E te Manao e Faatulaga ni Sini Sili Atu i lenei Tausaga? Mulimuli i Faataitaiga a Perofeta
Ua faaalia e taitai o le Ekalesia e mafai ona ausia sini i le finafinau, onosai, faatulaga o mea e tatau ona faamuamua—ma le fesoasoani a le Alii.
O Ianuari o se taimi sili lea e fai ai ni fuafuaga e aoao ai ma tuputupu ae ai i le isi 12 masina. A o e mafaufau ma le agaga tatalo i au sini, ia manatua nei lesona e fa mai olaga o perofeta ma aposetolo o e na faatulagaina ma le manuia ma ausia a latou sini.
Faataitai ma Faifai Pea
A o tamaitiiti Peresitene Heber J. Grant, sa taumafai lona tina e aoao o ia e pese. O lea, na auai ai Heber i se vasega o pesepesega i le 10 o ona tausaga—ae sa le mafai ona ia “usuina se fati faigofie.” Sa “fiu le faiaoga musika ma le faanoanoa” ma fai mai o Heber “e le mafai lava, i lenei lalolagi, ona aoao e pese.”
Ae sa pulunaunau lava Heber ma tuu lona mafaufau i le sini o le a’oa’o ia iloa pese. Sa ia faataitai mo le tele o itula i soo se taimi lava e malaga ai na o ia ma e le mafai ona faalogoina e soo se tasi e ono faalogo i ai. Sa ia iloaina o mea lelei e masani ona manaomia ai le galue malosi e faataunuu, ma fai mai, “Ou te fiafia lava e tuuina atu le lua pe tolu masina o lo’u taimi avanoa pe afai o le faia o lena mea o le a taunuu ai i lo’u usuina o se viiga se tasi pe lua.”
E ala i le tele o le finafinau ma le faataitai, na faasolosolo malie ai lava ona faaleleia le leo a Heber. O le mea e sili ona tāua, o le taumafai pea lava pea. Sa ia usuina le viiga muamua sa ia aoaoina i le faitau selau o taimi. Mulimuli ane, e ala i ana taumafaiga faifai pea, na ia iloa ai pese.
Ia Taulimaina Sini Faigata
Sa iloa foi e Peresitene Spencer W. Kimball ia faamanuiaga o le feagai ai ma se sini faigata. Sa ia faamatala mai le tala lenei i se sini sa ia faia ina ua 14 ona tausaga:
“Ina ua ou faalogo i se taitai o le Ekalesia mai le Aai o Sate Leki o ta’u mai ia i matou i le konafesi e tatau ona matou faitauina tusitusiga paia, … Sa ou savali atu i lo’u fale i se poloka e mamao ese … ma sa ou faitauina uluai mataupu o le Kenese. …
“Sa ou iloa ai o lenei Tusi Paia sa ou faitauina sa i ai i totonu ni tusi e 66, ma sa toetoe lava a ou le naunau ai ina ua ou iloaina o loo i ai i totonu mataupu e 1,189, ona ou iloa ai lea foi e 1,519 itulau. Sa matautia, ae sa ou iloa afai e faia e isi e mafai foi ona ou faia.”
O lena aofaiga o le faitauina sa le faigofie mo se talavou, ae ui i lea sa tumau pea Peresitene Kimball ma faamaeaina lana sini. A o avea ma se tagata matua, sa ia fai mai, “Sa ou fiafia lava i taimi uma ou te faitauina le Tusi Paia mai le faavaa i le faavaa.”
Sa faamanuiaina Peresitene Kimball mai le faaaluina o le taimi e mafaufau ai i le faatulagaga o lana sini. E ui lava sa foliga mai e taufaafefe, ae o faamatalaga na saunia ai o ia ina ia manuia. E pei ona sa i ai ia Peresitene Kimball, o le aapa atu ma le ausiaina o se sini faigata a o talavou e mafai ona aumaia ai lagona o le mautinoa ma le faamalieina e auauna mai ia i tatou i le olaga atoa.
Aua Nei Faatagaina Mea e Itiiti le Taua e Faalavelave i le Ala
Na faamatala e Elder Quentin L. Cook o le Korama a Aposetolo e Toasefululua le tala i lona tama o aoaoina o ia e faatu ni sini e ala i le nonofo i lalo ma tamaiti taitoatasi ma ofoina atu le fesoasoani.
