Le Alii e, Matou Te Fia Feiloai ma Iesu

Novema 2023

Le Alii e, Matou Te Fia Feiloai ma Iesu

Saunia e Elder Robert M. Daines

O Le Fitugafulu

Tatou te fia feiloai ia Iesu i Lona lava faasinomaga ma lagonaina Lona alofa.

Tauaso i Foliga

I se tasi aso i le tautotogo o le 1945, sa ala a’e se alii talavou i se falemai o le militeli. Sa laki ona o la sa ola—sa fanaina o ia i tua tonu o lona taliga, ae na faia le taotoga e fomai, ma sa mafai nei ona savali ma talanoa e pei ona masani ai.

O le mea e faanoanoa ai, na faatama’ia e le pulufana le vaega o lona fai’ai e iloa ai foliga. Ua tilotilo nei i lona toalua e aunoa ma sina iloaina; na te le’i iloaina foi lona lava tina. E oo lava i foliga i le faaata sa le masani ai—sa le mafai ona ia iloa pe o se tamaloa po o se fafine.¹

Na oo ina tauaso-i-foliga—o se tulaga e aafia ai le faitau o miliona o tagata.²

O tagata e ogaoga le tauaso-i-foliga e taumafai e faailoa isi e ala i le taulotoina o tulafono—o se tulafono mo le iloaina o se afafine i le mamanu o ona foliga taelagoa po o se uo e tosoa ona vae pe a savali.

Tuputupu A’e

O se tala lona lua lea, e aafia ai le failauga: A o ou laitiiti, sa tele ina ou vaai i lo’u tina o le faitulafono. Na te filifilia le taimi e mafai ai ona ou taalo ma le taimi e tatau ai ona ou moe, po o le mea e sili ona leaga, o le vele o vao i le lotoa.

Sa iloagofie lava e alofa ia te a’u. Ae e tele naua taimi ma ou te maasiasi ai, sa ou vaai atu ia te ia ua na o “Ia o Sē e Tatau Ona Usita’ia.”

Sa na o ni tausaga mulimuli ane na ou vaai ai ia te ia o se tagata moni lava. Ou te ma lava e faapea atu, ou te le’i matuai matauina lelei ana osigataulaga, pe manatunatu foi pe aisea mo le tele o tausaga e na o le lua lava ona sakete tuai e ofu (a o la sa maua o’u ofua’oga fou) pe aisea foi, i le iuga o le aso, sa matua’i lelava ma naunau ai mo a’u ina ia vave moe.

Atonu Tatou Te Tauaso-i-Foliga

Atonu ua outou matauina o nei tala e lua, e tasi lava le tala—mo le tele naua o tausaga, o le mea moni, o a’u sa tauaso-i-foliga. Sa le’i mafai ona ou vaai atu i lo’u tina, o se tagata moni. Sa ou vaai i ana tulafono ae ou te le’i vaaia ai lona alofa.

Ua ou faamatala atu nei tala e lua e aumaia ai le manatu e tasi: Ou te masalo ua outou silafia se tasi (atonu o oe o se tasi) o loo mafatia mai se ituaiga o tauaso-i-foliga faaleagaga.

Atonu o e tauivi e vaai atu i le Atua o se Tamā alofa. Atonu e te tilotilo agai i le lagi ma vaaia ai, e lē o foliga o le alofa ma le alofa mutimutivale, ae o se faapuloulou o tulafono lea e tatau ona ui atu ai lou ala. Atonu e te talitonu i tulafono a le Atua i Ona lagi, e tulei mai e ala i Ana perofeta, ma e alofa i lou tuafafine ae e te taumanatunatu faalilolilo pe alofa o Ia ia te oe.³ Atonu ua e lagonaina le ai uamea i lou lima ae e le’i lagonaina lava le alofa o lou Faaola lea e tau atu i ai.⁴

Ou te masalo ua e iloa tagata faapea ona na umi se taimi, o a’u sa avea o se tasi faapea—sa ou tauaso-i-foliga faaleagaga.

Sa ou manatu o lo’u olaga sa faatatau i le mulimuli i tulafono ma le fuaina e tuuese ai tulaga faatonuina. Sa ou iloa e alofa atoatoa le Atua ia te oe ae ou te le’i lagonaina e a’u lava ia. Ou te fefe sa tele ina ou mafaufau i lo’u oo atu i le lagi nai lo le mafuta i lo’u Tama Faalelagi.

