“Faia o Fesili, Mauaina o Tali: O Le Mamanu na Faatulaga e Iosefa Samita,” Liahona, Ian. 2025.
Sau, Mulimuli Mai ia te A’u
Iosefa Samita—Talafaasolopito 1:1–26
Faia o Fesili, Mauaina o Tali: O Le Mamanu na Faatulaga e Iosefa Samita
A Pillar of Light [O Se Ao Faaniutu], saunia e Dan Burr, e le mafai ona kopiina
I le 1820, na maua ai e Iosefa Samita, le alii talavou faifaatoaga na muai faauuina e 14 tausaga le matua i le itu i matu o Niu Ioka, le Uluai Faaaliga faavavega lea o le a faailogaina ai se amataga fou mo le lalolagi atoa. O fesili ma tali nei e tolu e uiga i le faamalosia o a tatou molimau i le Uluai Faaaliga.
O le a se mea e mafai ona tatou aoao mai le mamanu a Iosefa Samita o le faia o fesili?
Sa sailia e Iosefa le faamagaloga mo ana agasala ma tali i ana fesili. Sa ia fia iloa po o le fea lotu e auai. Sa auai o ia i lotu eseese ma sa ia saili atu i le Tusi Paia mo tali. O leIakopo 1:5 na musuia ai o ia e ole atu i le Atua, le puna o upumoni uma. (Tagai i le Iosefa Samita—Talafaasolopito 1:10–13.)
A o sauni Iosefa e tatalo, sa ia maua se nofoaga sa filemu ma toamalie. E ui lava i teteega sa feagai ma ia i le amataga o lana tatalo, ae sa faaaoga e Iosefa ona “malosi atoa e valaau atu ai i le Atua e laveai [o ia]” (Iosefa Samita—Talafaasolopito 1:16) ma maua ai se tali i lana fesili (tagai i le fuaiupu 18–19).
Mai le aafiaga o Iosefa, e tele mea e mafai ona tatou aoaoina e uiga i le faatuatua, tatalo, ma le mauaina o tali. E taua le matauina e ui ina sa maua e Iosefa tali i ana fesili muamua i lana faaaliga vaaia o le Tama ma le Alo, ae i lona olaga atoa sa faaauau pea ona ia sailia tali mai le Atua i le tatalo. Na oo mai nei tali i le tele o tausaga a o ia saili pea, usiusitai, ma maua le faatuatua o le a tali mai le Atua ia te ia.
Na aoao mai Peresitene Russell M. Nelson e faapea, “Ua faatulaga e le Perofeta o Iosefa Samita se mamanu mo i tatou i le foiaina o a tatou fesili.”:
Pe alagatatau le Uluai Faaaliga i la’u molimau?
O le Uluai Faaaliga ua faailogaina ai le amataga o le Toefuataiga o le talalelei a Iesu Keriso lea o loo faaauau pea e oo mai i lenei aso. I lena aso o le tautotogo i le 1820, na talanoa ai le Atua ia Iosefa, tali Lana tatalo, ma tuuina mai le taitaiga lea na taitai atu ai i le toe faatuina o le Ekalesia a Iesu Keriso i le lalolagi.
Afai tatou te talitonu na fetalai mai le Alii ia Iosefa, ona mafai lea ona tatou talitonu o loo fetalai mai o Ia ia i tatou. Afai tatou te faatuatuaina na Ia toe faatuina Lana Ekalesia e ala mai i le Perofeta o Iosefa, e mafai ona tatou faatuatuaina o loo faaauau pea ona Ia taialaina i tatou e ala mai i lo tatou perofeta o i ai nei, o Peresitene Russell M. Nelson.
E pei o Iosefa Samita, e maua e perofeta soifua faaaliga e taiala ai le Ekalesia. Na aoao mai Peresitene Russell M. Nelson, “Afai o le aafiaga paia o Iosefa Samita i le Vao Paia ua aoao mai ai se mea ia i tatou, o lona uiga, ua matala le lagi ma ua fetalai mai le Atua i Ana fanau.”
Faatasi ai ma se molimau i le Uluai Faaaliga, ua faamalosia ai lo tatou faatuatua i le Alii, Lana Ekalesia, ma faaaliga faifai pea ua Ia tuuina mai i a tatou perofeta ma aposetolo i aso nei.
E faapefea ona tatou maua se molimau i le Uluai Faaaliga?
E ui o le malaga a tagata taitoatasi i le liua o le a eseese, ae mulimuli ane e manaomia e tagata uma le faamautuuga o le Agaga Paia ina ia mafai ai ona maua se molimau i le Uluai Faaaliga ma isi upumoni o le talalelei.
Na aoao mai Peresitene Jeffrey R. Holland, Sui Peresitene o le Korama a Aposetolo e Toasefululua, “Ia faailoa ma le faamaoni au fesili ma ou popolega, ae ia tapili muamua ma faavavau le afi o lou faatuatua, aua e mafai mea uma e i latou e talitonu.”
O le tatalo o le ki lea e tatala ai le faitotoa i faaaliga patino e uiga i le Uluai Faaaliga—ma isi fesili uma. Ole atu i le Atua. Fesili atu ia te Ia pe na vaai moni Iosefa i le Tama ma le Alo. Saili le Agaga, faalagolago i le Alii, ma taumafai pea. E mafai ona e fai atu e pei ona sa faia e Iosefa: “Sa ou vaai mautinoa, ma sa ou mautinoa sa silafia e le Atua lena mea, ma e [le mafai] ona ou faafitia lena mea” (Iosefa Samita—Talafaasolopito 1:25).