraist enaaj] jabwilbwil m̧aanļo̧k n̄an jem̧ļo̧k ko an laļ, āinwōt dekā eo m̧wijiti jān toļ ko kōn ejjeļo̧k pā ko.”
Ij kamool: Irooj ej kakūrm̧ol kallim̧ur eo An. Kabun̄ eo kar kōjepļaaktok an Rilo̧mo̧o̧r ej ejaak aolepān laļ in im ej kein jerbal eo me Anij enaaj “kobaik men ko otemjej ilo Kraist, men ko i lan̄ im men ko i laļ.”
Jerbal eo an Irooj ilo raan ko āliktata “ej wūn eo me ekar kaitok limo in armej ro an Anij ilo aolep tōre; ej juon unin tōl me rikanaan ro, pris ro im kiin̄ ro raar pedped ippān lo̧udin̄din̄ eo eoktak; raar reim̧aanļo̧k kōn kōtmene elem̧ōņōņō n̄an raan eo men jej mour ie; im ketak kōn kōtmene ko an lan̄ im relem̧ōņōņō raar al im je im kanaan kōn tōre in ad.”
Ilo tōre in bōk eddo in eļap tata im āliktata an aolep gospel, “bwe dipiio in im dedeļo̧k in koba eo eweeppān, im kaōnļo̧k ippān doon in tōrean bōk eddo ko, im ki ko, im kajoor ko, im aiboojoj ko ren aikuj bōk jikier, im kwaļo̧ki jān raan ko an Adam em̧ool n̄an iien in. Im jab men in wōt, ak men ko me rejjan̄in kar waļo̧k jān foundasōn an laļ in … naaj kwaļo̧ki … ilo iien in, tarlep in tōrean iien bōk eddo ko.”
Rikanaan Josep ekar kōm̧eļeļeikļo̧k wōt, “Aolep kain̄i ko im jerbal ko me raar aikuji kōn Priesthood eo, ium̧win tōl ko im kien ko an Eo Ekajoor Bōtata ilo jabdewōt iaan tōrean iien bōk eddo ko, naaj aolep pād ilo tōrean iien bōk eddo eo āliktata … n̄an kakūrm̧ool jepļaaktok eo kar kōnono kake jān lo̧n̄iin aolep Rikanaan Kwojarjar ro.”
Kallim̧ur ko im Naan in Kam̧ool
Iaar kajjieon̄ ba ilo tukadu in m̧ōttan ko im̧aan tata aorōk tata im aiboojoj an “naan eo em̧m̧an” jabdewōt armej jabdewōt jikin ilo laļ in emaron̄ bōke—ennaan eo bwe Irooj Jisōs Kraist ekar kōjepļaaktok gospel eo An im Kabun̄ eo ilo raan ko āliktata.
Ij karuwaineneik aolep n̄an katak kake im kam̧oole ennaan in. Ij kallm̧ur bwe kajjojo ro me “rej ekkatak ennaan eo an Jepļaaktok in im jerbale ilo tōmak renaaj jeraam̧m̧an [kōn kajoor eo an Jetōb Kwojarjar] n̄an bōk kam̧ool eo aer make kōn kwojarjar in im jibadbad eo an n̄an kōpooj laļ in n̄an Itok eo Kein Karuo an Irooj im Rilo̧mo̧o̧r, Jisōs Kraist me kar kallim̧ur kake.” Ilo ami lukkuun jar kōn kōtmene eo n̄an jim̧or bōk im jerbale uwaak eo jān Anij, ejja wōt an Josep Smith eo edik ekar, ekkeke eo ami n̄an kile im uwaake kam̧ool eo ekwojarjar naaj ļapļo̧k.
Ij kam̧ool bwe Anij Jemān Indeeo ej Jemād. Ij kwaļo̧k kam̧ool im kam̧ool bwe Jisōs Kraist ej Jitōnbōro Nejin Jemān im Emake Wōt Ekar Keotak ilo kanniōk. E ej ad Rilo̧mo̧o̧r im Ripinmuur.
Ij lan̄lōn̄ ilo kam̧ool bwe Jemān im Nejin raar waļokļo̧k n̄an ļaddik eo Josep Smith, kōn menin ekar ijjino eo an Jepļaaktok eo an gospel eo an Jisōs Kraist ilo raan kein āliktata. Bok in Mormon ej bar juon kallim̧ur kōn Jisōs Kraist im epād ie naan eo an Anij. Mālim eo an priesthood n̄an jutak ilo etan Rilo̧mo̧o̧r eo im jerbal ilo Etan bar juon alen epād ilo laļ in. Im Kabun̄ eo an Jisōs Kraist im Armejro Rekwojarjar ilo Raan Ko Āliktata ej Kabun̄ eo kar kōjepļaaktok an Kraist ilo Kallim̧ur Ekāāl. Ij kwaļo̧k aō kam̧ool em̧ool bwe aolep men kein rej m̧ool ilo āt eo ekwojarjar etan Irooj Jisōs Kraist, amen.