Utiej Ippān Irooj ilo Raan Ko Aō
Ewi wāween ad en̄jake kōn en̄taan ko ad? Jej ke kam̧m̧oolol kōnke eļapļo̧k ad kalimjōki wōt kōjeraam̧m̧an ko ad im jab jorrāān ko jej kōm̧m̧ani?
Ajedeed in COVID-19 ekar juon iaan mālijjon̄ im apan̄ ko rellōn̄ me ajri ro nejin Anij rekar jelm̧ae ilo bwebwenato in laļ in. Ilo jinoin iiō in, baam̧le eo aō im n̄a kōm̧ ar mour deblo̧ke jet raan ko remarok. Ajedeed in nan̄inmej in im jekjek ko jet rekar waļo̧k jāne rekar bōktok mej im metak n̄an baam̧le eo am̧ ilo jako ko an ro rejitōn bōro. Mekarta kōjparok ko jān jikin taktō, jitlo̧k, im jar, ilo ium̧win ļalem wiik ko ļeo jeiū Charly, im lio jatū Susy, im ļeo pāleen leddik eo jeiū Jimmy rekar kijoone rōn̄ōl eo iturājet.
Elōn̄ iien ko ikar kōļmenļo̧kjeņ etke Rilo̧mo̧o̧r eo ekar jan̄ ke Ekar loe an Meri liajļōļ kōn mej eo an ļeo jein, Lazarus, men̄e Ekar jeļā bwe ewōr Ippān kajoor eo n̄an kōjerkak Lazarus im E eo enaaj kōjerbal kajoor in n̄an lo̧mo̧o̧ren in Eo m̧ōttan jān mej.1 Eļo̧kjenaō kōn tūriamo eo an Rilo̧mo̧o̧r eo im jouj n̄an Meri, Ekar meļeļe metak eo ejjeļo̧k emaron̄ kōmeļeļeiki me Meri ekar en̄jake ilo mej eo an ļeo jein, Lazarus.
Jej en̄jake ejja kain metak in n̄e jej jelm̧ae jenolo̧k in an jidik iien n̄an ro rejitōn bōro ippād. Rilo̧mo̧o̧r eo ekar wōr ippān tūriamo in ewāppen n̄an kōj. Ejjab likjab jān an ļōmņak kōn likjab in loļo̧kjeņ ko ad, barāinwōt ad likjab in kalimjōke em̧m̧akūt in ad ejjeļo̧k jem̧ļo̧kin. Ijjelo̧kin, ewōr An tūriamo kōn ad būrom̧ōj im en̄taan.
Jemedwōj Ilan̄ im Nejin, Jisōs Kraist, rekōņaan bwe jen lan̄lōn̄.2 Būreejtōn Russell M. Nelson ekar katakin: “Mōn̄ōņō eo jej en̄jake edik jetņakin ilo wāween mour ko ad im aolep men otemjej jej kōm̧m̧ani kōn mije mour ko ad. N̄e mour ko ad rej pedped wōt ilo karōk in lo̧mo̧o̧r eo an Anij, … jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad.”3
Ke ikar juon mijenede em̧m̧an dettan, ij keememej ke juon mijenede ekabwilōn̄lōn̄ eo me ikar kautieje ekar bōk jet nuuj ko rejjab em̧m̧an. Jinen im ļaddik eo jatin rekar mej ilo juon itaak in wa. Mijen būreejtōn eo ekar leļo̧k n̄an elder in kālet n̄an ro̧o̧l n̄an m̧weo im̧ōn n̄an iien ilomej eo. Ijoke, ālkin an kōnono ippān jemān ilo taļboon, mijenede eo ekar kālet bwe en pād wōt im kam̧ōj mijen eo an.
Jidik iien tokālik, ke kōm̧ ar jerbal in juon wōt zone, kōm̧pānien eo aō im n̄a kōm̧ro kar bōk juon jidimkij in call, jet riko̧o̧t rekar ko̧̧o̧te baajkōļ eo waan ejja mijenede in im rekar kaknejnej e kōn juon bakbōk. E im kōm̧pānien eo an rekar etetal iturin aujipitōļ eo, ijo me kōm̧pānien eo aō im n̄a kar ioon er ie. Iaļ eo am n̄an aujipitōļ eo, ikar būrom̧ōj kōn mijenede in. Ikar ļōmņak bwe jetōb eo an enaaj kar m̧ōjņo̧, im bwe ālkin en̄jake eo an ekabūrom̧ōjm̧ōj, enaaj kiiō kōņaan in ro̧o̧l n̄an m̧weo im̧ōn.
