Ua Auauna Atu Taitai o le Ekalesia i le Tele o Atunuu

Sa faaauau pea e taitai o le Ekalesia la latou auaunaga i le lalolagi atoa i le aluga o le ono masina ua tuanai. O nisi nei o gaoioiga iloga o le mau gaoioiga talu mai le konafesi aoao ia Aperila.

Na Toe Manatunatu Peresitene Oaks i Tosinaga a Tamaitai

I se vitio a le Ekalesia na faalauiloaina ia Setema, sa talanoa ai Peresitene Dallin H. Oaks, Fesoasoani Muamua i le Au Peresitene Sili, e uiga i le tosinaga a lona tina ma lona tinamatua e fesoasoani ai ia te ia e atiina ae se molimau ma le faatuatua i le Alii. Sa faaauau pea tosinaga a tamaitai i lona olaga faatasi ma lona faletua, o Sister June Oaks, ma ina ua mavae lona maliu, faatasi ai ma lona faletua, o Sister Kristen Oaks.

“O faiaoga aupito sili ona taua na ou maua i le itu o aoaoga faavae ma auaunaga ma tiutetauave faaleaiga a le Ekalesia—ua faatulagaina iina faatasi ma perofeta o le Ekalesia—o tamaitai,” na saunoa ai Peresitene Oaks.

Na Saunoa Atu Elder Uchtdorf i Tagata Sulufai

Na malaga Elder Dieter F. Uchtdorf o le Korama a Aposetolo e Toasefululua i Polani ia Aperila. Sa ia pulefaamalumalu i se faigalotu mo tagata sulufai i Iukureini o e na mauaina se sulufaiga le tumau iina.

E uiga i le asiasiga, sa saunoa ai Elder Uchtdorf, o le sa avea ma se tagata sulufai i le popofou o lona olaga, ua faatumulia lona loto i “se faanoanoaga loloto mo le mafatiaga” o Au Paia o Aso e Gata Ai ma isi i atunuu na fano i le taua ae faapea foi ma le lotofaafetai.

“O nei tagata taitoatasi ma aiga ua faamalolosia ma siitia i tatou i lo latou lelei, faatuatuaina, ma le faatuatua ma mo le Faaola ma Ona faamoemoega paia,” na ia saunoa ai. “Sa ma faamoemoe ma Harriet ia faamalolosia ma faamafanafanaina i laua, ae sa latou aumaia le malamalama faalelagi, faamoemoe, ma le mafanafana i o ma’ua loto.”

Na Saunoa Atu Elder Bednar i le National Press Club i Uosigitone, D.C.

Sa saunoa atu Elder David A. Bednar o le Korama a Aposetolo e Toasefululua i le National Press Club ia Me, ma auiliili mai ai le a ma le aisea o fesoasoaniga alofa a le Ekalesia a Iesu Keriso i le lalolagi atoa, uelefea, aoaoga, malumalu, faifeautalai, ma gafa.

“O le faamoemoega autu o Le Ekalesia a Iesu Keriso o le Au Paia o Aso e Gata Ai o le fesoasoani lea i tagata e aoao e uiga i le natura ma uiga paia o le Atua, ia alofa i le Atua, ia avea ma soo o Lona Alo, o Iesu Keriso, ma ia alolofa ma auauna atu i o tatou uso ma tuafafine,” na saunoa ai Elder Bednar.

Na Asiasi Atu Peresitene Aoao o le Aualofa ma le Peraimeri i Amerika i Saute

Sa fono Peresitene Camille N. Johnson, Peresitene Aoao o le Aualofa, ma Peresitene Susan H. Porter, le Peresitene Aoao o le Peraimeri, ma taitai faalemalo ma tagata o le Ekalesia i Atenitina, Chile, Iurukuei, ma Parakuei i le taimi o se galuega e 10 aso ma se asiasiga aapa atu.

Sa latou fono ma faalapotopotoga a le malo e fesoasoani i tamaitai e feagai ma tulaga lamatia i Parakuei ma Atenitina.

“Ua tulimatai atu la matou Ekalesia e galulue faatasi ma outou ina ia faaleleia avanoa mo aoaoga ma le ola tutoatasi mo tamaitai,” na saunoa ai Peresitene Johnson.

E faaopoopo atu i le aapa atu faalemalo, sa auauna atu foi Peresitene Johnson ma Porter i tagata o le Ekalesia. Sa latou faia fonotaga mo matua talavou, o se faigalotu mo tamaitai nofofua, fonotaga fesootai mo aiga e i ai fanau, ma aoaoga faamasani mo taitai o faapotopotoga.