Itukutuku ni Veiliutaki ni Iwasewase
Na Kosipeli kei na Veisorovaki i Jisu Karisito Sa Vakarautaki Tu Vei Ira Na Tamata Kecega
Nikua, eda bula tiko ena dua na vuravura ka sa vakayalia e levu sara na kena ivakatakilakila. Na ivolanikalou e vakananumi keda vakamatata ni:
“na toro mai na siga vei ira era na sega ni rogoca na domo ni Turaga, se na domodra na nona tamata, ka sega ni muria na nodra vosa na parofita kei na iapositolo, era na muduki tani mai vei ira na tamata; Ia era sa lako tani mai na noqu cakacaka vakalotu, ka voroka na noqu veiyalayalati tawavakaiyalayala; Era sa sega ni vakasaqara na Turaga ka vakadeitaka na nona yalododonu, ia era sa dui muria ga na nodra sala na tamata yadua, kei na ivakatakarakara ni nodra kalou vakataki ira, na kena ivakatakarakara sa vakataki vuravura” (Vunau kei na Veiyalayalati 1:14–16).
Na kosipeli e tuberi keda kina dina tawamudu, na vakacegu kei na reki. Na kosipeli e vakavulica vei keda nida sa luvena lomani kece na Tamada Vakalomalagi, ka buli me ucui Koya. Ni matata vinaka vei keda na keda ituvaki vakalou, eda na kunea edua na loloma tawavakaiyalayala ka ulabaleta na noda caka cala kei na malumalumu.
Me vaka nida lewenilotu i Jisu Karisito ni Yalododonu Edaidai, eda sa vakalougatataki nida kila na taucoko ni kosipeli kei na Veisorovaki ni noda iVakabula ko Jisu Karisito, sai koya na iwali kei vuravura. Oqo na vuna e vakaroti keda vakayadua kina na Turaga—o keda sa yalataka me taura vei keda na Yacana nida papitaiso—meda kacivaka yani na Nona kosipeli. E dodonu meda matataka na Nona kosipeli i vuravura, ka oya na vuna e dodonu meda bulataka kina na Nona kosipeli. Na Kosipeli i Jisu Karisito e itukutuku ni loloma kei na veivueti kina kawatamata kecega.
Na noda yalodina kina cakacaka ni kaulotu e dua na ivakaraitaki bibi ni noda vakabauta na “bibi ni kosipeli ki vuravura raraba.” O ira na noda kaulotu era matanataka na yalo ni veiciqomi ni veiqaravi i Karisito, e tete yani vei ira na biligi tani ka ciqomi ira ena yalololoma o ira kece era sa tu vakarau mera vakarorogo. Era kauta voli na cina ni itukutuku raraba ni kosipeli, ka tukuni kina ni loloma ni Kalou kei na Veisorovaki i Jisu Karisito e vakarautaki me baleti keda kece.
Na 2 Nifai 26:33 e tukuna vakavinaka na dina oqo:
“. . . Ka [na Turaga] sa sureti ira kecega me ra lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa; ka sa nanumi ira na tawa lotu; ka ra sa tautauvata na tamata kecega vua na Kalou, ko ira na Jiu kei ira na kai Matanitu Tani.”
E dodonu meda nanuma ni vei tamata kece eda sotava era luve ni Kalou, ka dodonu mera lomani, rokovi, ka nodra na madigi mera rogoca na itukutuku ni kosipeli. Ena Alama 16:16, eda vakananumi ni Turaga ena sovaraka na “Yalona kina dela ni vanua taucoko me vakarautaka na nodra vakasama na luve ni tamata, se me vakarautaka na lomadra mera ciqoma na vosa ena qai vakatavuvulitaki ena kedra maliwa ena gauna ni Nona lako mai.”
E dua tale na tiki bibi ni noda ivunau sai koya na vakabauti ni ituvaki tawamudu ni matavuvale kei na madigi ni veivakabulai kina itabatamata kecega. Ena noda veivaletabu, eda vakayacora kina na veicakacaka vakalotu eso me baleti ira na noda qase e liu. Na ivakarau tabu oqo e vakadeitaka na noda vakabauta ni veivakabulai e vakarautaki tu vei keda kece, oka kina o ira era a sega ni rogoca na kosipeli ena nodra gauna ni bula.
Na noda soli keda kina cakacaka ni valetabu e vakaraitaka na vakabauta ni loloma ni Kalou e tete yani kina taudaku ni bula oqo. E kena ibalebale ni matata tu vei keda ni Veisorovaki i Jisu Karisito e vakarautaka tu na inuinui kei na veivueti sega walega vei ira na bula, ia vei ira talega ena yasa ni ilati kadua.
Na Veisorovaki i Jisu Karisito e yavu ni noda vakabauta. Ena Nona isoro ni veivakaduavatataki, a colata kina o Koya na noda ivalavala ca, mosi, kei na rarawa ka vakarautaka kina vei keda o Koya na madigi ni veivutuni ka ciqoma kina na veivosoti vakalou. Oqo e iloloma raraba, ka vakarautaki tu vei ira kece era ciqoma na Turaga ena yalomalumalumu kina nodra bula.
Meda dei ena dina oqo ni kosipeli kei na Veisorovaki i Jisu Karisito e noda kece vakaidina. E itukutuku ni inuinui, veivueti kei na veivakalougatataki tawamudu, ka soli wale tu vei ira na tamata kece era lomasoli mera vulica e levu tale na ka. Meda dodoliga yani ena loloma, yalololoma, kei na veinanumi vei ira na tacida kei na ganeda, nida kila nida liganicakacaka ni Nona ituvatuva vakalou, me vakarautaki na veivakabulai ki na tamata vakayadua.
Me kena itinitini, au vakadinadinataka na dina ni kosipeli i Jisu Karisito kei na kaukauwa ni Nona Veisorovaki. Meda qai masuta meda dubau ena noda sasaga meda muri Karisito ka kaburaka yani na itukutuku vinaka oqo vei ira kece na luve ni Kalou, se cava ga na ituvaki era lako mai kina se sotava tiko. Na vuravura e gadreva vakaidina na kosipeli kei na Veisorovaki i Jisu Karisito ena nodra bula. Meda qai vakabulai ira vata. Ena yaca tabu i Jisu Karisito, emeni.