Aenōm̧m̧an eo an Juon Make ilo Iien ko Reppen
Kiiō eļapļo̧k an aorōk n̄an kappukot aenōm̧m̧an an juon make.
Kar jitōn̄ eō bwe in aje jidikin historic Nauvoo. Āinwōt m̧ōttan ijjitōn̄ eo, ikar maron̄ loļo̧k jikin kalbuuj Liberty ilo Missouri. Ke ikar alooje jikin kalbuuj eo, ikar kejōkļo̧kjeņ kōn m̧akūtkūt ko rekar bōk jikin ijeņ me rekōm̧m̧an bwe en āinwōt juon m̧ōttan eļap an aorōk ilo bwebwenato ko an Kabun̄ in. Mour eo an Armej ro Rekwojarjar kar kamijake er kōn juon kōttōpar n̄an kadiwōjļo̧k er jān jikin eo jān tōl eo an Kabōna eo an Missouri. N̄an kakobaba, Rikanaan Josep im jet iaan ro m̧ōttan raar bar pād ilo jikin kalbuuj Liberty kōn ejjeļo̧k ruweer. Juon iaan un ko unin aer jum̧ae im kakkure membōr ro ad ej bwe elōn̄ iaer rekar jab errā ilo jerbal in kōm̧akoko.1 Liakeļo̧k eo an Josep Smith im rikaļoor ro an ej juon waanjon̄ak eļap n̄an kōjerbal ilo bōd anemkwoj me emaron̄ jelet armej ro rekwojarjar. Iien ko an Josep ilo jikin kalbuuj Liberty ej kwaļo̧k bwe apan̄ ejjab kein kam̧ool eo an Irooj dike ak kōbōjrak kōj jān kōjeraam̧m̧an ko An.
Ikar lukkuun ellowetak ilo aō kar riiti ta eo Rikanaan Josep Smith kar kwaļo̧k ke ej pād ilowaan kalbuuj ilo jikin kalbuuj Liberty: “O Anij, kwo pād ia? Im ia eo em̧ nuknuk eo ej kalbubu ajikin tilekek eo Am?”2 Josep ekar kajjitōk ewi toon an armej ro an Irooj naaj “en̄taan kōn bōd kein im kebiōp kein rerupe kakien.”3
Ilo aō jutak ilo jikin kalbuuj Liberty, ikar lukkuun em̧m̧akūt ke ikar riiti uwaak eo an Irooj: “Nejū m̧aan, aenōm̧m̧an en n̄an am; mennin jum̧ae kein am im en̄taan kein am renaaj n̄an jidik wōt iien; innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej.”4 Elukkun alikkar bwe jum̧ae ko rej kōkm̧anm̧anļo̧k kōj n̄an juon mejān kajjik indeeo im an selestial.5
Naan ko raorōk an Rillo̧mo̧o̧r “Nejū m̧aan, aenōm̧m̧an en n̄an am”6 eļap meļeļe ippa make im ewōr juon aorōkin eļap n̄an raan ko ad. Ekakeememej eō kōn katak ko An n̄an rikaļoor ro An ilo iien kwaļo̧k naan eo An ilo mour in.
M̧okta jān en̄taan eo an Kraist ilo jikin Kallip Getsemane im ioon debwāāl, E ekar kakien Rijilōk ro An n̄an “yokwe doon; āinwōt Iar yokwe koṃ”7 im kainem̧m̧an er kōn naan kein: “Aenōṃṃan Ij likūt ṇa ippemi, Aō aenōṃṃan Ij lewōj ñan koṃ: Ña Ij lewōj ñan koṃ, jab āinwōt an laḷ lewōj. En jab pok būruemi, im en jab lōļn̄o̧n̄.”8
Juon iaan taitōļ ko im rem̧man an Irooj im Rilo̧mo̧o̧r, Jisōs Kraist, ej “Irooj in Aenōṃṃan.”9 Ilo iien eo Aelon̄ in Anij enaj ejak im bareinwōt aenōm̧m̧an im iakwe.10 Jej reim̧aanļok n̄an juon taujin iiō an Messaia tōl.
Mekarta ettōņak eo kōn juon taujin iiō in An tōl ioon lal, jejeļā bwe aenōm̧m̧an im jokne rejjab ajedeed ilo raan kein ad.11 Ilo aolepen mour e aō, ijjan̄in jan̄in kar lo ejjeļo̧k kautiej eļap. Eļap kadtok kōj kōn matōrtōr, naan in jum̧ae im kūtōtō, kōm̧m̧an ko eļap aer nana me rej ko̧kkure aenōm̧m̧an im jokne.