“Sa ou manao e auai i lenei faiga faatasi ma la’u fanau,” o le tala lea a Elder Cook. “Ina ua lima tausaga o le ma atalii o Larry, sa ou fesili atu ia te ia po o le a le mea e manao e avea ai pe a matua. Sa ia fai mai sa manao e avea ma se fomai e pei o le Uso o lona Tama o Joe. …
“I ni nai masina mulimuli ane, sa ou toe fesili atu ai ia te ia po o le a le mea e fia avea ai o ia. O le taimi lea na ia fai mai ai e manao e avea ma se pailate o le vaalele. … Sa ou fai atu, ‘Larry, o le taimi mulimuli na ta talanoa ai na e manao e avea ma se fomai. O le a se mea ua suia ai lou mafaufau?’ Sa ia tali mai, ‘Ou te fiafia lava i le manatu o le avea ma se fomai, ae ua ou matauina e faigaluega Uncle Joe i taeao o Aso Toonai, ma ou te le manao e misia ata komi o le Taeao o le Aso Toonai.’
“Talu mai lena taimi ua faaigoaina e lo matou aiga se faalavelave mai se sini aoga o se Ata Komi o le Taeao o le Aso Toonai.
“O a nisi o Ata Komi o le Taeao o le Aso Toonai e faalavelaveina ai i tatou mai le mauaina o le olioli tatou te mananao ai? … Afai tatou te iloiloina mafuaaga tatou te le faia ai le mea e tatau ona tatou faia, tatou te iloa ai o le lisi o Ata Komi o le Taeao o le Aso Toonai e toetoe lava a le gata.”
Ua faaali mai e aoaoga a Elder Cook ia i tatou e tatau ona tatou mafaufau i le auala o loo tatou faia ai, aloese mai mea faalavefau, ma taulai atu pea a o tatou saili e ausia a tatou sini.
Faatulaga ni Sini e Faavae i Fautuaga a le Perofeta
I le 54 o ona tausaga, a o lei valaauina o ia o se Pulega Aoao, sa auai ai Peresitene Russell M. Nelson i se fonotaga lea na luiina ai e Peresitene Spencer W. Kimball tagata na auai ina ia “auauna atu i tagata Saina” ma “aoao la latou gagana.”
E ui lava o ia o se fomai tipitipi pisi o le fatu i lena taimi, ae sa tauaveina e Peresitene Nelson lenei fautuaga i lona loto. Sa ia maua se faiaoga e fesoasoani ia te ia e aoao ai le gagana Meniterini.
E lei umi ae nofo Peresitene Nelson i autafa o se fomai tipitipi lauiloa Saina, o Dr. Wu Yingkai, i se tauaofiaga faafomai. Ona o ana suesuega i le gagana Saina, na mafai ai e Peresitene Nelson ona faia se talanoaga ma Dr. Wu. Mai i inā, na fausia ai e foma’i e to’alua se faauōga tumau ma na oo lava ina asiasi atu i atunuu o le tasi ma le isi.
O le sini a Peresitene Nelson ia aoao le gagana Meniterini na taitai atu ai i fesootaiga lelei ma Saina, e pei ona faamoemoe i ai Peresitene Kimball. Ina ua uma ona valaauina o ia i le Korama a Aposetolo e Toasefululua, sa faia foi e Peresitene Nelson lana taotoga mulimuli o le fatu i le tagata pese opera sili ona lauiloa a Saina e ala i se talosaga faapitoa.
Ua faatuina foi e Peresitene Nelson se faataitaiga o le faatuina o sini e ala i lana suesuega o tusitusiga paia. Ina ua ia faalogo i le aioiga a Peresitene Thomas S. Monson (1927–2018) i le 2017 mo i tatou taitoatasi e faitau ma suesue i le Tusi a Mamona i aso uma, sa faia e Peresitene Nelson se sini ia faia lena mea—e pei lava ona sa ia faia ina ua ia faafaigaluegaina se faiaoga Meniterini.
Ao ia suesue, sa faia e Peresitene Nelson “ni lisi o mea e uiga i le Tusi a Mamona, o mea na te faamautuina, o mea na te faamaoniaina le sese, o mea na te faataunuuina, o mea na te faamaninoina, ma mea na te faaalia mai.” Sa ia faaali mai ia i tatou o upu a perofeta e mafai ona uunaia ai sini ua tatou faatuina ma e mafai ona faaauau pea ona tatou aoao ma faaleleia i o tatou olaga atoa.
Mauaina o le Olioli
O nei mamanu o le faatuina o sini o se vaega o le mataupu faavae e faavavau o le tuputupu ae ma le faaleleia i o tatou olaga atoa. E finagalo le Tama Faalelagi ma Iesu Keriso ia tatou avea atili e faapei o i La’ua ina ia tatou maua le olioli ma le faamalieina ma mafai ai ona tatou nonofo e faavavau faatasi ma i La’ua.