“Sa Ia Faaiila o Matou Seevae,” Liahona, Oke. 2022.
O Leo o le Au Paia o Aso e Gata Ai
Sa Ia Faaiila o Matou Seevae
O le auaunaga faaKeriso a Paulo na aoaoina ai a’u e uiga i le meaalofa o le Togiola a le Faaola i se auala na tuua ai se uunaiga tumau i lo’u agaga.
A o ou auauna atu o se faifeautalai i le Misiona a Pasila Salvador i Saute, sa masani ona aai faatasi faifeautalai e toavalu i le matou sone i le fale o Paulo, o se tasi o le Uarota a Itapua. Matou te aai faatasi ma lenei aiga i vaiaso uma i se aso patino.
I se tasi aso patino sa matou aai ai i le fale o Paulo ma lona toalua ma lona afafine. Sa timuga i le vaiaso atoa, ma sa faatumulia auala i vaitafe. Sa tauagafau le fale o Paulo, faatasi ai ma se fola sima ua lamolemole i le aluga o taimi. Sa lei lava meaafale a lona aiga mo faifeautalai uma e toavalu, o lea o le toatele o i matou sa saofafai i luga o le fola.
O Paulo o se tagata liliu mai i le Ekalesia o lē sa lei maua le avanoa e auauna atu ai i se misiona. Ina ua uma le matou taumafataga, sa ia fesili mai po o fea o le a agai i ai a matou talaiga i lena aoauli. Sa matou ta’u atu ia te ia o loo matou agai atu i le ofisa o le misiona mo a ma faatalanoaga masani ma le peresitene o le misiona.
“Alii faifeautalai,” o lana tala lea, ma tilotilo i o matou seevae ua palapala, “e le mafai ona tou o vaai le tou peresitene o le misiona ma seevae e foliga faapena!”
Sa alu o ia i totonu o lona potumoe ma toe foi mai ma se atigi apa polesi seevae ua toeititi lava a uma. Ona ia tootuli lea i luga o le fola ma amata ona faaiila o matou seevae.
E mafai faapefea e lenei alii ua uma ona ositaulagaina le tele o mea e fafaga ai faifeautalai fiaaai e toavalu i vaiaso taitasi ona toe faaiiila foi o matou seevae? O a’u o le tasi o tagata mulimuli i le laina, ma sa tonu ia te a’u e teena ma le faaaloalo pe a oo mai i lo’u taimi. Ae ina ua taunuu o ia i o’u seevae, sa ou iloa afai ou te teena lana ofo, o le a ou teenaina se meaalofa paia mai se alii lotomaualalo moni.
Ona o le auaunaga faaKeriso a Paulo, ou te lagona ai le mu o lo’u loto i le olioli i taimi uma ou te mafaufau ai ia te ia. Sa ia aoaoina a’u e uiga i le meaalofa o le Togiola a le Faaola i se auala na tuua ai se uunaiga tumau i lo’u agaga.
Na puapuagatia Iesu Keriso i puapuaga e tele mo tagata taitoatasi. Pe a tatou taliaina ma le loto i ai Lana taulaga mo i tatou, o le salamo i a tatou agasala ma mulimuli ia te Ia, e tuputupu ae lo tatou alolofa mo Ia (tagai Mataupu Faavae ma Feagaiga 88:33). O Lona alofa mo i tatou e iloaina atoatoa a o tatou taliaina mea ua Ia foai fua mai ia i latou uma o e loto momomo ma salamo.