ʻEletā Dean M. Davies
Fitungofulu Taki Māʻolunga
Lolotonga e fakaʻuli foki ʻa ʻEletā Dean M. Davies ki ʻapi mei he ngāué ʻi he 1989, naʻe maʻu ia ʻe ha mofuike ʻi Seni Felenisisikou, Kalefōnia, USA, ʻa ia naʻe luluʻi lahi ai ʻene kaá. ʻI heʻene fakalaulauloto kimui ange ki he maumau naʻe hoko he feituʻú, naʻe fakamanatu kiate ia e mahuʻinga hono langa ʻetau moʻuí ʻi ha fakavaʻe paú.
Naʻá ne pehē, “He ʻikai ha taha ʻo kitautolu te tau langa ʻi he ʻilopau hotau ʻapí, ngāueʻangá pe ngaahi fale toputapu ʻoku fai ai e lotú ʻi ha ʻoneʻone, makamaka mo e veve pe ʻikai tonu hono palaní mo e naunaú. Tuku ke tau tali e fakaafe ʻa e Fakamoʻuí ke haʻu kiate Iá. Tuku ke tau langa ʻetau moʻuí ʻi ha fakavaʻe ʻoku malu mo paú.”1
Ko ʻEletā Davies, ʻa ia naʻe ngāue ʻi he Kau Pīsopeliki Pulé talu mei ʻEpeleli 2012, naʻe hikinimaʻi ia ko ha Fitungofulu Taki Māʻolunga ʻi he ʻaho 3 ʻo ʻOkatopa 2020. Naʻe hoko ʻa ʻEletā Teivisi ko e Tokoni Ua kia Pīsope Gary E. Stevenson ʻi he Kau Pīsopeliki Pulé kae ʻoua kuo hikinimaʻi ʻa Pīsope Sitīvenisoni ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 3 ʻo ʻOkatopa 2015. Na‘e hikinimaʻi leva ʻa ʻEletā Davies ko e Tokoni ʻUluaki kia Pīsope Gérald Caussé, ʻa ia naʻá ne fetongi ʻa ʻEletā Sitīvenisoni ko e Pīsope Pule foʻoú.
Naʻe fanauʻi ʻa Dean Myron Davies ʻi Sōleki Siti, ʻIutā, USA, ʻi he 1951. Hili ʻene hoko ko ha faifekau taimi kakato ʻi he Misiona Uruguay/Paraguay, naʻá ne mali mo Taiala Sēmisi ʻi he Temipale Sōlekí, ʻi he 1973. ʻOku ʻi ai haʻana fānau ʻe toko 5 mo e makapuna ʻe toko 17.
ʻI Siulai ʻo e 1995, naʻá ne kamata ngāue ʻi he Siasí, ʻo ne hoko ko e talēkita pule ʻo e Potungāue Ngaahi Ngāue Makehé, peá ne tokangaʻi e kelekele ki he taumuʻa makehé, palani ʻo e temipalé, mo e langa ʻo e temipalé. Kimuʻa pea ngāue ʻa ʻEletā Davies ki he Siasí, naʻá ne ngāue ʻi he High Industries, Inc., ʻo Lanisesitā, Penisilivēnia, USA, mo e Bechtel Investments, Inc., ʻi Seni Felenisisikoú. Naʻe maʻu hono mataʻitohi BA ʻi he ʻekonomika fakangoué mei he ʻUnivēsiti Pilikihami ʻIongí pea fakakakato ha ngaahi polokalama ako māʻolunga ange ʻi he ʻUnivēsiti Sitenifōtí mo e ʻUnivēsiti Tokelau-Hihifó.
Kuo hoko ʻa Pīsope Teivisi ko e palesiteni ʻo e Misiona Pueto Liko Seni Huani, tokoni palesiteni fakamisiona, palesiteni fakasiteiki, tokoni palesiteni fakasiteiki, sekelitali pule fakasiteiki, aleaʻanga māʻolunga, pea ngāue ʻi ha kau pīsopeliki lahi.