Na’o Tusiga Faatekinolosi
Feagai ma le Faailoga Tagata i le Falefaigaluega
E alala le tusitala i Zacatecas, Mekisiko.
Sa faigata tele ina ua teena au i se galuega ona o au o se tagata o Le Ekalesia a Iesu Keriso o le Au Paia o Aso e Gata Ai.
A o ou laitiiti, sa ou auai i se iunivesite tumaoti i le matou setete i Mekisiko. Sa lelei lava a‘u fegalegaleaiga ma faiaoga ma le faatonu o le iunivesite. O a‘u o se tagata aoga maoae ma sa ou maua ni togi lelei, ma sa ma fesootai pea ma le faatonu ina ua uma lo’u faailoga.
I se tasi aso i le 2010, sa ou talanoa ai i le faatonu. Sa ia tau mai ia te au e le o lava faiaoga o le iunivesite, ma sa ia ofoina mai ia te au se galuega ona o ou tomai ma aafiaga.
Sa ou lagonaina o se faamanuiaga ia te au. Sa ou le faigaluega i lena taimi, ma sa matou tauivi ia tau lava o le aai. O se miti mo a‘u le aoao atu ina ia mafai ona ou tausia lo’u toalua ma le fanau.
Sa ou fai atu, “ Ae a. O le a ou fiafia iai.”
Na ia fai mai, “Lelei tele! O le isi semesa e amata i le 15 aso. Matou te manaomia oe e faatumu le pepa lenei ma sau i le aoaoga faamasani ina ia mafai ona e amata galue.”
E Lei Faamoemoeina ma Lē Talafeagai
Ina ua ou alu e faatumu pepa o le galuega, sa vaai mai se isi faiaoga ia te au ma fesili poo le a le mea o le a ou tusia i le mea na fesili mai ai e uiga i la‘u lotu.
Sa ou fai atu, “O au o se tagata O Le Ekalesia a Iesu Keriso o le Au Paia o Aso e Gata Ai.”
Sa ia fai mai, “Ou te fautuaina lou lē tusia o lena mea. Afai e te faia, o le a latou teena vave lava lau pepa talosaga.”
Sa ou fesili ifo ia te au lava, E mafai faapefea lenei mea? O le seneturi lona luasefulu-tasi. E mafai faapefea ona avea le lotu ma se faafitauli? E le gata i lea, sa ou lagonaina e tatau ona ou faamaoni, o lea sa ou faia ai. Sa ou faamaeaina le pepa faigaluega ma imeli atu i ai. O le aso na sosoo ai, sa ou faatalitali ai mo faamatalaga i la‘u faasologa o le aoao atu. E leai se mea na tupu.
O le aso na sosoo ma lena, sa ou faafesootaia le faatonu ma fesili atu ia te ia e uiga i ai. Sa ia fai mai, “E te iloa, o le a le taunuu.”
Sa ou fesili atu, “Aisea, o le a le mea ua tupu?”
Sa ia fai mai ia te au, “O au mataupu aoaoina e le o faamalieina ai tulaga manaomia faaleaoaoga.”
Sa le talafeagai lenei mea ona o ia lava na ofoina mai ia te au le galuega i le amataga. Na mulimuli ane ta‘u mai e le pulega ia te au le mea moni: Ua ou le mauaina le galuega ona o la‘u tapuaiga.
Talu ai e leai se tulafono tusitusia po o se aiaiga faavae a le iunivesite e faatatau i talitonuga po o tapua’iga a le aufaigaluega, o lea sa le talafeagai ai faiga faaituau ia te au. Sa faigata tele mo a‘u lava ia, ae maise lava ona ou te le iloa pe o le a faapefea ona ou tausia lo’u aiga.
Liliu Atu i le Atua mo se Fesoasoani
O se tasi o mea na fesoasoani ia te au o le mafaufau lea i le ala na mafai ai e Nifae ona fau se vaa e aunoa ma le iloaina pe faapefea ona fai a o lei amataina (tagai i le 1 Nifae 17:7–55; 18:1–4). O le iloaina e mafai e le Atua ona taiala a‘u ma tuuina mai mea e manaomia e lo’u aiga na fesoasoani ia te a‘u e sao mai ai i lenei taimi faigata. A o ou mafaufau i lo‘u tulaga, sa fesoasoani mai le Tama Faalelagi ia te a’u ina ia ou le lagonaina lava le ita, ma sa ou filifili ai e tatau ona ou lafoaia. Sa Ia fesoasoani ia te au e taulai atu i lo‘u aiga ma maua se galuega ese o se failipoti, ma o se faamanuiaga sili lena.
Fesoasoani i Isi
Ua tuuina mai e Iesu Keriso ia i tatou le faataitaiga atoatoa. Nai lo le faatino ma le faailoga tagata i isi, e mafai ona tatou taulimaina isi e pei ona Ia faia.
I lo‘u valaauga o se faiaoga inisitituti, sa ou aoao atu ai talu ai nei e uiga i le faataoto i le Samaria Agalelei (tagai Luka 10:25–37). E mafai e le olaga ona aumaia le tiga e le tatau ai mo i tatou, ma o le tele o taimi tatou te ono lagona ai e pei o le tagata sa fasia ma gaoia, ua na’o le faamoemoe o le a fesoasoani mai se tasi ia i tatou. Ae i lenei faataoto, ua finagalo lo tatou Faaola, o Iesu Keriso, ia tatou avea atili e faapei o le Samaria po o le pule o le faletalimalo, o le na tausia i latou o e sa mafatia. O le mea lena na faia e le Faaola e ui lava i Lona lava teenaina tele ma le tiga. Sa ou iloaina nai lo le filifili e avea ma tagata ua afaina, e mafai ona ou filifili e galue i le matafaioi o le tagata faamalolo.
E mafai ona tatou taumafai uma ia avea ma ni tuaoi lelei, uo lelei, tagata lelei, ma ni tagatanuu lelei. O le a faigofie atu lena mea pe a tatou alolofa i o tatou tuaoi ma taumafai ia malamalama e faia e tagata ni mea sese. O nisi taimi o nei mea sese atonu e le lelei ia i tatou. Ae o le faaalia o le malamalama ma le faamagalo atu o le a fesoasoani tatou te alolofa ai i isi, lagolago i latou o loo manaomia le fesoasoani, ma suia le lalolagi.
E faamalosia i tatou e le Atua ina ia mafai ona tatou fesoasoani atu i isi pe a latou tauivi. Tau lava o lo tatou saunia ina ia mafai ona Ia aoao i tatou i le ala e fai ai.