Na’o le Faatekinolosi

Alu i totonu o le Vaafaaola: Mauaina o le Saogalemu i le Ekalesia

Saunia e Brother Bradley R. Wilcox

Fesoasoani Lua i le Au Peresitene Aoao o Alii Talavou

Aua nei o tatou pei o i latou i luga o le Titanic o e sa mumusu e feosofi i totonu o se vaafaaola ona sa latou manatu e le mafai ona magoto le Titanic. .

Ata

atatusi o se tagata o loo faaaogaina tusitusiga paia faapei o se vaa

Ina ua alu le Titanic i lana malaga i le 1912, sa fai mai tagata o se vaa e le magoto. E le pei o isi vaa muamua, sa fausia vaega le vaa ma afai ae iai se pu, e na o le vaega lava lena o le a faatumulia i le vai ma e mafai lava ona tumau pea le opeopea o le vaa. Peitai, ina ua taia e le Titanic se poloka aisa i le Vasa Atelani matu, sa faapūpūina e le aisa le tele o vaega ma amata ona magoto ai le vaa.

Sa ta‘u atu e le kapeteni i tagata uma ia o atu i vaafaaola, ae o le toatele o pasese sa faatalitonuina e leai se tulaga lamatia moni. Sa latou manatu sa ova faaeteete lava le kapeteni ma o le a vave ona toe faasilasila mai ua foia le faafitauli ma mafai ona latou toe foi atu i o latou potu. Latou te lei vaai i se mafuaaga e tuua ai se vaa ua faamalamalamaina i moli matagofie ma le mea sa ta ai le faili. Ona lilifa ai lea o le vaa “lē magoto” i le isi itu ma le mata’utia ao amata ona alu ifo i lalo, ma ua mananao tagata uma e i ai i luga o vaafaaola.

Ae i lena taimi, ua tuai tele.¹

I le 2019 na folafola mai ai e nisi tagata, “E leai se mea e mafai ona taofia le tamaoaiga o le lalolagi. Ua maualalo le numera o tagata leai ni galuega i le salafa o le kelope nai lo se isi lava taimi.” Ona oo mai lea o se vairasi e matua itiiti lava ma e le mafai ona tatou vaai i ai, ma na suia ai mea uma. E le gata ina sa mama‘i le faitau miliona o tagata ma maliliu ai le toatele, ae e toatele foi tagata na leai ni galuegga. Sa i ai le fefe i soo se mea. E pei o le Titanic, sa lilifa le lalolagi, ae sa saogalemu ma malupuipuia pea tagata o Le Ekalesia a Iesu Keriso o le Au Paia o Aso e Gata Ai i totonu o le vaafaaola.

Ona tupu lea o se mea mataina. O le toatele o tagata sa vaavaai agai atu i le vaafaaola o le tatou Ekalesia. O konafesi aoao ia Aperila ma Oketopa i le 2020 na maimoaina e le toatele o tagata nai lo se isi lava taimi muamua—e faitau miliona tagata faaopoopo. I le taimi o le faama‘i tele, e toatele tagata na amata ona iloa sa latou manaomia le mea na ofoina atu e le vaafaaola: talitonuga i le Atua, talisapaia o tapuaiga faatulagaina, ma le faatuatua ia Iesu Keriso.

Talitonu i le Atua

O se suesuega lata mai faavaomalo na faailoa mai ai o le toatele o tagata talavou nai lo se isi lava taimi muamua, ua latou tautino atu i latou lava o ni tagata e le talitonu i le Atua. E manatu nei tagata o le talitonuga i le Atua e leai se eseesega pe a oo i le avea ma se tagata lelei, amio mama, ma faamaoni.² O le luitau lenei: Ua tuuina mai e le Atua ia i tatou le saolotoga e talitonu ai ia te Ia pe leai, ae e le sao le faapea atu e leai lava se eseesega. O lo tatou talitonuga i le Atua e aafia ai le ala tatou te vaai ai ia i tatou lava ma le auala tatou te vaai ma taulima ai isi.

Ua faaalia i suesuega e faapea i taimi o faigata ma faalavelave, e sili atu le taulimaina e tagata talitonu nai lo tagata e le talitonu.³ E sili atu le fiafia o tagata talitonu ma sili atu ona naunau e foai atu i faalapotopotoga agalofa.⁴ I le taimi o le faama‘i tele, sa tauivi tagata e saili le filemu ma le uiga i se taimi o le nofoesea tele ma le faalavelaveina. Sa lagona e tagata talitonu se faamoemoe ma se talitonuga e lei lagonaina e isi.^{isi. 5}

O Brett G. Scharffs o se polofesa o le tulafono i le Iunivesite o Polika Iaga. Ina ua iloa e nisi o ana paaga i isi iunivesite o ia o se tagata talitonu faamaoni, o nisi taimi latou te fesili ai, “Ae faapefea pe afai e te sese ma e le o i ai se Atua?”

Na ia tali atu: “Ua ou naunau e sese i lenei ala pe afai o lona uiga o le talitonu ma le taulimaina o isi e pei i latou o fanau a le Atua, na foafoaina i Lona faatusa faatasi ai ma le gafatia e avea ai ma tagata e pei o se Atua ua atoatoa ma atoatoa le alofa. E sili ai ia te au le faia o le mea sese o le faatupuina o uiga ma le alofa i se atulaulau e leai se uiga ma le popole i ai nai lo le isi itu. Ma le isi, ou te manatu e le sese i tatou.⁶

Tulaga Faatauaina o Talitonuga Faatulagaina

Ata

vaega o talavou matutua o faapotopoto mo se gaoioiga

E toatele tagata e talitonu i le Atua ae le’o ni tapuaiga faatulagaina. Latou te fai mai, “Ou te faaleagaga, ae le o se tapuaiga.” E masani lava o lona uiga latou te faailoa atu le i ai o le Atua ae le mananao e fesili atu mo Sona finagalo mo i latou, tuuina mai ia i latou se poloaiga, pe faamomoe latou te faia ni suiga.

