“Lofituina? Ia Faatumau Lou Taula’i atu ia Keriso,” Liahona, Oke. 2022.
Autalavou Matutua
Lofituina? Ia Faatumau Lou Taula’i atu ia Keriso
Ina ua foliga taufaafefe o’u tiutetauave o se tagata o le Ekalesia, sa suia e Keriso lo’u loto ma fesoasoani ia ou malamalama i mataupu faavae o Lana talalelei.
Afai ou te aoteleina nei tausaga ua tuanai i se upu se tasi, o le mu [i le feoma’i i le tele o mea]. O mea uma lava e lagonaina le tele—e aofia ai, i nisi taimi, o o’u tiutetauave o se tagata o le Ekalesia—e faigata ai ona iloa le mea e tatau ona ou popole moni i ai po o le auala e tatau ona ou faaaluina ai si o’u malosi itiiti.
Ua fautuaina ma le atamai i tatou e Peresitene Russell M. Nelson ina ia “liliu atu [o tatou] loto, mafaufau, ma agaga ua faateleina i lo tatou Tama Faalelagi ma Lona Alo, o Iesu Keriso”1 i nei taimi faigata.
A o ou taumafai e faaaoga lenei fautuaga i lo’u olaga, sa ou lagonaina muamua le sili atu ona lofituina, ma le manatu e tatau ona ou mulimuli atoatoa i taiala uma mo a’u taumafaiga e faia se eseesega. Ae sa faamanatu mai ma le filemu e le Agaga ia te a’u e faapea “e le tatau ona tatou momoe televave atu nai lo [tatou] malosi” (Mosaea 4:27). Sa ou iloaina e tatau ona ou taula’i muamua atu i mea e muamua—o Keriso.
Na saunoa le Perofeta o Iosefa Samita, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, na maliu o Ia, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”2
O le faamalosia o lo’u malamalama ia Keriso ua fesoasoani ia te a’u e fausia ai la’u molimau i Ana aoaoga tutotonu o le talalelei, lea ua fesoasoani ou te malamalama ai i le mafuaaga o tua atu o mea uma ua poloaiina ai i tatou ma fautuaina e fai: o mea uma lava e faasino atu ia Keriso.
Malamalama ia Keriso
I le faataoto i taleni (tagai Mataio 25:14–30), na tuuina atu ai e se alii i ni auauna se toatolu se vaega o oloa a o lei malaga ese atu i se malaga umi. Ina ua ia toe foi mai, sa teu faafaigaluega e ni auauna se toalua a laua taleni ma sa faamanuiaina, ae o le lona tolu na natia lana taleni ma sa tuliesea.
Atonu tatou te taumanatunatu pe na faapefea ona iloa e auauna le mea e fai i taleni na tuuina atu ia i latou. Sa tofu uma le toatolu ma le “tomai” (Mataio 25:15) ma sa iloa le auala e faafaigaluega ai, ae o le lona tolu na filifili e le faaaogaina lona malamalama. Sa malamalama o ia i lana galuega, ae masalo sa lei malamalama o ia i lona alii.
Faatasi ai ma se malamalama malosi ia Keriso, o le a le manaomia ai ona “poloai[ina] i mea uma” tatou ae o le a lava le silafia lelei o Keriso ma Ana aoaoga e “faia ai mea e tele i lo [tatou] lava loto malie, ma aumai ai le amiotonu tele” (Mataupu Faavae ma Feagaiga 58:26–27). E masani lava, o le tele o lo tatou iloa o Ia, o le tele foi lena o a tatou faatinoga o le a atagia mai ai Lona finagalo mo i tatou.
E faamoemoe le Alii o le a tatou faaaogaina o tatou tomai e aoao ai e uiga ia te Ia ma faataitai i amioga faaKeriso i o tatou lava olaga—o le mea moni, ua Ia faamoemoe o le a avea i tatou e faapei o Ia.3
Aoao mai ia te Ia
O le aoao mai ia Keriso o se taumafaiga e faavavau, ma Na te lagolagoina i tatou i laasaga taitasi. I le vaega o aoaoga, o loo i ai se manatu faavae ua lauiloa o le fata apefa’i. E faaaoga e faiaoga lenei manatu faavae e fesoasoani ai i tamaiti aoga ia maua le malamalama sili atu ma le tutoatasi sili atu a o latou aoao.4 E faapena foi, e mafai ona tatou faapea atu o Keriso, i le avea ai ma Faiaoga Sili, e faaaogaina le fata apefa’i e fesoasoani ai ia i tatou ia tuputupu ae i Lana talalelei ma “aoao e uiga ia te [Ia]” (Mataio 11:29; tagai foi fuaiupu 28; Mataupu Faavae ma Feagaiga 19:23).