Ijoke, ke kōm̧ ar tōkeekļo̧k aujipitōļ eo, ikar loe an mijenede in babu ioon peet eo an kōttar aer bōkļo̧k bwe en m̧wijm̧wij—im ekar ettōn̄ dikdik. Ikar ļōmņak, “Etke emaron̄ in ettōn̄ dikdik ilo kain iien rot in?” Tōre eo ke ekar ājmourļo̧k ilowaan aujpital, ekar itok limo in leļo̧k pamphlet ko im kape in Bok in Mormon ko n̄an taktō ro, nōōj ro, im rinan̄inmej ro jet. Mekarta mālijjon̄ kein, ekar jab kōņaan ro̧o̧l n̄an m̧weo im̧ōn. Ijjelo̧kin, ekar jerbal m̧ae raan eo āliktata in mijen eo an kōn tōmak, kajoor, maron̄, im laudin̄din̄.
Ilo jinoin Bok in Mormon eo, Nipai ej ba, “Im ālikin aō lo elōn̄ en̄taan ilo raan ko aō, mekarta, āinwōt ke iaar utiej ippān Irooj ilo raan ko aō.”4
Ij ļōmņak kōn elōn̄ mālijjon̄ ko me Nipai ekar iooni, elōn̄ iaer rej pād ilo jeje ko an. Mālijjon̄ ko an rej jipan̄ kōj meļeļe bwe kōj aolep elōn̄ ad raan ko remarok. Juon iaan mālijjon̄ kein rekar waļo̧k ke Nipai kar kean̄ e bwe en ro̧o̧lļo̧k n̄an Jerusalem n̄an bōk brass pileij ko me rekar pād ippān Leban. Jet iaan ļaddik ro jein Nipai rekar em̧m̧aan ro edik tōmak ko aer, im aaet rekar m̧an Nipai kōn juon aļaļ. Nipai ekar en̄jake bar juon mālijjon̄ ke ekar bwilo̧ke libbo̧ņ eo an im ekar jab maron̄ elolo m̧ōn̄ā n̄an baam̧le eo an. Tokālik, ke kar kean̄ Nipai n̄an kalōk juon wa, ļaddik ro jein rekar kajjirere kake im m̧akoko in jipan̄ e. Mekarta mālijjon̄ kein im ko jet rellōn̄ ilo mour eo an, Nipai ekar aolep iien kile em̧m̧an eo an Anij.
Ke baam̧le eo an rekar kijoone lo̧maļo eo ilo iaļ eo aer n̄an ānen kallim̧ur, jet iaan ro uwaan baam̧le eo an Nipan̄ rekar “jino kam̧ōņōņōik er make, kōnono naan ko rellaj, im meļo̧kļo̧k ke ekar kajoor eo an Irooj eo ekar kōjparok er. Ke Nipai ekar luuk er, rekar metak kōn naan ko an im likwōje kōn to jon̄an ekar jab maron̄ m̧akūtkūt. Bok in Mormon ej kwaļo̧k bwe em̧m̧aan ro jein “rekar kōm̧m̧an n̄an [e] kōn eļap eddo”; pā ko peiū im ne ko neō “rekar kanooj ebbōj, im eļap kar metak eo.”5 Nipai ekar liaajlo̧ļ kōn kijn̄en̄e eo an būrueer im elōn̄ iien ekar en̄jake anjo̧ jān būrom̧ōj.6 “Mekarta,” ekar ba, “Iaar reilo̧k n̄an aō Anij, im iaar wūjtak E aolepān raan eo; im iaar jab ellotaane Irooj kōn en̄taan ko aō.”7
Ro jeiū im jatū, ewi wāween paaktokid n̄an en̄taan ko ad? Jej ke elotaan im̧aan mejān Irooj kaki? Ak, āinwōt Nipai im kar mijenede eo m̧ōtta, jej ke kam̧m̧oolol kaki ilo naan, ļōmņak, im kōm̧m̧an kōnke eļapļo̧k ad kalimjōke wōt kōjeraam̧m̧an ko ad ijjelo̧kin inepata ko ad?
