“Na Veika Au sa Kunea niu Sa Biuta na iTukutuku Vakavuravura,” Liaona, Maji 2024.
Na Veika Au Sa Kunea Niu Sa Biuta na iTukutuku Vakavuravura
Na noqu sa vakalailaitaka sobu na noqu vakayagataki itukutuku vakavuravura sa vakatara vei au meu tiko vakalevu cake ena vukudratou na luvequ ka vakavinakataka cake na noqu veiwekani kei na iVakabula.
Droini mai vei David Green
Ena vica na yabaki sa oti, au kila ni a vakauqeti au tiko na Kalou meu kalawa tani mai na itukutuku vakavuravura. Au kila ni vakacegu mai na itukutuku vakavuravura e cecere sara vei au, ia au kila talega niu taleitaka na veimaliwai vakatamata au kunea e kea. Au sega ni kila meu vakameautaka vakacava na veika e rua oqo; ia au kila ga ni dodonu me veisau e dua na ka.
Au a wilika e dua na ivola ka vakavuna meu vakasamataka vakatitobu na taro, “E vica na gauna ena itukutuku vakavuravura sai koya na levu ni kena yaga ki na itikotiko raraba, ka sega na veivakayarayarataki ca kece sara?” Vei au, na isau ni taro oqo e rauta ni 20 na miniti … dua na vula. Au a lalawataka me yaco oqo, ia ena veivuke ni Turaga, e rawarawa cake sara mai na noqu nanuma. Na ka au sega ni namaka oya na levu ni veisau oqo a vaqaqacotaka na noqu veiwekani kei na noqu iVakabula. Sa yaco meu vakila vakavinaka cake na loloma ni iVakabula vei au; sa yaco meu kila vakamatata cake na ituvatuva e tu Vua me baleti au; ia au sa mai raica sara vakamatata na nodra gagadre na tamata era tu wavoliti au.
Me Kakua ni Vakatarai na Selfie Me Lewa na Noqu Kilikili Vakai Au
Au sa dau kila tu ga niu luve ni Kalou ka lomani au o Koya. Au sa vakila na loloma ni noqu iVakabula ena veigauna dredre ni noqu bula. Ia e vakavuqa niu dau vakatara na itukutuku vakavuravura me lewa mai na ivakarau ni noqu raica ka vakasamataki au kina. Ena kena levu ga niu tovolea meu vakadeitaka vei au ni sega ni tarai au na ivakatakarakara eso ena itukutuku vakavuravura, ia era a tarai au. Niu vakalailaitaka na noqu gauna ena itukutuku sa vakatara vei au na vakacegu ni vakasama kei na vakanomodi ni dodonu meu rogoca na iVakabula ni tukuna tiko vei au na veika e nanuma o Koya me baleti au. Au sega ni kila na levu ni noqu calata meu rogoca na Domona me yacova niu sa bulia e levu cake na vanua me tiko kina o Koya.
Au sa dau vakadinata tu ga na ituvatuva ni veivakabulai. Au kila ni o Jisu Karisito na iusutu ni ituvatuva oya. Ia au vakabauta talega ni tiko e dua na nona ituvatuva na Tamada Vakalomalagi me baleti keda yadua. O Larry M. Gibson, na imatai ni Daunivakasala e liu ena Mataveiliutaki Raraba ni Cauravou a vakavulica, “Au kila ni kauwaitaki keda yadua na Tamada Vakalomalagi ka tu na nona ituvatuva me da rawata na keda icavacava tawamudu.”1
E levu na gauna au dau vakadikeva toka meu tovolea ka vakasamataka se cava na kequ inaki. Na noqu rai tiko ena itukutuku vakavuravura a solia vei au e dua na idabedabe e liu ki na veika vovou, ka totoka era cakava tiko na tamata. Au a vulica e levu na ka mai vei ira na tamata oqo, ia sa levu cake na gauna au vakasaqara tiko ka sega ni cakava. Me tekivu mai na noqu a biuta mai na itukutuku vakavuravura, au vakila niu sa dusimaki meu kila vakatabakidua na veika e vinakata na Tamada Vakalomalagi meu cakava. E vuqa na veika oqo era sa veivakurabuitaki ka duidui mai na ka au nanuma ni ra na vakakina, ia era sa vakavutuniyautaka ka vakalevu cake sara na noqu bula.
A lako mai na iVakabula me rawa vei keda na bula ka me rawa ni levu cake kina na ka e tu vei keda (raica na Joni 10:10). Au vakavinavinakataka na veivakauqeti e solia vei keda na Yalo Tabu me vukea me levu cake na noda bula.
Na bula ena taudaku ni Sikirini
Na iVakabula a raici ira era dro mai na nodra nanuma na tani. Au taleitaka na wilika na italanoa baleti Koya ena nona qaravi ira na tamata vakaoqo ka vakavulici ira ena kedra yaga. Na vakayagataki gauna vakasivia ena itukutuku vakavuravura e tarova na noqu raici ira e matanavotu na tamata ena noqu bula, oka kina na noqu matavuvale. Au sa qai kila ni kevaka era sega ni vakila na luvequ niu raici ira tiko, sa na sega ni dede era na raica e tautuba na ivurevure me ra vaqaqacotaka kina na kedra yaga.
Au kurabuitaka na noqu loloma vei iratou na luvequ niu sa mai tiko vata vakalevu kei iratou. Au sa taleitaka vakalevu cake na noqu itavi vakatina ena yabaki sa oti oqo mai na veigauna e liu. Au sa mai kilai ira na tiko volekati au kau sa mai vakaitavi vakalevu ena noqu itikotiko raraba. Sa levu cake na noqu madigi ni veiqaravi. Au nanuma ga ni itukutuku vakavuravura raraba a vukei au meu kila vakavinaka cake, ia na ka dina au sega ni bula tiko kina ena gauna oqo meu raica vakaidina na nodra gagadre o ira era tu wavoliti au.
Niu vakalailaitaki na noqu vakayagataka na itukutuku vakavuravura e vaka e dua na ka lailai ka rawarawa, ia sa vakatarai au meu vakalevutaka cake na noqu vakabauta ka vakavinakataka cake na noqu veimaliwai kei na noqu iVakabula. Au kila ni lomani keda na Tamada Vakalomalagi, e tiko na nona ituvatuva baleti keda, ka tu talega na luvena era gadreva me ra vakila ni da raici ira tiko talega.
O dauvolaivola e vakaitikotiko e New York, Amerika.