Magdungan sa Pag-uswag
Ang managsoong Clarkson napanalanginan pinaagi sa pagserbisyo sa ilang mga korum sa priesthood ug sa pagbasa sa Basahon ni Mormon.
Mga litrato pinaagi ni Richard M. Romney
Daghang nindot nga mga kausaban miabut sa Simbahan salamat sa inspirasyon nga nadawat ni Presidente Russell M. Nelson. Duha niini nga mga kausaban adunay direkta nga epekto diha sa managsoong Clarkson gikan sa California, USA:
-
Ang batan-ong mga lalaki mahimo na karong ordinahan ngadto sa office sa pagkapari inig Enero sa tuig nga sila mag-edad na og 12, 14 ug 16.
-
Ang kabatan-onan angayan nga makaangkon og limitado og gamit nga rekomend sa templo sugod sa Enero sa tuig nga sila mag-edad og 12.
Alang sa managsoong Mateo (15), Andrew (13) ug Isaac (11), kini nga mga kausaban nagdala og bag-ong mga oportunidad sa pagserbisyo ug pag-uswag diha sa ebanghelyo ni Jesukristo—dili lamang sa ilang kaugalingon apan kanilang tanan.
Ang Adlaw sa mga Sinugdanan
Niadtong Enero 2019, sila si Matthew, Andrew, ug Isaac nakasinati sa adlaw sa mga sinugdanan. Miingon si Andrew: “Si Matthew nahimong usa ka priest, ako nahimong usa ka teacher, ug si Isaac nahimong usa ka deacon sa samang higayon. Walay usa namo nga anaa sa mga edad diin kami nag-uswag kaniadto.”
“Sa akong unang adlaw nga nahimong usa ka priest,” miingon si Matthew, “Akong gipikaspikas ang pan alang sa sakramento ug mipanalangin niini. Gikulbaan kog gamay. Ang akong mga kamot nagkurog og gamay sa dihang akong gilitok ang pag-ampo, apan kini talagsaon kaayo.”
Bag-o sa Aaronic nga Pagkapari, si Isaac karon adunay kahigayunan nga makat-on gikan sa iyang mga magulang nga igsoon. “Nindot kadto tungod kay ako uban sa akong mga igsoon ug pipila sa ilang mga higala,” miingon si Isaac. “Gibati nako ang Espiritu sa dihang akong gipaambit ang sakramento sa unang higayon.”
“Akong Gibunyagan ang Akong Igsoong Lalaki!”
Uban sa pagdawat sa Aaronic nga Pagkapari ug pagpaambit sa sakramento, si Isaac mitambong usab sa templo aron mopahigayon og mga bunyag. Ang iyang amahan mibunyag kaniya pag-una, apan miabut dayon ang surprisa:
“Ako ang nakabunyag sa akong igsoong lalaki!” Miingon si Matthew.
“Wala ko magdahum nga si Matthew mobunyag kanako,” miingon si Isaac. “Apan siya usa na karon ka priest, mao nga siya makahimo. Nindot kaayo kadto nga kasinatian. Akong mabati ang Espiritu Santo.”
Matag Buntag sa dili pa ang Seminary
Sila si Matthew, Andrew, ug Isaac dili lamang ang mga igsoong lalaki sa pamilyang Clarkson. Aduna pay upat: Levi (9), Eli (7), Sam (4), ug Titus (2), ug usa ka hapit na matawo nga bata.
Sa dihang si Presidente Nelson midapit sa mga babaye sa Simbahan niadtong Oktubre 2018 nga kinatibuk-ang komperensya nga mobasa sa Basahon ni Mormon sa dili pa mahuman ang tuig, sila si Matthew, Andrew, ug Isaac, uban sa ilang amahan ug mga manghud nga lalaki, nakahukom sa pagtanyag sa ilang suporta sa Mama. “Mobasa mi uban nimo!” miingon sila. Matag buntag sa dili pa ang seminary, mangmata sila ug magbasa og dungan.
