ពិធីសាក្រាម៉ង់ ៖ វិធីរំឭកចាំព្រះអង្គសង្គ្រោះ

រូបភាព

កន្លែងដាក់អត្ថបទ

អាហារចុងក្រោយ ដោយ ស៊ីម៉ូន ឌីវី

នៅយប់មុនពេលគេឆ្កាងទ្រង់ ព្រះយេស៊ូវគ្រីស្ទបានជួបនឹងពួកសាវករបស់ទ្រង់នៅឯអាហារចុងក្រោយ ។ នៅទីនោះទ្រង់បានប្រទានសាក្រាម៉ង់ដល់ពួកគេជាលើកដំបូង ថា ពិធីនេះគឺជាវិធីមួយដើម្បីពួកគេរំឭកចាំដល់ទ្រង់ ។ ពិធីសាក្រាម៉ង់គឺជា ពិធីបរិសុទ្ធ មួយដែលយើងទទួលទាននំប៉័ង និងទឹកដើម្បីរំឭកចាំចំពោះ ដង្វាយធួនរបស់ព្រះគ្រីស្ទ ។ នំប៉័ងតំណាងឲ្យព្រះកាយរបស់ព្រះគ្រីស្ទ ហើយទឹកតំណាងឲ្យព្រះលោហិតទ្រង់ ។

យើងទទួលទានសាក្រាម៉ង់រៀងរាល់ថ្ងៃអាទិត្យអំឡុងការប្រជុំសាក្រាម៉ង់ ។ យើងច្រៀងទំនុកតម្កើងខណៈដែល ពួកអ្នកកាន់បព្វជិតភាព ហែកនំប៉័ងទៅជាបំណែកតូចៗ ។

ពួកអ្នកកាន់បព្វជិតភាព ដែលហែកនំប៉័ងពោលការអធិស្ឋានពិសេស ។ ការអធិស្ឋានទាំងនេះមាននៅក្នុង គោលលទ្ធិ និង សេចក្ដីសញ្ញា ២០:៧៧, ៧៩ ។ ការអធិស្ឋាននេះរំឭកអំពីអ្វីដែលយើងបានសន្យាចំពោះព្រះវរបិតាសួគ៌ និងអ្វីដែលទ្រង់បានសន្យាដល់យើង ។

ពួកអ្នកកាន់បព្វជិតភាព ផ្សេងទៀតចែកសាក្រាម៉ង់ដល់សមាជិកក្នុងរួដ ឬសាខា ។ នៅពេលយើងទទួលទានសាក្រាម៉ង់ យើងរំឭកចាំព្រះអង្គសង្គ្រោះ និងការពលិកម្មរបស់ទ្រង់ចំពោះយើង ។ យើងក៏ប្ដេជ្ញាចិត្តជាថ្មីដើម្បីរក្សាសេចក្ដីសញ្ញា ( ការសន្យា )ដែលយើងបានធ្វើជាមួយនឹងព្រះវរបិតាសួគ៌ ។

រូបភាព

ក្មេងស្រីកំពុងទទួលទាននំប៉័ងអំឡុងការប្រជុំសាក្រាម៉ង់ ។

យើងមានគារវភាពខណៈដែលពិធីសាក្រាម៉ង់ត្រូវបានប្រសិទ្ធពរ និងចែក ។ វាគឺជាពេលមួយដើម្បីយើងគិតអំពីព្រះជន្ម ការបង្រៀន និង ដង្វាយធួនរបស់ព្រះយេស៊ូវគ្រីស្ទ ។ យើងក៏អាចគិតអំពីរបៀបដែលយើងអាចធ្វើតាមគំរូរបស់ទ្រង់ផងដែរ ។

ពាក្យគួរស្គាល់

ពិធីបរិសុទ្ធ ៖ សកម្មភាពផ្លូវការដ៏ពិសិដ្ឋមួយដែលបានធ្វើឡើងដោយសិទ្ធិអំណាចនៃបព្វជិតភាព ។

ពួកអ្នកកាន់បព្វជិតភាព ៖ ពួកបុរស និងពួកយុវជនដែលស័ក្ដិសម ដែលបានទទួលសិទ្ធិអំណាចដើម្បីធ្វើសកម្មភាពនៅក្នុងព្រះនាមរបស់ព្រះយេស៊ូវគ្រីស្ទ ។

ដង្វាយធួនរបស់ព្រះយេស៊ូវគ្រីស្ទ ការរងទុក្ខសម្រាប់អំពើបាបរបស់យើង ការសុគតនៅលើឈើឆ្កាង និងការមានព្រះជន្មរស់ឡើងវិញរបស់ទ្រង់ដែលធ្វើឲ្យយើងអាចត្រឡប់ទៅរស់នៅជាមួយនឹងព្រះ ។

© 2022 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, April 2022. Cambodian. 18314 258