E Faapefea Ona Ou Faatulagaina ni Sini Amiotonu ma le Talafeagai?

Saunia e Mabel Teerlink

Mekasini a le Ekalesia

O nei mataupu faavae e tolu e mafai ona fesoasoani ia te oe e galue ai e agai atu i ou manaoga amiotonu e ala ia Iesu Keriso.

o le Faaola o loo faamafanafanaina se tamaitai talavou

O le amataga o se tausaga fou o se taimi masani lea e saili ai se amataga fou ma faatulaga ni sini. Ae o nisi taimi o faafitauli faaleaiga, ma’i faaletino, faigata faalemafaufau, po o isi luitau e faigata ai ona ausia a tatou sini.

I le feagai ai ma nei faafitauli, ua mafai ai e Iesu Keriso ona tatou “fai mea e tele i [o tatou] lava loto malie, ma aumai ai le amiotonu tele” (Mataupu Faavae ma Feagaiga 58:27). I lenei vaitau o le faafouina, o nei mataupu faavae e tolu e mafai ona fesoasoani ia te oe e faatulaga ai sini amiotonu e ala ia Keriso.

1. Liliu atu ia Keriso

I taimi o faigata, atonu e te mafaufau pe aoga le faatuina o sini ae pe mafai foi ona ausia. Na fesili foi le perofeta o Mamona i se fesili faapena: “E mafai faapefea ona outou taofimau i mea lelei uma?” (Moronae 7:20). Ona ia faamalamalama mai lea o le auala na faaaoga ai e tagata i le aluga o taimi le “faatuatua ia Keriso; ma o le faatuatua na faapea ona latou taofimau ai i mea lelei uma” (Moronae 7:25).

E ala i le faatuatua ia Keriso, e mafai ai ona tatou faia ma maua mea lelei. O Lona mana, Lona alofa, ma Ana aoaoga e mafai ai ona tatou faataunuuina o tatou manaoga amiotonu. I le popofou o le Toefuataiga, na fetalai ai le Alii i ana auauna, “Afai e te manao i ai, o le a avea oe ma ala o le faia o mea lelei e tele i le tupulaga lenei.” (Mataupu Faavae ma Feagaiga 6:8).

O le a le uiga o le “faia o mea lelei e tele” mo oe? E tele auala e mafai ai e le Atua ona faaaoga au taleni ma uiga tulaga ese e fausia ai Lona malo. A o e mafaufau i sini e te manao e faatulaga, saili musumusuga ma le fesoasoani mai ia te Ia. “Filifili faatasi ma le Alii i au mea uma e fai, ma o le a ia taitai oe mo le lelei” (Alema 37:37).

2. Fai Ni Laasaga Laiti ma Faigofie

I totonu o tusitusiga paia tatou te faitau: “O mea laiti ma faatauvaa e faataunuu ai mea tetele” (Alema 37:6). O lenei aoaoga e mafai ona foliga mai ai o a tatou sini e le taufaafefe ma sili atu ona faigofie ona fai. O nisi taimi e galue ai le Atua “i mea itiiti lava” (Alema 37:7) ma tuuina mai ia i tatou lana afioga “i lea fuaitau ma lea fuaitau, o lea mataupu i lea mataupu, o sina mea itiiti iinei ma sina mea itiiti iina” (2 Nifae 28:30).

E mafai foi ona e galue i au sini “i lea fuaitau ma lea fuaitau” ma i laasaga “matua laiti lava”. O nisi nei o faataitaiga o le faatuina o sini e faia ai mea lelei, faatasi ai ma ni auala laiti e galulue ai agai i le manuia:

Sini	Laasaga “Laitiiti ma faigofie” (Alema 27:6)
Auauna atu ia i latou o e matitiva, mamai, pe mafatia.	Faaalu sina taimi e faalogologo ai i se tasi o loo feagai ma se tofotofoga.
Faaali atu le alofa ia i latou o e ua tuuatoatasi.	Nofo faatasi ma se tasi o nofo na o ia i le lotu.
Tausia tamaiti, tagata matutua, po o i latou e i ai manaoga faapitoa.	Faatulaga se taimi e asiasi ai i se tagata matua e masani ai po o se fale e tausia ai.
Galue e fesoasoani e tausia oe lava po o lou aiga.	Fesili i se tasi e te faaaloalo i ai mo se fautuaga faalegaluega.
Faataunuu lou valaauga i le Ekalesia.	Tatalo mo le taitaiga e uiga i lou valaauga.
Volenitia i galuega faatino a le alalafaga pe tuuina atu le auaunaga faalemalo.	Faaalu le 10–15 minute e sailiili ai i avanoa volenitia i le lotoifale.
Fafaga lou tino, mafaufau, ma le agaga i mea ma gaoioiga lelei.	Fai se lisi o meaai maloloina e mafai ona e ’ai i lenei vaiaso.
Faaleleia mausa patino po o faiga masani faaleaiga o le suesueina o tusitusiga paia, tatalo, auai i le lotu, ma tapuaiga i le malumalu.	Seti se faailo po o se faamanatu i aso taitasi e suesue ai tusitusiga paia.
Auauna atu ia i latou ua maliliu e ala i le faia o galuega o talafaasolopito o aiga.	Alu i totonu i FamilySearch.org ma aoao e faaaoga se vaega se tasi e le masani ai.
Faasoa atu le talalelei a Iesu Keriso i isi.	Tau atu i se uo e uiga i lau mau po o le lauga o le konafesi aoao e sili ona e fiafia i ai.
Aoao ni tomai fou e mafai ona fesoasoani ia te oe e fausia ai le malo o le Atua.	Saili se vitio o loo aoao mai ai se tomai e te manao e aoao.

E pei ona taua e Elder Dieter F. Uchtdorf o le Korama a Aposetolo e Toasefululua: “Pe a tatou vaai i o tatou olaga ma vaai i ni mea se selau e fai, tatou te lagona le lofituina. Pe a tatou vaai i se mea se tasi—alofa ma auauna atu i le Atua ma Ana fanau, i ni auala eseese se selau—ona mafai lea ona tatou galulue i na mea ma le olioli.”

3. Tulei i Luma

Afai e telegese lou alualu i luma pe tautevateva foi i le ala, aua le lotovaivai. E finagalo o Ia ia ou “fetaomi atu i luma ma le tumau ia Keriso, ma se susulu atoatoa o le faamoemoe” (2 Nifae 31:20). Ua saunia Iesu Keriso e sii ae oe ma fesoasoani ia te oe e toe taumafai.

E olioli le lagi i taumafaiga uma ina ia ausia a tatou sini, e tusa lava po o le ā le lē lelei atoatoa. Na saunoa Peresitene Howard W. Hunter: “Tatou te oo uma lava i taamilosaga o le alualu i luma ma taimi tatou te tau ai ma nei luitau e le maalofia o le toe foi i tua. O faamanuiaga silisili mai le Alii e i ai i a tatou taumafaiga ia alualu i luma.”

E silafia e lou Tama Faalelagi ou manaoga ma ou luitau. E mafai ona Ia taialaina ma fesoasoani ia te oe i au sini amiotonu. Tatalo ia te Ia, ma o le a Ia faapaiaina mea ua e ausia, e tusa lava po o le a le laitiiti, ina ia “manuia ai lou agaga” (2 Nifae 32:9).