“E Dua na Loloma Veivueti Vinaka Ni Oti e 25 na Yabaki,” Liaona, Maji 2024.
Domodra na Yalododonu Edaidai
E Dua na Loloma Veivueti Vinaka ni Oti e 25 na Yabaki
Au vakavinavinaka ni a vakayagataka na Kalou e dua na ivola sa guilecavi tu me cakacakataka kina na Nona loloma veivueti vinaka.
iTaba lolomataki mai vei koya e volavola
Niu veivakavulici tiko ena semineri ena mataka lailai e Eureka, California, Amerika, au a kerei ira na noqu gonevuli me ra vakasamataki ira ena 10 na yabaki mai muri. Au a qai kerei ira me ra vola e dua na ivola vata kei na nodra ivakadinadina ni kosipeli kei na veika cava tale era gadreva me ra laki wasea vei ira ni ra sa qase. Au a kaya vei ira niu na vakauta yani na ivola ena loma ni 10 na yabaki.
Sa sivi na gauna kau sa sega ni vakauta rawa na nodra ivola. Ena dua na siga ni oti e 25 na yabaki, a kunea o Heidi na luvequ yalewa na ivola ka vakataroga sara. Niu sa vakamacalataka oti na ka au a navuca, a vakadikeva o koya na nodra itikotiko na noqu gonevuli e liu ena nona vakayagataka na veisala ni itukutuku raraba.
Droini mai vei Alex Nabaum
Ni oti na nona sa vakauta na veiivola oya, keirau a ciqoma eso na vakavinavinaka levu. A vola mai e dua na noqu gonevuli e liu ni semineri:
“Au gadreva me kila o tamamu me kila ni sa kunea o koya na ivola oqori ena dua na vuna. Sa sotava dredre tiko na luvequ yalewa yabaki 18 na nona ivakadinadina kei na nona nanuma ni ‘goneyalewa yalododonu Edaidai uasivi sara’ e sega ni baleti koya. E sega ni wasea vei keirau na veika e tu e lomana. E sa ka dredre dina.“
Na noqu gonevuli e liu, a vakaleqai ena so na ka a vola toka o luvena yalewa ena dua na bulago, ka kuria:
“Au kila ni sa dodonu meu vosa kina vua. Sa kena ivakarau, ni sa yaco mai na veivosaki oqo, e dau matakaukauwa sara ka veileti, ka dau galu tu ga. Au solia vua na noqu ivola ka tukuna vua niu vinakata me wilika.
“Au a raici koya ni sa mai wilika vakavica na imatai ni parakaravu. Au a vola niu sega ni kila ke tiko beka na noqu ivakadinadina, ni Yalododonu Edaidai sa rui ka levu ka rairai sega ni baleti au.
“Sa tekivu tagi na luvequ yalewa. Au a gadrevi koya me kila niu sa kila vinaka tu na nona bula dredre. Ena sega vakadua ni vakabauta ke sega na ivola oya! Sa kasura sobu mai eso na nona ilati, kau vakila vakaidina ni gauna ni ivola oqo sa dua na loloma veivueti vinaka. Kevaka au a ciqoma ena 10 na yabaki sa oti, keu sa viritaka laivi beka se vakayalia! Yalovinaka ni vakavinavinakataki tamamuni ni keimami sa vola na ivola ka ra sa mai yali tu ena veiyabaki kece oqo! E sega ni dua na ka e vakacalaka.”
Na Tamada Vakalomalagi dauloloma e wanonovi ira kece na Nona sipi, ena Nona gauna vakasakiti, e rawa vua me cakacakataka na loloma veivueti vinaka kei na cakamana mai vei keda yadua me kauti ira mai era sa lako sese tu ki na qele ni sipi.