Afai e te mafaia, faapei o a’u, i nisi taimi e na ona faafoliga i laugutu, ae e lē o usuina le pese o le alofa togiola,”⁵ o le a se mea e mafai ona tatou fai?

O le tali, pei ona faamanatu mai e Peresitene Nelson ia i tatou, o Iesu lava.⁶ Ma o se tala fiafia tele lena.

Le Alii e, Matou Te Fia Feiloai ma Iesu

O loo i ai se fuaiupu puupuu i le Ioane ou te fiafia i ai. O loo faamatala mai ai se vaega o tagataese sa o atu i se soo ma se talosaga taua. “Le Alii e,” ua latou fai atu, “matou te [fia] feiloai ma Iesu.”⁷

O le mea lena tatou te mananao uma i ai—ia feiloai ia Iesu i Lona lava faasinomaga ma lagonaina Lona alofa. E tatau ona avea lea ma mafuaaga mo le tele o mea tatou te faia i le Lotu—ma e mautinoa lava o lotu faamanatuga uma. Afai o e taumanatunatu pe o le a le ituaiga lesona e aoao atu, pe o le a le ituaiga o fonotaga e fuafua, ma pe tau ina tuu ai pea tiakono ae togitogi polo, e mafai ona e faaaogaina le fuaiupu lea e fai mou taiala: mata o le a fesoasoani lea i tagata e vaai ai ma alolofa ia Iesu Keriso? Afai e leai, atonu ia faataitai se isi mea.

Ina ua ou iloaina lo’u tauaso-i-foliga faaleagaga, sa ou vaaia tulafono ae le o foliga o le alofa mutimutivale o le Tama, sa ou iloa e le o se sasi o le Ekalesia. Sa le o se [sasi] a le Atua, ma e le’i faapea ua leiloa mea uma; o se mea e ao ona tatou aoaoina uma . E oo lava i uluai molimau i le Toetu na masani ona faafesagai ma le Alii toetu ma sa le’i iloaina o Ia; mai le Tuugamau Togalaau i le matafaga o Kalilaia, o Ona so’o sa “iloa Iesu ua tu mai, a e lei iloa e ia o Iesu lava lea.”⁸ Sa tatau ona latou aoao ia iloa o Ia, ma e faapena foi i tatou.⁹

Alofa Mama

Ina ua ou iloaina lo’u tauaso-i-foliga, sa amata ona ou mulimuli i le fautuaga a Mamona e tatalo “ma le malosi uma o le loto” ina ia faatumulia i le alofa na folafola mai i Ona soo—lo’u alofa mo Ia ma Lona alofa mo au—ma “vaai ia te ia e pei ona i ai o ia … ma maua lenei faamoemoe.”¹⁰ Sa ou tatalo ia mafai ona mulimuli i le poloaiga sili muamua ia alofa i le Atua ma lagonaina faapea “o le upumoni e alofa le Atua ia i tatou ma Lona loto atoa, malosi, mafaufau, ma le manatu atoa.”¹¹

O Evagelia

Ua ou faitau foi ma toe faitaua Evagelia e fa—i le taimi lenei o le faitau ina ia lē aveesea mai tulafono ae ia vaai pe o ai o Ia ma pe o le a le mea e alofa i ai o Ia. Ma, na i ai le taimi, sa ou tafea ai i le vaitafe o le alofa sa tafe mai ia te Ia.

Sa faasilasila atu e Iesu i nofoaga faitele, ua Ia afio mai “e faamalolo i e loto momomo, e [tala’i le saolotoga] i le tafeaga, ma [toe faaleleia] le pupula o mata o e tauaso.”¹²

Sa le na o se lisi o mea e fai po o se Sootaga Lautele lelei; o le mamanu lava o Lona alofa.

Tatala soo ia Evagelia; i le toetoe lava o itulau uma tatou te vaai ai ia te Ia o tausia tagata o e mafatia—faaleagafesootai, faaleagaga, ma faaletino. Sa Ia pa’i atu i tagata na faitaulia e eleelea ma lē mama¹³ ma fafaga i e na fiaaai.¹⁴

O le a le tala e sili ona e fiafia i ai e uiga ia Iesu? Ou te masalo o loo faaalia ai le Alo o le Atua o loo aapa atu e opo mai pe ofo atu le faamoemoe i se tasi i autafa—o le lepela,¹⁵ o le Samaria inosia,¹⁶ le tagata agasala na maasiasi,¹⁷ po o le fili faaleatunuu.¹⁸ O lena ituaiga o alofa tunoa e ofoofogia.

