Digital Lamang: Mga Young Adult
Ang Espirituhanong Hypoxia [Kakulang sa Positibo nga Espirituhanong mga Impluwensya] ug ang Importansya sa Buotang mga Higala
Ang tagsulat nagpuyo sa Habagatang Australia, Australia.
Sa tibuok nakong pagkabatan-on, mitambong ko og daghang mga fireside. Moangkon ko, wala ko kahinumdom sa tanan, apan usa ka pakigpulong ang nagpabilin gayud nako. Usa sa akong mga lider, kinsa kaniadto usa ka piloto sa Air Force, mipakigbahin sa iyang kasinatian mahitungod sa hypoxia—ang kakulang og oxygen diha sa lawas sa tawo, nga makaapekto sa ilang utok.
Ang mga lider mipasabut nga ang piloto sa Air Force namiligro nga mahimong hypoxic, mao nga sila moagi og pagbansay diin sila makasinati niini. Sa usa ka sesyon sa pagbansay, gisugo siya sa paghubo sa iyang oxygen mask ug dayon ibutang kini og balik kon gibati niya nga mahimong hypoxic. Apan wala gayud niya ibalik pagbutang ang iyang mask—ang iyang mga higala maoy mihimo niini alang kaniya.
Human sa pagbansay, ang iyang mga higala mipasabut nga sila nagbantay kaniya nga nag-antus sa tanang mga timailhan sa hypoxia—dili maayong paghimo og desisyon, nagyabag nga sinultihan, ug kalibug. Siya miingon nga siya wala mobati og bisan unsa niadto nga mga sintoma ug naghunahuna nga siya naglihok ra nga normal, bisan og ang iyang mga higala nakakita nga siya anaa sa kakuyaw.
Usahay sa kinabuhi, makita nato ang atong kaugalingon nga nagpadulong sa sayop nga dalan nga wala makahibalo nga ang unsay atong gibuhat dili sakto. Kita mahimong mohimo og dili maayo nga mga desisyon, molihok sa lahi nga paagi, ug hingpit nga naglibug sa kinabuhi—sama sa hypoxia. Ang dalan padulong sa kinabuhing dayon mao ang usa ka dalan nga sayon mahilayo gikan niini kon ang tanan sa imong palibut dili usab maningkamot (tan-awa sa 1 Nephi 8:23, 28; 3 Nephi 14:13–14). Mao kini ang panahon nga ang dili maayong mga higala mahimong makadaot sa inyong hypoxic nga kahimtang. Siyempre, ang dili maayong mga higala wala magpasabut nga dili maayong mga tawo—naghisgot ko mahitungod sa mga higala kinsa dili mobutang og balik sa imong oxygen mask ug kinsa mao gani ang posibling modala kanimo ngadto sa kahimtang sa espirituhanong kakuyaw.
Nagtubo sa Australia, ako nakig-uban sa nagkalain-laing mga higala, sulod ug gawas sa Simbahan—ang uban dili positibong mga impluwensya. Nakasinati ko og mga sitwasyon diin nakasiguro ko nga ako magpabilin sa higpit ug pig-ot nga dalan, apan tungod sa impluwensya sa pipila ka dili maayong mga higala, ang ilang mga lihok nahimong normal alang kanako ug nagsugod ko sa pagsunod niini.
Unsay nakatabang nako nga makasabut sa akong pagbati mao ang pagpaminaw sa akong mga ginikanan ug mga lider sa Simbahan. Nasayud ko nga gusto nila ang labing maayo alang sa akong kinabuhi ug nga sila makakita sa mas maayo kay kanako nga ako nahulog ngadto sa kahimtang sa espirituhanong hypoxia. Naningkamot ko nga kanunay mobarug sa balaang mga dapit. Mitambong ko sa mga kalihokan sa young adult ug sa simbahan. Bisan kon ako migahin og daghang panahon sa unibersidad ug sa trabaho, akong nakita ang maayong mga higala. Nakaamigo ko og daghan kinsa dili mga miyembro sa Simbahan, apan kinsa mopili sa matarung ug talagsaong mga ehemplo. Pananglitan, akong nahimamat ang usa sa akong labing suod nga higala sa high school. Siya kanunay naningkamot nga mahimong mas maayo nga tawo, ug bisan tuod dili siya miyembro, mitabang siya kanako sa pag-ila kon ako wala magpili sa matarung nga dalan alang sa akong kaugalingon. Ug kana mao ang buhaton sa usa ka maayo kaayo nga higala.
Sa Proverbio 13:20 kini mabasa, “Lakat uban sa tawong manggialamon, ug ikaw mahimong manggialamon: apan ang kauban sa mga buang magaantus tungod niana.” Ako uyon gayud—ang mga higala nga naglibut kanimo mao ang mga tawo nga maoy labi nimong sundon sa katapusan. Ingon nga wala ko makaamgo, dili nimo mamatikdan kon ikaw nahimo nang hypoxic sa espirituhanong paagi ug nagsunod sa sayop nga dalan o sayop nga mga tawo. Importante ang pagpaminaw niadtong kinsa nahigugma kanimo ug sa pagbutang sa imong kaugalingon sa mga lugar nga modapit sa maayong tawo ug sa Espiritu. Sa dihang gihimo nako kini nga mga butang, akong nakaplagan ang akong kaugalingon nga gilibutan sa mas maayong mga higala kada adlaw—mga higala kinsa motabang kanako sa akong matarung nga mga desisyon.
Bisan asa pa ikaw sa kalibutan, makakita ka og mga higala kinsa kanunay mobutang og balik sa imong oxygen mask kon ikaw nanlimbasog sa pagbuhat niini sa imong kaugalingon. Makakita ka og mga higala nga makatabang nimo nga makagawas sa kahimtang nga hypoxic sa espirituhanon nga paagi nga imong nahimutangan. Ang inyong mga higala adunay dakong epekto sa imong kinabuhi kay sa imong mahunahuna, mao nga pangita og kauban uban niadtong kinsa nagpili sa matarung. Gibuhat nako, ug kini nakapausab kanako ug sa akong umaabut nga kahangturan.