Sau, Mulimuli Mai ia te A’u

Ieremia 1

Sa Silafia E Le Atua A’u Ae Ou Te Le’i Fanau Mai.

teineitiiti ma lima faaloaloa o loo tilotilo i fetu i le lagi

Sa tatou ola faatasi ma le Tama Faalelagi ae tatou te le‘i fananau mai. “E lei amataina la tatou malaga patino i le fanau mai. Ae tatou te lei fananau mai, sa tatou faatasitasi i se lalolagi o tapenaga lea na tatou ‘maua ai a [tatou] lesona muamua i le lalolagi o agaga’ [Mataupu Faavae ma Feagaiga 138:56].”¹ Na ta’u atu e le Alii lenei upumoni ia Ieremia le perofeta ina ua Ia fetalai mai, “Na A’u iloa oe a o lei faia oe e A’u i le manava; … na A’u tofia oe e fai ma perofeta i nuu” (Ieremia 1:5).

Pe na tuuina mai e le Alii ia i tatou ni misiona e faataunuu foi?

Na faapea mai Sister Wendy W. Nelson

“I le muai olaga na tofia ai oe ma a’u i se misiona ofoofogia e faataunuu a o i ai iinei i le lalolagi. …

“O le filifiliga e a oe ma a’u. Pe o le a tatou filifili ea e faia soo se mea e tatau ai ina ia faataunuu ai le misiona matagofie na ala ai ona auina mai i tatou i le lalolagi?”²

I lea lava alatoto, Na aoao mai Elder Bruce R. McConkie (1915–85) o le Korama a Aposetolo e Toasefululua, “[O le Aposetolo o Paulo] o loo fai mai foi e uiga i tagata o le Ekalesia e faapea, ‘ua filifilia i tatou e le Atua ia te ia a o lei faavaeina le lalolagi, ina ia tatou paia ma aunoa ma le tuuaia i ona luma i le alofa,’ ma sa mua’i faauuina i tatou e avea ma fanau a Iesu Keriso e ala i le vaetamaina, o lea o le mauaina o se ‘faamagaloga o agasala’ i lenei olaga ma se tofi o le mamalu e faavavau i le olaga a sau [Efeso 1:7].”³

Talanoaga

E mafai faapefea ona fesoasoani ia te oe le manatua na silafia oe e le Atua ae e te lei fanau mai? (tagai Ieremia 1:5; tagai foi Aperaamo 3:22–23).

E faapefea e le iloaina sa e filifili e mulimuli i le fuafuaga a le Tama Faalelagi i le muai olaga ona aafia ai au filifiliga i lenei olaga? (tagai 2 Nifae 2:26–27; Aperaamo 3:25–26).

Faamatalaga

1. Neil L. Andersen, “O Le Malaga Patino a se Atalii o le Atua,” Liahona, Me 2021, 46.

2. Wendy W. Nelson, “Faamoemoe o Isaraelu” (faigalotu a le autalavou i le lalolagi atoa, 3 Iuni, 2018), HopeofIsrael.ChurchofJesusChrist.org.

3. Bruce R. McConkie, “God Foreordains His Prophets and His People,” Ensign, May 1974, 73; tagai foi Gospel Topics, “Foreordination,” topics.ChurchofJesusChrist.org.