Taumafai e tusi i lalo taimi uma Na Te viia ai pe faamalolo pe taumamafa ma se tagataese, ma o le a uma le vaitusi o lau peni ae e te le’i tuua Luka.

A o ou vaaia lena mea, sa mapuna a’e lo’u loto ma le alofa i le iloa ai, ma sa amata ona ou lagona atonu e alofa o Ia ia te au. Na aoao mai Peresitene Nelson, “O le faateleina o lou a’oa’o e uiga i le Faaola, o le faigofie atu foi lena o le faalagolago i Lona alofa mutimutivale, Lona alofa e lē i’u.”²⁰ Ma o le tele o le a e faatuatuaina ai ma alofa i lou Tama Faalelagi.

Ua aoao mai i tatou e Elder Holland e faapea na afio mai Iesu e faaali mai ia i tatou “po o ai le Atua lo tatou Tama Faavavau ae faapei foi o ia, faapea le atoatoa o le gauai atu o Ia i Lana fanau i tupulaga uma ma atunuu.”²⁰

O loo ta’ua e Paulo “o le Tamā e ona le alofa mutimutivale [uma], o le Atua foi e ana le faamafanafanaga uma.”²¹

Afai e ese lau vaai ia te Ia, taumafai pea.

Feagaiga ma le Fuafuaga a le Atua

Ua valaaulia i tatou e perofeta e saili atu i Ona fofoga.²² Ou te avea lenei mea o se faamanatu tatou te tapuai atu i lo tatou Tama, e le o se fuafaatatau, ma e le’i uma seia oo ina tatou vaai ia Iesu o foliga o le alofa o lo tatou Tama;²³ ma mulimuli ia te Ia, ae le na o Ana tulafono.²⁴

Pe a talanoa perofeta ma aposetolo e uiga i feagaiga, e le pei i latou o ni faiaoga e feei mai nofoa (veloveta mumu), e ta’u mai ia i tatou e “taumafai malosi!” Latou te mananao ia tatou vaai ia tatou feagaiga e faatatau lava i sootaga²⁵ ma e mafai ona avea o se vaifofo mo le tauaso i foliga faaleagaga.²⁶ E le o ni tulafono ia maua ai Lona alofa; Ua uma ona Ia alofa atoatoa ia te oe. O la tatou lu’i o le malamalama lea ma mamanu o tatou olaga i lena alofa.²⁷

Tatou te taumafai e vaai e ala i a tatou feagaiga, e faapei o se faamalama, i fofoga o le alofa mutimutivale o le Tama i tua atu.

O feagaiga o foliga ia o le opo a le Atua.

O Le Vaitafe o le Alofa o le Atua

O le mea mulimuli, e mafai ona tatou vaai ia te Ia e ala i le auauna atu ia te Ia. “Aua pe faapefea ona iloa e le tagata le matai e le’i auauna i ai?”²⁸

I nai tausaga ua mavae, sa ou maua ai se valaauga sa ou manatu ou te le’i agavaa ai. Sa ou ala po, ua popole—ae o le i ai o se fasifuaitau i lo’u mafaufau ou te le’i faalogo i ai muamua: e faapea ina ia auauna atu i lenei Ekalesia o le tu lea i le vaitafe o le alofa o le Atua mo Ana fanau. O lenei Ekalesia o se vaega o galuega a tagata e i ai piki ma suō, o loo taumafai e fesoasoani e faamamā le alaata mo le vaitafe o le alofa o le Atua e aapa atu ai i Ana fanau i le faaiuga o le atulaina.

Po o ai lava oe, po o le a lava lou taimi ua tuanai, o loo i ai se avanoa mo oe i lenei Ekalesia.²⁹

Aumai sau piki ma sau suō ma auai i le ‘au. Fesoasoani e tauave Lona alofa i Ana fanau ma o le a pisi mai se vaega o lena alofa ia te oe.³⁰

Ia tatou saili atu i Ona fofoga alofa, Lana opo faalefeagaiga, ona tuufaatasi lea o lima ma Lana fanau, ma o le a tatou usuina faatasi le “Fa’aola o Isaraelu”:

Le sulu o ou fofoga,
Ia toefuata’i mai; 
Ma lou fiafia to’afilemu;
Ia avea le fia mau ma oe
I luga 
Ma faamoemoe o lo’u agaga.31

Tau ina ia tatou sailia Ona fofoga alofa ona avea ai lea ma ipu o Lona alofa mutimutivale i Ana fanau.³² I le suafa o Iesu Keriso, amene.