Aenōm̧m̧an ilo laļ in ejjab kallim̧ur ak ejjeļo̧k kōjatdikdik kake m̧ae itok eo an Jisōs Kraist Kein Karuo. Rilom̧or ej kōmeļeļeik rikaļoor ro Anibwe mijen eo An ioon lal in ekar jab ej jāmin naaj bōk aenōm̧m̧an ioon lal. Ekar katakin, “Kwom̧in jab lōmnak bwe ij itok bwe in jilkinļok aenōm̧m̧an ioon lal.”12 Aenōm̧m̧an ilo aolepān laļ in ekar jab m̧ōttan naan in kwaļo̧k ko an Rilo̧mo̧o̧r. Aenōm̧m̧an an aolepān laļ in ejako rainin.
Kōn menin, aenōm̧m̧an an juon make maron̄ tōprak men̄e matōrtōr, jum̧ae, aitwerōk, im men ko rej ko̧kkure laļ in ad rainin. Kiiō eļap an aorōk n̄an kappukot aenōm̧m̧an an juon make. Juon al kāāl eo em̧m̧an im aiboojoj kar je n̄an jodikdik ro raan kein jān Brother Nik Day taitōļ eo “Aenōm̧m̧an ilo Kraist” ej kalikkar, “N̄e ejjeļo̧k aenōm̧m̧an ioon lal, ewōr aenōm̧m̧an ilo Kraist.”13 Jej jeraam̧m̧an bwe al in ear waļo̧k m̧okta jān kar COVID-19 eo eajeeded ipeļaakin laļ in.
Al in ebōkliļok aiboojoj in im letok aenōm̧m̧an kab aorōk in aenōm̧m̧an eo ej an̄kō ilo mour im mijen eo an Jisōs Kraist. Būreejtōn Josep F. Smith eaar kwaļo̧k, “Ejamin maron̄ itok n̄an laļ in jetōbin aenōm̧m̧an im iakwe … m̧ae iien ro nejin armej renaaj bōk m̧ool eo an Anij im naan ko an Anij … , im kile kajoor im mālim eo An ekwojarjar.”14
Ilo ad jab maron̄ bar ro̧o̧l jān kijejeto ko n̄an bōk aenōm̧m̧an eo an aolepān laļ in, em̧ōj kalikkar n̄an kōj bwe jemaron̄ bōk aenōm̧m̧an an juon make āinwōt an Kraist katakin. Pedped in katak in epād ilo Katak im Bujen Ko: “Ak kom̧in jeļā bwe eo ej kōm̧m̧ani jerbal ko rejim̧we enaaj bōk wōņāān, em̧ool aenōm̧m̧an ilo laļ in, im mour indeeo ilo laļ eo ej itok.”15
Ta jet iaan “jerbal jim̧we” ko me renaaj jipan̄ kōj jān lōkapokpok im kadikļo̧k iakwelel im pukōt aenōm̧m̧an eo ilo laļ in? Aolep katak ko an Kraist rej jitōn̄ļo̧k iaļ in. Inaaj kwaļo̧k jet im ij tōmak remenin aorōk.
Moktata; Iakwe Anij, Mour kōn Kien ko An, im Jeorļok an Aolep Bōd
Būreejtōn George Albert Smith eaar erom Būreejtōn an Kabun̄ in ilo 1945. Ekar kanooj bun̄bun̄ ilo iiō in jerbal eo an āinwōt juon Rijilōk eo im ej ritōl in aenōm̧m̧an im iakwe. Ilo kar iiō kein 15 m̧okta jān an kar erom̧ juon būreejtōn, idajon̄jon̄ im mellijon̄ ko an laļ in ekoba mej an elōn̄ ilo kar bata eo kein kauro, ekar ejjeļo̧k aenōm̧m̧an.
