« តើមានអ្វីកើតឡើងនៅក្នុងការប្រជុំរបស់សាសនាចក្រនាថ្ងៃអាទិត្យ ? » លីអាហូណា ខែ មិថុនា ឆ្នាំ ២០២២ ។
សារលិខិត លីអាហូណា ប្រចាំខែ មិថុនា ឆ្នាំ ២០២២
តើមានអ្វីកើតឡើងនៅក្នុងការប្រជុំរបស់សាសនាចក្រនាថ្ងៃអាទិត្យ ?
សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយប្រមូលផ្ដុំគ្នានៅរៀងរាល់ថ្ងៃអាទិត្យដើម្បីថ្វាយបង្គំព្រះ និងបង្រៀនគ្នាទៅវិញទៅមកអំពីដំណឹងល្អនៃព្រះយេស៊ូវគ្រីស្ទ ។ មនុស្សទូទៅត្រូវបានស្វាគមន៍ឲ្យចូលរួម ហើយសមាជិកនឹងមានឱកាសអធិស្ឋាន ឡើងនិយាយ និងបង្រៀនមេរៀន ប្រសិនបើពួកគេចង់ធ្វើ ។ ការប្រជុំទាំងនេះជួយសមាជិកពង្រឹងសេចក្តីជំនឿគ្នាទៅវិញទៅមក ហើយមាន « ចិត្តចងក្រងរួមគ្នាដោយសាមគ្គី ហើយស្រឡាញ់គ្នា » ( ម៉ូសាយ ១៨:២១ ) ។
ការប្រជុំសាក្រាម៉ង់
សមាជិកវួដ ឬសាខាប្រមូលផ្ដុំគ្នារៀងរាល់ថ្ងៃអាទិត្យចូលរួមការប្រជុំសាក្រាម៉ង់ ។ ( អ្នកដែលពុំមានជំនឿដូចយើងក៏ស្វាគមន៍ឲ្យចូលរួមផងដែរ ) ។ សាក្រាម៉ង់ត្រូវបានផ្ដល់ដល់សមាជិកនៅអំឡុងការប្រជុំនេះ ដើម្បីជួយពួកគេរំឭកចាំពីព្រះយេស៊ូវគ្រីស្ទ ( សូមមើល អត្ថបទមូលដ្ឋានគ្រឹះនៃដំណឹងល្អ ខែមេសា ឆ្នាំ២០២២ សម្រាប់ព័ត៌មានបន្ថែមអំពីពិធីសាក្រាម៉ង់ ) ។ ការប្រជុំនេះក៏រួមមាននូវការអធិស្ឋាន តន្ត្រីថ្វាយបង្គំ និងការឡើងនិយាយរបស់សមាជិកអំពីដំណឹងល្អរបស់ព្រះយេស៊ូវគ្រីស្ទផងដែរ ។
ការប្រជុំផ្សេងទៀត
បន្ទាប់ពីការប្រជុំសាក្រាម៉ង់ សមាជិកបំបែកគ្នាតាមថ្នាក់ និងកូរ៉ុម ។ កុមារអាយុពី ១៨ ខែ ដល់ ១១ឆ្នាំ ចូលរួមថ្នាក់អង្គការបឋមសិក្សា ។ នៅថ្ងៃអាទិត្យទីមួយ និងទីបីនៃខែនីមួយៗ សមាជិកផ្សេងទៀតទាំងអស់ចូលរួមសាលាថ្ងៃអាទិត្យ ។ នៅថ្ងៃអាទិត្យទីពីរ និងទីបួន ពួកគេចូលរួមការប្រជុំសមាគមសង្គ្រោះ ក្រុមយុវនារី ឬកូរ៉ុមបព្វជិតភាព ។
ការអធិស្ឋាន
ការអធិស្ឋាននៅក្នុងការប្រជុំរបស់សាសនាចក្រត្រូវបានធ្វើឡើងដោយសមាជិក ។ ការអធិស្ឋានមានភាពសាមញ្ញ ហើយបានដឹកនាំដោយព្រះវិញ្ញាណបរិសុទ្ធ ។ សមាជិកអធិស្ឋានដោយប្រើពាក្យពេចន៍ ដែលបង្ហាញសេចក្ដីស្រឡាញ់ និងការគោរពដល់ព្រះវរបិតាសួគ៌ ។ ការណ៍នេះរួមបញ្ចូលការប្រើសព្វនាម ទ្រង់ និង របស់ទ្រង់ នៅពេលអធិស្ឋានទៅរកព្រះ ។