Makapausab sa Kinabuhi nga Hagit
“Sa dihang gihimo namo kini nga hagit, naghunahuna ko nga magkinahanglan kini og daghang panahon,” miingon si Andrew. “Nabalaka ko nga wala koy igong panahon sa pagbuhat sa tanan nga akong gustong buhaton, sama sa pagpatukar og sista o pagkuyog sa akong mga higala. Apan ako nakaamgo nga dili kana sama niana. Sa pagsige nako og basa sa Basahon ni Mormon, mas duna na hinoon koy panahon. Nakaamgo ko nga kon ako magpadayon sa pagbasa sa mga kasulatan kutob sa mahimo, ang akong kinabuhi mabalanse. Mas duna koy panahon kada adlaw.”
Si Matthew naglisud sa dihang ang pamilya nagsugod sa pagbasa kada buntag. Miingon siya, “Dili kaayo ko maayo sa eskwelahan. Naglisud ko sa akong personal nga pagtuon sa kasulatan ug sa akong relasyon uban sa Langitnong Amahan, ug gitago nako kining tanan sa akong kaugalingon. Wala nako kini hisguti uban sa akong mga ginikanan.”
Hinoon, samtang si Matthew migahin og mas daghan panahon sa pagbasa sa Basahon ni Mormon, ang ebanghelyo nahimo na nga unang prayoridad sa iyang kinabuhi. Mas naningkamot usab siya sa eskwelahan. Nagtrabaho siya pag-ayo ug ang iyang mga grado mitaas.
“Nakaamgo usab ako kon unsa ka dako sa gugma sa Langitnong Amahan ug sa akong mga ginikanan nako ug kon unsa ka dako ang ilang tabang nako. Ug ako adunay mas dako nga pagpamatuod ni Jesukristo. Siya mitabang nako sa pagbuntog og dili maayo nga mga kinaiya ug mitabang nako nga ang akong kinabuhi magpaingon sa sakto nga direksyon. Malipayon kaayo ko nga among gihimo ang hagit ni Presidente Nelson isip pamilya. Nakapausab kini sa akong kinabuhi.”
“Daghan kaayo ang nausab!”
Ang pagdawat sa imbitasyon ni Presidente Nelson nakapalig-on usab sa pagpamatuod ni Isaac. “Gilinginan namo ang mga pulong nga Dios, Ginoo, Manunubos, Manluluwas, ug Kristo matag higayon nga makita namo kini,” miingon siya. “Sa adlaw nga kami nahuman, akong gipakli ang Basahon ni Mormon ug nakita ang tanang mga pulong nga akong gilinginan. Naghunahuna ko, ‘Daghan kaayo!’ Wala nako makamatikod kon pila na kabuok. Gibati nako nga mas espirituhanon nga magbasa sa Basahon ni Mormon. Nalipay ko nga gihimo namo kini.”
Ang Kinabuhi Mas Maayo Kaayo
Sila si Matthew, Andrew, ug Isaac natingala nga ang ilang pamilya nakahuman sa Basahon ni Mormon sa duha ka bulan lamang. “Sa kasagaran moabut kini og usa ka tuig namo,” miingon si Isaac. Sila tanan, nakadiskobre sa mga panalangin sa pagsunod sa imbitasyon sa propeta.
“Kon buhaton ninyo unsa ang inyong angay nga buhaton,” miingon si Andrew, “sama sa paglig-on sa relasyon uban sa Langitnong Amahan pinaagi sa pag-ampo, pagtuon sa kasulatan, ug pagpabilin nga aktibo sa Simbahan, ang kinabuhi mas maayo kaayo.”
Kining tulo ka managsoong lalaki nakatabang sa usag usa nga molambo diha sa ebanghelyo. Sila misunod sa propeta, kinsa mitawag sa mga miyembro “sa pagdugang sa ilang pagtuo diha sa atong Ginoo nga si Jesukristo ug sa Iyang Pag-ula, sa … [paghimo] ug [pagtuman] sa ilang mga pakigsaad uban sa Dios, ug sa pagpalig-on … sa ilang mga pamilya.”1