Jem̧ļo̧k in Bata eo Kein Karuo, ilo kweilo̧k eo jinoin āinwōt juon Būreejtōn ilo Oktoba 1945, Būreejtōn Smith eaar kakeememej Armej ro Rekwōjarjar an Kraist bwe ren iakwe ritūrier im jeorļo̧k aer bōd im katakin, “Bwe jetōb in armej ro rekwojarjar ilo raan ko āliktaa rej aikuj pukōt n̄an jutak im̧aan Mejān im bōk Pein ilo juon karuwainene eo eaibojooj n̄an aelōn̄ eo.”16
Kein karuo: Kappukot Leen ko an Jetōb
Rijilōk Paul ilo Leta eo an n̄an ri Galetia bwe ren reim̧aanļo̧k n̄an kōjeņoļo̧k ikōtaan jerbal jim̧we eo im ej letok n̄an kōj aelōn̄ in Anij im jerbal ko, jab ukweļo̧k, renaaj joļo̧k kōj. Ilubwiljin men kein me rej kōkarbōb e kōj rej leen ko an Jetōb “yokwe, lan̄lōn̄, aenōm̧m̧an, meanwōd, jouj, em̧m̧an, tiljek, ineem̧m̧an, [im] jatōr.”17 Paul ar ba bōk eddo ko an doon im jab mōk ilo kōm̧m̧an em̧m̧an.18 Ilubwilijin jerbal kein rejjab jim̧we ekoba matōrtōr, illu im kijejeto.19
Juon iaan katak ko rebun̄bun̄ reļļap jān Kallim̧ur M̧okta kōn jemen ro ritōmak Ebream. Ebream im Lot, leo man̄dren, raar m̧weie bōtaab rar jab maron̄ ippān doon. N̄an joļo̧k kijejeto Ebream ar kōtļak bwe Lot en kelet ene eo ekōnan. Lot ar kālet Jordan, ijo dān ko ie rem̧m̧an im reaibojoj. Ebream ekar bok ijo edrik bwidej eo ie ilo Mamre. Jeje ko rekwojarjar ej ba bwe Ebream ar erļo̧k em̧ nuknuk eo im kalōk jikin lokatok eo an Iroj.”20 Lot, ilo ijo drejet, “ear kajutak em̧ nuknuk eo iturin Sodom.”21 Bwe en wōr jem̧jerā eo eaenōm̧m̧an, klatak in ealikkar bwe jej aikuj naaj joļo̧k kijejeto ippān karejar eo ejjab koba ippān wānōk eo ej letok aenōm̧m̧an ilo juon pād. Ilo katak an Kiin̄ Benjamin, “Im kom̧ ban kar kōņaan n̄an kōmetak bar juon, ak n̄an mour ilo aenōm̧m̧an.”22 Ak elukin aurok ilo wawen ad m̧akūtkūt bwe jen ekejel wot ilo tomak, ak katak ko rejim̧we im mol.
N̄e jekōnaan bwe aenōm̧m̧an eo pād ippād eo ej itok āinwōt nōbar jān jerbal jim̧we, jenaaj ban kajutak em̧ nuknk ko ad jitōn̄ļo̧k wijwaan ko an laļ in. Jenaaj kajutak em̧ nuknuk ko jitōn̄ļo̧k tampeļ eo.
Kein Kajilu: Kōjerbal Anemkwoj in Kālet n̄an Kālet Wāppen
Anemōn im anemkwoj rej koba āinwōt m̧ōņakjeņ ko an karōk in lo̧mo̧o̧r eo. Āinwōt kar kwaļo̧k ilo unin kōnono eo an gospel eo ilo “Anemkwoj in Kālet im Bōk Eddo,” Anemkwoj ej juon jim̧we eo Anij ar letok n̄an kōj bwe jen kālōt n̄an kōj make.23 Lo, anemkwoj ej ijo būruon kajjojo ej eddōk im kōjeraam̧m̧an eo ilo ar ļoor Rilo̧mo̧o̧r.24
Anemkwoj ar juon pedped eo ilo Ko̧o̧njeļ eo ilo Mour eo Mokta im jum̧ae ko ko ikōtan ro im rar kālet bwe ren ļoor Kraist im ro rej ļoor Satan.25 Joļo̧k mōņōņō im kabojooj im kālet Rilo̧mo̧o̧r enaj tōl kōj n̄an meram kab aenōm̧m̧an eo an. Ak aenōm̧m̧an eo aō make naaj idajon̄jon̄e n̄e armej rej kwaļok anemkwoj ilo wāwein ko re kōmetak im kamijak.