Ad Rilo̧mo̧o̧r, Jisōs Kraist, ekar letok n̄an kōj waanjon̄ak eo ilo iien kwaļo̧k eo an ioon laļ in. Ilo iien ko reppen im mālijjon̄, ewōr jejjo men ko rej bōktok n̄an kōj eļapļo̧k aenōm̧m̧an im ju bōro jān baj jerbal wōt n̄an armej ro ad. Ilo bok in Matu ej kwaļo̧k ta eo ekar waļo̧k ke Rilo̧mo̧o̧r eo ekar jeļā bwe ļeo rilikin Jon Ripeptaij, Kiin̄ Herod ekar jōbare kōnke en kam̧ōņōņōik kōrā eo nejin Herodias:
“Im ro rū kaḷoran rej itok im bōk ānbwinnen im kalbwin e, im ilem kōnnaanōk Jisōs.
“Ke Jisōs ej roñjake, Ej make ḷọk jān ijo kōn wa ñan āne jeṃaden; im ke armej rej roñjake, rej ḷoor E im etal jān jikin kweilọk ko.
“Im Jisōs ekar itok im lo eḷap jar eo, im Ej tūriaṃokake er, im Ej kemour ro re nañinmej ro ippāer.
“Im ke e jota, rū kaḷoran rej itok ñan Ippān im ba, “Ijin āne jeṃaden, im iien eo e mootḷọk; Kwōn jilkinḷọk jar ko bwe ren ilọk ñan jikin kweilọk ko re dik im wiaik kijeir.
A Jisōs ej ba ñan er, “E jab eṃṃan bwe ren ilọk; koṃwin leḷọk ñan er bwe ren ṃōñā.”8
Jisōs Kraist ekar kwaļo̧k n̄an kōj bwe ilo iien mālijjon̄ ko im apan̄ ko, jemaron̄ kile men ko reppen an ro jet. Em̧m̧akūt kōn tūriamo, jemaron̄ pukotļo̧k im kotak er. Im ilo ad kōm̧m̧an āindein, jej barāinwōt ebbōkak jān jerbal in jipan̄ āinwōt Kraist. Būreejtōn Gordon B. Hinckley ekar ba: “Uno eo em̧m̧antata ijeļā kōn inepata ej jerbal. Uno eo em̧m̧antata n̄an inepata ej jerbal in jipan̄. Kāājmour eo em̧m̧antata n̄an em̧ōkm̧ōk ej apan̄ eo n̄an jipan̄ juon armej eo eļapļo̧k an m̧ōk.”9
Ilo, Kabun̄ eo an Jisōs Kraist, ekar wōr aō iien ko rem̧m̧an n̄an jerbal in karejar im jerbal n̄an armej ro aō. Ilo iien kein ke ij en̄jake bwe Jemedwōj Ilan̄ ej kōmeraikļo̧k eddodo ko aō. Būreejtōn Russell M. Nelson ej rikanaan an Anij ioon laļ in, e ej juon waanjon̄ak eļap kōn wāween ad aikuj in jerbal in karejar n̄an ro jet ilo iien mālijjon̄ ko reppen. Ij kobaiki naan in kam̧ool eo aō ippān ro rellōn̄ Rikwojarjar ro jet bwe Anij ej Jemedwōj Ilan̄ eo eļap an iakwe. Ikar en̄jake iakwe eo an eļap ilo raan in marok ko aō. Ad Rilo̧mo̧o̧r, Jisōs Kraist, ej meļeļe metak ko ad im en̄taan ko ad. Ekōņaan joļo̧k eddodo ko ad im kaenōm̧m̧an kōj. Jej aikuj ļoore waanjon̄ak eo An ilo ad jerbal im jerbal in karejer n̄an ro eļap aer eddodo jān ko ad make. Ilo etan Jisōs Kraist, Amen.