Na aoao mai Elder Jeffrey R. Holland o le Korama a Aposetolo e Toasefululua e faapea o le faaleagaga—o se aafiaga patino—atonu o le pau lea o le mea tatou te manaomia pe afai tatou te nonofo na o i tatou i luga o tumutumu mauga, ae o loo tatou nonofo i aiga, nuu, faalapotopotoga. O le mafuaaga lena tatou te manaomia ai tapuaiga—o le faiga faavaega o le faaleagaga.⁷

E faigofie ona nofo toatasi i luga o se tumutumu mauga ma fai atu, “Ou te alofa i tagata uma.” Taumafai e lagona le auala lava lea e tasi pe a e tuai mo le galuega ona o le avetaavale o le taavale o loo i ou luma o loo alu lemu. E te manao e faaee le pu ma ee atu i le avetaavale. I lena taimi, e te manaomia tulaga masani ma tulaga faatonuina o tapuaiga e fesoasoani ia te oe e aumai ai ni tulaga lelei mai tumutumu mauga e pei o le alofa i le taimi tonu e le alofagia ai se tasi. O le mea lena e fesoasoani ai tapuaiga ia i tatou e fai.

O nisi tagata e le manaomia se tapuaiga faatulagaina lelei, ae latou te manaomia ni a‘oga faatulagaina, aai, faleoloa, malaevaalele, ma falemai. Latou te vaaia faamanuiaga o le o atu i se falemai faatulagaina, lea e i ai tulafono po o faamoemoega. Tatou te vaaia faamanuiaga lava ia i totonu o la tatou Ekalesia faatulagaina.

O le avea ai ma se vaega o lenei tapuaiga faatulagaina e faamanuiaina ai i tatou ma i latou tatou te alolofa i ai i vaega uma o o tatou olaga. Ona ua faatulagaina le Ekalesia, e mafai ona tatou tausia faatasi isi ma le mataalia sili atu nai lo le mea e mafai ona tatou faia taitoatasi. Na saunoa mai Elder Gerrit W. Gong o le Korama a Aposetolo e Toasefululua e faapea, i se vaega o le faama‘i pipisi i le lalolagi i le 2020, ua uma ona auai le Ekalesia i le silia ma le 1,000 galuega fesoasoani mo fesoasoaniga alofa i le silia ma le 150 atunuu. Sa tatou tuuina atu meaai ma isi mea e manaomia e tausia ai le faitau miliona o e le tagolima. E leai se tasi o i tatou na mafai ona faia lena mea na o i tatou lava, ae sa tatou faia faatasi ona o loo i ai sa tatou tapuaiga faatulagaina.⁸

Ia Faatuatua ia Iesu Keriso

O nisi tagata e talitonu i le Atua ma auai i tapuaiga faatulagaina, ae e leai so latou faatuatuaga ia Iesu Keriso. Na lipotia mai e Elder Neil L. Andersen o le Korama a Aposetolo e Toasefululua i le konafesi aoao ia Oketopa 2020 o le Ekalesia e faapea, i le fiasefulu tausaga a sau, ua valoia le toatele atu e o le a tuua le Faakerisiano nai lo le ulufale atu i ai.⁹

O se mea masani le vaai atu i faasalalauga faaagafesootai e tauleagaina ai Keriso ma Kerisiano. Tatou te liliu atu ea o tatou tua i le Faaola ona o le mulimuli ia te Ia ua le o toe lauiloa? Pe o le a tatou mumusu e sisi ae le fu‘a Kerisiano aua e avea ai i tatou ma taulaiga? Ou te le manatu i ai.

O se tasi o suesuega na faaalia ai e faapea, a o sasao le faama‘i pipisi o le KOVITI-19 i le taimi o le taumafanafana o le 2020, o le 12 pasene o aiga e le o ni Au Paia o Aso e Gata Ai na faateleina a latou faiga faalelotu faaleaiga e faatusatusa i le 62 pasene o aiga o le Au Paia o Aso e Gata Ai o e na faateleina a latou faiga faalelotu faaleaiga.¹⁰ Ua iloa e nei aiga o manatu o tagata e le suia ai le upumoni. O Iesu Keriso o le Faaola o le lalolagi. O Ia o le Kapeteni o le vaafaaola. Na Ia fetalai, “Amuia outou pe a latou upu leaga, ma faasaua ia te outou, ma latou tuuaiina pepelo outou i mea leaga uma ona o a’u” (Mataio 5:11).

Fesoasoani i Isi ia Maua le Vaafaaola

Ina ua amata ona malaga atu ni nai pasese i vaafaaola i luga o le Titanic, sa manatu isi e valea i latou. O le mea moni, o uluai vaafaaola na muamua o ese sa afa afa. Peitai, ina ua lilifa le Titanic, sa vaaia e tagata le taua o le vaafaaola. Pe a lilifa le lalolagi, o nisi tagata e amata ona mafaufau atili e uiga i le Atua, iloa le taua o tapuaiga faatulagaina, ma faateleina lo latou faatuatua ia Iesu Keriso.

E le o le taimi lenei e toe foi atu ai i le Titanic. O le taimi lenei e tumau ai i le vaafaaola—le Ekalesia a Iesu Keriso—ma aapa atu e fesoasoani i isi ia maua mea ua latou misia.