ʻOku Ou ʻUluaki Fekumi nai ki he ʻEikí?

ʻĪmisi

Nīfai ʻoku lotu

ʻOku tau ʻilo mei he 1 Nīfai 2:16, ko e taimi naʻe fehangahangai ai ʻa Nīfai mo e taʻepaú, naʻá ne tafoki ki he ʻEikí pea naʻe fakamolū ʻe he ʻEikí hono lotó. ʻI he tafaʻaki ʻe tahá, ko e taimi naʻe fehangahangai ai ʻa Leimana mo Lēmiuela mo e taʻepaú, naʻá na fakakikihi mo fakafalala ki hona tokoua ko Nīfaí ke maʻu ha ngaahi tali kae ʻikai falala ki he ʻEikí (vakai, 1 Nīfai 15:8–9).

ʻOku fakahaaʻi ʻe Leimana mo Lēmiuela ha sīpinga ʻo e meʻa ʻe lava ke hoko ʻi he taimi ʻoku tau fakafalala tāfataha ai ki he niʻihi kehé ke maʻu ʻa e moʻoní kae ʻikai tafoki ki he ʻEikí. Naʻe mālohi fakalaumālie ʻa Nīfai pea tauhi faivelenga ki he ʻOtuá ʻi he kotoa ʻo ʻene moʻuí, lolotonga iá naʻe faifai pea liʻaki ʻe Leimana mo Lēmiuela ʻa e ngaahi akonaki ʻa ʻena tamaí ʻo fekauʻaki mo e ʻEikí. Neongo ko ha ākonga falalaʻanga ʻa Nīfai, ka naʻá ne ʻiloʻi naʻe ʻikai ko ha fetongi ia ʻo e fekumi fakahangatonu ki he moʻoní mei he ʻEikí (vakai, 1 Nīfai 15:6–11).

ʻI hoʻo vakaiʻi ko ia hoʻo fakafalala ki he ʻEikí mo e fakafalala ki he kakai kehé, ko e fē ʻi he ngaahi fili ko ʻení ʻokú ke fakafekauʻaki mo iá?

Ngaahi Maʻuʻanga Tokoni Fakamāmaní	Ngaahi Maʻuʻanga Tokoni ʻo e Ongoongoleleí
ʻOku faʻa ngalo ʻiate au ke u fakalaulauloto mo fakakaukau ki he meʻa naʻe akoʻi lolotonga ʻa e konifelenisi lahí.	ʻOku ou ako maʻu pē ʻa e ngaahi lea ʻo e konifelenisi lahí ke u feinga ke manatuʻi maʻu pē ʻa e ngaahi lea ʻa e kau takí.
ʻI he taimi ʻoku ʻi ai ai haʻaku ngaahi fehuʻí, ʻoku ou vakaiʻi ʻa e mītia fakasōsialé pe ko e podcasts ʻoku ou saiʻia taha aí ke maʻu ʻa e ngaahi talí.	ʻI he taimi ʻoku ʻi ai ai haʻaku ngaahi fehuʻí, ʻoku ou fekumi ki ha tokoni ʻi he folofolá pe ngaahi lea ʻa e kau palōfita ʻo onopōní.
ʻOku faʻa ngalo ʻiate au ke u lotu mo ako ʻa e folofolá.	Ko e lotú mo e ako folofolá ko ha konga angamaheni ia ʻo ʻeku moʻuí.
ʻOku ʻi ai ha kakai kehe ʻoku nau maʻu ha faleʻi lelei ange ʻi he kau taki ʻo e Siasí pe folofolá.	ʻOku ou maʻu ha nonga ʻi he fanongo ki he ngaahi lea ʻa e kau taki ʻo e Siasí pea mo e folofolá.
ʻOku ou mahuʻingaʻia ʻi he ngaahi fakakaukau ʻa e niʻihi kehé ʻo mahulu hake ia ʻi he ngaahi akonaki ʻo e ongoongoleleí.	ʻOku ou mahuʻingaʻia ʻi he ngaahi akonaki mo e ueʻi fakalaumālie ʻo e ongoongoleleí mei he Laumālie Māʻoniʻoní.