I le avea ai ma soo o Iesu Keriso, tatou te faamalosia pea lava pea lo tatou malamalama i mea ua tatou iloa ma faaopoopo atu i lena malamalama i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). A o tatou faamalosia lo tatou malamalama ia Keriso, e mafai ona Ia faatuatuaina i tatou ma le malamalama atili, “aua o ia o lē na te talia o le a Ou tuuina atu atili i ai” (2 Nifae 28:30).
Mafaufau pe faapefea ona aoaoina i tatou o ni tamaiti. E manaomia e fanau laiti ni faamanatu faifai pea e fesoasoani e faamalosia ai lo latou malamalama i mea ua uma ona aoaoina e o latou matua; i luga o le malae taalo, atonu e manaomia ona faamanatu atu i se tamaitiiti mo ni nai taimi e aua le tuua palapala i o latou gutu. Peitai, a o latou tuputupu ae ma matutua, e faapena foi lo latou malamalama i na mataupu faavae, ma e mafai e o latou matua ona fesoasoani ia i latou e aoao se mea fou.
O le a i ai taimi tatou te toe aoaoina ai se mea, ae o le mea lena e uiga i le fata apefa’i—o i tatou uma o tamaiti aoga e manaomia le fesoasoani a lo tatou Faiaoga Sili. Na faatinoina e Keriso le Togiola ina ia mafai, faatasi ai ma le lotomaualalo ma le faatuatua, ona tatou liliu atu ia te Ia e ala i le salamo ma toe aoaoina.
Mulimuli i Ana Poloaiga
I le avea ai ma se vaega o le aoaoga a le Tama Faalelagi ma Keriso mo i tatou, tatou te maua ai le taitaiga e uiga i le ola amiotonu. O nisi taimi o lenei taitaiga e aofia ai taiala patino e tatau ona tatou mulimuli ai. Atonu tatou te mafaufau i nei taiala e avea o se vaega o le fataapefa’i a Keriso—o faatonuga patino e fesoasoani ia i tatou e faamalosia lo tatou malamalama i mataupu faavae o le talalelei o loo latou suitulaga ai.
Mafaufau i le mataupu faavae o le talalelei o le tauagafau, mo se faataitaiga. O le tamaitusi o le Mo le Malosi o le Autalavou o loo aumaia ai se faauigaga patino, e mafai ona faatinoina o laei e le tauagafau: “Soo se laei e fufusi, valavala, pe faaalia i soo se isi lava ala.”5 A o tatou mulimuli i lenei taiala, e mafai ona fesoasoani ia i tatou e faamalosia lo tatou malamalama i mea uma e tauagafau moni lava—o se uiga faaalia o le lotomaualalo, faaaloalo, ma le “vii[ga] o le Atua” (1 Korinito 6:20)6—seia suia o tatou loto ma a tatou amioga ia latalata atili atu ai ia Keriso e avea ma natura lona lua.
A o ou faaaogaina lenei suiga i le mafaufau i “mea uma e fai” sa ou lagona e tatau ona ou faataunuuina i le talalelei, sa amata ona suia ou lagona faateleina o le mu [i le feomai i le tele o mea e fai] i lagona o le faatuatua. Sa mama a’u avega a o ou tilotilo atu i mataupu faavae tutotonu o le talalelei lea na faatusa i ai mea taitasi e fai po o poloaiga. Na aoaoina a’u e le sefuluai e uiga i le faaaogaina o le tulafono o le faapaiaga i lo’u olaga. O le auai i le lotu i vaiaso taitasi e ‘ai ma inu i le faamanatuga na avea ma se lesona i le Togiola a le Faaola. Na faafuasei lava ona lagonaina e pei sa i ai se agaga, ma e le na o se tusi, i tulafono a le Atua i lo’u olaga.
