Lava ʻo Maʻu Fakakomipiuta e Tohi Tuʻutuʻuni Fakakātoá

ʻOku hokohoko atu ʻa e ngāue ki hono toe fakaleleiʻi e Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea ʻe vavé ni hono tuku atu e liliu ʻo e naunau ne filifili ʻi ha ngaahi lea fakafonua tefito ʻe 21.

Naʻe pulusi fakakomipiuta e tohi tuʻutuʻuni foʻoú ʻi he lea faka-Pilitāniá ʻi Fēpueli ʻo e 2020, pea toe tuku mai ha ngaahi naunau ne toe fakaleleiʻi ʻi Māʻasi mo Siulai. ʻI he taimi ní, kuo toe hiki mo pulusi ha vahe ʻe 16 ʻi he vahe ʻe 38 ʻo e tohí. ‘E toe fakaleleiʻi e ngaahi vahe ʻoku toé ʻi he ngaahi māhina ka hoko maí, kau ai e ngaahi fakalelei ke fakanounou mo fakafaingofuaʻi ki hono laú.

Hili pē ʻa e konifelenisi lahi ʻo ʻOkatopa 2020, ʻe kamata hono pulusi e vahe 32, “Fakatomalá mo e Fakataha Alēlea ki he Tuʻunga Memipasipi ʻi he Siasí,” mo e ngaahi konga ʻo e konga 38.6, “Ngaahi Tuʻutuʻuni ʻi he Ngaahi Meʻa Fakaeangamaʻá” (ʻa ia ʻoku poupou ki he vahe 32), ki ha ngaahi lea fakafonua ʻe 21 (makehe mei he lea faka-Pilitāniá). ‘Oku lolotonga liliu ha ngaahi vahe lahi ange mo teuteu ke pulusi ʻi he ngaahi māhina ka hoko maí, pea ʻe faifai pē pea maʻu kakato ia ʻi he lea fakafonua ʻe 35.

Neongo ‘oku lava ʻo maʻu e tohi tuʻutuʻuní ʻi he uepisaiti ʻo e Siasí mo e app Gospel Library, ka ʻoku fakatautautefito ʻa e naunaú maʻá e kau taki ʻo e Siasí. ʻOku fetongi ʻe he tohi tuʻutuʻuni ne fakaleleiʻí ʻa e Tohi Tuʻutuʻuni Fika 1 (maʻá e kau palesiteni fakasiteikí mo e kau pīsopé) mo e Tohi Tuʻutuʻuni Fika 2 (maʻá e kau taki kotoa pē) pea fakatahaʻi e fakamatala ʻi he tohi tuʻutuʻuní ki ha tohi pē ʻe taha.

Ko e puipuituʻa ki he fokotuʻutuʻu ʻo e tohi tuʻutuʻuni foʻoú ko e ngāue ʻo e fakamoʻuí mo e hākeakiʻí, ʻa ia ʻoku kau ai ha ngaahi tafaʻaki ʻe fā ke tokanga taha ki ai ʻi heʻetau haʻu kia Kalaisi pea tokoni ʻi he ngāue ʻa e ʻOtuá:

1. Ko hono moʻui ʻaki e ongoongolelei ʻo Sīsū Kalaisí

2. Ko hono tokangaekina ʻa kinautolu ʻoku faingataʻaʻiá

3. Ko hono fakaafeʻi ʻo e kakaí kotoa ke nau maʻu e ongoongoleleí

4. Ko hono fakatahaʻi ʻo e ngaahi fāmilí ke taʻengatá

‘Oku fakataumuʻa e ngaahi vahé ke tokoni ki he kau taki ʻi he funga ʻo e māmaní ke nau ngāue anga faka-Kalaisi ʻi hono fakahoko e ngaahi polokalama, ngaahi tuʻutuʻuni, mo e ngaahi founga ngāue kehekehe ʻa e Siasí, pea fakafenāpasi mo e ngaahi tūkunga fakalotofonuá he taimi ʻoku fiemaʻu aí.

‘Oku hanga ʻe he pulusi fakakomipiuta ʻo e tohi tuʻutuʻuní ʻo fakaʻatā ke fakahoko e ngaahi liliú mo e ngaahi fakaleleí ʻi he tupulaki ʻa e Siasí pea mo hono liliu ʻo e ngaahi tuʻutuʻuní. ʻOku tokoni e ngaahi tefitoʻi moʻoni ʻo e fakafaingofuá mo e fakafenāpasí ne kau ʻi he tohi tuʻutuʻuní ke fakaʻaongaʻi lelei ʻe he kau takí mo e kāingalotú ʻa e ngaahi tefitoʻi moʻoní mo e ngaahi polokalama ʻa e Siasí ʻi ha faʻahinga tokolahi pē ʻo ha haʻofanga pea ʻi ha Kāingalotu kehekehe fakaemāmani lahi.