Ejjeļo̧k lōke bwe aenōm̧m̧an eo jej en̄jake ilo būruer ar kōkajur jelaļokjen eo ad kōn Rilo̧mo̧o̧r eo an laļ bwe enaaj kakūrm̧ool menin ilo etad. Menin aibojoj im ar waļok ilo Preach My Gospel: “Ilo ar pedped ion ripinmuur Jisōs Kraist, Emaron̄ jiban̄ kōj dribuk melijon̄, nan̄inmej, im metak. Jenaaj obrak kōn lan̄lōn̄, aenōm̧m̧an, im jokne. Aolepen men ko reppen im kaen̄tanaan kōn mour in remaron̄ kōm̧m̧an bwe ren jim̧we kōn Pinmuur eo an Jisōs Kraist.”26
Kein Ka Emen: Kalōk Zaion ilo Bōro ko im Kapijuknen ko
Jej nejin Anij im mōttan baam̧le eo an. Jej barāinwōt mōttan baam̧le eo jar ļotak jen e. Ej katakin bwe baam̧le ej doulul eo eaorōk tata n̄an mōņōņō im aenōm̧m̧an. Būreejtōn Russell M. Nelson ar katakin kōj--ilo iien ajeeded in an nan̄inmej in jaar katak-- bwe im̧on pād ko an im̧on kabun̄ ko remaron̄ “kōmjal kajur an baam̧le … n̄an ukot [ad] kabijuknen n̄an im̧ōn ro ritōmak.”27 Elan̄e jenej kōm̧m̧an iien kabun̄ jar ko ad ilo mōko im̧ōd, jenaaj bōk aenōm̧m̧an eo an Rilo̧mo̧o̧r.28 Kōjwōj jelā bwe elon̄ iar ejjeļo̧k kōjeraam̧m̧an ilo kabijuknen im lem̧ōņōņō eo ippān ro rej kālet jab wanōk. Rilo̧mo̧o̧r emaron̄ lewaj kōjbarok im aenōm̧m̧an n̄an tōl eok n̄an jikin eo ejokane jen mour in ļōkabokbok.
Ij jiron̄ eok bwe lan̄lōn̄, iakwe, im baam̧le eo ej iakwe jim̧we naaj bōktok aenōm̧m̧an im mōņōņō jim̧or. Iakwe im meanwōr rej unin Zaion ilo buruer im kabijuknen.29
Ka ļalem: Ļoor Kain̄ ko an Rikanan
Ad aenōm̧m̧an ej ļapļo̧k n̄e jenaaj ļoor rikanan an Irooj, Būreejtōn Russell M. Nelson. Mōttan wot jidik im enaj wōr ien n̄an ar ron̄ jen e. E kar kōpooj E jān pedped eo an laļ in n̄an kūr in. Kōppopo eo An make ekar kanooj ļap an kabwilōn̄lōn̄.30
E ar katakin kōj bwe jemaron̄ “en̄jake aenōm̧m̧an im lan̄ļōn̄ ilo ien ko reppen.” ilo ad kajjieon̄ bwe jen erom̧ āinwōt Rilo̧mo̧o̧r eo, Jisōs Kraist.31 Emoj an kōkabiļōkļōk kōj bwe jen “ukweļok aoleb raan” ilo ad kōm̧m̧ane menin, jej bōk “karreo eo an Rilo̧mo̧o̧r, kōmour, im kajoor in kōkajoorļo̧k.”32 Ij juon rikam̧ool bwe revelesōn kar bōke im ej wōnm̧aanļo̧k wōt bōk jān lan̄ jān rikanaan eo ad ejitōn bōro.
Ilo ar nebare im rejōtak e āinwōt juon rikanan, jej kabun̄ jar n̄an Jemed ilan̄ im ad Rilo̧mo̧or, Jisōs Kraist. Jetōb Kwojarjar ej katakin kōj.
Ij kwaļo̧k aō im letok aō kam̧ool āinwōt juon rikaļoor bwe Jisōs Kraist, Rilo̧mo̧o̧r im Ripinmuur eo an laļ, ej tōl Kabun̄ eo An me em̧ōj an jepļaaktok. Mour eo An im pinmuur eo An rem̧ool rej bōktok aenōm̧m̧an. Rilo̧mo̧o̧r eo ej Irooj in Aenōm̧m̧an. Ij kwaļo̧k aō kam̧ool ejeņoļo̧k bwe E emour. Ilo etan Jisōs Kraist, amen.