សុន្ទរកថា
សមាជិកម្នាក់នៃគណៈប៊ីស្សព ឬគណៈប្រធានសាខាសុំឲ្យសមាជិកឡើងនិយាយនៅក្នុងការប្រជុំសាក្រាម៉ង់ ។ ការឡើងនិយាយទាំងនេះផ្ដោតលើដំណឹងល្អនៃព្រះយេស៊ូវគ្រីស្ទ ។ ពួកអ្នកឡើងនិយាយប្រើបទគម្ពីរ និងប្រសាសន៍របស់ថ្នាក់ដឹកនាំសាសនាចក្រពេលពួកគេរៀបចំសុន្ទរកថារបស់ខ្លួន ។ ពួកគេក៏ថ្លែងទីបន្ទាល់អំពីពរជ័យនៃគោលការណ៍ទាំងឡាយនៃដំណឹងល្អនៅក្នុងជីវិតរបស់ពួកគេផងដែរ ។
មេរៀន
បន្ទាប់ពីការប្រជុំសាក្រាម៉ង់ សមាជិករៀនអំពីដំណឹងល្អនៅក្នុងថ្នាក់តូចៗ ។ មេរៀនប្រហែលជាអំពីបទគម្ពីរ ការបង្រៀនចេញពីសន្និសីទទូទៅ ឬប្រធានបទផ្សេងទៀត ។ ទោះជាគ្រូបង្រៀននឹងដឹកនាំមេរៀននោះក្ដី ក៏វាពុំមែនជាការបង្រៀនទេ ។ សមាជិកថ្នាក់គ្រប់រូបអាចចែកចាយគំនិតរបស់ពួកគេអំពីប្រធានបទនោះ ។
ទីបន្ទាល់
ក្នុងមួយខែម្ដង ការប្រជុំសាក្រាម៉ង់រួមមាននូវការប្រជុំថ្លែងទីបន្ទាល់ ។ ជាធម្មតា ប្រារព្ធឡើងនៅថ្ងៃអាទិត្យដើមខែ ។ អំឡុងការប្រជុំនេះ សមាជិកអាចថ្លែងទីបន្ទាល់របស់ពួកគេអំពីព្រះយេស៊ូវគ្រីស្ទ និងដំណឹងល្អរបស់ទ្រង់ ។ ការថ្លែងទីបន្ទាល់មានន័យថា ការប្រកាសអំពីសេចក្ដីពិតនៃដំណឹងល្អទៅតាមការបំផុសគំនិតដោយព្រះវិញ្ញាណបរិសុទ្ធ ។
ការរៀបចំខ្លួន
សមាជិករៀបចំខ្លួនសម្រាប់ការប្រជុំនៅថ្ងៃអាទិត្យតាមរយៈការអធិស្ឋាន ការសិក្សាបទគម្ពីរ និងការត្រៀមខ្លួនទទួលយកការបំផុសគំនិតពីព្រះវិញ្ញាណបរិសុទ្ធ ។ ប្រសិនបើបងប្អូនត្រូវបានសុំឲ្យឡើងនិយាយ ឬបង្រៀនមេរៀនមួយ សូមគិតពីរបៀបដែលបងប្អូនអាចបង្រៀនគោលការណ៍ទាំងឡាយនៃដំណឹងល្អប្រកបដោយការអធិស្ឋាន ។ សូមប្រើបទគម្ពីរ ។ សូមថ្លែងទីបន្ទាល់អំពីសេចក្ដីពិត ។ ថ្នាក់ដឹកនាំសាសនាចក្ររបស់បងប្អូន អាចជួយបងប្អូនឲ្យរៀបចំខ្លួន ប្រសិនបើចាំបាច់ ។
© 2022 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, June 2022. Cambodian. 18315 258