E Na’o le Faatekinolosi: Talavou Matutua
O o Tatou Eseesega e Le Tatau ona Vaevaeina ai i Tatou
Sa ou tauivi e faatautaia la‘u sootaga ma se uo e le tutusa o ma talitonuga. Na faaali mai e le alofa o le Atua ia te au le ala.
Pe a oo mai i le faatautaiga o sootaga, o le tali aupito silisili na tuuina mai ia i tatou na oo mai i le tulaga o se Faaola: “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi” (Ioane 3:16; faaopoopo le faamamafa).
Soo se taimi lava ou te oo ai i le ogatotonu o se fesili e foliga mai e le mafaatusalia po o se feteenaiga le lelei, ou te liliu atu ia Iesu Keriso ma e faamafanafanaina au i le filemu ma le alofa lea e tafe mai mai ia te Ia. O Lona alofa, mo au, e faatumulia ai le gaogao.
O le alofa o Iesu Keriso o le tali lea na ou mauaina ina ua tau mai e se uo mamae ia te au ua ia laa ese mai le Ekalesia. A o lei faia lenei faaiuga, sa ia faasoa mai ana fesili faamaoni ia te au, ma fesili mai mo ou manatu ma talanoa mai ia te au e uiga i le tiga sa ia lagonaina. Sa moni lona tiga, o ana fesili sa ootia, ma sa ou lagonaina le faamamaluina e avea ma se taliga e faalogo. Peitai, o manatu sa ou faasoa atu e masani ona foliga mai e le’o oo atu ia te ia.
Ou te tuua a ma talanoaga ma lagona le mautinoa pe faapefea ona lagolagoina o ia. I se tasi o talanoaga faapitoa, sa ia fai mai ai ia te au se fesili faamaoni e uiga i se mea sa ou lagonaina le le mautonu i ai ma le lauina mai o lo’u le sa’o pe a faigata ona ou iloa pe faapefea ona tali atu. Ou te manatua lana tala, “E, e te le talitonu moni i lena mea. Ou te iloa e te le talitonu iai.”
Na sa’o lava o ia.
Ina ua uma lena fegalegaleaiga, sa ou lagonaina lo‘u see ese atu mai le faigauo. Sa ou le toafimalie i le talanoaina o mataupu faaleagaga ma ia ma lagona le le fiafia mai i o ma eseesega i le talitonuga ma le tau leai o ni a‘u tali atoatoa. Sa ou lagona le leai o se faamoemoe. Sa ou le toe fesili atu ia te ia e uiga i ana fesili o le talalelei ona o le fefe i le le mauaina o tali. Sa amata ona ou mafaufau sa eseese tele i maua i le avea ai ma ni uo.
Na alu ni nai masina ae faatoa ou iloa o le sailia o tali i ana (ma au) fesili, sa ou le iloa ai le tali sili ona taua: Ua faapea lava ona alofa mai o le Atua i le lalolagi—e alofa tele le Atua i la‘u uo.
I lana saunoaga i le konafesi aoao ia Oketopa 2020, sa faamanatu mai ai e Peresitene Dallin H. Oaks, Fesoasoani Muamua i le Au Peresitene Sili, “O aoaoga a le Faaola ia alolofa [i le tasi ma le isi] e faavae i luga o le mea moni e faapea, o tagata uma o ni fanau faapelepele a le Atua.” Sa ia faaiuina lana savali i se faamanatu e uiga i le vaaiga faapea o lenei malamalama ua tuuina mai: “O le iloaina o i tatou uma o fanau a le Atua ua tatou maua ai se vaaiga mamao faalelagi i le taua o isi tagata uma.”1
O na upu na taia ai au. Ioe, o lenei aoaoga o se upumoni faavae. Peitai, sa ou iloaina i la‘u tali atu i le see ese ai o la’u uo mai le Ekalesia, sa ou faataatia ese ai lenei upumoni.
O le iloaina o la‘u uo—e ui i o ma eseesega i le talitonuga—o se afafine faapelepele o le Atua na suia ai mea uma mo au.
Na mavae atu masina ao ou lagonaina le taumamao mai la’u uo, ae sa vave ona ou valaau atu ia te ia ina ua ou iloaina, ma sa ou faasoa atu le alofa o le Atua ia te ia. Sa mafai ona ou faamatalaina le mafuaaga na ou taumamao ese ai mai ia te ia. Sa ou faamatalaina le mafuaaga na tiga ai le lagona e pei o se mea e sili ona taua ia te au sa lei taulimaina ma le faaaloalo. O le mea e lelei ai, sa malamalama o ia, ma sa ma faatoese uma. Sa ma talanoa e uiga i le taua o la ma faigauo ma le ala na sili atu ai ona malosi o ma tulaga tutusa nai lo ma eseesega. Sa ou fai atu ia te ia sa ou fia feiloai ia te ia i le tulaga sa i ai o ia a o faatumauina pea ou tulaga faatonuina ma le faatuatua, ma sa ou faamoemoe e mafai ona faaauau pea ona ma lagolagoina le tasi ma le isi. Sa ou matuai faafetai lava ina ua ia ioe mai.
E pei lava ona sa iai Sorama o “se uo moni” ia Nifae (2 Nifae 1:30), ou te naunau ia avea ma se uo pele ia te ia, e ui i o ma eseesega.
Ou te faafetai mo le alofa o le Atua—faafetai ona e mama a‘ia’i, mamana tele, ma matua faateleina ia mafai ai ona faatasi ma i tatou i talanoaga faigata. Ou te faafetai ua avanoa le alofa o le Atua mo agaga o tagata uma. Ou te faafetai ona o le alofa o le Atua e mafai ai ona tatou alofa atoatoa i le tasi ma le isi. Oka se alofa paia, e le mafaamatalaina.