Faatagaina o Ia ia Suia o Tatou Loto
A o tatou taulai atu i le Faaola ma faatagaina o Ia e suia o tatou loto, o le a avea le faatusa o le Atua ma “togitogia i o [tatou] foliga” (Alema 5:19). E finagalo o Ia ia le gata ina tatou mulimuli ia te Ia ae ia avea faapei o Ia, ia mafaufau ma galue e pei ona Ia finagalo ai, ia iloa o Ia.
I le faataoto i taleni (tagai Mataio 25:14–30), e mafai faapefea e le auauna mulimuli ona fai atu na te iloa lona alii ae peitai na ia faia le faafeagai o lona finagalo? Atonu na malamalama o ia i lona alii i se tulaga papa’u, o se “tagata maaa” (Mataio 25:24), ae o “auauna lelei ma faamaoni” (Mataio 25:21) sa malamalama i lo latou alii i lona auga tonu.
Ina ia iloa moni le Tama Faalelagi ma le Faaola i lo La’ua auga tonu, e manaomia ona tatou faamalosia lo tatou malamalama i a La’ua mataupu faavae autu o le talalelei. Na aoao mai e Keriso nisi o nei mataupu faavae autu i le Ioane Ioane 3:3–21, e aofia ai Lana Togiola ma le alofa o le Atua mo i tatou. O lenei galuega o loo taialaina e poloaiga sili e lua ia alofa atu i le Atua ma alofa atu i o tatou tuaoi (tagai i le Mataio 22:37–39).
O poloaiga uma ma a tatou feagaiga ma valaauga i le talalelei e mafai ona faasino atu ai i tatou i nei mataupu faavae autu, lea e faasino atu ai i tatou ia Keriso. Mafaufau pe faapefea ona fesoasoani isi aoaoga e faamalosia upumoni taua i le talalelei. O le a se mea o aoao mai e le faamanatuga ia te oe e uiga i le alofa o le Atua mo oe? O le a se mea o aoao mai e le auaunaga ia te oe e uiga i lou alofa mo le Atua?
Taulai Atu ia te Ia
A tatou vaai i poloaiga ma o tatou tiutetauave o ni soo o Keriso ua na o ni mea e fai e le talafeagai, o o tatou lagona o le mu [i le feomai i le tele o mea e fai] e mafai ona tatou fesiligia ai pe aoga le mulimuli i ai. Faatasi ai ma lenei mafaufau, atonu tatou te amata ona lagona le oona ma amata ona vaai atu i poloaiga o ni mea faasāsā ma lē fetaui. Ae o le malamalama i le fuafuaga o le fiafia faatasi ma Iesu Keriso i le totonugalemu o le fuafuaga e fesoasoani tatou te taulai atu ai i le aisea i tua atu o mea uma ua poloaiina ai i tatou e le Alii e fai ma e mafai ona suia ai o tatou tiutetauave mai i le faatauvaa i le anoa (tagai Alema12:32).
Pe a lagonaina le faigata ona iloa po o a mea e taua po o le a foi le taua o lo tatou malosi itiiti, ia tatou “faaaoga sina faatuatua itiiti” (Alema 32:27) o Keriso o le ala ma o le ala o feagaiga e taitai atu ai i tatou ia te Ia. Ia tatou “tofotofo i [Ana] upu, … e tusa pe le mafai e [i tatou] ona sili atu nai lo le fia talitonu” (Alema 32:27). O le faia o lena mea, atonu tatou te vaai ai i le totonugalemu o mea uma a le Faaola—atonu e oo lava i na mea o loo e tauivi ai i le talalelei. Ae faapefea pe afai e faasino uma ai i tatou ia Keriso, Lana taulaga togiola, ma Lona Toetu? Ae faapefea pe afai e faasino uma i le alofa o Lona Tama Faalelagi mo i tatou?
A o ou faatotonugalemuina le faavae o la’u molimau ia Keriso, sa mama le avega o le mu [i le feomai i le tele o mea e fai]. O loo ou lofituina pea i nisi taimi, ae o le toe taulai atu o lo’u loto ia te Ia e fesoasoani ou te iloa ai o le mea e sili ona taua o a’u taumafaiga, tetele ma laiti, ia latalata atili atu ia te Ia i aso taitasi.