“Ko e Laine Fetuʻutaki Totonú,” Liahona, Sānuali 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Laine Fetuʻutaki Totonú
Naʻe ʻikai mahino kiate au ʻa e ʻuhinga naʻe ʻikai fetuʻutaki ai ʻa e pailate naʻe molé mo kimauá.
Tā fakatātaaʻi ʻe Roger Motzkusart
ʻI ha hoʻatā ʻe taha lolotonga ʻeku akoako ngāue ko ha pule ʻo e ngaahi fepunaʻaki ʻi he ʻataá ʻi he malaʻe vakapuna ʻi Tiuana, Mekisikoú, naʻá ku fakatokangaʻi mo ʻeku faiakó kuo kāpui ʻe ha kakapu matolu mei tahi ʻa e malaʻe vakapuná mo ha konga lahi ʻo e koló. Ka neongo ia, naʻe kei malava pē ke fai ha sio pea naʻe kei fakangofua pē ki he tō mo e puna ʻa e vakapuná.
Ne ʻikai fuoloa mei ai, kuó ma fakatokangaʻi ʻi he monitoa tala vaká ha Cessna 172 ʻoku haʻu mei he tafaʻaki fakatongá ʻi he matāfangá, ʻoku puna mai ʻo fakatatau mo e ngaahi lao ki he tuʻunga lelei ʻo e fepunaʻakí (VFR). ʻI he malumalu ʻo e VFR, ʻoku fakasio ʻe he kau pailaté honau tuʻuʻangá ʻaki ha ngaahi maʻuʻanga tokoni mei he fonuá ke nau aʻu ai ki he feituʻu ʻoku nau fakataumuʻa ki aí.
Meʻapangó, naʻe hē ʻa e pailaté ʻi he kakapú. ʻI heʻene puna ʻi he ngaahi siakale takatakai ʻi he feituʻu matāfangá, naʻá ne feinga ke ʻiloʻi ʻa e feituʻu ʻokú ne lolotonga ʻi aí mo ʻene mamaʻo mei he malaʻe vakapuná, ka naʻe fakangatangata ʻene vakaí ʻe he ʻikai lava ʻo sio leleí. Naʻá ku fehuʻi ki heʻeku faifakahinohinó pe ko e hā te ma lava ʻo fai ke tokoniʻi ai iá.
Naʻá ne tali mai, “ʻOku fiemaʻu ke ne maʻu ʻa e laine fetuʻutaki ʻa e tauá pea fetuʻutaki mo kitaua. Ka ʻikai, he ʻikai ke ta lava ʻo fai ha meʻa maʻana.”
Naʻe ʻikai mahino kiate au ʻa e ʻuhinga naʻe ʻikai fetuʻutaki mai ai ʻa e pailate lolotonga heé kiate kimauá. Naʻe ʻi ai nai ha palopalema ʻi heʻene letioó? Naʻá ne ongoʻi nai te ne lava pē ʻo hao mei he fakatuʻutāmakí ʻiate ia pē?
Naʻe ʻosi atu ha ngaahi miniti. Faifai pea maʻu ʻe he pailaté ʻa e laine fetuʻutaki ki he tauá. Naʻá ne kole tokoni ʻi heʻene loto-hohaʻá. Naʻá ma ʻoange ʻi he taimi pē ko iá ha ngaahi fakahinohino ke tataki malu ai ia ki he leleʻanga ʻo e malaʻevakapuná. Naʻe pau pē ke ne falala ki heʻema ngaahi fakahinohinó mo ʻene ngaahi meʻangāue vakapuná.
ʻI heʻema vakai hili ha ngaahi miniti siʻi ki he mavahe mai ʻa e vakapuná mei he kakapú pea tō lelei hifo ki he kelekelé, naʻá ma maʻu ha fiefia naʻe ʻikai lava ke fakamatalaʻi.
ʻI heʻeku foki ki ʻapí, naʻá ku fakalaulauloto ki he meʻa naʻe hoko ki he pailaté. Naʻe hanga ʻe heʻene fetuʻutaki mai kiate kimaua ʻi he laine fetuʻutaki totonú ʻo fakahoko ha kehekehe ʻi he vahaʻa ʻo e maʻu ha tokoní pe puna takatakaí—pe ha tūkunga ne kovi ange.
Hangē ko e pailate ko ʻení, ʻoku ou hē ʻi ha taimi ʻe niʻihi ʻi “ha ʻao fakapoʻuli” (1 Nīfai 8:23). ʻI he taimi ʻoku ou fiemaʻu ai ʻa e fakahinohino ʻa e ʻOtuá, ʻokú Ne tatali ʻi he faʻa kātaki ke fanongo ki hoku leʻó.
Hangē ko e lava ke u sio ki he vakapuna ne heé ʻi he monitoa tala vaká, ʻoku ʻafioʻi kitautolu ʻe heʻetau Tamai Hēvaní mo hotau ngaahi faingataʻaʻiá. ʻOku ou houngaʻia ʻokú Ne ʻomi ha fakahinohino kiate kitautolu. ʻOkú Ne fai ha tokoni ʻo fakafou ʻi he lotú, folofolá, kau palōfita moʻuí, pea mo e meʻa-foaki ʻo e Laumālie Māʻoniʻoní. Te Ne tataki kitautolu mei he fakatuʻutāmaki fakatuʻasinó mo e fakalaumālié kapau te tau feinga maʻu pē ke maʻu ʻa e tataki ʻo e Laumālié, kole ha fakahinohino, mo fakafanongo ki Hono leʻó.